SYNOD INKHAWMPUI 2012

Thlarau lam Thupui : Sawitu : Chang thlan : A ram leh a felna zawn hmasak Rev. Dr. C. Chawnghmingliana Matt. 6:33; 2Chro. 1:11-12

Thuhma: Kumin 2012 Synod Inkhawmpui-a thlarau lam Thupui, “A ram leh a felna zawn hmasak” tih sawi tura Synod Inkhawmpui zahawm takin min ruat hi lawmawm ka ti tak zet a, chutih rual chuan ka insit hle bawk a ni. Ka kova nghah a nih ve takah chuan ka theih tawpin ka inbuatsaih ve a, chuti chung chung chuan Kohhran mipui te leh Palai zahawm tak tak te mamawh a phuhruk zo lovang tih chu ka hlau hle. Tawngtaina nena lo ngaihthla turin ka sawm nghal bawk che u a ni. Kumina kan Synod Inkhawmpui thupui Aram leh a felna zawn hmasak tih hi thupui pawimawh tak leh lar tak a nih laiin kan Synod Inkhawmpuiah hian thlaraulam thupuiah vawi khatmah kan la hmang ngai lova, tun tum hi a vawi khatna a la ni a. Inkhawmpui hrim hrimah hian thupuiah hian kan hmang lar tehchiam lo a ni mai thei. Tunhma deuh khan Chanmari Bial leh Electric Veng Bial te Pastor Bial khata an awm lai khan Pastor Bial Inkhawmpui Electric vengah thupuiah an hmang tawh a. Chu mi tum chuan A ram leh a felna tiin thupuiah an dah a. Thupui hi then hnihah then a ni a, mi pahnihin an insawi tawma, pakhat zawkin A ram tih a sawia, pakhat zawkin A felna tih a sawia, thupui sawi awlsam tak chu a ni lo ni awm tak a ni. Kan Thupui hi hlawm thum lian takin then ta ila, hetiangin- A ram leh afelna zawn hmasak chu enge a awmzia, Engvangin nge a ram leh a felna chu kan zawn hmasak ang, tih leh A ram leh a felna zawn hmasak chu enge a thatna/hlawkna. 1. A ram leh a felna zawn hmasak chu enge a awmzia? : A Ram tih chu Pathian ram/ lalna tihna a ni a, a felna chu Pathian Chhandamna emaw Pathian duh dan rempuina, Lal Isuan a koh chhan anga nungchang famkimna tihna a ni a. Lal Isuan tlang chunga thu a sawi khan a thupui ber chu Pathian ram/ Van ram tih a nih kha (Matthaian Vanram tih tawngkam a hmanga, Lukan Pathian ram tiin a hmang thung). Lal Isuan Pathian ram hlutzia sawi nan entirna chi hrang hrang- tuikeplung leh ro phum ruk te a hmanga. Tuikeplung leh ro phum ruk chu a hlut em avangin a hmu tu chuan a neih zawng zawng hralhin a lei thu a sawi a. Chutiang bawk chuan Van ram chu a hlut em avanga neih zawng zawng hralha lei ngam tur chi a ni e a tihna niin a lang. A tawi zawngin sawi ta i la : Pathian lalna leh chhandamna hi ngai pawimawh hmasa ber zel phawt mai teh u tihna emaw Pathian lam thil hi ngaipawimawh hmasa ber zel phawt mai rawh u tihna a ni ber mai. Kan ngaihtuah ngai emaw? Kan Pathian hi ‘hmangaihna a khat Pathian’ kan tih lai hian mahni inngaipawimawh deuh mai, pawimawh ber nih duh tlat, amah ang emaw, amah tiat emaw amah aia pawimawh leh sang, dah ropui zawk neih duh hauh lo Pathian a ni tel tlat. “Keimah lo chu Pathian dang rêng rêng i nei tur a ni lo. Milem siam chawp leh thil, a anpui rêng rêng - chung lam vâna mi emaw, hnuai lam leia mi emaw, lei hnuai lama tuia mi emaw - i tân i siam tur a ni lo: chung chu chibai i buk tûr a ni lo va, an rawng i bâwl tûr a ni hek lo; kei, LALPA i Pathian hi, Pathian thîkthuchhia, pate khawlohna avânga fate hrem thîn, mi hawtute chu chhuan thumna leh chhuan lina thlênga hrem thîn leh, mi hmangaiha ka thupêkte pawmtu sang tam takte chunga khawngaihna lantîr thîn ka nih hi” (Ex. 20:3-6) ti tu Pathian kha a ni. Kan nunah, kan thinlungah, keimahniah hian - hmun lian ber chan a duh, ropui ber, pawimawh ber (No. 1) nih a duh tlat. Amah aia ropui zawk leh pawimawh zawk neih a phal lo. Amah aia Pathian dang thlangtu te chu ami ni tlak an ni lo.
