Conference Dinmunh Ngetna Tangthu, Part VII

1992 Kum iin Conference Ngetna Kinei Kik

Sia Thang Siangh in March 11, 2010, ni aa a lai gelh “SIHNA GUAMSUNG PAN. 5” sung ah
“Section zumpan a support omlo-in mipi otot pen huihlak aa awng bang hilel hi. Makai khat pen
mipitawh kizop kul hi. Union leh UMM zum aa sem khempeuh pen amau kamphen (mouthpiece)
kisuak khin hi. Layman taangaa kamkek ngam omlo hi.” ci iin gelh sinsen napi huzaap nei iin Upper
Myanmar Mission President panmunh a let kum 2 sung iin amah ngiat in Conference ngetna vai
bangmah awng lo pau lo hi. Tua ban ah, "mipi otot pen huihlak aa awng bang hilel" ci napi ama sep
sung iin Conference status deih ungh ci aa otna aw kiza lo zel hi. “Thu nung theih leh sa nua kap”
a cih bang iin a muibun thei ding dinmunh ah a om laai tak iin Conference vai phawk kha lo iin
Yangon ah a peem khit ciang, Union ah departmental panmunh khat a let ciang, bek iin Pr. Sandy
Dee kiang ah Sia Siangh in April 4, 1992 ni mit tawh conference dinmunh ah kalsuan nading Upper
Myanmar Mission makai te kiang ah hanthawn iin tawsawnna lai khakpan san mawk hi. "Khuapi
guah zuk ciang aa lo siam ding phawk san” ih ci diam “sa ngaak bu tom” ih ci zaw diam thu hoih
nung phawk san aa mui bun nawn lo hi. “Mi khut aa guul man nuam” a cih bang keek iin a man
Conference ngen lo iin Sia Sandy Dee hun ciang iin a ngen ding iin tawsawn ziau lel hi. Amah
Upper Myanmar Mission ah a om nak leh Conference a hi khinsa dan or Conference a kisam nawn
lo iin seh aa amah a om loh lian leh Conference kisam sa pah hi. Conference ih cih peen mi khat in
makai a ngah leh a ngah loh tawh kisai lo iin pawlpi bup ii khantoh zia zil aa a kiphut kipawlna ahih
lam kingaihsun lo mawk iin ke’n makai ngah maw ngah lo cih tawh kalsuan mawk ahihmanin tua in
tu aa Zomi SDA pawlpi sung aa ih buaina zungpi khat ahi hi.

1992 kum akipan Sia Sandy Dee in UMM President hong sep ciang iin ama mai aa president te in
bang sem bang bawl uh hiam cih kan iin lai kikhakna teng a pheh kawikawi leh Sia Kip Za Nang in
UMM President a sep sung iin Division tawh kizopna a neih zel lam kimu napi Sia Siangh hun sung
iin Division tawh kizopna khat zongh kimu kha lo hi. April 4, 1992, ni aa Sia Siangh in Pr. Sandy
Dee kiang aa Conference vai manawt ding hanthotna lai a gelh khat bek muh theih ding om hi.
Bangbang ahizongh’n Myanmar Union Mission ah Conference nget kik ding Sia Sandy leh Sia
Mungno te in geel uh aa April 1992 sung iin Administrative Committee in Myanmar Union Mission
leh FED tung ah ngetna nei kik iin June 8-9, 1992, Upper Myanmar Mission Executive Committee
in lungkimpihna (approval) pia hi.

Banghang iin Conference Kingahlo

Conference dinmunh maan ih ngah theih nading iin sum leh paai vai ah khuangkhohna (financial
stability), makaih siamna (leadership quality) leh khalam ah picinna (spiritual maturity) cih teng
thum peen pawlpi mi sung ah hi ta leh a diakdiak iin sia te sung ah kisam pha diak hi. Mission ahi
aa conference ahizongh’n a makai te or a makaih ding te in sum leh paai a vaan siam (financial
management and control), makaih siamna a nei leh khalam ah lungsim picing ahih ding uh kisam
mahmah hi.

