ZAM Hotline 016-293 9027 ZAM Office 03-2142 6659

Email: zomiassociationmls@gmail.com

Volume 7, Issue 36
ZAM Member Card vai zaksakna: 2013 January 1st ni aki pan, ZAM card tawi member khat ii ngahtheih ding ham phatna teng: (1). Deihloh pen sihna tuaka ZAM card ahinglai (valid) leh sumtang RM-500/-(zanga) tawh sihgalna in, kipia ding hi. (2). UNHCR department tuamtuam ah lai-at ding aom leh manngenlo(free) in, ki-atsak ding hi. (3). Nasep neilote nasep manngenlo-in, ki zonsak ding hi. (4). Damlo leh mat leh hen vaitawh kisai-in, manngenlo-in avai kipanpih dinga, ahizongin sum leh paai tawh kipanpih lo ding hi. (5).Tualo atuamtuam pan pih theih omte kipan pih ding hi. (6). Member card athak bawl/ahingsak kik(renew) te ading RM50/- (sawmnga) hita ding hi. Nau pang kum 10 nuaisiah leh uham kum 60 tungsiah te ading athak bawl man/hingsakkik(renew) manding leh card anungta lai(valid) mangsak/kisiasakte adingin, RM10/-(sawmkhat)hiding hi. Azen zenin, ZAM card tawi nu/pa khatpeuh in, asih khitciang Card(renew)/ athakbawlte adingin, sihgalna RM500 kipialo ding hi. Kumpi Zato napaiciang, Siavuante Memo ngen ham tangin: Cidamlohna hang khat peuhpeuh tawh sikhan (clinic), zato napai aleh Kumpi Zato mah paipah in. Tua hileh Siavuan Memo kingah thei ding hi. Kumpi Zato pan Siavuante Memo bekmah UN ten theihpih in sangthei uhhi. UN card ngahnopna hang ahizong, UN card neikhinte ahizong, cidamlohna khat peuhpeuh hangin, zato kibawlna sum beite na ngetkik nop aleh, zato ah nakibawllai tak mahin lai/siavuan Memo pello-in, ngahsawm hamtang in. Hih Memo lai omlo-in, UN ah bangmah huhna kingen thei vetlo hi. 2013 kum, Zomi Nam Ni ading: Khua leh Pawlpi pan sum akipia sateng azom; 75) Pimpih Khua KipawlnaRM100, 76) Tuipi Khua Kipawlna-RM200, 77) Laitui Khua Kipawlna-RM200, 78) KL-EBC Pawlpi-RM200, 79) Muizawl Khua Kipawlna-RM200, 80) Rawang Zomi InnkuanRM100, 81) IZCC pawlpi-RM200, 82) Zampi Khua Kipawlna-RM100, 83) Aung Nan Daw ansai-RM300/- hiteng bangin kipia khin tahi. Apia nailo ten zong amanlang thei pen in, ih piak mengmeng nading kong zasakkik hi. A (65)Veina Zomi Nam Ni Zinmang: Chief Guest ding Kawlgam pan Pu Cin Sian Thang (ZCD President) leh Lengtong Kam Khen te zong Feb. 10, 2013 Sunday ni sun pawlin Malaysia ongleng thei tading hi. TSKhai zong Kuala Lumpur hong tungkhin tahi. Pu Thang tungah dotnop, gennop anei nuamten hih anuai-a contact no. tawh kidong thei hi. Thomas Piang: 016-610 0877. 2013 Zomi Cup hunsung hunbit Nurse kideih: Hih hun sung hunbit Nurse volunteer semding kideih ahih manin, Zomi sungah minam itna leh veina taktawh hong kipia khia dingin kong lamen uh hi. Kipiakkhiatna pan ngahna ong omthei pan hi. Contact ding; Sya Kam Sang; 016-918 9692. Theihding: February 20, 2013 Zomi Nam Ni bup ZAM zum kikhak ding hi. February khasung UN zum kikhak nite Sen kumthak ni 11, 12 nite UN zum kikhak ding hi.