www.mizoramsynod.org

Lal Isua pawhin hetiang hian a sawi, “Tuman hotu pahnih rawng an bawl kawp thei lo; pakhat huain pakhat an duh ang; a nih loh leh, pakhat tanin pakhat an hmusit ang. Pathian leh sum rawng in bawl kawp thei lo ve” tiin (Matt. 6:24). Lal Isuan a sawi tum chu hei hi a ni, ‘sum leh pai aiin amah Lal Isua hi ngaihpawimawh hmasak zawk tur a ni, Pathian thil leh khawvel thil tham kawp chu tlakchhiatna leh thihna a ni’. Tirhkoh Paula pawhin Beliara leh Krista’n inremnana an nei thei lo a tih kha. Lum chang chang emaw, vawh chang changa a lai laklawha awm a phal lo. Pathian lam emaw, khawvel lam emawh thlan fel law law mai tur a tihna a ni. Khawvel thil leh Pathian lam thil tham kawp tu te chu, “Ka ka ata ka chhak chhuak ang che u” a ti mai a ni. Amah nena kan inkarah hian mi dang tel ve a phal lo, amah nena kan inneihnaah hian tumah an rawn inrawlh buai ve a phal hauh lo a ni. Khawvelah hian hlimna te, lawmna te, lungawina te leh thlamuanna te zawngin kan vak huai huaia. Kan hmu mai dawn emaw kan ti thina, mahse khawvel thil ringawta chutiang zawngtute chuan manganna leh beidawnna leh lungngaihna mai lo chu an hmu si lo. Mahni in enfiah ila, tunge ka nun min kaihruaitu hi, tunge ka nun kawng min khalh kal tu hi, Ka nun kar che tu hi tunge maw ni le, tunge maw ka innghahna ber hi le? Pu Chawngkhupa kha a ropui ka ti. Mihring lamah chuan a ropui tehchiam lo pawh a ni thei. Kan naupan lai khan (naupang thil hriat a chiang lo pawh a ni ang) mi ang lo emaw kan ti thin. Mahse, a chanchin te kan han hre chiang chho zela, Pathia ram buaipui tawp mai chi, Pathian lo chu innghahna tur dang nei lova inhria, Pathian bel tawpa, Pathiana innghat hmiah mai mi, Mizoram Kohhran zawng zawng te tana Pathian fakna hla ropui tak “Aw khawngaihtu Pathianin” tih phuahtu a lo ni reng mai. Mawi loh a hlau lem lova, Pathian thu a nih chuan tu mitmei mah pawh a veng-thawng lem lova, ‘Mi aiawt chiah te hi a lo ena, aiawt-a chakai lo tang khawm te chu “E, Zalen takin awm rawh u” tiin a chhuah mai a ni’ an ti. ‘Sakei bulah a riak’ tih te, ‘rul a mana, a nghawngah a bat’ tih te a la ni ta zela. Heng zawng zawng hi eng vanga ti thei nge a nih ang le? A ram leh a felna a zawn hmasak vang a ni lo thei lovang. A ram leh a felna zawng hmasa tlat tu te hi, khawvel mite mit atang thlir chuan ‘ava han a tak em ve aw!’ tih tur an ni fo mai, Abrahama te, Josepha te, Daniala te, leh Joba te ho pawh kha. Mahse, hmuh theih lohva chu an hmuh tlat avangin chutiang chuan an lo awm a ni thin. 2. Engvangin nge a ram leh a felna chu zawng hmasa tura min tih? : 1) Ro sum aiin Pathian ram a pawimawh zawk vangin: Matt. 6:19-21 ah hian Pathian rama ro khawl khawl khawm thu Lal Isuan a sawia. He lei hi chu rosum khawl khawmna tlak a ni lo, sulrul leh tuiekin a ei chhiat leh mai mai tur leh rukru ten an ruk bo leh mai mai tur a ni a. Chuvang chuan rukru ten an ruk theih