Financial Stability: 1987 pan akipan conference hong kisin sak iin appropriation na ngawn hong
khiam uh hi. 1989 kum bei iin Union ah leibaa kinei lo iin credit kinei zaw hi. Division leh Union in
Conference hong kisinsak cih bang peen ngeina hi lo hi ci aa phunna aw kum 2003 khit zawh khat

1
veivei ih zak hang iin tua hun 1987-1991 sung iin kua mah phun lo hi. Hong kisinsak ahihmanin a
ngah thei ding aa lamet huai (hopeful) cihna hi aa tua hun iin a kilungdam mahmah, a lungdamhuai
takpi leh lungkim thukim aa a kisin ih hi hi. Hong kisinsak laai tak iin tithe base (sawm aa khat
zungpi) koi ci ciang iin om aa selfsupporting percentage (tangdinzawhna tan) koi ci ciang iin
khuangkhoh uh ahiam cih peen sum leh paai vai aa a theih nop bulpi uh ahi hi. Conference Ngah
Ding Lametna, November 9, 2010, leh Conference Dinmunh Ngetna Tangthu, Part III, pp. 2&3,
January 21, 2011, cih te sung ah a kicing iin kigelh khin zo hi. 1987-1989 sung khawng iin
Myanmar Union Mission tung ah tein tampi leibaa a nei hi le hangh Conference a hong kisin
sak vet lo ding uh ahih lam theih huai mahmah hi.

Conference vai ah hong makaih leh hong manawt pih ding iin ih nget ngiat Sia Thang Siangh peen
1990-1991, kum 2 sung teng Upper Myanmar Mission ah president hong sem sak uh hi. Tua kum
nih sung iin sum leh paai vai ah khangto cih genloh Ks. 25,00,000 bang leibaa hong neih pih pah
mawk hi. Hih kum nih sung iin ih tithe base (sawm aa khat zungpi) a kikheel a om loh hang iin
leibaa khang vetvat iin a ki selfsupport zo lo hi mawk ihihmanin Union leh Division te tung ah
Conference ih picin zawh lohna ih makaih theih lohna lim a laklak ih suak mawk hi. Union ah sum
piak ding te puak nuam lo iin leibaa khangkhang hi. Tua ahihmanin Conference makai ding aa ih
muan makai khat tawh Conference dinmunh kum 2 sung bek ih kisin sung iin leibaa tampi hong
neih pih iin sum thu ah makai ih cintaak lohna bek lak zaw tham loh iin mission sung aa ih dinmunh
ngei nangawn sang iin sum thu ah niam suk zawsop laai mawk hi. Sum leh paai zeek zia leh leibaa
thaangbaa vai en le uh Division leh Union in Conference a hong pia nuam uh ahizongh’n 'piak huai
mah ei' a cih theih nading uh paulap ding thu om thei mahmah lo hi.

Leadership quality: Kawlgam peen 1962 kum laai iin South East Asia ah a khangto peen gam khat
hi napi General Ne Win in 1962 kum aa hong makaih akipan kum 26 sung iin leitung ah a zawng
peen gam hong suak sak zo ziau hi. Zimbabwe (formerly known as Rhodesia) gam zongh a hau
mahmah Africa gam minthang khat hi ngei napi 1980 kum iin British khut sung pan gam it mahmah
aa a kinei, tua gam tualsuak mi te in suahtakna la uh aa kum 25 sung iin leitung bup aa a zawngpeen
gam suah zo uh hi. Sum leh paai, leibaa thaangbaa te khangkhang cih peen makaih zia (leadership)
tawh kisai mahmah hi. Conference status ih ngah theih nading iin Union in Sia Kip makaihna tawh
1989 dong hong kisinsak khit ciang iin Conference a lawp mahmah ih muan ih deih sak mahmah
Sia Siangh tawh 1990 pan hong kisin sak uh aa kum 2 sung iin sum leh paai thu ah khangto lo bek
hi lo iin leibaa thaang baa tampi tawh hong kiam suk pih zaw sop hi. Pasian na sepna hi lel hi ven
Union ah sum khak kul kei, en zangh zangh lel ding, cih bangh ngaihsutna leh lungsim te hang aa
leibaa thangbaa a pung ahi hi. Conference status lam a manawh leh a kalsuan te in leibaa thaangbaa
hau semsem ding leh Union ah sum puak lo iin ih huang sung bek ah zangh gai ding cih hi lo iin
Mission dang te leh Union ah a huh zo zaw ding kim laai, sum leh paai vai ah kiam suk lam hong
manawh pih zaw sop mawk hi. Hi bang teng hang iin Conference makai ding gen loh Mission
makai ding nangawn iin Union in a muang nawn lo uh ahi hi. Conference ngah nai lo pi iin Union,
Division leh General Conference makaihna te thusim lo, leh amau makaihna te zui nuam lo iin tu ni
ciang dong gensiat ding bek masuan iin nei hi. SDA pawlpi in Mission, Union leh Division kizopna
ngeina kip a khunsa te bang iin zui iin ih kalsuan masiah bang zah ta iin sum ih hau aa ih pil ih siam
zongh iin Conference hong ki pia ngei lo ding hi. Sum leh paai in a cit loh ban ah ih pawlpi ngeina
zui nuam kei laailaai iin illegal way vive sem mawk lengg makai picing a nei lo leh pawlpi mi
picing a nei lo suak ihihmanin Conference a kingah ngei ding hi vet lo iin hong kipia vet lo ding hi.

