Since 2006

ZAM Information Department

Volume 6, Issue 44 April 8, 2012

Estd. 2006

informing people, transforming lives

Na mite a kempa hong hi in la, amaute panpih to tawntung ta in. Late 28: 9

MINSANNA NGAH NAILO GAMBEL KHAT II THUTOMNO (BIODATA) KAIHKHOPNA KIPAN

Malaysia gamsung aa om, register (minsanna) a ngahnailo galtaite ii athu a tomno (mang kamin biodata) kaihkhopna khat UNHCR in vaihawmna neiding kithawi uh hi. A makai ding pen, tuma kum nih val lai aa UNHCR pan mobile registration a makaite mah hi aa, amau kampan leh a tangkona uh om bangin, hih vaihawmna thak pen mobile registration hilo aa, Biodata Kaihkhopna hi, ci uh hi. Hidan vaihawm zia om ngei nailo kha ding hi. A ngeina leh nasepzia a mazang pending zui-in, Kipawlna leh Kipawlna makaite tawh vaihawm khawm uhhi. Kipawlna tawh vaihawm cihthu hong om ciangin, a ngeina bangin, kua kipawlna pen, bang hun, bang ni-in kaihkhopna nei ding uh hiam, cih ki lunghimawh leuleu aa, lunghimawhna mahtawh kigensawn ngeingai-in, thuging tam mahmah bilbel hi. Zomi gambel mi tampi tak register ih lunggulh leh ih kisap sawt mahmah ta ahihna zui-in ki lunghimawh pah aa, lunghimawhna mah tawh thu tuamtuam zong tampi tak gingkhia hi; Kiza hi. SMS tuamtuam pan thuging tuamtuam tam penpen aa, internet tung khawngah zong kizel keii hihtuak hi. Tuabang aa thuging tuamtuam a om simin ZAM zum mah dongpah zaw leng thusiangzaw hi. Bangbang hi leh, UNHCR in a vaihawm ahihna leh amau hong vaikhakna zui-in, Zomi sungpan thubuai, thu nawngkai omlo theithei aa amau vaihawmna ih zuihsiam ding, a sepna vaihawmnate-uh ih panpih siam ding leh Kipawlna bulphuh aa hong vaihawmna uh ih lawhcin sak zawhding pen palaite tungbek hi peuhmahlo-in ZAM member mi malkim tung ki nga hi; Ki nga takpi ngiat hi. UNHCR tawh kikupnate March 2, 2012 ni-in UNHCR zum ah, UNHCR pan hong zaksakna uh kipelhin kikupna a sappen uh ZAM pan kihel khalo aa, March 4, 2012 ni teh hihvai a makaite tawh ZAM palaite va kimu thei-in, vaihawm ziading kikupna ki neithei hi. March 5, 2012 ni zingsang ciangin, Kawlgam pan aa mualtungmi makaiteng tawh kikupna tomno khat hong sam leuleu uh aa, ZAM zong hong sapna zui-in palai nih va kihel thei hi. Mualtungmi teng pan Kachin, Kayar, Karen, Mon, Rakhine, Shan pan makai khatta leh Zogam pan ACR, CRC leh ZAM makaite kikupna kihel thei hi. Hih kikupna-ah, a thupi pen hong vaikhakna-ah, Kipawlna makaite-in mipi makaih ziading leh tutung data collection vaitawh kisai-in, UNHCR in thu a zaksak Kipawlna makaite simloh in thusuah khatpeuh hong neih hetlohna ding limtak hong vaikhak phapha uhhi. Thusim omlo napi-in, mihon, mipi tawh vaihawm ding ahihna leh, hih gammite aa kipan thuneite thuneihna sung mah aa vaihawm ding ihih man zong ahihi. Mikim aa ding ngaihsutna hizaw hi.

