Carito Garah Kudo Written by Viveri Yudi Thursday, 30 July 2009

Carito garah Kudo tajadi di Republik Antahbarantah. Nagarinyo banamo Matipucuak, talatak di salingka daerah Matiaka, dalam wilayah Matiraso. Nyampang tasuo namo jo tampek nan samo itu bukan ambo singajo. Mari kito suruikan ati ka nan elok, kito ambiak sado nan paguno. Nan elok diambiak jo mupapakaik, nan Buruak buang jo etongan. Baitu caro urang minang. Ambo takuakan kapalo nan aso, disusun jari nan sapuluah, maaf jo rila ambo pintak ka sidang nan mambaco. Kapado Allah sajo kita basarah diri. Salam taunjuak dari ambo, Udo jo Kudo, iyo kaganti bajawek tangan.

Pambukak Kato Haiiihh..! Kancang snek Gumarang! Lah tinggi matoari ko mah... Jan pamaleh juo, sorak Udin Kirun mahalau Kudo di tangah nan rami. oto jo onda bapacu badugo kancang. Jan kareh bana manyentak tali les, Do. Sakik bibia den!" saringik Kudo manahan sakik. Mantang-mantang tali kandali sadang diawak, nan kalamak diawak se maelo tali. Haiiihh..! Ck ck ck... Usah waang banyak curito. Awak indak samo. Wakden Kudo, waang urang..! Eh.., sasek... Mungkasuik den... aden manusia, waang binatang! Usah Udo talonsong bana. Banyak juo manusia nan labiah randah dari kami. Sabutan lai tinggi, mulia, tapi banyak nan marandahan martabaiknyo surang. Mungaksuik Ang? He.., he... Lai indak malu Udo kalau den jalehan..? kecek Kudo Bunduang..! Jan banyak cik minyak jo lai. Den lambuik jo palacuik ko ha? Udin nan dipanggia Udo manggaregak Kudo jo palacuik. Eiiit... Usah balanteh angan bana jo palacuik nan di tangan. Sasek malambuik ujuang palacuik tibo di mato. Bile kasudahannyo. Buto salamonyo. Mandanga jawek Kudo, Udo aniang saribu bahaso. Saabih bajawek kato, baliak lantun ka dirinyo juo. Bak manapuak aia di dulang, mancabiak baju di dado, kato rang tuo.Tibo-tibo tadanga bunyi nan biaso

di talingo Udo, Dhuuutt! Kurang aja waang! Induak samang dibusuakan juo... Phuihh... Busuak! He.., he.. Manga takuik jo baun busuak nan kalua di jalannyo? Kok kaluanyo di talingo, baru bedo. kama lo bakelok kato Ang tu, Kudo? pinteh UdoSi Gumarang taruih baturo-turo, Banyak karajo busuak manusia nan labiah manyeso. Diagiah kuaso nak maniayo. Dapek palacuik, nak malambuik. Kacak langan lah bak langan, kacak batih lah bak batih, dunia lah raso dalam ganggaman. Lai tibo nan patuik, apo salahnyo? sanggah Udo. Patuik dipandang jo raso, bukan jo raso bakuaso. Kabanaran indak buliah bak kato ati awak sajo, mamanggakan pangkek jo jabatan pulo. Kan baitu Udo bakato, baleh Kudo. Sakutiko Udin Kirun tadiam. Jantuang atinyo bak raso dicucuak-cucuak mato jarum. Nurani manusianyo manarimo, tapi uju jo sombong dalam dirinyo manulak kabanaran. Udo acok lupo jo pangajaran agamo, walau acok malagu-lagukan ayaik Alquran. paluah dingin mailia di sabatang tubuahnyo, mukonyo pucek. Tibo-tibo Udin basorak sakuek tanago, Haiiihh.., haiiihh..! Larilah Gumarang! Bialah wak tampuah jalan baliku nan panjang, asa lai basuo jo padang nan lapang. molah kito tarajang sagalo kamungkaran, jan takuik katasingguang puncak kada urang. Haiiihh..! Hihiieeeh.. Makonyo, kada jan dipaliharo. Nak jan tasingguang dek urang. He.., he.., gumam Kudo sambia balari.