Kitta Katubba Pa’lappassang Rumallang tahun 1431 H / 2010 M

Battu ri
Dewan Pimpinan Pusat Wahdah Islamiyah

MA’NANNUNGANG ILALANG RELLANA ALLAHU TA’ALA

KARAENG LAMMOROKA NAMANGNGAMASEANG

 





 Uru-urunayya kana’

Tena kana siratang, kanang- kanang lani pau, passangngali kana Sukkuru Pammujita, ri karaeng
Malompoa, Sanrapang kana pannyungke, bicara pappakariolo, kana malabbiri angngimbolong makna
masarro malompo’ maluara tampaserena.

Sukkurukki lanri lebbatta nasare pakkasia mabaji, iareka nikmat, baji na barang-barang kammaya
tompa Tappa massing niaka ribarambanta’ lompo taenaya passanggaenna, ajjari saba naki nia ngaseng
a’ra’pungang ammempo abburung-burung ritampaka anne, naerang muri-muri.

Ammujiki nasaba ataki ri Ia’ Karaeng angkammai sikontu alanga, Karaeng anjaria ero’na ‘ kuasa ri
tunggala ta’se’re-se’rea , karaeng siratanga nisomba’ nipappalakki siagang nipakkusiangngi allo bangngi.

Allahu akbar 2x Walillahilham

Tau toa siagang saribbattang tunipakalakbirika gaseng niaka hadere

1
 Ganna ruana’
maeki naki tuli nia ampakabiasai massing kalenta, Assalawa ki’pabattu sallang ri Nabbita’ Na’bi
jo’jo’na Karaeng Malompoa, akjari tunipinawang ri tunggala kana gautta, ri tallasa katallasanta ri
kampong pa’linoanta ri tompo’na anne lino

Allahu Akbar 2x Walillahilham

Ri anne kamma, anne alloa, a’kumpulumi umma islanga sibatu lino’ a’rappungang a’gompo-gompo,
suara ta’muri-muri, appakalompo Attakabbere’ se’re kana najului, Subu-subu dudu inji, nani
langngere’mo sa’ra, Takabbere sibali-bali anggalluru attangnga langi, takabbere angngeranga kana
ta’kimbolong takabbere nabassukanga lila annarrusu ri ati maci’nong angngerang dinging-dinging,
takabberena ammurusu ri pa’rasangang ammutusu attangnga langi naerang anging sa’ra
rikasa’ra’kanna .

Ri kajariang kammayami anne, nakigassingmo ta’sunge’nge, dinging-dinging pa’maitta, tugguru je’ne

matanta, lanri niana niu’rangi rewasa le’ba laloa, inaimo ati tapacce ,pa’mai tadinging-dinging, katenapa
nasiapa sallona, ri pa’lappasang rioloa, se’rea baine siagang inji bura’nenna, se’rea anak
sipammempoang inji tau toana, anne kamma tenami risa’rinta tani cini rupanna tani langngere
sa’ranna, ‘bellami ri passimbangenta ka’limbammi riaanja lingka ri padataring ri pa’rasangang
ma’nannungang Tania kala’busanna . sileomi rannu nyawana, rannu saba ganna’na puasana, saba
parentana karaeng malompoa ,rimangkananna .

“… siagang pa’cukku laloi bilanna puasanu nanu ppakalompo ri karaennu saba le’ba naserenu pappijo’jo
dasi na dasi barang nia’jako sukkuru”. (QS. 2 : 185)

Ikatte mami massing niaka ri lino, maeki nani pajjari pappilajarang, naki massing sikatutui sipakainga,
kaikatte lagi tani asseng kalabbusanta . maeki nani paccukku tappatta, naki pattojeng panynye’reanta
dasi na dasi barang katambanji mallatta. Naki ma’nannungang tuli a’jari, Insan Rabbani. Bella ri gau
salah, ta’le’basa ri teka kodi , ta’lappasa ri jekkong nawa-nawa.
Ma’nannungangki appakalompo, to’doppuli ri panynye’reanta kippakatangkasa ri gau dosa kisipainga
ri gau narellaia Karaeng La’birika namangngamaseang.

“ apaji nanu to’dopuli lalo ri katojengang ri apa le’baka napassuroang menge rikau ke’nang siagang ri
tau tobaka , nutea’ lalo ta’liwa-liwa, sitojeng-tojengna Karaeng malompoa masarro naissengi ri apa
niaka nugaukang “. (Hud : 112)

2
Allahu akbar 2x Walillahilham

To’dopuliki ri syarea’na Islanga, ri pangngajara’na Na’bita, iamintu oloanna mabajika oloang narellaia
karaeng malompoa, pamminawangngang angngeranga katarompokang , apaji naki sabbara lalo
ilalangna tuli a’gau baji, namassing kijagai kaniakkanna. Syarea ampakatinggi kaniakkanna rupa tauwa,
angngangkaki deraja’na tumabuttayya, apaji naki katutui , kijagai baji-baji kiboli ilalang tampa majarre.