ZAM member sungpan kuate kaikhawm masa ding KL tawh aki gamla khuate pan data collection pan masa ding uh aa, ani ding pen sehsa ahihi. Tua a ni sehsate sungah ZAM ci-in a tuamin kihel khalo aa, tuatawh kisai-in, March 5, 2012 ni kikupna sungpan ulianpa-in, State khat, leitangmun kibang sungpan hong taii gambelte na hih manun ZAM in ACR leh CRC makaite tawh, no aa tektek ami omzah zui-in kikum un, ci-in ZAM, ACR leh CRC makaiteng zak dingin hong vaikhak hi. KL pan agamla khuate aa ding data kaihkhopna Anuai-aa bangin, KL tawh kigamla ZAM member atamna Penang leh Johor aa omte-in Kipawlna pan ih vaihawm zia na theihpah ding uh kisam hi. Hih vai aa kihel dingte pen, ZAM card tawi, UN ngahnailo, kum 18 leh atungsiah, innkuan lutpihna angak ahilote kihel ding hi; Penang aa om ZAM member te-in, April 11, 2012 ma peuhmahin Penang Khawk makai ahi Mang (012 479 1757) tungah na ki pulak hamtang un. Johor aa om ZAM member te-in, April kha beima peuhmahin, Johor Khawk makai Mungpi (010 294 5373) tungah na ki pulak hamtang un. Mimal phattuam bawlna omsak kei ni Zomi khatin registration ih ngaklahna siksanin data collection vai khawngah mimal khatpeuh ii metbawlsawmna ih tuahkhak zenzen leh zum ah hong zasak un. Data Collection ci-in registration hilo ci uh UNHCR in hong vaikhakna-ah, hih vai pen data (thutomna) kaihkhopna hi-in, registration (min sanna) piading hilo hi, ci uh hi. Hih data a kaihkhopna tungtawn lianin, na thu, na phone nambatte tawh hun khatteh registration hong pia dingin, nang na ummawh hiam? Registration hikei ci-in, nang lampan, gampan na taikhiat ni aa kipan UNHCR ii hong kaihkhop thute khat peuhpeuh kigin losa-in nang ii thutomna (data) pia dingin kithawi kei zaw in! Atawmpen Malaysia sung na om laisiah, UNHCR in ahang khatpeuh tawh a ut hunhunin hong dongthei lua aa, ei kigin ding ei mawhpuak hiden hi. ZAM khatvei bek thu tangko khia pan Hih data collection vaihawmna tawh kisai, ZAM panin Selangor State sung aa ZAM member te kiginkholhna vaihawm ding cihthu sms a kihawm lo ngal, mipi tung tangkona kinei nailo hi. sms pen atuamtuamin zong ki puaksawn thei aa, zong kipuah thei hi. ZAM pan ih hawmkhiat sms pen, athu tellohna ding om hetlo aa, athu kicing mello sms kihawm a om leh ZAM pan hilo hamtang ding hi. Tuabang dan SMS khatpeuh a om leh ZAM zum dotpah ding hoihzaw leh kician sakzaw hi. Azom >

