Internet sangit

Smart Bro ang akong internet service provider (ISP) sud na sa pila ka tuig. Wa koy reklamo, gawas sa pila lang ka takna nga nikamang ug naputol ang koneksiyon sa internet. Hangtod sa niaging semana. Kanus-a nakapalta ko og pila ka adlaw sa pagsuwat ning akong lindog. Kay wa koy internet connection. Ang Smart Bro maoy sad-an adtong tanan. Maka-internet lang ko dayong tungang gabii ug kadlawong dako. Mora kong gihilantan. Nakumbinser na ko sa resulta sa survey nga internet survey sama na ka-importante sa tubig ug kuryente. Maong nituo ko sa tambag sa akong bayaw, nga taguon lang nato sa ngan nga Jay Jakosalem, pagsuway sa Sun Broadband. -o0o-

P995 nga Sun USB Dongle ang akong napalit. Prepaid ang akong gipili kay wa koy pailob pag-adto sa ilang sales center ug pagpakita sa proof of billing ug ubang panginahanglan alang sa postpaid. Bugtong nakong problema sa tindahan sa Consolacion mao ang pino kaayong manual. Salamat na lang nga gibasa alang nako sa gikaabot nakong amiga, nga taguon lang nato sa ngan nga Kara Mae Noveda. Niuli ko nga nabalaka nga di masulbad ang suliran. Kay wa koy bilib sa Sun. Gitaod nako ang SIM sa USB ug gi-plug sa nagmingaw nakong PC. Human lang sa pila ka pamilok, online na ko. -o0oUg andam kong makiglalis ni bisan kinsa, apan mao ni tinuod: Ang USB dongle sa Sun mas paspas kay sa akong Smart Bro nga may antenna. Ambot tungod ba kay di pa sama kadaghan ang subscribers sa Sun, o mas maayo lang gyod ang ilang sistema, o maayo lang sila sa sugod. Maong lingaw kaayo ko sa lima ka adlaw nga unlimited nga internet connection nga pakapin sa napalit nga USB dongle. Kon di lang gihapon mabalik ang naandang koneksiyon sa Smart Bro karong semanaha, mahimong magpa-load ko og dugang. O mosusi sa mas paspas nga postpaid plans sa Sun. -o0oAkong kasinatian nitakdo sa sibaw nga mga reklamo sa mga tigpaminaw sa DYAB Abante Pa, Bisaya! mahitungod sa nagkamang o nawa gyod nilang internet connection. Inay awhagon silang modangop sa National Telecommunications Commission (NTC), nga inutil pagbaraw sa binuang sa ISPs, gidasig nako sila pagpabuhagay sa ilang kasinatian sa kahanginan. Nanghinaot ko nga ang pagsaw-anay og kasinatian makagiya sa mga konsumidor unsay labing maayong ISP sa asang bahina sa Sugbo. Timaan sa kamasulub-on sa kalidad sa internet connection dinhi sa ato, way ISP nga nakadawat og lunlon nga pagdayeg. Nakadawat hinuon sa labing daghang boto ang PLDT

myDSL. Patas ang pagdayeg ug pagsaway sa Smart, Globe ug Sun. Maong magpataod na lang tingali ko sa PLDT myDSL. Apan mag-agad ning tanan sa tinuod nakong bosing, nga taguon lang nato sa ngan nga Iris. [30] leo_lastimosa@abs-cbn.com