tawhlohna tur leh, sulrul leh tuiekin a eichhiat mai mai theih tawh lohna tur Van ramah hian in rohlu tak tak te hi khawlkhawm (invest) zawk rawh u tiin min chah a. Juda ten an bungrua leh an ro tha te an thukruin an phum bo thin a, chungte chu thimin a ei chhia a, a tuiek a, a lo chhe leh vek thin. Pathian rawngbawl nan kan sum leh pai te hi kan hman chuan Pathian tan, Pathian hnenah ro kan khawlkhawm a lo ni zawk e, tiin Lal Isuan min zirtir a ni. Pathian tel lova leia ro sum leh pai neih leh khawl te hian awmzia tak tak a nei lo, heng kan sum leh pai, ro sum hlu zawng zawng te hi Lalpa tan hmang zel rawh u min ti a ni. Pathian ram nei si lova hausak chu- “Mi a, zaninah i thlarau an laksak dawn che, i deh chhuah kha tu ta nge?” tih hi a hmabak a ni. Pathian aia ngaih pawimawh tur dang reng a awm lo, chuvang chuan a ram leh a felna hi zawng hmasa phawt mai rawh u a ti ani ber mai. 2) Ro sum hlu aiin Lalpa thlan zawk tur a ni: Matt. 6: 24 ah hian Pathian leh sum rawng bawl kawp theih a nih loh thua sawia. Juda-ho hi mi sakhawmi tak leh sum leh pai khawsakna lam ngaihtuah tak mi an ni a. Lal Isua hian tangka sum leh pai lam hi a hnawl/ mausam lam niin a lang lova, sum leh pai hian mihring thinlungah hmun a chan awlsam dan leh mihring hi Pathian rawng bawl thei lek lova siam tu a nih thu sawina niin a lang. Chutiang dinhmunah chuan a ram leh a felna zawng hmasa zel rawh u tiin min chah a ni.
www.mizoramsynod.org

3) Pathian tel lova thil lungkham vak vak hi a sawt loh avangin, a ram leh a felna zawn hmasak zel hi a sawt zawk avangin. Matt 6:25-34 ah hian thil lungkham luat a sawt loh thu leh Pathian tel lova thil ngaihtuah vak vak ai chuan a ram leh a felna hi zawn hmasak zawk mai tur a nih thu leh, chutianga a ram leh a felna zawng hmasa tu chu khawvel khawsakna thila a mamawh tur chu Pathianin a ngaihtuah sakin a pe mai zawk dawn a ni tih Lal Isuan a sawi a ni. He lai thu hi Lal Isuan a zirtir dan tak hriat thiam a har deuhva. Nungcha te leh pangpar te awm dan entawna, engmah thawk lova awm mai mai tur tihna a ang viau maia, mahse chu chu a ni lo. Lal Isuan thatchhiat thu a zirtir lo, dam chhung thil ngaihthah tur pawh a ti lo. Nungcha te leh pangpar te chu an awm dan tura ruat ang takin an awma, Pathianin a chawmin a enkawl zel maia. Chutiang bawkin Mihringte pawh hi Pathianin kan awm dan tur leh nihphung tur a ruat ang taka awm mai tur kan ni a. Chu kan nihphung leh awm dan tur tak chu- min siam tu Pathian biak, chibaibuk, leh amah hmangaiha, a thu thu a awm leh thil dang zawng zawng aia, amah ngaihpawimawh kha a ni a. Pathian ropuina tur kan zawng hmasa ber anga, theih tawp chhuahin nitin hna kan thawk anga, dam chhung khawsakna atan pawh kan thiam ang tawk leh kan theih ang tawkin kan inpuahchah ang. Chung zawng zawngah chuan engkimah Pathian kan ring anga, a kutah engkim kan dah anga, a rorel sak ang zelin thlamuang takin