SUKSMANING BRATA SIWA RATRI Dresta Brata Siwa Ratri kemargiang ring Bali, nangken awarsa nemoning kresna

paksa, panglong ping pat belas utawi prewani, sasih Kepitu. Pelaksanane manut ring kasidhan sowangsowang, sujatine wenten pemargi tatiga minekadi, nista, madhya, miwah uttama. 1. Kemawon jagra, megadang ring Pura, bilih wenten balihbalihan, sane melakon Lubdaka wantah becik pisan, reh wewali punika pateh suksmanipun ring dharma wecana. Kebawos becik pisan taler, yen prade wenten anak uning mewarah-warah, nuturang indik brata Siwa Ratri, yadyapi sinengguh nistaning pemargi. 2. Madhya, melarapan mewaca-waca lontar, miragiang tutur Lubdaka, utawi sane sewosan, pinaka sarana nenten aturu, sirep sawengi. 3. Uttama, sipeng mona brata, sawengi miwah rahina, tanpa mangan ... tan panginum, tanpa turu, ngawit dauh pisan semeng rawuh dauh pisan esuk semeng, laju dauh kutus sore. Yan sira presidha ngelarang brata uttama puniki, nanging sahuripe ambek sadhu dharma, pastika pacang sidha mukti swargan Ida Bhetara Siwa. a. Prewani utawi kresna paksa panglong ping pat belas, sinengguh, peteng pepet tan pasingkaban/peteng dedet nenten wenten galang amatra, tegesnyane kapetengan manah.

IB. Putu Bangli - Horti Basa Bali

b. Sasih Kepitu, pinaka nyasa Sapta Timira, bacakan punyahe sane papitu. Manut pawilangan Wariga Dewasa, rikala punika wantah payogan Ida Bhetara Siwa. c. Lubdaka munggah ring taru Bila sarwi ngebis-ngebis daun Bila, maka sadana nenten arip mata sawengi. Kruna Bila mekadang ring kruna Wila + sa, dados wilasa, kerti rahayu dijagate kalaning kari mahurip. Prade limbakang suksmanipun malih, I Lubdaka morosin mrega, buron, wenten anak morosin tresna (cinta), taler morosin, ngulah ... harta brana kawebuhan, wenten anak morosin, ngulah sastra, maka sadana nyuluhin raga, pisarat kahyune mangda sidha rahayu. Daging sastra agamane nyinahang, sakelwir dosa, mala pataka, lara roga wighna, gumanti sidha lebur dening brata. Risampune puput makerti rahayu, ngelarang bebratan kalaning urip, katah pidartaning Swarga kabhukti, manut kerti sowang-sowang jadma manusane.

IB. Putu Bangli - Horti Basa Bali