Since 2006

ZAM Information Department

Volume 6, Issue 41 March 18, 2012

Estd. 2006

informing people, transforming lives

Na pilna ding lam kong hilh zo a, na gamtat zia ding kong gen zo hi. Paunak 4: 11
RSC NASEP ZIA LEH ZUIHDING PAWLKHAT
March 15, 2012 ni-in UNHCR-CDU uliante vaihawmna tawh Kipawlna makaite tawh kikupna, thu pulakna hun khat Chinese Assembly Hall ah kibawl thei hi. ZAM panin Lutangpi Huh leh Lai-atpipa va kihel thei hi. Tua kikupna sungah, tulaitak RSC aa alianpenpa zong kihel in, RSC ii nasep zia leh galtai mipi-in koici panpih thei ihiam cih lamlahna tom kim takin neithei hi. Amah pen, galtaite vai a sepzawh kum (20) val khin khat hi aa, Thailand gam RSC zumpi-ah kum (4) val a sepkhitteh tuma kha nih pawl pan Malaysia hong tung ahihi. Nasep zia tel tuakin muanhuai mahmah ding hi. RSC bang hiam RSC cihpen Res ettlement Support Center a tomlawhna ahihi. Ei kamin tomgen leng, resettlement icih (nuntak khuasak kikna) vaite panpihna phualpi ki cithei ding hi. Ahih hangin, USA gam tuntheihna ding, USA gam ah resettlement ngah leh ngahloh dingte pen, amau khentatna pan hilo-in, amau pen palai nasep sem uh hi. A beisa kum khawngin, RST interview ih zawhkhit teh OPE in hong sam hi. Tuhun ciang RSC ii sep ahih mah bangin OPE ci nawnlo uh aa, RSC interview cizaw uh hi. RSC pen UNHCR pan ahiam Hilo hi! UNHCR tawh kisaina omlo ci leng zong hi dektak phial hi. Cihnopna-ah, a nasep, a tupna leh a vaipuakte uh atuam tuak ahihi. Kibang vetlo hi. Malaysia lian ah bel, UNHCR huangpi sung ah RSC zum leh DHS zum om ahih manin, Zomi tampi-in ki theikhial thei pahpah hi. Huang khat sung aa zum hongkhawm bek uh hi aa, a nasep zia uh leh a nasep uh kibang hetlo hi. RSC koipan ki cithei IRC (International Rescue Committee) pan ahih kei leh IRC nuai aa nasemte ki cithei ding hi. RSC nasep bulpi bang Asep bulpi pen uh a tomin gen hileng, USA gamah a tungthei ding galtaite UNHCR pan RSC in a ngah khitteh, DHS (Department of Homeland Security) te ii ettheih ding, tua galtai pa, galtai nu ii thu leh vai om a kisam teng kaihkhop sak khol uh aa, lam khatpan DHS te aa ding vai kisam khempeuh bawlsak khol uh, ki cithei hi. DHS icih pen, USA gam ii gamsung a lut a pusuak mimal etcikna/sittelna aneite hi aa, a tamzaw in, kawilai-in ih theihzawk lah-wah-kah a cihpen ahihi. Himah hi, DHS icih teh USA gam ii lah-wah-kah ci-in ihtheih tek ahihi. RSC nasep zia UNHCR panin RST interview a zokhin khat pen RSC puak uh hi. RST zawhkhit teh aki puakkha pah zong omthei aa, amau nasep zia zui-in zong khat leh khat kibanglo thei hi. RSC in interview hong sap baih leh sap baihloh pen, RSC te tung bekah ki nga khinlo aa, UNHCR pan ih laiteng, ih thuteng RSC tungkhin hiam, tung nailo hiam cih in zong thu tampi sai hi. RSC te kiang galtai khat ii file/lai teng a tun khitteh, RSC in tua galtai pa/nu thudotna (interview) bawl ni ding vaihawm in, galtai pa/nu file sung aa om phone nambat kipia pen tawh sam uh aa, interview ni ding zasak uh hi. Tua interview pen, ih theihtek ahi RSC interview ahihi. Tua hi aa, UNHCR te kiang na piaksa phone nambat pen na laih leh, ahih kei leh na zatnawn kei aa a hun lapin zasak lo-in na om leh, RSC in UNHCR pan a ngah uh na file sung aa om phone nambat dandan in hong sam ding uh hi. Hih pa, hih nu a phone nambat ki ngah nawnkei-in, kan mengmeng ni hong cimanlo ding uh aa, bang hun hiam khatteh contact ngahlo (hopih theihloh) teng hong suahsak uh teh hong helpan ding uh hi. Tuadan hi-in, tuni aa contact a ngahloh khat uh tuni-in Kipawlnate tung kan beh, kansak pah cihbang sem manlo uh ahih manin, UNHCR aa ih phone nambat piaksa pen aki zattheih nawnloh lam ih zaksak loh teh ei kisumh mahmah hi. Kha tampi ziakai tuam pah hi. RSC hoihtak na kigin leh DHS buaihuai nawnlo Atung lam ih gensa, RSC ii nasep pen DHS te etding aa a kisam teng vaihawm sak khol cih hi ngiat hi. RSC inteview cihpen DHS interview mah hipah ki cithei lel hi. DHS te dot ding thu a haampi teng a kicing zaw in RSC in hong dong khol ahihi. RSC in hong dot leh ih dawnkik dan teng lian mah DHS te kiang na puak uh aa, DHS in thu hong dot teh, tua RSC aa ih gensa teng tung tawnin kisam in cei, acih teng bekmah DHS in hong dongkik hi. Tua hi aa, ih theihngei sa mah bangin, RSC leh DHS pen a nasep uh leh a tupna kibang sitset hipah lel hi. Galtaite aa ding hong sepsak zia uh a kibang ahihi. USA gam a lunggulh khatin DHS hong dotciang limtak dawng dingin kiging pan cihbang a omthei ding hilo hi. RSC interview ah lim takin ih dawntheihna ding kiginna pen DHS a kigingta na hihi. RSC interview ding limtak na kigin leh DHS ah buaina ding om nawnlo phial lel hi. Kiginkholh kisam hi. DHS interview ding ahun ki ciangtan theilo RSC te nasep lak ah khatmah ahi, DHS ulian (officer) te USA gampan a sap uh pen vai lianpi khatmah ahihi. RSC interview a zo khin a ciangtan zah khat uh a cin ciang, USA gampan DHS interview pia dingin officer te zasak uh aa, sam uh hi. USA DHS zumpi panin, a honhon a pawlpawl in Malaysia hong paisak uh aa, kha tampi sem hetlo sawnsawn uhhi. A honhon mahin kilaih uh hi. Kilaih toto ahih manin, DHS zum kikhak phot hi cihte, interview omlo phot hi cihte ih tuakzel thei hi.