2
Spiritual Maturity: 1991 kum bei dong ciang ciang ah pawlpi mi te sung ah ki itna leh ki
pumkhatna om hi. Pawlpi mi te in ih theih khak loh man a hi phial zong iin tua hun laai iin ih Zomi
SDA sia te sung ah za leh panmunh te hang iin khat leh khat kimawhsak luatna te leh thumaan lo pi
aa mindai sak nop man bek tawh zuau phuak aa ki gensiat supsupna te ka tam zak kei hi. Tua
ahihmanin 1991 kum bei masiah sia te sung hi ta leh pawlpi mi te sung ah hi ta leh khaa lam
picinlohna (spiritual immaturity) ih gen ding om lua lo hi. Ih theih khak khol loh tampi a om man
mah hi ding hiam Sia Siangh peen it takpi iin ki muang tak pi mah hi. Sia Paupu leh Pr. Htein Nan
te in Sia Siangh mah Upper Myanmar Mission president ding aa hong piak kik ding uh 1991
Yearend Union session ah a nget kik uh hang iin Conference ih suah theih nading aa ih kisin hun
sung iin financial management leh leadership quality a picin zawh loh man iin Sia Siangh in ngah
kik zo lo hi. Sia Siangh in Union office ah Associate Director a ngah hunta iin Sia Sandy Dee in
Upper Myanmar Mission president a ngah hunta ahihmanin amau panmunh tek a ngah theih
nading in a kimu thei lo Khasiangtho in nominating committee member te’ tungtawn iin na sem
hi ci in sansiam ding ahi hi.

Tua bang iin saangsiam hi leh Sia Siangh in amah leh amah self-examination and self-assessment
nei thei ding aa financial management, leadership leh spiritual vai ah kipuah pha iin a khangto thei
ding hi napi negative view vive iin la zaw ahihmanin a nuai aa thu tomno kigual te ih et ciang iin
khaa lam ah a picinlohna kilangh sak semsem hi.

(1) Kiteelna ah a ngah lo pipi iin leitung dictator te in panmunh a ot nop loh bang iin a lamet na
panmunh ah a ngah kik, a tut kik loh ciang iin "tutphah ot loh ding" “Aanaa thein ding” zah
dong ngaihsutna nei thei mawk hi. (Refer: Conference Dinmunh Ngetna Tangthu, Part IV, p.2)

(2) “Conference” vai leh UMM aa project te a suk siat nop man un Myanmar Union Mission in
term cinglopi iin Union session vaihawm tawm bang iin gen hi. (Refer: Ibid, Part V, p.3)

(3) Kiteelna bawl lo pi iin veto power tawh Union in Sandy Dee peen Upper Myanmar Mission
president ding iin a guang bang keek iin gen hi. (Refer: Ibid, Part IV, p.3)

(4) 1991 Union session ah Sia Thang Siangh sim loh midang a kilaih om het lo iin Union session ah
amah bek a kipei khia tuam dan iin gen hi. (Refer: Ibid, Part IV, pp.3&4)

(5) Aman UMM president a ngah kik loh man iin Upper Myanmar Mission sung aa laymember te
phal khap ding kipan iin Sia Paupu te unaau in Sia Siangh a lehheek leh Zomi nam a lehheek
bang iin taangko aa ih Zomi sung dei iin khen khapna te hong kipan hi. Sia Paupu in “tutphah ot
loh ding” leh “sawm aa khat leh sumpi te khak tan ding” cih te ah a panpih zawh loh man iin
Sia Siangh in amah a lehheek leh Zomi nam a zuak bang iin taangko hi. (Refer: Ibid, Part IV,
pp. 4&5)