ZAM THUPUAK
KL, Selangor State leh Negiri Sembilan sung aa ZAM member te aa ding kiginkholhna kipan khin April 3, 2012 ni-in ZAM OB kikupna kinei aa, ih tomlawh ziauhtheih KL leh akiim aa om ZAM member tul tampi aa ding vaihawmkholhna kipat ding ki khentat hi. Tuatawh kizui-in, ahun simin naseppih ahi Khua Makaite tung leh Khawk makaite tung sms tawh ki zasak pah hi. Hih Data Collection aa ding UNHCR pan hong piak uh Basic Biodata acih form laidal pen tampi print khia-in mi khatteh khatta-in khum (fill up) ding ki vaihawm pah hi. Hihpen, April 4, 2012 ni aa kipan aki vaihawm pan ahihi. ZAM member (pawlmi) sungpan, KL leh a kiimnai aa om, UN ngahnailo, kum 18 leh atungsiah, innkuan lutpihna a ngak ahilo khempeuh in tua form laidal pen, mi khatin khatta ZAM zum ah pai-in khumding ahihi. Hih KL leh a kiimnai icih ziauh Selangor leh Negiri Sembilan sung aa om khempeuhin April kha beima-in ZAM zumah ZAM card tawh tua basic biodata form laidal khumding ahihi. ZAM member meltheih kiim leh pamte zasak tek ni. Sum bangzah beiding cih dotna tawh kisai ZAM member mipi sung panin, Kipawlna ii vaihawmzia ding leh sum leh pai tampi abeiding muhkholhna tawh dotna tuamtuam om hi. Sum bangzah bei ding, bangzah khiatkul cih bangin hong kidong zel hi. Himah hi; abeisa hunte-ah zong mipi tul tampi aa ding vai khatpeuh ih vaihawm simin sumtang tul tampi mah beipah hi. Ahi zongin, tutung data collection vaiah, ZAM card tawi member khempeuh in zum hong pai aa form laidal sungah thute khumding/gelhding ciang ki vaihawm ahihi. Sum leh pai ahi zongin, lampi khatpeuh tawh phattuam bawlna ki vaihawmlo aa, ih data te hong kaihkhop hun ciang UNHCR in mun khat hong zang leuleu ding uhhi. Tuamun aa mipi vaihawmna aa beiding khempeuh ahi zongin, Kipawlna ih picin zawhna ding ahi zongin ZAM member akihelkha dingteng mahin sum tawh ma ih pankhop hun hong om veve thei, cih theikhol tek ni. ZAM hong zasak pah un Tu laitak aa ih vaihawm khop data kaihkhopna aa ding kiginkholhna vai-ah, mimal khatpeuh in ahi zongin, mun khatpeuh pan ahi zongin, registration (minsanna) lunggulh luatna siksan in nei aa, registration ding min pua sakin metbawlna vai khatpeuh ih tuah zenzen leh ZAM zum manlang takin nong zaksak ding uh kong zawn uh hi. Mai kaal sung zumhon hun ding Data collection aa ding kiginkholhna-in form laidal khum vai nasep tamluatna zui-in, mai kaalsung April 9 leh April 13 kikal ah data kaihkhopna vai zingsang 10am pan nitak 5pm kikal sungbek ki vaihawmzo photding hi. Thusuah leh thu pulak kidop huai Ih gensa UNHCR pan minsanna (registration) kisap luatna, lunggulh luatna zui-in Zomi sungah thuging tuamtuam ih zatek ding hi. Gentehna- tutung data kaihkhopna pen kiza sawn totoin, mun tampi atun khitciang, ZAM ah UN kipiata ci ahia, ahih kei leh UN card kihawm maw, cihdan in kitelkhialto pah hi. Kam tawh, lai tawh, sms tawh, internet tung mun khat peuhpan ahi zongin, thu ih suah, ih pulak sawm leh, a thu omzia leh ih Kipawlna ii vaihawm zia tel hamtang ding ong zawn ingh. iNFO

April 8, 2012

NTV7 Leh Malaysia Zomi Gambelte Vai

March 3, 2012 nitak lamin Park Royal Hotel (Yangon) ah Zomi National Congress (ZNC) makaite le Malaysia gampan apai NTV7 reporter te kimuhkhopna neithei uhhi. NTV7 panin dotna thu thum neihpih uhhi; (1) Zomi le Chin ki lamdanna, (2) ZNC ngimna policy, (3) Banghangin Malaysia gamah Zomi te alomlomin tai uh, cih thute ahihi. President Pu in adawnkikna-ah, Chin cih minam min kammal pen Chin State Khua (9) sungah anei ki omlo banah akhiatna tuni dong kimu zo nailo hi. Mangkang kumpi khutnuaiah sila-in ka om uh aa kipan aki ngah sila min ahihi. Ko le ko ka pu kapa hunlai tangtawng pek aa kipanin Zomi ka kici uhhi, ci-in dawngkik hi. ZNC ngimna policy pen, Panglong thukimna tawh Mangkang kumpi khutnuai pan suahtakna laak lai-in Federal gam ki-ukna tawh ki-uk ding, cih thukimna a tangtunna dingpen ZNC ngimna ahihi, ci-in dawngkik hi. Zomi tampi tak Malaysia gamah gambel in hong taina thu pen, Kawlgam ah Federal Democracy ki-ukna omlohna hangin, minam ki nenniamna, biakna kideidanna, mipi tangtha zawhthawh thu tawh kisawlna tam, kumpi nasem sungah zong minam le biakna ki deidanna nasia lua, cih bangin thumanlo, haksatna tuamtuam hangin Kawlgam kikhel masiah, Federal Democracy kingah masiah mipi tampi gamsung pan kitai khia, zong hong ki taitai lai ding hi, ci-in dawngkik hi. Malaysia aa Zomi gambelte vai dotna pen, Daw Aung San Suu Kyi tungzong dong uh aa, a dawnkikna-ah, Kawlgam ah, belpawlgam taktak ahih lohna hangin mualtung mite haksatna tampi tuak uhhi. Belpawlgam taktak akingah mateng hidanin mualtung mite cimawhin, gambel in atai uh bei theilo ding hi, ci-in, ahi bangin dawngkik hi. Source: ZNC Info Team

