TERTIB ACARA PARTANGIANGAN BONA TAON KELUARGA BESAR GKPI SE-RESORT BALATA 01 JANUARI 2011 Pukul : 00.

00 Wib 1. Marende No. 64. : 1 2 Naung Moru do Muse Sataon 1. Naung moru do muse sataon, huhut lam suda bohalhi Beha do ahu nasailaon, ture do pangalahongki Lam ganda haporseaonku, nang holong ni rohangku pe Di Jesus dohot Debatangku, nang didonganku sasude 2. Aut alusanku Debatangku, ra tung maila ahu disi Marningot salpu ni rohangku, ro di sude ulaonhi Ai dosa do binaen ni tangan, gok dosa nang rohangku pe Nang pat nang mata, nang pamangan, gok dosa nang rohangku pe 2. Votum : Responsoria ( U:Uluan ; K:Keluarga ) U: Dibagasan goar ni Debata Ama dohot goar ni anakNa Tuhan Jesus Kristus dohot goar ni Tondi Porbadia na tumompa langit dohot tano on. K: Amen U: Mandok mauliate ma hamu di Jahowa, ai pardenggan basa do Ibana ai ro disalelenglelengna do asi ni rohaNa. K: Dohononta ma tongon ro disalelenglelengna do asi ni rohaNa. U: Jahowa do donganku, ndang mabiar ahu,tung aha tagamon bahenon ni jolma tu ahu. K: Marhaporusan tu Debata do ahu, ndang tahuton ahu,tung hahuaon ni jolma ma ahu. Denggan marhaporusan tu Jahowa, asa marhaporusan tu raja. U: Martangiang ma hita : Ale Jahowa Debatanami, sitompa jala siramoti hami.Tama do hami pasahathon pujipujian dohot hamauliateon tu Ho marningot saluhut asi ni roha dohot denggan ni basaM na patariparhon hami tu taon naimbaru on. Ho do na paluahon hami sian ragam ni parmaraan dohot na mangasiasihon tu hami angka ragam ni pasupasu saleleng taon naung salpui.Hupangido hami ma tu Ho, sai ramoti jala rajai ma hami nang di taon naimbaru on. Mangolu manang mate pe hami, tongtong ma hami dibagasan Ho jala Ho dibagasan hami. Tung unang tadingkon hami , ramoti hami tongtong. Sahat tu Ho ma pardalanan, dohot sude gulmit ni ngolunami , holan dibagasan goar ni anakMu Tuhan Jesus Kristus hupasahat hami tangiangnami on tu Ho. Amen. 3. Marende No. 70 : 1 2 O Jesus Sipangolu Ahu 1. Naung salpu taon na buruk I, Ho ma hupuji Tuhan i Ai diramoti Ho tongtong Tondingku dohot dagingkon Ai diramoti Ho tongtong Tondingku dohot dagingkon 2. O Jesus sai asi roham, paian denggan ni basam Muse di taon naimbaru on, dinasa huriam tongtong Muse di taon naimbaru on, dinasa huriam tongtong. 4. Martangiang Manopoti Dosa : Responsorium U: Ale Jahowa Debatanami, asi ma rohaM di hami, palambas ma rohaM mida pangalahonami na sataon na salpu i. K: Gok dosa do hami, ai hulaosi hami do patikMu, ndang huhaholongi hami Ho sian nasa rohanami, donganami pe ndang doshon dirinami huhaholongi hami. U: Godang do dosanami nang maradophon keluarganami, hurang holong ni rohanami na marsaripe; na marianakhon, nang marnatoras.

