THUKLAI KUM 100 CIN POAI 1.

Ih Pianna Thuklai Khua: Thuklai khua min sia, khua dangte taw kibang ngawl a, ih pianna ih PU min hi. Mikangte min phuak bangin phuak leang bang, ih khua bup ii innkuan min [family name] sia Thuklai hi tu hi. 2. A Nuam mama Khua: Dr. Vum Ko Hau in, leitung mun tam mama a thetna sungpan, ih Thuklai khua bangin khuahun nuam ka he bua hi ci hi. Khuahun sia ni suakpal, nguazu le zong theau kik paih a, nitaang kik paih siuseau, vot lei ngawl sa lei ngawl a, a nuam bek khat hi. 3. Thupha Saang Khua: Ih khua taw kiphu kilawm ngawlin, Pathian in ih khua thupha tam mama hong pia cisia ih heak hi. (a) Pilna: Khamtung bup ah taan 10 sang kinga phit a, Zato, Laito le Thikkhau zum le Palik zum kinga hi. SHS kinei ahikom, pilna kisin tek a, MBBS aa kipan BA, BSc, Nurse ong sia, Khamtung khuano theampo sungah degree nga tam bel kihi ngei hi. (b) Thing Nga: Lingmaw le seak sia Pumva, Phaipi le Kalzang ah nasia pian mama ngei a, pasal khatin Lingmaw sia ui zongin du ngawl cileang, bang law thong tu ziam? ci ngei liang hi. 4. Ih Thupha teng Koisung Theng Ziam? (a) Nu le Pa Kibaan Ngawl: Ih pu ih pa le ih ute in thupha saang mama kale, a naute in amate bak lang zong kibaan nawn ngawl hi... ih thing ngate zong nidang bangin piang nawn ngawl hi... (b) Ngui Thei Kham Thei: Khangnote ngui thei kham thei hangin alal a thi kitam mama hi. Hausa te in zuzuakte khaam zo ngawl a, khangnote ngual baan nawn ngawl hi. 5. Kum 100 Poai Man Zok Ciang A Bangteng Seam Leang Pha Tu Ziam? (a) Kisikikna le Pianthakna: [Salvation] Piangthak ngawl lai theampo mawna kisik kikin Topa Jesu saang tu a, piangthak sate zong, khialna kisikik tu, athiangtho Tapidaw nuntak zia taw ih nuntak tu thupi masa tu hi. Thupha hong pia Pathian mangil a, a thupha bebek ih del nate aa kipan ih ki phatsakna, ih kihuai ngamtatnate ih kisik tu kisam hi. Khua thiansua tu khawng ih hanciam bangma, mihing theampo Topa Jesu chisan taw a kithiansua sa ahina ih heak sak tu le hong saan thei tu kisam kasa hi. (b) Ngaamthak Nasepna: [Mission] Kachin te in Kum 100 Cinh Poai zok ciang, Kum-3, 300 ci-in, mihing 300 kum 3 sung amate minamte sungah ngupna thuson sak ahikom, Topa in thupha tam mama pia hi. Khamtung mite zong, CCOC ih sepna tung tawnin, Topa in Kawlngam sungah a zak bel minam khat kisuak hi ci in um ing. Yangon Lai Thiangtho sangte, tanga kepna theampo sungpan 80% bang sia Chin minamte ii lampuina hi. Tua hi a, Thuklai Kum 100 zong, mungtupna khat nei in ngamtak nasepna kipan leang ci nuam ing. Ih thukim thei le a kicing zaw in ih kikum tato tu hi.. (c) Leitung Bp Kipawlna: [Global Association] Tuipi ngal athengsate sia, khang khat sung zong hi ngawl lai a, ih pianna Sizang Kual aphawk mama nawnngawl kitam mama zo hi. Khang 2 na ciang sia mansa hi zo hi. Tua ahiciang, ih pianna khua ih puua tu sia ih vekpi ii vaipuak ahina, thinsung theampo taw ih phawk maksak tu kul hi. Tu dong sia, Thuklai Sang, Zato, Mei vai te ah, a hi thei babangin ahanciam tuam pawl khat kidiang sak bek hi. Pawl khat bek ii hanciamna taw, ih khua ih tui kipuua zo ngawl tu ahiciang, leitung bup kipawlna khat nei leang pha ngawl tu ziam? Ngam omte zong kipawlna tung tawnin ih pianna Thuklai Khua hong phawk tuam tu hi. Hi kipawlna pan ih nga sumte: (i) Pathian nasepna (ii) Sangka zo ngawlte huna (iii) Cina kibawl zo ngawlte huna.. (iv) azawng le, nupi pasal huaite huna (v) khantona [development] tatuam sepna tu in zangh leang... Hisia atu in, sontena ngampua aa dollar nete in tha khat $ 2, ngamsungte in K. 500-1000 cibangin situa thong leang, na kiseam zo mama tu hi. A vaipuak nei tu zong, akhua, ahawng in kihawm leang piang thei tu in ka um hi. Ih khua itna ih nei takpi tu bek kisam masa hi. Ih biak TOPA Pathian in, Kum 100 Cin Jubilee tung tawnin Thuklai khua athak in thupha hong pia ta hen. Amen! Itna taw, Lam Cin Thang, ANTS Syapipa, Yangon Khua