(6) Ama' mimal nasep masuan leh panmunh buaina hang iin a gaal muh den keei Karen te peen
Zomi SDA pawlpi mi te in a muhdah pih theih nading leh mipi in amah peen Zomi it phadiak
bang iin amuh nading iin Karen te or Union te ci iin gen sia den iin Zomi khangno te sung ah
Karen te muhdah nading lungsim sia guan hi. A lai gelh te nih en pak lengg: "Karen te makaih
laiteng lammaan om ngeilo ding aa,---" (Thang Siangh, November 16, 2010) leh "UMM ii sep

3
 khantohna khempeuh suksiat sawm ngiau hi. Khantohna khempeuh Karen makaite langpanna in
ngaihsun ngaiu hi." (SIHNA GUAM SUNG PAN. 7, Thang Siangh, March 23, 2010)

(7) Tu aa ih Conference kalsuan dan peen SDA pawlpi ngeina, GC leh Division ii working policy te
palsat aa pawlpi sung pan hepkhiatna dong a tungsak kalsuanna ahihmanin lammaan hi lo hi.
February 18, 2010 ni aa Sia Siangh in “Conference legally in kidingleh, Union, Division,GC te
tawh ki-akgual khen ding hilo” ci aa a gen mah bang iin tu aa Mission, Union, Division, leh GC
te tawh ih ki aakgual khenna peen lampi maanlo (illegal means) tawh tu maa kum 9 laai pawl
akipan illegal Conference ih laak man bek bek hi zen mawk hi. Sia Siangh in illegal
conference cih thei lua ahihmanin thumaan a lunggulh takpi Zomi SDA te in lammaan deih iin
Division hong makaihna ih zuih nop khak ding deih lo ahihmanin lammaan a cih kammal
nangawn za dah ta aa "------- ei Zomite sungah lammaan kammal ---a kizak nawnloh nangin
hanciam ciat ni." (Thang Siangh, November 16, 2010) ci liang mawk hi. UMM lutang pi khat
hi ngei, pastor khat hi ngei, khaa lam ah ih muan mahmah ngei pa khat ahihmanin lammaan
tawh kalsuan ding hong hanthawn leh a kilawm mahmah zaw hinapi Zomi te lam pial ding iin
hanthawn zaw sop hi.

(8) Sia Siangh in ama’ kisapna leh kicinlahna te kisittel lo ban ah tu laai tak aa ih Conference
kalsuan dan te leh Working Policy tawh kituak lo aa ih pai khialhna te, Division makai te in
ama' (Sia Siangh’) deih bang iin hong sep sak theih te leh hong panpih theih te hi lo hi. Tua hi
aa Union leh Division te in hong panpih loh man un Division makai te nangawn golhguk a ne
leh panmunh a kip nopman uh aa thumaan a sem ngam lo bang iin Zomi te tung ah gensia iin
mindai sak den hi. Hiah pawl khat en pak lengg: "Myanmar Union Administration te meeting tut
laitakin, sikhazaihna manbu om leh muhtheihloh bangzah in tutpih ding hiam kitheilo hi. Hih
meeting pen Jesu kha in makaih hileh, mihing tulval hawlkhiat ding pen, nak sel mahmah in
ka-um hi. A golhsum piakna sabuaite sawnthal mangin ka-um hi." (Conference Movement Vai
Dotna, Thang Siangh, January 13, 2006) "Union leh Gulfan kipumgup khin mawk cih zongh kiza
a GC tungah bangzah na kiphelh ding hiam khat nahi khin ding hi. Union tungah tuaci gen un,
ci-in amau kigulluk nateng a kilatloh nangin na ki-eksim ding uh hi." (RE: GC ten phone hong
set!, Thang Siangh, January 27, 2011) "Lawkite leh milim biate sepngamloh ngoltol tak aa a
sem ngam ding hong cial uh hi. Position khan uh hi. Motor Cycle pia uh hi. Golhsum ding
dangka puasak kanghkangh uh hi. Mittawsa-in bangbang hileh semngam takpi mawk hi."
(SIHNA GUAM SUNG PAN. 7, Thang Siangh, March 23, 2010) "Mungnote sumgolh tawh pai
khiankhianin ngah pah hi. Sumgolh a pia leh sumgolh a nek union sungah kipatna zong hithei
phial ding hi" (Thang Siangh, June 6, 2010) "No aa leh midang aa hong teh ken. “Sandy in
sumgolh na khuanung san a, president aana tawh laigelh thei hi.” (Thang Siangh, June 6, 2010)
Hi bang aa golh guuk pia or ne ci aa mi dang te a ngawh ngawh vai tawh kisai iin tel kim theih
ding iin ASI Convention paina vai ah golhsum tawh kisai iin amah peng het lo kha ding hinapi
midang te golhguk pia leh golh sum la iin a mindai sak zawk sop vai tellahna "SDA Zomi te leh
USA Gam Thak Keekna Tangthu Tomno, Gentelna, #8, June 22, 2010 sung ah kitel tak iin ka
gelh khin hi.