kan awm tawh mai tur a ni. Pathianin kan mamawh engkim a hre vek sia, kan mamawh chu min pe zel mai dawn a ni tih La Isuan min zirtir a ni. 3. A ram leh a felna zawn hmasak chu enge a hlawkna? : A ram leh a felna zawn hmasak a hlawkna chhan chu –Chung zawng zawng chu a pek belhchhah ang che u Lal Isuan a ti. Chung zawng zawng a tih chu enge ni kan tih chuan a hmasa lama kan sawi tak, Khawvel sum leh pai, ro hlu leh hausakna te, leh kan mamawh zawng zawng te hi an ni. Judaho te hi kan sawi tak ang khan khawvel khawsakna sum leh pai, hausakna, rohlu leh hmingthanna te ngaihtuah tak mi leh lungkham deuh mai mi an ni a. Mahse Lal Isua chuan Lungkham avanga mahni dung lam tawng khat chauh pawha tih san a theih loh thu te a sawia. Ei tur aiin Chatuan nunna a hlut zawk thu te, chungleng sava ten buh an tuh lo an at hek lo, Pathianin a chawm mai zawk thu te a sawi a. A dik khawp mai- Ramsa te, chungleng sava ten an ei tur an lungkham buai ve vak lo. Sava buh tuh kan hre ngai lo, kan buh thar hmasa ei hmasatu chu chungleng sava te, sanghal te an ni tlat mai. Enge a chhan, kan Pa Vana miin a chawm mai a ni. Lal Isua chuan heng kan taksa mamawh- ei leh bar tur te, silh leh fen, incheimawina tur te, leh thil dang dang te hi ngaihtuah hmasak berah nei lo ula, Chatuan nunna thu leh Pathian duh dan hi ngaipawimawh hmasa ber zel phawt mai ula, heng in mamawh dang zawng zawng hi chu Pathianin a pek belhchhah mai dawn che u a ni a ti a ni. Keima testimony han sawi ta ila, a pawi em loving chu maw, ka lo tisual ta a nih chuan Nangmahni leh Pathian ngaihdamna ka dil nghl e. Pathian thu kan zir lai khan Aizawlah in hmun neih ve kan chaka, thian ten en Reveneu Departmentah inhmun dilna form kan va la chhuak ve a. Form chu kan han fill up dawna, V/C recommend-na te a lo ngaia, V/C hmelhriat lah kan nei miah bawk si lo, kan beidawng hle mai. Zanah chuan chutianga mihring khawsakna ringawt mai ngaihtuah chuan ka muhil hlei thei ta lova, zan lai pelh rawkah chuan ka muhil thei lo chuan Bible ka chhiar ta a, Matthaia 6:25-33 lungkham luat a sawt loh thu hi ka chhiar ta a, A ram leh a felna zawng hmasa zawk rawh u, ti chuan chung zawng zawng chu a pek belhchhah ang che u tih ka han chhiar chuan ka harh ta hawk mai a, ka lawm tae m em maia. Ka tih loh tur ka lo tia, ka tih tur zawk ka lo hlamchhiah a ni tih ka hre ta a. Lalpa rawngbawl hi ka dah pawimawh hmasa zel phat anga, ka mamawh chu Lalpan min pe zel ang tih ka hre chiang ta a. Chuta tang chuan In hmun tih vel chu ka ngaihtuah ngai ta lo. Chutatanga kum 10 hnuah chuan Lalpan min pe ta. Lalpan in hmun min pek dan chu hetiang hi a ni. Ka nuphal pakhat chuan, “Kei nin in hmun pahnih kan neiha, kan rawngbawltu Hminga ten in hmun an neih loh chuan a tha lovang” tiin an inhmun pakhat chu Lily Vengah min pe ringawt maia, tichuan Aizawlah in hmun chu kan nei a ni ve ta der mai. Hei hi kan phu miah lo, Mahse Pathian thutiam kha a lo thleng dik tlat a ni. Aizawla in hmun kan neih hi eng