Umma islang niaka hadere

Ikatte ngaseng ritampaka anne tuni pilei ri Karaeng malompoa massing nasare pa’pijo’jo , ma’nannu
gang lalang tappa tuli’ gau kuntu tojeng, ri amala mabaji ri gau katarompokang ri kana tojeng tanaleo
gau salah.

Iaminne rewasaya, susami niboya oloang kana tojenga, sukkarami ni gappa rurunganna gau
mangngeranga kabajikang, nicini’mi tasiratanga nicini, assallerang tommi gau tuna taniaka siri’na.

A’jari tunipinawangmi gau salaya. A’jari jarung teka kodia a’jari pintala’tommi tujekkong nawa-nawaya.

Lunturu’mi pangngajaranna agamaya kaburu’mi syarea’ka, antimbo ruku’mi sipa kodia rapang pippisi ri
bosi-bosiya . nisa’belammi pakkaletutuna tupanritaya tanipilangngeri panggappana tucara’detta.
Nipassamaturukimi sipa’ jekkong nawa-nawaya, nipa’bulosibatangngimi teka kodia. Apami sallang
kajarianna pallinoang tabiasayami sallang lakajariang ta’bale’mi sallang linoa kakodia nikana baji,
bajikami nikana kodi.

Allahu akbar 2x Walillahilham

Apaji na’jarimo jamang-jamang , tamakullemaki lari rikajariangna umma Islanga. Passangngali antamaki
attangnga, naki jari jarung kalli pangngala, lappaenteng kana tojeng, angnganiang gau baji abbulo
sibatang accera sitongka-tongka ampakasalamaki pa’rasanganta, bori pammantanganta. Maeki nani
lappa lima bajunta, naki basse lipatta, ambunduki salayya, ampabetai agamata. naki tea tong
takkaluppai, ri gau pakkalinoanta ri ekonomita, solla naki bella ri tuna kasiasi. naki tea takkaluppa ri
gau’na pa’rasangang labattua ripadataring Allo ribokona Karaeng kammaya Ero’na.

Rigau kammayami anne masarro masiratangmi pammarentaya bella ri gau salah batunna kana
koruptorka siratangmi ta’tinro amboyai timungang passulukanna negarata battu ri majaiya masaalah : ri
pa’simbangenna kompor gaska tenapa nale’ba batuiseng rimaraengngannayya, apami sallang
kajarianna.

*. Eeh … ikambe ngaseng tumabuttaya ri tau niparentaya kiu’rangi kania’kanta , saba anjo
pammarentata sanrapangi rupa carammeng tumabuttaya . kamma nakaya karaeng malompoa :

“ Siagang kammayaminjo napa’jari ripa’simbangenna ke’naning tau bali’ballangnga a’jari bela-belana

iareka pammarentana battu ripa’simbangenna saba panggaukanna tonji “. (QS. Al An am : 129)

3
*. Appakkaletutua ri kattengaseng tau tuaya, anjo ana jari taunta belo-belona atinta panrannuang
rikatte battu ri Karaeng mala’birika namangngamaseang , teaki ma’ring nakelo kagassing nakana
mange assikolah nangngaji nari tanjungja ammenteng, ri molkaji ammo’joro tani asseng panggaukanna .
ikatte tau toaya teaki ero najina ,kipa’jarilaloi anatta, anak sholeh ,anak rimang ri tau toana.

*. Ikatte bainea bentennaki kamponta, belo-belonaki lino teaki ma’ring najina pammanrakinna
burannea baji kananna, ribokota amma’risi. Apami sallang kajarianna punna naallemo tasiratang naalle
nakajariang tojeng tommo nasikalinna bokojilampanna, sassalalang tattappu’mi sallang kalenta garring
Tania balleanna erokki sallang mate nataero allampa nyawata .

Umma islang niaka hadere …

Eeeh… ikambe ngaseng ana mudaya ikatte ngaseng penerusnaki agamata bangsata , sallang lana tabaki
pa’kuta’nang ri allo ribokona Karaeng Malompoa : kemai kila’busu masa mudata ‘ lanri kammanaminjo
ki pare laloi masa mudata a’gau baji amal sholeh, sanrapang Ali Bin Abi Tholib tucara’de’na agamata ,
Mus’ab Ibn Umair ,siagang ri pa’simbangenna. kanang-kanangki nisa’bu punna baji gau-gautta
lammorokki niu’rangi punna sukku agamata, tuli nipau nibicara ampe-ampeta.

Bulan rumallangnga anne kamma niami ammaliang bella ri passimbangenta a’lampami tamassaile
abboko rikatte angngerangi catatan puasata sassalalammi tau balangpareka ri puasana ranggaselami tau
tagannaka tarawena amala baji nasike’de dudu tonja, najallomi sarenna nakusissing batang kalenna,
karumallang labattua ri gau’na tampolea tena tompa tantuanna, maiki naki massing ampaccukkuki
amalatta . kamma ri pappasanna Nabbita : “appuasaki annang allo ri anne bulanga.