(9) Sia Siangh in ama’ kisapna leh kicinlahna te kisittel lo ban ah mi dang te vive ngawh den hi.
Sanpya clinic sum vai bang ah Sia Siangh' paubanna hi mah ta leh kua mah tek in a kigen nuam
het lo kim laai ama khialhna pi mah gen khia iin midang te mawh sak zaw sop hi. A gen thu te
khat leh nih en pak lengg: "Sanpya Clinic sum Ks. 50,000/- kei leiba ah hong koih sak a, hih

4
 ngam lel uh hi." (Thang Siangh, November 19, 2010) "Sia L S Mang tawh khasum kalak uh,
Letbat in na-om venvan mawk aa, kabuaipih pet mah uh hi. Kai Khan Khual in sanpya clinic aa
ding Yangon hong thoh sum Ks50,000 pen kei leiba iin hong koihsak mawk hi. Union meeting
katut laitak ua hong thoh hi iin kei authorization kisam ahih man iin letmat kathuh ahi hi."
(Thang Siangh, January 8, 2007) Hih Sanpya clinic sum Ks. 50,000, Sia Siangh in a thoh khiat,
ama khut sung aa a thel thang tawh kisai iin "RE: SDA Mission election paizia & Conference
movement khaktan nading, January 15, 2007" sung leh "Policy Paizia maw Apostasy Paizia?"
cih thulu pan Sia Khoi Sian Langh' dotna te dawn kikna #5(f) sung ah November 27, 2010 ni iin
a kicing zaw iin ka gelh khin zo hi.

Sia Siangh in a lamet UMM President panmunh a ngah kik loh man aa Union makaite tung ah a
hehna teng tu ni dong mah veng (bei) sak thei mahmah lo iin khuapi kulh kongpi mai ah tu iin [Oh,
ih gam sung ah kei kumpi (thukhen) iin hong kikoih hi zen hen la, thubuai nei khat peuh ka kiang ah
hong pai leh thumaan ka ngahsak ding hi ci iin hi bang iin Absolom in Israel mi te ii lungsim te gu
hi. (2 Samuel 15:3-6, kitomkaih hi.)] ci aa Israel gam mipi te a khem thapai Absolom bang iin
pawlpi mi te tung ah tungsiah Union, Division leh General Conference ulian te gensia sia iin amah
bek a thumaan peen bang iin a gengen ban ah amah a it mahmah a sanggam te nangawn gaal neih
mawk hi. Lai Siangtho sung aa “na hehna uh ni tum sak kei un” ci napi President mun a ngah kik
loh man iin tu ni iin SDA pawlpi lang do lawh liangh ta hi. [O Lucifer, ziingsang khuavaak' tapa,
vantung pan hong bang ci kiat suk na hi hiam! Minamte a zawngkhaal sakpa nangmah leilak
dong ah hong bangci kiphukpai ahi hiam? Isaiah 14:12 NKJV] A khantawn vua circle leader
ciang nangawn a ngah kha zo ngei lo aa pension a la te mun ah kiguang kiseh thei hi leh hi zah
ciang lungsim sia nei lo iin SDA pawlpi a langdo dinmunh tung lo ding hi. Sia Siangh in self-
examination or self assessment bawl lo iin self reflection nei lo ahihmanin midang te bekbek mawh
sak mawk hi. Ama deihna tawh a kituak kei nak leh Mission, Union, Division, leh General
Conference makai te dong iin mawhsak ding bek thei ahihmanin hi ci bang peen Khalam Picinna
(Spiritual Maturity) a nei het lo khat a na hih gige lam tu iin a langh tang iin kimu thei semsem ta
hi. Conference kisin aa ih om laai tak iin Conference makai ding aa ih muan peen Sia Siangh in
hong makaih kum 2 sung iin sum leh paai vai makaihna ah hong makaih siam loh ban ah kiteelna
hong ngaih kik loh man aa a hehna tawh a sep, a bawl, a gen te khempeuh tu ni dong ih et et ciang
iin khaa lam picinna a na nei lo takpi hi mawk hi.