LAIMAL PUAHPHATNA
Hih THUPUAK (Volume 6, Issue 44_April 8, 2012) sung, laimai masa (a langkhat) lam aa, UNHCR tawh kikupnate cih thulu leh ZAM member sungpan kuate kaikhawm masa ding cih thulute sung aa a ni leh a kha kigelhna mun pawlkhat akhate kigelhkhial kha hi. April kha ding pen March kha vive-in kigelh khial kha hi. Tua ahih manin, March 2, March 4, March 5 cihna munte pen April 2, April 4, April 5 hizaw hi. iNFO

ZEC-Cheras Leh New Straits Times Malaysia UNHCR ah kum sagih val asem external relation makaipinu, ZAM pan ZEC coordinator leh New Straits Times reporter khat April 6, 2012 ni-in ZEC-Cheras ah thudotna hun bawlkhawm thei uhhi. Zomi Education Centre vai, ZEC-Cheras vai, Sang siate nasep ziate leh a deuhdeuhin tukum 2012 pan Sang kah kawmin sang naupang aneulamte lai a hilhkawm Zomi numeino nih thudotna bawlthei hi. ZEC-Cheras in, Malaysia aa om galtai Sang khempeuh tangin, mi tul-za tampi simtheih ding gambel naupangte dinmun pulakna bawlthei uhhi. ZEC Thupuak ZEC-Klang Sang Naupangte Vaihawmna ZECBukit Tinggi ci-in ih theihsa ZEC-Klang aa Sang naupangte-in Sang Siate vaihawmpihna omlo-in, April 2, 2012 ni-in a Sia, Sianute tung vuah lungdamkoh lahna Teachers Day picing takin vaihawmzo uh hi. A hunsung khempeuh zong Sang naupangte mahin makaih in, lungdamkoh kammal pulakna, lungdamkoh van piakna leh lasakna, limlahna cih bangin hunte kicing etlawm sak mahmah uh hi. Ih muan ngamding Zomi naupang hong ki behlap totota hi. ZEC Thupuak Innkuan Lutpihtheikhinte Maban Khat UNHCR in innkuan lutpih theihna hong bawlsak khit, innkuan in card ngahkhin aa RST thudotna a ngak peuhmahin, innkuan na lutpih theihkhitna RST zum ah zaksak pah ding thupi hi. RST in, nasep tamna zui-in, kuateng innkuan lutpih theikhin cih hong kan manlo ding uh aa, ei pulak pahding thupi hi. GED General Education Diploma lai sinna kipat ding leh ahun ding cihte thuthak omkik nailo-in, a om ciang min nong puaknauh phone nambat ah hong ki zasak kik hamtang ding hi. ZEC Tongdot Zolai-Manglai, Manglai-Zolai Electronic Tongdot khat RM350 tawh ki ahlai hi. A laibu pen kingahkik nailo hi. A vaikhak nuamte aa ding: 016 285 1234, 016 293 9027 DVD 2012 Zomi Nam Ni pawisung aa laamna, thugenna, lasakna khempeuh a kimin a kihel DVD RM10 tawh kingah hi.