Rebelde General Alvarez & Datu Kalun i

A media del mes de Marso, ya decidi si Gen. Alvarez anda na Lamitan mira con Datu Pedro
Kalun, el como rey na maga Yakan alla. Ya pensa ‗le ‗se kay dol nuay ta pasa nada con el militar
campania ya pasa ya cerca de dos meses este Marso para saca el Fortaleza Pilar, y para na futuro
plano lansar un grand ataque contra el fortaleza este que biene mes de Mayo.
Bonito ‗se el istoria di Datu Kalun paquemodo ‗le ya queda un como rey del maga wild
Yakans na hinterland del Lamitan. Ya empesa su istoria cuando ya escapa le junto con seis o ciete
uban, na preso alla na San Ramon, el penal colony del maga Espanol 28 kms. weste del Fuerza del
Pilar. Alli estaba le preso kay 16 years old palang ya mata ya le un guardia civil alla na Cavite, Luzon,
de donde gane ‗le. Y aquel tiempo si serioso gayot el dituyo crimen ta manda contigo, como exile ya,
na Mindanao, en particularmente na San Ramon Penal Colony.
Para jende conele puede descubri el maga Espanol naval que tiene gane naval base na
Isabela, Basilan Island, si Gen. Alvarez ya viaja le usando el mismo ruta que ya usa si Kalun cuando
ya escapa ‗le na San Ramon, este gane ruta further este del isla.
El meeting di ila dos, si Alvarez y Kalun, alla gayot adentro na hinterlands de Lamitan, kay el
maga Yakans core que core ya lang di-ila vida na maga di-ila contrallo: el maga piratas del sultan de
Jolo y maga soldao del maga Espanol.
Aquel tiempo ya man mirajan sila dos, si Datu Kalun ta usa ya el nativo costume del di suyo
maga followers, maga Yakan, jende na camisa de maga Cristiano. Na suyo cabeza tiene un folded
turban, que mas alto contra maga natural headgear, para dale con ele mas altor, y pantalon aquel bien
apretao, dol sausage embolbido na intestine de cabrito, y aredor suyo bariga cuantos vecez ya bira un
bien largo colorful sash, despues na costao na un waist un largo kris –serated long knife. Y
prominente na su mano un escopeta, que ara ta serbi como su unico armas.
Aredor suyo el maga Yakan warriors, y maga viejo, mujer, y bata na distancia. Ta sinta le na
unico silia (onde caja elle ‗se ya saca? ya pensa si Alvarez) con alto detras, y na su detras el suyo maga
lieutenants. Ya noticia si Don Alvarez que nuay ni un Cristiano uban di Kalun, que ya escapa junto
conele sale de San Ramon.
Este si Datu Kalun quiere-quiere icha cuento paquemodo ‗le ya queda sultan o rey del maga
Yakan, aquel tiempo jende pa Muslim sino pagano o animist—maskin nuay kita conele pidi icha el
estoria. Ya empesa le,
―——Pues, ya man challenge yo con el numero uno datu del maga Yakan. Ya habla yo
conele, ‗Para dicidi diaton problema y quien el man reign como rey del maga Yakan, ta man
challenge yo con bos na un duel hasta na muerte.‘ Ya accepte ‗le ese dimiyo challenge.‖
Uno na grupo que ya conosce con Don Alvarez, maskin jende ‗le de uniforme, ya man roll
un corto tree-trunk para sinta si Don Alvarez, y habla si Datu Kalun,
―Sinta usted, por pabor, Don Alvarez. Para buena mente y comfortable tu oi mi istoria.‖
Cuando sintao ya si Don Alvarez ya empesa ya tamen si Datu Kalun,
―Ya designa donde kame man duel, aqui gane abajo na Lamitan.‖ Ya tose ‗le un poco como
para limpia su gargande, ya suave sale si vos, ―Pues, tempranito pa talla ya el Numero Uno datu, con
su bien agudo kris. Cuando ya mira ‗le conmigo nuay ni armas, save por un palito na mi mano‖—
aqui ya abaja un mano suyo ensima na suyo riple. ―Bien grande gayot suyo boca na risas, y llamando
con su maga warriors y ta insignia conmigo con su kris, ya ri, ‗Ha, ha, ha.‘‖ Na miyo pensamiento
ya habla yo, ‗Na, ultima vez ya se de ‗bos risas.‘‖
Ichando dos pies na tiera, si Datu Kalun ya hace subi suyo frame na detras del silia para dale
illusion de altor. Kay ele—aki kita puede mira el razon—bien conscious suyo bajo altor.
―Ya chulya yo conele, llamando cosa-cosa nombre: ‗Ebos, mas mala carra pa que conel
chongo … que con el dimiyo buli!‖ Gangya que gangya yo con ele. Si ya puede ‗bos mira suyo carra,
el ojos ta queda bien grande, el naris taman expand como del puerco de monte, y el boca ta man
laway como uno ta ataka con epilepsis.‖
Ya man pause ele, mirando con Don Alvarez con bien serioso carra. Ya habla le,
―Como un loco, el kris alsao na su brazo, lampas na su cabeza, el numero uno datu del
maga Yakan ya man charge conmigo como un irido tamaraw, irido na suyo honor y pride na dimio
insulto y ganga. Cuanto pies ya lang el distancia el datu conmigo, pero no sabe pa ele o ya tiene
suspecho que el ‗palito‘ yo ta agara ay puede mata con ele. Ya also yo el escopeta na mi ombro y
ichando conele na mio sight el numero uno datu—y ahora un grand risas na mio carra, ya jala yo el
trigger.
