Tthingtthang Mekazin june chuak chung in

Mars Kalnak Sok Khawh A Si

Si Bawi Mang Lian June 2013

2013 kum thawk i vawlei a hnintu thawngpang pakhat cu mars timi vawlei (planet) ah peem a duhmi paoh nih kal khawhnak sok khawh a si, timi hi a si. Dam lo in siizung kal lengmang hi an simh maw? Cozah uknak tang i um, khuachung rawldawr le mibupi lak tthutdir nih an simh sual maw? Siloah na nungak/tlangval tthing nih an buai hnawh tuk dah? Mah cu a si ahcun Mars One timi The Netherlands company sinah rian cu sok khawh a si. Vawleipi hel in mars ah a peem hmasabik ding minung an kawl cuahmah. Minung nih hin pathian sinak ngeih duh in pathian kan i siter ttheo. Mirang nih playing God an ti. A um lomi le a si lomi thil pakhat kong an ttial, film an thlak, an suai ti bantuk vialte khi sertu sinak le a ngeitu sinak a um kho. Cucaah ttawnchom cattial (fiction) khi sertu sinak aa celhmi (playing god) an ti tawn hna cu a si. Cu bantuk in atu i pathian kan icelh ning cu mirum le mifim hna nih an i hrawmmi company pakhat hmang in mars timi vawlei ah minung khuah hnih thlah in Eve le Adam bang umter an duh hna. Cun June thla thawk ah USA nih vawleicung minung le ram pawl a thlite in Google, Facebook, Yahoo, Skype le telephone hmang in a rak ngiat ziarmi kong CIA i rian a ttuan balmi pa nih a phuan tikah Pathian nih minung hi zei kan tuahmi paoh a hngalh i a kan hmuh dih bantuk in USA nih hmuh le theih dih an duh ve ai. Lusifer cu Pathian nih dawhnak tling le tthawnnak vialte a rak pek dih ko nain, Pathian si a rak duh i cutin kan si lai, khuadawm ah ka kai lai, tiah keimah tiin a rak um caah Pathian nih vawlei ah a rak thlak ti a si. Minung hi Pathian sinak kan icelh tikah hin khawika ahdah a kan thlak ve hnga? Vawleinak niam a um ti hnga maw? Hell timi mei-tili cu dah a si tak ko hnga?

Tthingtthang Mekazin june chuak chung in

Mahhi kong hi cu bialam phan ka von ruah tami a si, Mars kalnak kong cu ka von peh lai. Mars kalnak ding a tuahtu Mars One Insititute cu Netherlands ah a um i Bas Lansdrop nih a hruaimi a si. An i tinhmi cu Mars ah minung kuat i pemter beh ding a si. Mah cu kong cu june 2012 ah khan an rak thanh cang i a hmasa ah communication satellite le path finder timi cu 2016 chung ah an kuat lai. Caan zeimaw a rauh hnu i Mars in vawlei tiang pehtlaihnak a ttha cang ti hrawng ah 2022 in minung pali cu an kuat hna lai. Cu thawk cun kum hnih dan i minung pali lengmang Mars ah an phan lai i an um beh lai. Mah hi project a thawktu hi physicist in Nobel Prize a hmu balmi Gerrard Hooft a si. Cozah he pehtlaihnak a ngei lomi pumpak company an si. An kir ti lai lo Mars kalnak sok khawh a si. tiah tlang kan tar bantuk in a kal lawng an kal lai i zeitik hmanhah an kir ti lai lo. A va phanmi minung paoh cu Mars ah an um lai i Adam le Eve bantuk in Mars minung an va si beh cang lai. Tefa an ngeih duh le duh lo cu anmah nawl a si fawn lai, um awk a ttha maw, nau caah a poi lai maw, timi an izoh lai, tiah Mars One hruaitu Bas Lansdorp nih Mars kalnak sok a ngah kong a thanh lio ah a chim chih. Mars ah kuat hmasa ding minung pali cu nu pahnih le pa pahnih an si lai. An phak kum hnih hnu ah a dang pali nih an va phan ve lai i kum hnih dan peng in minung pali lengmang kuat an itim. Aruang cu minung nih hawikom le biaruah ding kan herh caah a si pinah Mars ah minung karh khawhnak ding caah a si. Mars One nih minung 20 lawng a thlah hna lai. Atu kan vawlei hi chuahtak na duh i Mars kalnak sok ding na si ahcun, Mars One nih ri an khiahmi na tlinh a hau. Kum 18 in kum 40 kar na si lai. Pum tlamtling, a thazaang tthami, a ngandammi na si lai. Thinlung le thluak a dam i a tthawngmi na si lai. Mirang holh a thiam taktakmi na si lai. Mars One nih an i timhmi le an ttuanmi project a dih hnu zong ah Mars in kan vawlei ah kirnak an tuah kho ti lai lo. Cinthlaknak le a dangdang a herhmi paoh zong ah an iken khawhmi an iken lai i an va tuah ding lawngte a si. An thih tik zongah zeitin an ituah lai timi cu anmah nawl a si tthiam lai, an i khangh ding hi a fiang bik tiah Lansdorp nih cun a chim.

Tthingtthang Mekazin june chuak chung in

Asinain anmah nawl a si a ti. Aruang cu Mars le vawlei kar cu ticket pakhat a um. Mars kalnak vanlawng cung na kai hnu cu chuahkehnak vawlei ah kirnak lam a um ti lai lo. Minung 80700 leng nih an sok cang, tiah the Guardian nih a ttial. Vawlei in Mars cu kilometer in million 60 lengpi a hla, i an lam caan hi a tlawmbik ni 200 a rau lai. Mars One ah kalnak a sokmi chung in thimmi paoh cu kum 8 chung training pek an si fawn lai. Hi vialte caah a dih ding phaisa zong an kawl cuahmah cang. Mars a kal ding minung thim hamsami 24 kha training an pek hna lio vialte cu reality-program in TV ah an thlah lai. Cun may 2013 tiang ah khan hi project caah $103327 cu mikip sinin hlutmi an hmuh. Mah cu TV in a zohmi paoh nih an duhmi minung pali kha Mars ah kal hmasa seh tiah an thim khawh ve lai, mi tambik nih kal hna seh an timi le Mars One duhning zoh in an thlah hna lai. Mah cu a si caah vawleicung khuaruattu, mifim, misawiseltu hna le cozah cheukhat nih cun sipuazi ca i an tuahmi a si ko, an ti ve hna. Mars ah minung an um kho taktak lai timi hmanh aa fian rih hlan ah minung 80000 leng nih va peem behnak an sok fawn cang tikah a ruah awk hi ka hngal lo. Bible ah le minung hi vawlei dang ah an kal lai ti a um fawn rua lo, bible bia cu a tling kan ti kho hnga dek maw? Mars kong tawi: Mars cu kan vawlei bantuk in nika a heltu vawlei (planet) pakhat a si. Planet pakua lakah nika he aa naihbik palinak a si. Rome miphun nih ralpathian an timi Mars minchuan in a min pek a si. A sen dih caah Vawlei sen tiah auh khawh a si. Kan vawlei nakin nika he aa hlatdeuh i a kik deuh. NASA nih seh cu an kuat khawh cang. 2030 chung ah NASA nih minung kuat an itim ve.

Ref: MarsOne.com http://en.wikipedia.org/wiki/Colonization_of_Mars http://en.wikipedia.org/wiki/Mars_One http://www.guardian.co.uk/science/2013/may/08/mars-one-applications-mission

http://en.wikipedia.org/wiki/Mars