You are on page 1of 1

SIMEIKHU KARTIN CHHUAK THINGSULTHLIAH editorial :

Dt. 10 November 2012 (INRINNI) PHEK- 2

NGO HARH A HUN - Correspondent, Tst. NGO han tih hian rilru-a lo lang hmasa ber chu YMA a ni a, a dawtah MHIP leh MUP an ni thin. Heng NGO te hian Kum tinin Kumpuan thupui neiin Ram leh khawtlang tan rawng an bawl thin a, Ram leh Hnam siamtha tur te, Sawrkar leh roreltute tha tichak a khalh ngil turte thleng pawhin pawimawhna thuk tak an nei a, tunlai hunah ngat phei chuan NGO hruaitute chu khawtlang leh Rampum huap pawhin mi pawimawh an tling phak tak meuh a ni. Hetih lai hian a bik takin kan Sub-townah hian NGO te hian thawm ri va an nei tlemin khua an tihar deuh niin a lang. An kumpuan theuh tihlawhtling tura an hmalakna pawh hriat tur a khat thin hle mai. Hruaitute leh roreltu(Committee) te hi an tha a thum ta deuh em ni aw a tih theih. Kan Khawtlangah hnathawh tur tam tak a awm a, thangtharte zinga sualna hrang hrang lo pung hmet mit tur te, Khawchhung hmel hmang enkawlna kawngah te tunhma kan phak ta lo deuh em aw, nge ni a, sum lam hian min ti zel thel ta zawk. Sum hlawh chhuahna tur a awm loh chuan kan pen chhuak peih ta mang tlat lo ni a an sawi te hi tak tak a nih chuan kan din chhan kan hai der tihna a ni thei ang.
Nghenchhan tur Sawrkar te, Politician te an kat nuk nuk a, hengte hi innghah nan kan hmang ta lutuk deuh em ni ang. Kan changkang ta lutuk deuh em ni zawk tih pawh ngaihtuah tham a tling awm e. Mihring kan changkang a, mahni zawnah kan tul tlang em em theuh ta mai a, rual elna vang te pawhin kan NGO hman ta mang lo pawh a ni thei. Mahse, kan changkan ang mil zel hian kan Hnam nunzia vawng him a, chelh nung tur leh Khawtlang hmasawnna lam hawia ke pen tur hian tih tur a awm thar ve zel tih hriain, hruaitute pawhin tun ai hian rilru han pe thar leh deuh sela, NGO kan nih ang ngei hian intiharh thar leh teh ang u.
SYNOD HMUN TLAWH Ni 8.11.2012(Thawhlehni) khan Seling Presbyterian Kohhran Hmeichhia te chuan kumtir a an project angin heng hmun hrang hrang Synod Office, Synod Press, Aizawl Theological College (ATC) leh Hmangaihna In, Durtlang te an tlawh. Hmangaihna In-ah hian tanpuina Rs. 1000/- an pek bakah member kal ten thildang an pek belh a, member kal te hi an vaiin 78 niin Bus 3 hmangin an kal. VENG HMING-AH KANAN Tst Hospital Area huam chhung Vaidawrkawng peng atanga Novadaya kawng dung chu Kanan veng tiin vuah thar a ni a. He Veng hming hi Thlaraumi (Tawngtaimi) ten an tawngtaina atanga an dawn niin thu kan lo dawng.

MERA THINGSULTHLIAH - K. Mankunga D/A Kan khaw vanneihna bik hi sawi tur ka ngah hle mai. Ka sawi hmasak duh ber chu Pioneer tui hi a ni. Mi khua te ka ngaihtuah kual a, Tuikhurhlu nen khuan a ber kan niin ka ring. A tui thianghlim zia hi ka fiah tawh a, kan in luahtu te an chhuak a, tuizem khat an lo kalsan a, kan lo hre si lova, thla engemaw zat hnuah kan hmu a, a lo la fim kar mai nia. Ka kawta tui pump ve thung chu fimkhur takin kan pump chhuak a, darkar khatah a zam a awm nghal mai thung. He kan tuikhur hi enkawl turin Pu Nunmawia, a bulah Pathianin a lo dah niin ka ring a, theihtawpin a lo enkawl a, a kawng a tihnat avangin tun thleng hian a kal nalh tha thei lo hial a ni. A hmu apiangin kan tuikhur a beih nasat vang a ni tih i hre theuh ang u. Kristian tho ru, mu rei su, Tap kan chawlhsan dawn em ni? tih hla angin a vel han metal a, a tul lai concrete bawk ila, a khur lah duh tawk tawk tih zauh theih bawk si hi mikhual awh thamin han siam ila, a kawr lah duh tawk tawk tihzauh theih bawk si, a va nuam dawn em aw! A va hlimawm dawn em! A tam lai phei chuan motor pawhin an chawi seng dawn em ni? Thawhkhat na na na chu hei chauh hi em ni tul ti khawpin roreltute leh khawtlang, MLA leh BDO te nen, rem hre tak te remhriatna te zep lovin han bei zui ila, chuan kan hmasawnna tur a ni ngei ang. Thingsulthliah khua hi kan ta theuh a ni si a. LAWMTHU SAWINA Ni 25.10.2012-a kan fapa Tv Lalngaihawma boral chungchangah kan khaw chhung, Thingsulthliah leh khaw thenawma thenrual thate chungah lawmthu kan sawi tak zet a, a boralna hmun Aizawl Armed Veng khawtlang mipui te min lainatna leh buaipuina zawng zawngah te lawmthu kan sawi tak meuh meuh a ni. Tin, min khawngaiha min tuarpui tute leh sum leh pai tam taka min tanpui tute chungah kan chhungkua-in lawmthu kan sawi mawlh mawlh a ni. In khawngaihna dawngtu, - V. Lalrosanga te chhungkua Thingsulthliah, Hospital Area. TLANGNUAM CENTENARY NITE Tlangnuam khua, kum 100 tlin lawmna, Centenary Organising Committee chuan ni 18 Dec 2012(thawhleh) zanah Centenary Meidet nise, hemi zan hi Thalaite Intihhlimna zan pual bik atan hun hman nise tiin Programme lo ruahman turin Tlangnuam Branch YMA kuta a dah angin Tlangnuam Branch YMA Executive chuan tunkar thawhleh zan khan Committee neiin ruahmanna an siam a. An ruahman dan ang chuan Meidet hi zan dar 6:30-ah neiin dar 7:15 pm-ah Community Hall-ah Nite hi hman nise an ti a. Thusawi lam awm lutuk lovin Solo, Extempore Speech, Special item etc hmangin hun hman nise an ti a. Solo turin mi 12 an ruat a, Extempore Speech kaihruai turin Pu C.Lalhruaitluanga ruatin, NITE kaihruai turin Pu Lalthangmawia, Vice President an ruat bawk. Tin, hemi zan hian Lucky Coupon siam a ni ang a, mi vannei 10 te hnenah T-Shirt man theihna siam ni bawk se an ti. He an ruahmanna hi Organising Committee-ah an thlen hnuah Programme hi Final a ni dawn a ni. REVIVAL NEI DAWN Thingsulthliah Bial UPC chuan Ni 18.11.2012(Pathianni) hmang hian Thingsulthliah Kohhran-ah Revival an nei dawn a. Kar kalta a kan rawn tarlan Ni 13 - 17 Nov 2012 hmanga Tst UPC Kohhran-in Revival Camping nei tura ruahmanna an siam chu remchan zawkna avangin Ni 20 - 24.11.2012 ah sawn a ni a, He Camping-ah hian Speaker Evan. H. Vanlalhruaia a ni ang.