Todo sila, maga leaders di suyo y maga warriors, bien espantao, shock-que-shock gayot sila
mira conel di-ila numero uno datu ya man baliscat muerto cuando ya insenia lang yo el ‗palito‘ que ya
hace tumba y mata conel di-ila datu con un grito o rayo que ya sale na punta suyo.‖
Ya quita su ojos con Don Alvarez, y alsanto su escopeta si Datu Kalun ya bombia con el
escopeta na aira. Na detras di suyo mga leaders y arreredor suyo el maga jente ya empesa grita y man
cheer, ―Arriba, Datu Kalun. Arriba!‖
―Ansina, Don Alvarez, ya queda yo rey del maga Yakan na Lamitan. Con este di miyo leyal
escopeta.‖
Otra vez ya bira ‗le mira con Don Alvarez, y ya pregunta ‗le cosa honor que ya lliva conele
aqui na Lamitan. Contesta si General Alvarez,
―Quiere yo saca tuyo alliance para pella kita conel maga Espanol, quien el diatun common
contralio.‖
Nuay contesta dayun si Datu Kalun, instead ya pregunta ‗le,
―Ya sabe ba tu que estaba aqui conmigo na Lamitan el hermano de General Aguinaldo … ta
pidi el mismo cosa tu ta pidi?‖
―Si, ya sabe yo.‖
―Y sabe tu cosa mi contestacion conele?‖
―Si, pero quiere yo oi dituyo mismo palabra.‖
―Bueno. Ya responde yo conele con este palabras: ‗Porque man yo sirvi na un general
mientras yo es el rey de este terreno!‖
Ya mobe si Don Alvarez di suyo position na tree-trunk, kay dol ta man numb ya suyo limbs
de sintar. Ya abla le,
―Estos maga de Luzon, ta pensa sila quien gayot sila. Ignorante y tampa sabe todo cosa ta
pasa aqui na Mindanao. Maga presumtuous gayot!‖
―Deberas. Sabe yo se kay original yo de Cavite. Pero solterito pa yo cuando ya man exile
conmigo maga Espanol na Mindanao. Ahora yo jende un Cristiano, o Muslim … soy un pagano
Yakan, como dimiyo maga gende aqui na Lamitan.‖
Selencio sila dos por cuantos minutos.
Para jende pensa si Datu Kalun que tiene le ta esconde, si Don Alvarez ya habla,
―Ya anda tamen conmigo na Zamboanga ese mismo hermano di General Aguinaldo.‖
―Ansina ba? Nuay man yo oi ‗se.
Este gayot si Datu Kalun bien pillo, ya pensa si General Alvarez. Paquemodo man ele no
sabe cuando una man conmigo ya anda el hermano de General Aguinaldo. Ta pretende lang le.
―Cosa man le ya habla. Cosa le quiere?‖
―Ya habla ‗le conmigo que ya bene gane ‗le na Zamboanga con order disuyo hermano
General Aguinaldo para man command el revolutionary forces in Mindanao.‖
Maskin tiene le idea cosa el responde di General Alvarez, ya pretende que no sabe ‗le. Pues
ya man lean le forward, hablando,
―Y cosa tu ya contesta conele, Don Alvarez?‖
 ―Ya contesta yo conele con un pregunta. Este, ‗Donde man debos army?‖
Si oi tu con Datu Kalun ri, el pensa tu ara lang le ya oi ese istoria. Despues de bira le icha
suyo detras na alto detras del silia, y poniendo un posture como un rey sintao na di suyo trono, ya
habla le,
―Don General Alvarez, sigurro maskin jende ya yo habla contigo cosa el dimiyo contestacion
na pregunta si puede yo man ally contigo contra un common enemigo, puede ya tu adivina ….‖
Frustrated si General Alvarez pero cosa man ele puede hace. Antes de sale le na Zamboanga
para Lamitan, nuay man ‗le asegura que puede le saca con Datu Kalun como un ally. El di Datu
Kalun gane compoblano, el hermano de General Aguinaldo que de Cavite tamen, nuay puede—
porque man conele el man junto si Datu Kalun para pella con el maga Espanoles?
Embes de volve si General Alvarez derecho para Zamboanga, ya habla si Datu Kalun
que mas bueno pa sale le si sereno ya para nuay peligro man encuentro le con el naval patrol del
Isabela naval fort. Como mucho pa tiempo antes de man sereno, ya pasa el tiempo na un gran fiesta
que ya dale si Datu Kalun. Ya mata le cuantos cabeza de baka y puerco, maga cabrito y manok, y ya
cusi saco por saco de arroz. Jende lang suyo maga jente ya man fiesta, pero hasta maga di-ila vecinos
aredor o hasta aquelos lejos na di-ila barrio. El maga Yakan quiere-quiere gale baila, ya observa si
General Alvarez, con sonrisas permanente na carra, juga ta pacha un rattan basket, tuca di-ila
kulintang y flutes, y demonstra maga warrior fights que tal vez maka miedo kay dol deberasan gayot.
Pero cosa gayot ya man enjoy y admira si Don Alvarez, de todo clase del celebration, el carrera de
caballo, que pirme tiene bonito ta suna sale na maga campanilla culgao na pescueso, que ta man
accompany kanila maskin donde maga brioso caballo ta anda, bien alisto y corre gayot sila, guapo
mira con el cuerpo di-ila pirme mujao de sudor, y con excellente caballeros que maskin cosa hace el
rival caballeros jende ta cay na di-ila tejido-tapete de montar.
Cuando para volve ya le Zamboangaa y ta embarka ya na su vinta –sailing canoe, si General
Alvarez ya pensa:
Ta tiene ya edad si Don Pedro Cuevas—Christian name of Datu Kalun. Cosa man aquel na
disuyo tos? jende bueno para conele ... su custipao.

i
Extract from “An Invitation to Dinner”