February 10, 2013

Kachin(Behte)Galtaaite Huhna kipia: Kawlgama I sang gam behte (Kachin) galtai dong tuakte pan p i h na d in g in , Malaysia aom Zomi Association of Malaysia (ZAM) makaihna tawh sumdonna kineih s ak in, pa wlp i khenkhat leh mi mal tungpan anuai abangin sum kingah vekpi; RM5,700/(tulnga leh za sagih), Febuary 06, 2013 Wednesday ni nitak nai 3:00pm hunin, Malaysia Kachin Kipawl (KRC) tetungah ZAM zum pan sum piakkhiatna(apna) hun nuamtak leh Galtai I sanggamte adingin thungetsakna kinei thei hi. Zomi Genvai Kipawlna (ZSM)vai zaksakna: Zomi Gen vai Kipawlna tawh Malaysia aom Zomi khempeuh I ki zop kim theihnang leh haksa dongtuakte, I van kimzawh na dingin, Zomibup kongzawn uh hi. Mi-1, kum-1, RM10. Na sum khiat pen na zat khak keileh a lungdamhuai hi zawa, a zangkha-te na panpihna hipah hi. Nang zat ding cihna tawh nakhiat sangin, azang ding om ahih manin akhia hi zaw in! Zomitekikhopna biakinn khempeuh panin kilutthei tahi. Biak inn pai manlote zong ZAM zum-ah kilutthei tahi. ZAM memberte bek kilut thei hi cih thuging pen zuau thu ahihna leh ZAM member hita keileh Zomi khempeuh suakta takin kilut thei hi. ZSM UNHCR pan uliante ZAM zumah onghawh: February 05, 2013 Tuesday ni-in, ZAM zum ah UNHCR-(EST& REG) pan ulian 2 te ong hawh thei-a, Malaysia gam sunga om Zomite UN ngah sa/nailo sazian om dan, nun tak khua sak zia leh thu tuamtuam holimna kinei thei hi. Mikang lai!!..Mikang lai!!..Mikang lai!!! Zomite ading Khangham Mikang lai sinna (Adult English Class) ZAM zum nuai-ah omding hi, nipi kal khat nai 2 sungta, Kigin ni (Saturday) sim hiding hi. Athucing theinuamte: Sya David Mungno: 017-333 4320. Theih gige ding: UN zumah lai na-at/khiat ciang, Zolai/ Kawllai tawh na-at sangin, Mikanglai (English) tawh at pah lecin nakpi takin lem zaw den hi. ZAM Thupuak Huhna: Aung Nan Daw ansai-in February 10, 2013 ni adingin RM100/- ZAM thupuak ading hongpia ahih manin, lungdamna kiciamteh hi.

...thahat inla, hangin, lau kei-inla, lungkia kei-in; ...na paina peuhpeuhah Topa na Pasian nang tawh hong om hi. Joshua 1:9

**ZAM Thupuak kal siala, kihawmkhia pen Leitung mun tuamtuam aom Zomi khempeuhin asim theih nadingin, Website: zomidaily.com & email: zomiassociationmls@gmail.com tepan kisim thei-in, aituam email tawh adeihten zong kingen thei hi.**