“. Inai – Nai Tau anrurungangi puasa rumallanna siagang puasa annang allo ri bulan sawwala sanrapangi
tau puasa sitaung sallona (HR Muslim ).

Rioloang takutongko’na katubbaku rikala’busang ceramaku appasanga rikatte ngaseng ri bura’ne siagang
baine ri ana siagang tau toa punna le’baki sallang rumallang ri le’banna khatubbaya ri wattunta
jamataeng sipammoporangki massing ri dosata, ikatte bainea balangpareka ri burannenna siagang ikatte
burannea tinggi langgaya ri bainenna sikatutuiki sikalabini rimang sibatu balla sileporang bangngi allo.
Ikatte tau towa balangpareka riana’na ri ana’ jari taunta belo-belona matanta bunga-bunganna atinta
kiajaraki ri agamaya ri gau kuntu tojeng barang ante kamma na’jari anak sholeh. Teaki ero sigenra-genra
ripassabakkang sike’de dudu, kapunna repakki sisala-salah singkampongki sallang tasipakatau, siampi
tasipammanaikangngi sitette gantiro tasipangngallea pepe sitinrangngang palang tuka
sipangngammukang taipalolo . punna kajarianmo kamma ya ammayumi sallang rapanga tani pinawang
mania tommi bontoa angngalle kappo manaung tommi kappoka angngalle bonto. Susami sallang
pa’samaturukanga bellami julukanaya allanynya tommi parekanna bajika ri boritta.

4
Ri allo mala’birika anne maeki naki ammotere angkusissingi massing atinta amparessai batang kalenta
antekamma kale’bakkanna , maeki naki ka’rang sombalatta naki gunciri gulinta kitangkasi nawa-
nawanta kipakalompomi tekatta kissamaturu mammuji appakalompo sukkuru appakatuna kale
ampassareang leko sike’keki kalenta naki pala doang ri Karaeng malammoroka namannarima toba.

“… Ooh .. Karaeng Malompoa ikatteji karaeng angkammai langika na buttaya , angkuasai lino kammaya
tompa akherat. Ri anne alloa sujjuka ri dallekanta rimajaina dosaku karaeng . kuassengikaraeng
rimajaina salangku kipammopporanga karaeng ikatteji siratangkupalapammopori

..Eee Karaeng ku, ri Katteja anynyomba karaeng baji ku assenna jaina passareta pangngamaseangta
mange rinakke kuassengi karaeng inakke majai gau salangku kipammopporanga karaeng taena
karaeng mammopporo passangngali Ikatteji Karaeng.

Eeee….. Karaeng malammoroka namangngamaseang ri Katteja Karaeng appala pa’lengu ri Susana

tallasakku kilomo-lomoang laloi dakkaku kisarea pangngamaseanta , Riruayya tumangnganakkanku
attalasaka iareka le’ba matea iyami saba karaeng naku asseng kalompoanta, angkatuowa siagang
pacce ampakalompoa ri kamase sileporang sabbara tu’guruki je’ne matanna karaeng saba gaukku , ooo
… karaeng taena nakkulle kubalasa pakkatuona passangngali pappala doangku ri Katte karaeng.
Kipammopporangi dosana kasarei pangngamaseang kipammopporangi le’ba matea, ki tuntungi niaka
inja attallasa. Kisarea karaeng kalompoang nyawa solla kugau baji mange riia.

Ooo… karaeng taenayya pajjuluanna … ki pa’jarilaloi ana jari taungku belo-belo rimatangku ki
pa’jarianga anak sholeh , kipa’jari agamaku karaeng pangnala ri tunggala urusangku, pasalamaka ri lino
karaeng kammaya tompa ri allo riboko-Ta.

Ooo… karaeng malompoa … anrinni , .. anne alloa karaeng rannuwa nasannang nyawaku. Sileo
ranggasela paccei atingku karaeng kania inja sari’battang julu agamaku tamakkulle tasampangmi
allappasa , niondang ri kamponna ritau tale’baka rella ri agamata karaeng, kitolongi umma islang niaka
ri Palestina , ri Afganistan siagang ri tunggala pammantanganna ,

Ooo… Karaeng Mala’birika… kijo’jokanga ma’nassana tojenga se’re katojengang kilopoanga atingku
lamminawang , kipakasingarranga ri ma’nassana kodia se’re kakodiang naki pakalompo nyawako bella ri
anjo kodia.

5
Ooo… karaeng kisareang laloa ri tompo’na anne lino iangaseng kabajikanna siagang kabajikanna allo
ribokota kipakabellalaloa battu ri pammanrakinna pepe’na naraka ,… amin …amin…amin

Wassalamu alaikum warohmatullahi wabarokatuh.