www.mizoramsynod.org

dang vang a ni lo, tling lo tak chunga A ram leh a felna kan zawn hmasak avanga Pathianin kan mamawh min pek vang chauh a ni. A ram leh a felna zawng hmasa tlat zel tu te nun leh dinhmun a then a zar lo chhui dawn ila: 1) Lal Solomona: Lal Solomona kha B.C 964-922 chhunga Israel lal ropui tak a ni a. A pa Davida aiawha lalna an chan phat khan Pathian hnenah inbiakna puan in-ah halral thil hlan hlanin maichamah inthawina a hlan a. Pathian chuan a hnenah, “Enge ka pek ang che, mi dil rawh” a ti a. Solomona chuan thil dang dil lovin, ‘a mite chunga tha taka ro a rel theih nan finna a dil a’. Pathian chuan, “Hausakna te, dam reina te, hmelma te thihna te dil lova, hetiang i dil avang hian i dil tel hauh loh- hausakna te, ropuina te pawh ka pek belh ang che” a ti a (I Lal. 3:5-15). Pathian chuan Solomona dilna chu a pe chiang kher mai. A finna a nasat zia chu a vela ram hrang hrang a mite pawhin an hria . Thufing 3,000 laia sawi a. A finzia chu hmeichhe pahnih nausen inchuh thubuai a rem danah khan a lang chiang kher mai. Seba ram lalnu pawh khan a finzia a lo hria a, finfiah tumin thukhirhkhan pui pui kengin Israel ram chu a pan ta a. Thukhirh tak a hrilhfiah theih loh reng reng a awm lo, a hrilhfiah thei vek a ni (I Lal. 10:3). Solomona nihna a’n hriat chian meuh chuan, a then pawh kan hre zo lo he lui kam atang hian tih ang maiin, “A chanve pawh ka lo hre lo a nih hi, i mite, i chhiahhlawh, i finna ngaithla fote hi an va nihlawh em! Lalpa i Pathian chu fakin awm rawh se” a ti thlawt mai a nih kha. A fin em avang chuan a rorelna a fela, mitin mai chu an thlamuanga, nuam an ti em em vek a ni. Keini ho pawh hi, ram ro kan relnaah te, khawtlang ro kan relnaah te, chhungkaw ro kan relnaah te, Kohhranho ro kan relnaah te hian, heng kan mite, heti zozai thiam tak leh tha taka ro kan relsak theih na turin Pathian hnenah finna i dil ang u. Kan Pathian thu chuan, “In zingah tupawhin finna a tlakchham chuan mi zawng zawng hnena hau lo leh ui lova pe thintu Pathian chu dil rawh se, chutichuan a hnenah pek a ni ang” a tih kha (Jak. 1:5). Pathianin finna a pek avanga thiam taka ro a rel avanga a ram remna leh muanna a a thlen ringawt pawh a ropui tawh teh reng nen, a dil tel hauh loh malsawmna danghausakna te, ropuina te damreina te a la pek belhchhah te hlei hlei hi a va ropui em! A hausakzia hi sawi sen pawh a ni lo, a ni khat ei ral ringawt pawh hian a sawifiah mai awm e. Ni khatah bawngpa 30, beram 100, leh ramsa chi tin reng, ni tin a lal inah an eiral thin. 2) Abrahama: Abraham hi rinna a kan pa te zingah chuan a ropui ber pawl a ni ang. A hnena Pathian thutiam lo thleng har hle chung pawha phunnawi hauh lo leh vuivai hauh lova, a ram leh a felna a zawng hmasa lui tlat mai te kha. Kum 100 mi a nih hnuah a chunga Pathian thutiam a lo thleng