ZAM THUPUAK
Tua ahih manin, RSC interview a zo khin khat DHS interview pen kha tuazah ciang, ni tuazah ciang kisam ding, ki cilian theilo hi, ci hi. Kha tuazah pawl cihbek ki lamen thei aa, kisam hamtang ding ki citheilo ding hi. RSC in, DHS officer dingte USA gampan a sap hun uh leh, DHS lampanin Malaysia hong kuanthei ding ulian kicing a ompah leh ompahlo-in zong tampi sai ding hi. Tulaitak lian bangzong nipi kaal nih sung khawng DHS interview a omlo hi aa, den aa ih gen tawlkhat sung a semkhin DHS officer te ciahkhin in, athak dingte hong tung nailo hizaw ding hi. RSC in vai hawm laitak ding hi. Tua hi-in, RSC interview zawhkhit ciang kha tuazah teh DHS interview hong sam ding cih kigenthei lian ngeilo hi, ci hi. A manlang theipen ding bel vaihawm den uh hi. Kisang leh kisanglo vai RSC in khentatlo Galtai khat USA gamin a sanzawh leh sanzawhloh vai pen RSC te ii nasep hilo hi. DHS te khentatna bangbang hizaw hi. DHS in USA gam luttheilo ding khat anial leh a lutthei ding khat a san vai khempeuh RSC in ama mun tuaktuakah panpih hi; RSC in thu khentatlo hi. Mipi zuihding RSC pan zaksakna RSC tawh kisai dawptheihzia pen, mi (40) ta a zum ah zingtung aa va pai-in va dawp cihdante a vaihawm loh zawh uh e-mail leh phone tawh dawpsak uh hi. Tuazawh pen, mi khempeuh in phone leh e-mail tawh kidawp pah ziahziah takpi aa, RSC ulian nasemte-in ni simin vaan/sai zo nawn vetlo hi ungh, ci hi. Ni khat sung bekbek in, galtaite tungpan thudawpna phone a tawmpen (40) vei bang hong lutin, nipi kaal khatin e-mail bekbek (700) bang hong lut aa, khat khit khat etding hun tampi beipah, ci hi. Paw lkhatte, zandeuh mahin RST interview mankhin RSC interview adawp zong ki-om zelzel in, athu paizia telloh man aa hong kidawp gawpgawp tam mahmah, ci hi. Na ngaklai un, cihkul den, ci hi. RSC nasep zia telin, mi kimin ei maban omzia tawh ih etkak theihding, athu ih telding hong vaikhak phapha hi. Cihnopna-ah, phone tawh kidawp thei tah ci aa, dawpding hinai hetlopi a kidawp a tamluat ciang, RSC zumte nasep tam mahmah kawmkal pan buaituam mahmahin, ko nasep aki behlap luatciang no mipi ii vai mabante ziakai zaw semsem cih hong phawksak nuam uh ahihi. Kidawp thei mah hi; A hunkhat om zawdeuh a cinuam uh hizaw hi. Tg. Kham (iNFO)

