UN DIA NA MÉRKA SEN IMIGRANTIS

By Joaquim Manuel Andrade, Dr. Azágua

Stória di povu Merkanu ê un stória d’imigrasãu y diversidadi. Mérka resebe, ku

brásu abértu, más imigrantis di ki kualker ôtu país – más di sinkuénta (70)
milions, na sê totalidadi – y inda es t’adimiti serka di un million pur anu.
Risentimenti kuzas bira ôtu; kafé bira xá. Pon bira kamóka.

Pur isu, Latinus y tud’ôtus imigrantis djunta mon, finka dôs pé na txon, es rolâ
manga, n’un dia Ixtóriku na vida di Mérka ôji, dia 1 di Máiu, dia di Trabadjadôris,
es organiza – “Un Dia Sen Imigrantis”. Un Dia Sen Imigrantis ta pretende
mostra fôrsa ki ten mon d’obra Latinu y di tud’ôtus imigrantis na ikonomia
merkanu y pa inpidi ki guvérnu dês país aprova leis kontra imigrantis k’ê bastanti
agresivu pa dirêtus umanus. Entri es: konstrusãu di parêdis áltus na frontêra
entri Mérka y Méxiku, kriminalizasãu y omentu di pénas kontra kenha k’ê ka
dukumentadu y punisãu pa sidadons merkanus ki djuda-s.

Párti d’es prupostas djâ foi aprovadu na Kâmara Federal na Dizembru di 2005,
má inda meste sér votadu na Senadu. Senadu têvi un frakasu semana pasadu
na tentativa di fitxa un akordu ki ta pirmiti legalizaba más di séti (7) milions
d’imigrantis sen dukumentus, nun total di dôzi (12) milions ki ta vive na Mérka.

Ôji, imigrantis latinus y tud’ôtus nãu só es dixa di trabadja y tambê es organiza

p’es ka konsumi ninhun prudutu merkanu. Foi un boikóti ku objetivu di obriga
kongresistas di Mérka pa sansiona kêl lei a favor d’imigrantis.

Mensájis mandadu através d’Internet foi un midjór manêra atxadu pa

manifestantis p’es prutestu txigaba tudu latinus: “Na dia 1 di Maiu, ka bu saí na
rua y ka bu kunpra ninhun prudutu di Mérka. N’es dia, guvernu ta perde
toneladas di dinhêru y el ta dâ konta ki kenha ki ta sustenta sê ikonomia ê
imigrantis.” Otr’un flâ: “Lenbra, nada di gringu na dia primêru di Maiu.”

Ditu fêtu. Karl Marx djâ fraba na “U Kapital” ki, “Revulusãu ta sérba un
mudansa radikal di ómi: ta pirmitiba derrubaba instituisons y purifikaba klási
operária. Ta libertaba klási oprimidu di “mizéria pôrku” (Drecke) y ta pirmitiba
rekriaba sosiedadi.”