chauhva, fapa duhawm tak mai a neih Isaka lah chu Pathian hnenah halral thil hlana hlan turin an ti leh mauh maia. A ni lah chuan Pathian thu a nih chuan hnial buai lovin halral thil hlana Isaka hlan turin Moria tlangah a kal leh hmiah maia. Mahse, a ram leh a felna a zawn hmasak zelna chu a hun takah mahni intum chawp Pathian chu a lo che a, a fapa aia hlan tur chu Pathianin beram no a pe chawpchilh leh ta mai a nih kha. A ram leh a felna zawng hmasatu te hian a hun takah mahni intumchawp Pathian an kar che thina, Jehova Jire a lo lang thin. Nang leh kei pawh hian, chan huamin a ram leh a felna kan zawn hmasak zel chuan mahni intumchawp Pathian kan kar che zel ang, Jehova Jire a lo lang zel dawn a ni. 3) Josepha: Jakoba fapa 12 te zinga Josepha hi a ropui ngawt bawk mai. A unau ten itsik leh elrelna a vanga, Ismael sumdawngho hnena an hralh kha, Aigupta ramah sal atan an hralha. Pharoa sipai lal Potiphara’n a leia, a bawihah a awm ta a. Mahse Lalpa chu a hnenah a awm tlata. A pu Potiphara mit a tlung tlata, a inchhung hotuah a siam ta a. Kawl a eng dawn chauhva, a piin a lo ngaihzawn a vang leh a rinawm em avangin pawngsual thubuai a nei leh ta. A dinhmun hi ava khawngaihthlak em! Josepha hian thiamthu sawina hun leh hmun a nei lo. Itsikna avanga hektute hekna finfiah a ni si lo. Mahse, a ram leh a felna a zawn hmasak luih tlat avangin Pathian a dem thei lo, Pathianah leh mihringah a rinawm lui tlat a. Pathianin a theihnghilh lo, a hun taka che thin Pathian chuan Jail chhung atanga la chhuakin Aigupta ram rorel khawlah Finance Minister ah hial a lo dah leh ta a ni. A ram leh a felna zawn hmasak zel chu a va han
www.mizoramsynod.org

tha tak em! Kan Pathian hi chu rintlak, innghahna tlak leh belh tlak a va ni tak em! Keini pawh a ram leh a felna kan zawn hmasak avanga harsatna kan chungah a lo thleng a nih pawhin rinawm takin a ram leh afelna i zawng hmasa tlat zel ang u khai. Pathianin thuduk a hria a lawm, bel tlat zel ang u. Lalpa hnenah i tawngtai tlat zel ang u. Kan duh hun takah min chhang lo mah se, a mahin a hun a tih takah min chhang anga, kan thatna tur zawk zelin ro a rel zel dawn a ni. 4) Daniala: Danial pawh hian a ram leh afelna a zawn hmasak tlat avang hian itsik leh elrel leh sawichhiat a tawk nasa teh a sin. Hektuten lal an thuhneh avanga dinhmun chhe tak leh hlauhthawnawm taka a din lai pawhin Pathian a phat ngai lo, Jerusalem lam hawiin a Lalpa hnenah a tawngtai lui tlat mai a nih kha. A ram leh a felna a zawn hmasak lui tlatna chuan sakeibaknei kha a tihchih saka, sakeibaknei koham tak te chu a tan blanket tha mi an lo ni ta zawk a nih kha. A va ropui em! Lalpa chu fakin awm rawh se. 5) Joba: Joba hi Uz ram a awm, mi famkim, mi ngil tak, Pathian tih mi, thil tha lo laka insum thei mi a nia. A neihnunzia chu, beram 7,000, sanghawngsei 3,000, bawngpa tuak 500, sabengtungpui 500 leh chhiahhlawh tam tak a