Zomi Cup Kihel Khempeuhin Kicing Takin Theihding: Leitungah minam khat peuhmah in, ngeina leh Minam aa ding ni thupi ni nei tek hi. Zomi te in, minam kician khat hihna leh ih Minam Ni pahtawina aa ih vaihawm Zomi Cup pen, a beisa kum thum vilvel, thu nawngkai, thu buaihuai khatpeuh hangin a laizang pan kikhawl bawl ahih kei leh, a hun kikhinto cihdan bangmah om hetlo hi. Tua pen, Khua makaite leh a kimawl mimal khempeuh in, ih lungkim khop, ih thukim khop thukhunte zui diamdiam aa, minam unau lungsim taktak tawh ih ma pan'na hang hi. Tukum zong, A (4) Veina Zomi Cup ah, Zomi te-in, hihbang vai lianpite vaihawm zo ung, ci aa ih lahkhop ding ih kithawi khin aa, ma tutna ding tawmbek ii sap ahihi. Nuamtak zo nuam ihih leh, a vaihawm makaite ii vaihawmna bek tawh kizo theilo hi. A thakin ih theih gige ding ah, tukpeng kidemna ci-in, mimal khatin ahih kei leh ih Kipawlna ZAM in, sum hong dongin, Khua Kipawlna tuamtuam kidem, ki langbawl, a zo ding kituh ding, a lelnuam omlo ding, Khua khat leh khat gual tungtuan' nopna tawh kidem gawp ding cihdan in Zomi Cup ki vaihawm ngeilo hi. Khua Kipawlna khempeuh in ih theihsa mah bangin, sum a kidong zah thukim aa sum khia vive hihang; Kikupna ah Khua makai khempeuh thukim in Thukhun ki vaihawm zong theitek hang; Sum a tawmzaw, atamzaw khia deuh cih zong om tuanlo ih theihtek hi; A kimawlna-ah referee kikawm hi-in guptuam, paihtuam neilo cihzong ih theihtek hi; Vai lianpi a omthei khempeuh kikupna pan vekpi thukimna tawh ih vaihawm cih zong ih theihtek ahihi. Mundang khawng aa a omthei gige, mi khat ahih kei leh Kipawlna khatin sum dongin, pahtawina limci nono tah in tukpeng kidemna pawi abawl dan aa Zomi Cup ih muh leh khialh cihtak a kikhial hipah hi! Ei teng sum kidong; ei tengin vaihawm zia ding kikum toto, ei teng mahin vaihawm khawm cih ih tel gige ding thupi hi! A vaihawmte atuam, a kimawl Khua Kipawlnate atuam cih bang aa ih muh leh vai buaihuai hong tam mahmah ding hi. A vaihawm makaite-in hong makaih, ahih kei leh palai hong sem hi aa, amau aa dingin sum tuazah ngahding, Khua Kipawlnate tuazah ngahding, cihdan in a ngaihsun kha ki omlo ahih manin Akum Thumna dong nuamtak ki vaihawmzo khin ahihi. Kilawmtatna a hihsam hangin kidemna khat mah ahih manin, muhdan, san'dan kibatlohna hun hong omthei zel hi. Tuabang hun ciang, Khua Kipawlna makaite tung thu tampi ki nga hita hi! Hong picing mahmah, hong thukhual mahmah, sanggam lungsim, makai lungsim hong pua mahmah dih un! Kikupna aa ki khentat bangbang vaihawm ding hipah aa, kikupna aa kikhentat thute a tel mello khat leh nih cihkhawng gen hak mahmah thei gige hi! Ih gensa gen zelzel ni; Hih Zomi Cup pen unau sanggam tengbek kidemna hi, apua pan kuamah zong lutsak kei hang; No lam te, ko lamte cih omlo hi; Ko Khua hong tuambawl deuh, Amau Khua te hampha deuh cihtheih dingin thu ki vaihawmlo hi! Vaihawmna ding ahang zong a omthei ding hilo hi! Nawngkaina, buaina omlo aa ih zawhtheihna ding pen mimal kimin Zomi sanggam lungsim ih neihkul hi. Zomi, Zomi, na minam teng ki lawmtatna pawipi-ah thu nawngkai bawl kha na suahloh ding hanciam in! Zomi, Zomi, na Khua min sia sak, dai sak kha na suahloh ding hong hanciam in! Tg.Kham

Nausuak lai lakna: 1. Jabatan Pendaftaran Negara (JPN) Cawangan UTC Kuala Lumpur, Aras 2 Wisma UTC (Pudaraya), Jalan Pudu, 55100 Kuala Lumpur 2. Putrajaya Immigration Office 3. YBC College mai-ah 4. Jabaton Pandaftaran Negara Komplexs KDN Jalan Sri Hetamas 1, Off Jalan Quatermas 1, KL-50551.