Tua hi aa Pr. Sandy Dee, Pr. Thankhuma, leh Sia Mungno te in Upper Myanmar Mission ah mission
officer panmunh hong let uh ciang iin amau mai aa Upper Myanmar Mission Administration in
Myanmar Union Mission aa leibaa a neih uh Ks. 2,500,000 ($416,667) a luah toh laaitak ahihmanin
Conference status a kinget kik ciangin Far Eastern Division Associate Secretary Clinton L Shankel
in June 18, 1992 ni mit tawh Pr. Sandy Dee kiang ah hi bang iin lai na thuk kik hi. “Na sum vai te
uh lah kiam tektek ………..Na sum vai te uh ah thahat kei le ucin conference dinmunh suahna
in no tung ah sum vai hamsatna behlap iin no a ding iin maban zopna hamsa sak zaw kan ding
hi. Conference status ngah man iin Kawlgam sung aa vai te ah dong tuahna ahih zawk ding ka
deih kei uh hi. Tu aa kong lai gelh in Elder Bullock kiang aa na ngetna vai tawh kisai a dawn
ding ka lamen hi.” [“Your finances are lessened …. If your finances are not strong, then
becoming a conference puts an additional financial burden upon you which will make even more
difficult for you to operate. We do not want the program in Myanmar to suffer because of a
conference status. Hopefully this will in part answer your request to Elder Bullock”]

5
Union makaipite' munh ah kiguang pak dih un. Sum leh paai muh khempeuh zangh gai, zeek
mang pahpah iin leibaa a loh ngei lo, Mission makai khat muang iin makai ding iin kum tampi
koih beh laai iin na ki um uh hiam? Division makaipi te’ munh ah kiguang pak dih un. Division
in zongh Myanmar Union Mission pan khasim financial report a ngah den uh ci lengg, sum leh
paai leibaa tampi a nei, kum nih sung aa Ks. 2,500,000 or $416,667 zah dong leibaa thaang baa
a nei thei organization khat peen financial stability a neih masiah leh sum leh paai a zeek theih
masiah, Conference piak ding kilawmsa iin na um uh hiam? Tua mission makai te zongh makai
muan huai leh muantak cing mahmah sa ding iin na um uh hiam?

Tua ahihmanin Upper Myanmar Mission in Conference ih ngah lohna peen Myanmar Union
Mission leh Far Eastern Division in Conference status tawh hong kisinsak sung, 1990-1991 sung iin
Upper Myanmar Mission makaite in sum leh paai zeek siam lo iin Myanmar Union Mission ah
leibaa a hauh luat man (Ks. 2,500,000 or $416,667 bang ih bat laai) ahih lam a tung aa Elder
Shankel' lai khak sung ah kitel sitset hi. Sum leh paai, leibaa thaangbaa khangkhang cih peen makai
te in a gam sung makaih thei lo cihna ahi hi. Leitung ki ukna mahmah ah hi taleh Pasian’ pawlpi
kipawlna sung aa ki ukna sung ah hi ta leh pension a la om aa na sep a lut thak om hi. Kiteelna a om
ciang iin panmunh kikheel diamdiam aa a za khang a om mah bang iin a kiam zongh om hi. Leitung
kumpi ki ukna sung nangawn ah kiteelna gah dung zui iin tavuan ki awn diam diam or tavuan la
diamdiam iin a om kawmkaal ah UMM officer election ah a lamet bang iin a pian loh ciang iin
hehna dam thei lo zah dong iin “tangtel siktan” bang aa thu leh la phuang den iin zuau vive tawh
Zomi SDA pawlpi mi sung tok den cih peen Khaalam picinna a om loh man ahi hi. Tua hi aa Union
leh Division te mawh sak aa ngawh ngawh nading om lo hi. Khangluui te in “mi’ bawl iin ih sia kei
aa ei leh ei kibawl iin ih sia” a cih mah bang iin Conference ih kisin saan laaitak iin nung leh maa
khual lo, tung leh nuai kizopna ngeina te gawm tuah siam lo ban ah Upper Myanmar Mission sung
kimakaihna te leh khaa lam picinna lam ah makai te a na cingtaak loh man aa conference maan a
ngah zo lo or a taan ih hi zaw hi.

