Santa Uxía de Riveira, 1 de xuño de 2010.- O Auditorio Municipal de
Riveira vai ser escenario este próximo domingo, a partir das 18 horas, da xa tradicional Actuación de Fin de Curso da Escola Municipal de Ballet, na que actuarán un total de tres grupos de bailaríns con idades comprendidas entre 4 e 17 anos.
O evento foi presentado este mediodía polo concelleiro de Cultura e
Festexos de Riveira, Luciano Fernández, e pola profesora de ballet clásico da Escola Municipal, Cristina Riveiro, quen exercerá de directora artística do festival.
Segundo informou esta última, no repertorio figurarán pezas de
Gottschalk (un autor moi próximo aos ritmos caribeños), de Helsted, Paulli e Gade, e dos clásicos Strauss e Tchaikovsky. Tamén incluiranse dúas obras de Philip Sousa e de Sting/Cheb Mami, que levan por título “Estrellas” e “Rosa Desértica”, respectivamente.
Tanto Luciano Fernández como Cristina Riveiro quixeron destacar a
dedicación e o esforzo de que fixeron gala os alumnos dende o inicio do curso, cuxos froitos poderán comprobar os asistentes no espectáculo montado.
Así mesmo, recordaron que a entrada para asistir á actuación é
gratuíta e recomendaron retirar as entradas media hora antes do inicio da función.