UN Card kimu hi, ZAM zumah hong kan un! 1. 354-12C01751, Khin Maung Shwe,(09/05/2015) 2. 791-09C10089, A Niang (27/09/2012) 3. 791-09C03478, Cin Ngaih Thang, (29/07/2012) 4. 354-11C04008, Far Chin Tial (18/05/2015) 5. 791-10C00696, Khai Kam Sing (17/01/2013) 6. 791-10C05522, Mun Lian Sang (06/03/2013) RSC leh DHS pan Phone ong kisap aleh: RSC leh DHS zum phone: 03-2144 8105, 03-2144 7994, 03-2141 1943, 03-9222 0805 te tawh Phone sapna bek hilo-in, Jan. 16, 2013 ni akipan SMS tawh Mikang lai in Interview ding sapna zong hong kikhak thei ding hi. Tua bang SMS te Delete kha hetlo-a, Interview ipaini ciang zumah lah theih pah dingin, Save mangngilh kei in! Zumah SMS lai na lah theih keileh honglutsak lo ding hi. SMS laikhak atello ten ZAM ah kidong thei hi. Malaysia om Zomite tung Laikhak: Kongit Zomi aw, singdang gamlei-ah sesum minthang mubang ngaih man, pianna Zogam vangkhua tual nuam nusia in, vabang nelen napan Zotaang bang ih damkim hiam aw.? Ih mipite ading na kasepna tawh kisai-in dahhuai, dipkuat huai, lauhuai dinmun ihtunlam ka muhteh ka khasiat suak, ka dipngekna in ih mibup in Pasian maipha zong kikin ih omnatek pan thungen tek leng cih ka lunggulh man hih laikhak onggelh ing. Pasian hang bekbek in apil, ahai, azawng, ahau kideidan lo in, gam 3na paitheih nading hamphatna ih ngah laitak ahihi. Hamphatna ongpia Pasian, gam nuamah kilawmlo kicinglo pipi ongpuak tantan ih Pasian ih mangngilhta-a, ut bangbangin eimau san ciatah ih om zelzul hi. Endih vevua! Nungak tangval pawlkhat kiteng nailopi-a utbanga lumkhawm, Papisa pawlkhatin mi zi khawng taipih, Nupi pawlkhatlah tangvalte tawh cikzialo taka omkhawm, Kawlgam pan ziding vaikhak(parcel) ci, Malaysia ongtun teh adang khatin na tenpih, Parcel tenzong alawmpa ding amuhteh ham/upa salua(or) hoihsalo-in Kawlte peuh tawh kiteng gawpgawp, teek leh mo omkhawm kitawng tawnglah beilo, Nu leh Pa tawh omkhawm gegu avak nuamlolah ki-om, Kawlgama nu leh pa awlmawhlo hopih lo zu dawndawn, biakinn tung ngeilo honkhat, nupa ki khen nuama zum ongpai pai pawllah om, mite zah zong phalo Zomi tawmcik mi gamah omin, mun khatah Kipawl theilo-a, Kipawlna tuamtuam aphuan pawl khatlah om, Khamtheih zanga lamdung lamvai-ah alum pawlkhat, ih om khinzo hi. Pasian Hehna ih mibup tung ong tunma ih Pastorte, nu leh pa lia leh tangte aw, ih pawlpi tekpan Pasian maipha zong khawmin thungen khawm ni! Mimal kim Topan thupha ongpia tahen! Zomi cih limlim nuam asa, a it; Kamtawng Dahpihna: Tuitum khua, Samte beh Pa Gin Za Khen leh Nu Goih Khen Niangte tapa Pa Gin Khan Tuang (39) in Sikhang natna tawh GHKL zatopi pan 4/2/2013 nin hong nusia-a, 7/2/2013 ni-in, ZCF Canaan biakinn ah hehnep hun akibawl khitteh, Batu Arang hanmualah aluanghawm tuhkikna kinei thei hi. A nusiat a innkuanpihte tawh aki bangin Zomi bup I dah khawm hi. Zaksakna: ZSM(Genvai) tawh kisai-in, vai khatpeuh aneite ading; Feb. 12, 2013 Tuesday nibup zumah kihong ding hi. Zomi Cup vai tawh manlahna hang hizawa, Zomi Cup leh Zomi Nam Ni zawhciang angeina bangin zum kihong ding hi. 2013 Zomi Calendar: ZAM zumpi pan akibawl 2013 kum ading Zomi Calendar dal khat ciang RM10/- (sawmkhat) tawh Khua kipawlna makaite kiang, kikhopna biakinnte ah ihzuak mante 2013 February 20, Zomi Nam Ni ma-in, ih Zumpi ZAM zumah nongpuak kimciatna dingun, zahtak tawh kong zasak hi. ZAM iNfO!