K: Asi ma rohaM, sai marpamuati ma rohaM mida dosanami i. U: Godang do dosanami di ulaonnami nang maradophon humaliangnami ai jotjot do hami gae tartuktukhan di nasida. U+K: Asi ma rohaM, marpanatap ma Ho mida hami,sesa ma saluhut dosa dohot hageduhonnami I marhite asi dohot holong ni anakMuTuhan Jesus Kristus Tuhannami. Amen 5. Marende No. 70 : 4 O Jesus Sipangolu Ahu 4. Sai unang jujur dosa I binaen di taon na salpu i Urasi hami sasude asi roham di hami be Urasi hami sasude asi roham di hami be 6. Renungan/Jamita : Pangungkapon 21 : 1a = Dung I huida ma banua ginjang naimbaru dohot tano naimbaru. Hamu angka dongan sahaporseaon, ruas ni GKPI Se-Resort Balata ! Parjolo ma pinasahat tu hita saluhutna : SELAMAT TAON BARU MA DI HITA SALUHUTNA ! Molo tasuarahon pandohan on, aha do gurasanna di hita ? Manang, aha do pangalapation ni hata baru disi ? Manang aha do naimbaru marhite pandohan i ? Tontu dohononta, hombar tu pandohan i, taonna do naimbaru. Alai sasintongna tung so adong do parasingan ni partingkian i ianggo sian hadirionna sandiri. Tung so adong do parasingan ni taon 2010 tu taon 2011 ianggo borhat hita sian partingkian i sandiri. Antong aha do naimbaru ? Rohanta do ingkon imbaru. Antong, hita do mambahen partingkian i gabe imbaru. Alani i ma , molo diloas Debata hita manaripari taon 2010 jala bongot tu taon 2011, naeng ma imbaru nang rohanta asa dibagasan panghirimon na togu hita mandali ni taon 2011 on. Ninna sada barita, tarbarita do sahalak dolidoli, anak sasada ni raja. Marungkil do raja on marnida bangko ni anakna i na sai dakdanak, hape umurna nunga tardok naung magodang. Dia ma usaho laho manopa dolidoli on anggiat lam matoras ? Di sada tingki, disuru raja on ma ibana mardalan hirahira 3 km manuju istana huhut mamboan sada cawan na gok marisi aek. Didok raja on ma : Molo use saotik pe aek sian cawan on ingkon bunuon do ho ! Aha na masa ? Diboan anakna on do antong cawan on jala ndang adong na use. Disungkun ma ibana, boasa boi songon i ? Dialusi ibana ma : Dina mardalan i ahu, tung hibul do rohangku manuju situjuonku anggiat bolas sahat. Umbege i didok raja i ma tu` ibana : Songon i ma bahen dina mardalani dalan sidalananmu di ariari ni ngolum anggiat di ombasna gabe raja na denggan ho. Hamu angka dongan sahaporseaon, songon i ma nian hita mandalani taon 2011 on. Jala panghirimon si songon i do naeng patotaonna tu hita marhite na marsaringar turpuk jamita on sopot di bona ni taon 2011 on, ditongatonga ni parsaoranta , nang ditongatonga ni keluargata ganup. Turpukta on , naeng paingothon hita, marhite panghirimon na tongtong imbaru i asa taida langit naimbaru dohot tano naimbaru, na tinompa jala na pinarade ni Debata di hita. Asa, molo diloas Debata hita mamongoti dohot mandalani taon 2011 on, lam tapadamos pardalananta mamereng dompak pandang situjuon i, ima langit dohot tano naimbaru. Isara ni na mardalan, tontu ragam do angka abatabat, hamaolon dohot angka parungkilon tagamonta dapot ditongatonga ni pardalanan i. Alai marhite turpuk on, dipajamothon tu hita, beha do hita tongtong mardalan dibagasan panatapan na bulus jala hibul holan tu sada pandang situjuon i. Amen. Syalom ! 7. Marende No. 68 : 1 Ihuthon Ahu sude hamu 1. Masilelean angka taon ro di ujungna sogot O Jesus lehon parrohaon na naeng tongtong marningot Di halalao ni aringki huhut manimbang ujung ni. 8. Martangiang sahalak sian anggota keluarga/ Syafaat :

9. Marende No. 66 : 1 Debata baen donganmi Debata baen donganami, lao mangula ulaonmu Baen Ibana haposanmu sai paserep rohami Debata baen donganmi. Debata baen donganmi. 10. Tingki marsitopotan dosa/ bermaaf-maafan : Parjolo ma sian angka ianakon manopoti salana tu natorasna, dung I natoras mangalehon angka poda, sipaingot tu ianakon. 11.Marende No. 66 : 3 Debata baen donganmi Debata baen donganmi, Sai na saut ulaonmu Sai na tulus do sangkapmu Jala sonang rohami Debata baen donganmi, Debata baen donganmi. 12. Ayat Pelean : 2 Korint :7 ganup ma nionjar ni rohana, unang ma sian muruk manang sian na so tarjua; ai dihaholongi Debata do na las roha mangalehon. Amen. 13. Pasahat Pelean.. 14. Tangiang Panutup : Ale Amanami. 15. Acara Jedah ( Snack ringan ) Suasana bahagia di Tahun Baru !

Ditingtingkon/ Di Warta Jemaatkan di Huria : 1. Sian las ni roha, Keluarga Bapak/ Ibu : ________________________________ 2. Maringan / Alamat di :________________________________

3. Pasahathon Pelean Partangiangan Bona Taon tu Huria :Rp. ____________________________ Parhalado GKPI Se- Resort Balata Pasahathon : Selamat Hari Natal 25 26 Desember 2010 & Tahun Baru 01 Januari 2011 Syalom ! Pendeta GKPI Resort Balata Pdt.WS. Simanjuntak