Kong it, Zomi SDA pawlpi mi te aw, Conference Dinmunh Ngetna Tangthu, Part I pan Part VII te
sung ah thu tampi a kicing iin ih kikum khin zo hi. Tangthu a suut ihihmanin a thu tawh kituak iin a
kihel kha te a min uh a ki hel zelzel om hi. Mi khat pahtawi nopna or gensiat nopna hang hi lo iin
tangthu a maan aa a suut a gelh ka hi hi. Ih kikup sa thu te a tom iin a nuai aa thulu teng ahi hi.

Conference Dinmunh Ngetna Tangthu, Part I, January 4, 2011

 Conference vai phu ding committee thak phut
 Pawlpi mi makaite' tupna leh ngimna

Conference Dinmunh Ngetna Tangthu, Part II, January 15, 2011

 Pawlpi mite in Conference ngah ding kilawpciat
 January 6, 1987 - Upper Burma Union Conference ngetna

Conference Dinmunh Ngetna Tangthu, Part III, January 21, 2011

 1987-1989 sung Conference vai
 Tithe base (sawm aa khat zungpi)
 Tangdinzawhna tan (selfsupporting percentage)
 1989 kum bei aa Myanmar Union Mission session

6
Conference Dinmunh Ngetna Tangthu, Part IV, January 27, 2011
 1990-1991 sung ah Conference vai maa panna
 1991 kumbei Union session ah kiteelna
 Sia Thang Siangh ii paulap tuamtuam leh mawhmatnate
 Term cinglopi kiteelna bawl
 Veto tawh Sandy Dee hong koih
 Section dangte kikheel om lo
 Sia Paupu te unaau mawhmat

Conference Dinmunh Ngetna Tangthu, Part V, February 8, 2011

 Sia Thang Siangh peen mipi in paakta (it)
 Myanmar Union makai te in muangnawn lo
 Mawhsakna leh gaal neihna lungsim kipan

Conference Dinmunh Ngetna Tangthu, Part VI, February 20, 2011

 Lay delegate te in a deih uh ngah lo, Bang hang taktak hi ding?
 Sangte hon thak hang maw?
 Sia cialna (employment) hang maw?
 Sum leh paai zeekzia (financial management) hang maw?
 Sia Siangh in UMM ah a ngah kik lohna bulpi

Conference Dinmunh Ngetna Tangthu, Part VII, February 26, 2011

 1992 Kum iin Conference Ngetna Kinei Kik
 Banghang iin Conference Kingahlo
 Financial stability
 Leadership quality
 Spiritual maturity

Mai lam hun ah lammaan tawh Conference maan ih ngah zawh nading iin ama sa peen iin pawlpi
mi te hi ta leh pawlpi sia te hi ta leh in Khaa lam picinna Topa’ kiang ah ngen ciat ni. Topa Pasian
in ih pawlpi sung ah sum leh paai khuangkhohna hong pia ding hi. Pasian thumaan thutak tawh
kiniam khiat aa hong makaih ding makai siam tampi hong pian theih nading iin thungetna ah phawk
tawntung ni. Topa Pasian in SDA pawlpi mite leh sia te khempeuh a thupha hong guan ciat ta hen.

Itna leh deihsakna tawh,

Mungno Gualnam
Thursday, March 3, 2011

 Part VII na a tawpna hi.

*Na hihna khempeuh ah Amah phawk in; tua hi leh lampi maan hong lak ding hi. (Paunak 3:6)*
*Na khat peuh na sepna thu thei tel in; tua hi leh na sep peuhpeuh mavang ding hi. (Paunak 4:26)*