Ul yeṣfan yettsellik amdan

Sγer : D.Messaoudi Yella zik yiwen wergaz umi qqaren Yeḥlaw. Netta γer-s yiwen n mmi-s kan yerna d ukrif ed d abehlul. Yeḥlaw yezdi axxam akked gma-s umi ttinin Yeqseḥ. Yeḥlaw yxeddem s tneyya yeṣfan; yettṣerrif s teγdemt γef twacult meṛṛa. Yeqseḥ kra yekka wass yettqeṣṣir deg tejmaεt, yerna netta yettṣerrif seg wayen ur d-yessas ufus-is. Medden ḥemmlen Yeḥlaw bu wul ḥlawen; γuccen Yeqseḥ bu wul qessiḥen. Yeqseḥ yusem; yeγtes ad yenγ gma-s yettwaḥemmlen akken ad yeṭṭef amkan-is deg wul n medden. Yiwet n tmeddit, yekker Yeqseḥ, yessuγel γer wexxam n yiwen seg yiεemmiten-is. “Acu akk-a ay k-idyuwin, a Yeqseḥ ?” Ay as-yenna εemmi-is mi d-yeldi tawwurt. “Aha kan ar neqqim ad ak-d-iniγ acu yellan.” Ay as-yerra Yeqseḥ. Mi dayen qqimen deg tesga n yiγimi, yenṭeq Yeqseḥ: “Ad ak-d-sumreγ yiwet n txeddimt, ma tqebleḍ-tt, ad ak-fkeγ taferka n uzemmur ed tyuga n yizgaren”. Yebda wul n uεemmit yedderdik seg tḍemεit. “Acu-tt txeddimt-a uγer annect-a akk n wazal ?” Ay t-yesseqsa. “Ad tenγeḍ gma Yeḥlaw.” Ay as-d-yerra. “Maca acimi ?!” Ay t-yesseqsa uεemmit s ubati. “Acku ma ğğiγ-t ad yedder, ad yeččar tawacult-nneγ s wukrifen ed wungifen ur yeṣliḥen i wacemma.” Ay as-yenna Yeqseḥ. Yxemmem uεemmit kra n yimiren, sakkin yinias: “Ihayen”. Azekka-nni, yekker uεemmit zik, yeḍfer Yeḥlaw γer uγeggad-is anida ymegger timẓin. Mi yuweḍ, yufa-t ycerrew yakan tidi seg tmegra. “Anida akk-a tettedduḍ s tqabact deg ufus, a Muḥ ?” Ay t-yesseqsa Yeḥlaw mi d-yenneḍran s yeẓri-s γer tama deg yesla i wesxerxec n kra d-yettaẓen γer-s. “Yuzen-iyi-d gma-k akken ad k-nγeγ.” Ay as-yerra uεemmit. “Aql-i γer-k”, ay as-yenna Yeḥlaw, “yerna nekk aḍad ur t-id-reffdeγ γerk, imi ay aγ-zdin yiẓuran”. Yebra uεemmit i tqabact γer tmurt yini i Yeḥlaw yneggin d tidi: “Wellah, imi kečč d argaz afeḥli ygan azal i yiẓuran, ur k-nγiγ lemmer ad iyi-d-ttunefkent tferkiwin n taddart-a akk !” Mḥallaqen sin yirgazen-nni kra n wakud, sakkin mεawanen tamegra armi yeγli yiṭij, dduklen-d γer wexxam. Yeqseḥ yella yettṛaju deg tejmaεt awwaḍ n usalli n tmettant n gma-s. Mi d-ffγen yimẓulla seg tẓallit tameggarut n wass, yuyes Yeqseḥ deg uṛaju, dγa yeṭṭef-d abrid γer wexxam. Deg-in, yufa gma-s akked εemmi-s ttmeslayen deg tesga n yiγimi. Werεad d-nneḍranen γer-s, yuγal-d Yeqseḥ timendeffert, yeffeγ-d seg wexxam. Γer tṣebḥit n uzekka-nni, ufan-t-id medden yugel γer ufurek n teslent yellan deg tlemmast n tejmaεt. Tamsirt: win yendin tacerket i gma-s, ad tesref fell-as.

Sign up to vote on this title
UsefulNot useful