ESCRIBIDO PARA UN

ZAMBOANGUENIA QUE ANTES

DALAGUITA
by Francis C. Macansantos

Cuando caja yo
Ay puede cuji completo
El imagen de tu cara
Como un vision vivo
Na todo detalla
Ta aparece creciendo
Limitao y arreglao
Del tanto agudo o blando linia:
El ardor de tu puro esplandor?

Cada pilo de tu hermosura

Que ta abuya na mi pensavista
Cada rastro que asigurao,
Ta entra na su nicho
Na espacio del recuerdo --
Y ta queda agudo,
Ta hace iri con el corason.
Por eso siguro,
Para de mi mismo bien
No quiere mas tu bolbe,
Vivo y ta resulla
Adentro na de mi imaginacion.

Con quien yo ta acorda:

Maga amigo, conoce, o maskin maga contra,
Completo el pigura y color como antes.
Pero donde ya el de tu bos,
Donde ya el dulsura maribalan
Del abierto madrogada?

Sayang gayot,
Pero mi culpa este todo
Que jende tu ta bira.
Tiene yo miedo que tu porma
Ay sirbi como un brillosa acusacion
Y como ultimo pena
Que nicisita ya cumpli.
Pero no quiere yo muri,
Jende yo un jiro,
Si no cuerpo umalin, viejo y miedon,
Que ta pidi que tu apasigua,
El dolor que ta vivi siempre
Daw si no hay muerte.