PIDARTANING SWARGA Katuturan sang sampun puputing kerti yasa, brata tapa, kalangkung pisan kautaman Ida sang

sidha lepas, mamukti swarga lewih. 1. Ring purwa, kangin, katon swarga putih, saha tembok panyengker putih sarwi ngulapin, meru tumpang sanga, Kahyanganira Bhetara Iswara, kabhukti antuk sang nitya puja, satya brata. 2. Ring daksina, wenten swarga mirah, meru tumpang sanga, meraab kuningan kadi mesangling, abra murub katinggalan, matembok panyengker tembaga, ring Brahma Loka, nga, Kahyangan Bhetara Brahma, kabhukti antuk sang pageh ring puja. 3. Ring pascima, swarga kuning, meru mas tumpang sanga, matembok panyengker mastatur, mas malebur, ring Buddha Loka,nga, Kahyangan Bhetara Mahadewa, kapikolih antuk sang sane lascarya medana punia. 4. Ring uttara swarga ireng, meru tumpang sanga, matembok panyengker antuk besi, ring Wisnu loka, nga, Kahyangan Bhetara Wisnu, kapikolih antuk sang sura ring rana, payudhan. 5. Ring ersania swarga biru, rawuh ring panyengker tembok biru perunggu, kabhukti antuk sang sureng rana, molih ring payudhan. Kahyanganira Bhetara Sambhu. 6. Ring geneyan, kelod kangin, wenten swarga gangsa, meru tumpang sanga, sarwi maklias, Kahyanganira Bhetara Mahesora, kabhukti antuk sang sane setata mapening-pening, sarwa suci, pinaka kembanging kendran, pada listuayu.

IB. Putu Bangli - Horti Basa Bali

7. Ring neriti, kelod kawuh, meru tumpang sanga, atepnia rathi, pada kwantania lawan mas,mrebuk arum ambunia, candana, andaru, burat kasturi, kumkuman, ring Darapada, nga, Kahyangan Bhetara Rudra, kabhukti antuk sang purusa ring laksana, satya ring ujar. 8. Ring wayabiya, kaja kawuh, meru tumpang sanga, atepnia gangsa, pupulan sarwa kembang, sekar, abra murub, ring wisatya, nga, ..... Kahyangan Bhetara Sangkara, ulihan sang stya brata. 9. Ring madhya, swarga ratna, lewih sakeng swarga sami, meru sarwa ratna, sesocan, mapucak inten, ringringnia cangkok mandawi, ules saka dewangga, abra murub dumilah, pebanjaran sarwa kembang, tinata wetan, angjarah sekar sri dhanta, widyadara-widyadari nampe hyasan, asangganing pada ngayap, ramya agambel angidung, pada amintonaken kaweruhan, ring Siwapada, nga, Kahyangan Bhetara Siwa, ulihan sang Wiku sakti, ring brata tapa, tata sri dharma kamoksan.

IB. Putu Bangli - Horti Basa Bali