neia, khawchhak fate zingah chuan mi ropui ber tia an hrilhfak a ni. Joba pawh hian a ram leh a felna a zawn hmasak avanga a tuarna hi a nasa tawk hle mai. Setana thik ram ram khawpin Pathian malsawmna a dawnga. Joba chungah chhiatna lo thleng tak tak ta se Pathian chu demin a sawi chhe duh mai dawnin Setana chuan a ringa. Chutianga a duh ang anga a chunga thil thlentir tur chuan Pathianin Setana chu thuneihna a pe ta a. Nikhat thil thu-ah a fanu 3 leh a fapa 7 te chhungkua te leh an chhiahhlawh ho te thlipui tuarin an borala, a ran rual te leh chhiahhlawhho te Seba mi ten an that chimit bawka. Joba tan chuan at ram ramna tham a ni ngei ang. Joba chuan Pathian a sawichhe tawh mai turah Setana chuan a ngai a. Mahse a teuh lo mai. “Ka nu pum ata saruakin ka lo chhuaka, saruak vekin ka kir leh dawn a nih hi; Lalpan a pe a, Lalpan a la leh ta a nih hi, Lalpa hming chu fakin awm rawh se” a ti thlap mai. Chu mai a la ni lo, a taksa panin a bawm khah vek hnuah a nupuiin a tuar ta lova, “I ngai rengin em ni i la awm dawn? Pathian sawichhia la, thi la a ni mai” a ti ta ringawt mai a. Joba chuan Pathian sawichhiat zai reng a rel lo. Pathianah chuan a rinawm lui tlat. “Nang hi hmeichhe a tawngin i tawng a nih hi. Pathian hnen atangin thil tha kan hmu a, thil tha lo pawh kan hmu lo ang em ni?” a ti hmiah mai. A ram leh afelna a zawn hmasak tlat avangin chung hnu zawng zawngah chuan Pathianin a hma aia malsawmna a pek letin mal a sawm leh ta a ni. 4. Tlangkawmna: Aw le, unau duh tak te u, kan ram leh kohhran te hi thlir ila. Suahsualna a pun nasat tawh zia te hi. Pawngsual, uire, nawhchizawrh, ruk ruk, inthah, corruption, Chhungkaw kehchhia tih thuthang vel te hi. Engvang nge ni ang? Eng vangin nge sualna rapthlak tak tak hi a lo thlen thin? A ram leh a felna kan zawn hmasak loh vang a ni ngei ang. Pathian ram leh a felna kan zawn hmasak loh avangin setana’n min min luhchilha, chhungkua a keh chhia a nih hi. Pathian thuin kan nun min kaihhruai loh avangin pawngsual, ui re, rukruk, inthahna, corruption a lo hluar ta a nih hi. Pathian aiin sum kan dah pawimawh zawka, Pathian lam thil aiin khawvel lam thil kan dah pawimawh zawk fo thin a, chu chu kan chhiatpui leh si a nih hi. Hawh teh u i ngaihtuah tlang teh ang u. Harsatna tam tak karah pawh a ram leh a felna zawng hmasa tlattu te chuan Lalpa malsawmna chhiar sen loh an dawng thin a nih kha. A ram leh a felna kan zawn hmasak avanga tuar dawn, chan dawn nia inhriatna lo awm thin mah se, a ram leh a felna kan zawn hmasak zel phawt chuan, Pathianin kan mamawh zawng zawng a hre veka, a nei vek bawka, chung zawng zawng chu min pek a tiam tlat a ni. Pathian hi a thutiamah a ding ngheta, a pe nge nge bawk thin. Engkim hre vek leh nei vek tu hian kan thatna tur zelin min thawh sak thin avangin A ram leh a felna i zawng hmasa zel ang u. Lalpan a thu kan za atan malsawm rawh se, AMEN.
www.mizoramsynod.org