Pangulo: Huna-hunaon ta nga si Maria Santisima mao kadtong babaye nga
giingon sa atong Ginoong Dios nga magadugmok sa ulo sa halas nga impyernohanon sa ato pa, nga si Maria Santisima mao ang babaye nga makadaug sa yawa ug dili madahig sa salang panulondon.
Si Maria Santisima gisanglitan usab sa atong Ginoong Dios sa arka ni Noe nga milutaw ibabaw sa katubigan sa dakong lunop sa kasal-anan sukad pa sa unang ginikanan, si Maria Santisima mao ray minglutaw nga wala madahig sa salang panulondon. Tungod kini kay siya man ang gipili sa Dios, aron mahimong Inahan niya, diha sa Iyang pagkatawo. Ug maingon kang Noe ug mga kauban nga nahisakay sa arka wala malunod ug wala mangapildi mao usab ang mga deboto ni Maria Santisima, ang matuod nga Inahan sa Dios, ang katingalahang arka nga gisakyan sa Anak sa Dios, dili malunod ug dili maalaut sa impyerno, hinoon sila maluwas tungod sa ilang pakigsakay uban kang Kristo pinaagi sa ilang pagdebosyon kang Maria nga kinahanglan ipakita diha sa pagtuman sa mga sugo sa Iyang hamili nga Anak ug atong Manluluwas, diha kang Maria walay pagduha-duha modunggo sila sa lapyahan sa himayang dayon.