Sabak Kenang Genteran Diau Di Sebayan Bejaku Niram Raja Udah meh nuan Ini Dara Melisa Udah

meh tunjuk dua nuan Nyambut leka ranyai rinda Ke bebuahka perengka nadai kurang Batak meh bala kitai tu Abu Nuan endang ngambu dulu Matak jalai midang Nyau bediri angkat bejalai Bala raya Raja Ngerai Ngejangka pun ranyai jurai Nyau udah berintai Baka ke bulih sekayu tantai, tinting belematang Tak nyau didinga terantang gendang pangkung bebendai Enggi sida di peretang penyarang rumah panjai Gaga ke bala orang ke main Ini Dara Pandai Keba peretang rumah panjai enda ulih terebai sehari langgai burung lang Nyau berindik di tengah lama Raja Niram Dibandung belayan madang pisang Bejaku Ini Dara Tuyu Ni ruai alai kitai ke datai duduk begempuru Ukai enda udah bisi dikerembai ke orang tikai sampar rampu Tinggang enggau pengedang baku indu Kelai orang enggau tarang lampu telu Baka lampu ujung Tanjung Datu Tepat perau pulai nambang Nyau bejalai tuju mua Bala raya sida Aki Bujang Melisa Lalu nunjan papan tangga laka Ngena gaga tukang tunjan papan teman kaki nyingkang Tangga papan tu udah dikajang sida di batang Mandai Renjan Enggau ampang pua berinjan ke meruan manah besundang Nyau titi sida sentali rumah jebung Tak nyau tampak terang, udah digitang pasang lampu kurung Mandang perabung rumah lintang Nyau berindik di landai ruai jebung Bekelai ke elka begumba balang bedabung Baka ke tau berenung nimang jangkang Nyau dudk semua bala Niram Raja enggau Ini Dara Melisa Nyau betubuh mayuh bejerita, baka ke bulih selaksa enda ulih dibilang Angkat kerubung karung mengandai Iya ke lela dulu nadai Mantaikka terebu baku Berunai Lalu mai orang bepakaika pinang tuai, digulai sirih kepayang

Lalu begau sekayu perunun rumah raya Orang ke ngulu Ini Kumang Dara Melisa Ke baru datai ari baruh rasa perenama bulan mansang Dia iya lalu mantaika tungkus seratus pua wa Peda tak lalu segenda, taring uting babi menua enggau batu lua baya Dikerayapka sida di singkap pinggai kemuja Lalu dibai enggau selanjau ijau manuk banda Digayang enggau belang babi menua Tu taruh kita manah, simpan di pelawan tajau menaga Engka kita lepas badu ngetau, nyengkau genarau padi puya Tandangka kitai ngabang baruh gentilang remang jera Sua ke kita sida lantang anak sendia Awakka sida enda merinsa Dilengkaka nuan ke lela sulai nyaya Awakka enda berasai ngulihka perengka macham barang Angkat kerubung karung berada Nukangka lawang pintu papan chenaga Lalu mai lantang iya tama, ke penaik bilik raya Lalu duduk mandung benung tajau menaga bujang Dia deh Ini Kumang Dara Tak beati berai bunding neraya Ingatka menua dibaruh perenama bulan mansang Anang meh nuan tusah ati Ninggalka ke menua deh Ini Dara Melisa Ditu pan kitai enda meh tusahka belanja Laban kami endang udah sedia mayuh barang Peda katil besi enggi nuan Ini Dara Mereti Nyau udah bediri tinggi meranggang Au meh selantang anank tuai Pia ku kerubung karung mengandai Ditu pan bisi endur nuan nguji ke penyidi jari tunjuk megai Ditu pan bisi meh tiang alai muntangka belembang lidi kirai, muntang belulai bebuah Ngambi tangkai marau pengerang. (Dibali ari Bup Sabak Kenang, dikarang Frederick Ranjit, Borneo Literature Bureau, 1969)