March 18, 2012

Sang Siate Panpihna Piakzia Kilaihta

UNHCR-Education Unit te makaih March 13 ni-in Sang Siapite kikupna leh March 15 ni UNHCR-CDU te makaih Kipawlna makaite tawh kikupna tegel pan Education Unit pan, Sang Sia panpihna vai tangkona khat nei uh hi. A beisa kum khatval sung Sang Sia (pawlkhatte) panpihna (khasum cilo uh) apiak tohtoh uh pen, 2012 kipat pan, UNHCR in sumbulpi (fund) a kicinlohna hang tawh, anuai aa bangin a piakzia tampi khiamsukta uh hi; Panpihna icih ziauh UNHCR in compensation acih pen Sang khempeuh kipiazolo ding aa, a tawmpen kum khat val a honghong khin Sangte bek ngaihsut sakthei, Sang khatah, Sang naupang 25 leh 49 kikal a om leh Sang Siapi-in compensation ngahding, sang naupang 50 pan 74 kikal ciang a omleh Sang Siapi leh Sang Sia dang khatin ngahding, sang naupang 75 pan 99 kikal ciang a om leh Sang Siapi leh adang Sia nih in compensation ngahding cih bangin, sang naupang 25 pen Sang Sia khat danin ratio tawh piata uh hi. Galtai Sangte vaihawmna haksa mahmahta 2012 sung limlim, hih panpihna pia ding acih khit uh hangin, abeisa kaal ciangah, UNHCR in Sang Siate compensation (panpihna) a piak uh om nailo hi. Bek thamlo-in, tukum aa kipan Sang Siapi khat ii panpihna sum pen RM300 bang kiamsakta uh aa, Sia dangte RM400 kiamsakta uh hi. Fund omloh man ci uh aa, eilam pan phun theih, ngettheih bangmah omlo hi. Hihbang vaihawmthakna tawh kizui-in, Malaysia aa ih naupangte a pantah, pilna ahilh tangtang Sang tampi vaihawmzia haksat mahmahna kituak semsemta hi! ZEC Thupuak

Palai Tawmpen Kum 2011-2012

Ih Kipawlna ZAM in, zum hongin, zum kahin mipihte vai tuamtuam a panpih kum guk dektak sungah tulaitak aa ZAM kum 2011-2012 pen, zum lian aa palai nasem kitawm penpen kum ahihi. Mipi-in hih thu ih telsiam ding kisam aa, bang hunin bang vaite zum in semman zawdeuh, kei vai banghun hileh hong ki vaihawm sakna lempen cihte leh ahihtheih nak leh ih zum ah, ahih kei leh palaite tungah dot masak zawhding kisam zelzel hi. Cihnopnaah, gamlapi pan ahih kei leh nasep ki ngen liangin ih ZAM zum pai aa, vaihawm theihding khatpeuh a lemlosa aa ciahkik khaknate a omlo theithei ding ih vaihawm khopding kisam hi. Kipawlna min tawh kihel loh phamawh kikupnate, pawi khatpeuh, nopna-dahna vai khatpeuh hong omvat khawngciang palai teng zong, tua nibup ai ma pan zia ding kikup hak liang theizel hi. Ahi zongin, tuateng kawmkal mah pan, palaite leh mipi-in vai omzia leh ih hunte iki theihpih tek nak leh seplah ding omlo hi.

ZOMI NAM NI DVD Vai Theihsakna

2012 Zomi Nam Ni (Malaysia) pawi bawlna DVD RM10 tawh kingahthei ta hi. Hun kipat pan a tawpdong, Thugenna, La, Laam a vekpi-in DVD sungah kihel hi. Zomi omna inn kimin ih neihhuai, ih ethuai DVD khat ahihi. Lametloh kawmkal pan copy bawl simin azuak ki omthei ahih manin, anuai aa te na entel hamtang un; DVD dal pen Sony disc tawh a kibawl ngiat hi. Atuamna tung, Zomi National Day 2012 sticker asan, abem khat om hamtang ding hi. Abawm sungah maan (photo) pawlkhat a kigawm laidal khat om hamtang ding hi. Theihsakna Thugenna, lasakna, laamna ahi zong, tomno ahi zong, saupi ahi zong, a vekin ahi zong DVD pan copy khia-in youtube leh internet (website) khat peuhpeuh pan ettheih dingin koih (post) kiphal lo hi! Information (Committee) in a kisap ciang hong khah lel ding hi.

DAHPIHNA Sia Khai Lian Mang (Phunom Khua) ii a

tapa Damien Zam Sawm Langh (Kum 22) pen February 24, 2012 ni-in, omna Puchong ah leitung nuntakna nusiain, March 14, 2012 ni-in lei-ah kituh kik hi. A cianlai a innkuanpihte tawh kikimin Zomi bup ih dahkhawm hi. ZSM Numeite Aa Ding Khutsiam Sinna UNHCR-CDU te makaihna tawh aki vaimawh, khi khil, taukhil, ba-la-chaung kandan Zomi sungpan a sinnuam peuhmah in ZWO ah min kipia theita hi: S/n En Cing (016 285 1234) LUNGDAMPIHNA UN pan leh ZEC pan panpihna/ khasum ki piazo takei leh, ZEC-Cheras ah Zomi naupangte veina tawh kum khatval a hun khempeuh apia khin Sia Thang En leh Lia Ciang San Nuam te, March 15 ni aa pumkhat suahtheihna ZAM pan ki lungdampih hi.