Since 2006

ZAM Information Department

Volume 6, Issue 45 April 15, 2012
Estd. 2006

informing people, transforming lives

“A dahte tawh na dah khawm un.” Rome 12: 15b
ZOMI BUPIN IH DAHPIH HI
April 10, 2012 Malaysia nitak 7:30pm hun ding pawlin Pa Dal Za Khup @ Joseph Dal Khup (Ngalbual Khua, Suante Beh) tawh a zi Nu Cingpi leh a tano kum (2) apha apeng nih, a vekpi mi (4), Taman Chileong (Klang) lampi tung khatah apai laitak un mawtaw taii-in phu kha-in, lim phukkhak lua ahih manin Klang Zatopi kipuak hi. Pa Khup in hong nusia Zatopi panin sanggampa Pa Dal Khup pen a nuntakna hu beita-in, kha siat huai takin mual hong liapsan hi. Azi zong pen, liamna baiina lim tuahlua ahih manin, operation kibawl hi. A tano uzaw zong lim liam pian ahih manin GHKL zatopi ki puakin, operation kibawl hi. A tano nauzaw pen ahih leh, liamna pawlkhat a ngahsam hang Klang zatopi siavuante phalna tawh April 12, 2012 ni-in zato tuakthei hi. Hih ama lim (photo) hi. Ithuai leh hehpihhuai mahmah hi. Gamthumna tungdek ding kithawisa Zomi tul tampi-in a ngaklah, a kisap, a lunggulh gamthumna paitheihna ding hun zong amau innkuan aa ding ani ding a theikhin uh hi aa, tuapen April 18, 2012 ni, ci hi. Tua ih theihpih semsem ciang na kisakpih tek hi. Nu Cingpi in hong nusia leuleu Lamet hetloh hun tektekin hong nusia Pa Khup hangin Zomi bup ki dahkhawm in ih om laitak mahin April 13, 2012 ni zan 12:00pm pawlin, Klang zatopi-ah akikem Nu Cingpi zong, ama aa ding leitung nuntak hun ciangtansa ommah bangin mual hong liapsan lailai hi. Ih lamet Tg. Khaino cidamna ding Ih tano a uzaw Tg. Khaino ahih leh, GHKL (General Hospital Kuala Lumpur) a kipuak hi aa, a kipuak ni aa operation na-ah, a khuaksung lam operate kul ahihna tawh kizui-in, khua phawklohza kipia-in April 14, 2012 ni-in khua hong phawkkik aa siavuante-in a vel ding cih maban kinei hi. Cidam pumpi ih lamet pih hi. Zum tawh kisai mabante Ih ut naikei zongin hanmual lam vaite vaihawm kul veve hita ahih manin, UNHCR-OPI zum ah report ding vaite palai a semzel Sia Kap Lian (ZAM & ZSM) in, April 11, 2012 ni-in, Pa Khup’ vai zum va lutin, va pulak thei hi. Maikaal sungah Nu Cing’ vai zong pulak kulding hi. April 18 ni aa lengding ani kisehsa ahihna uh tawh kizuiin, IOM leh RSC te ki zasak khin aa, zing leh thai-ah death certificate te ngahzawh ciang ZAM pan RSC uliante tawh va kimuh ding RSC zum tawh zong ki genkhin hi. Zato aa beiding vaite UNHCR-IAD tung ngaihsutpihna ki ngen aa, hih tuahsiatna vai amau-in zong hong lainat pih mahmah uh hi. A makaipi siavuannu-in zong hong buaipih in, zato tawh zong hoihtak hong hopihsak uh hi. IAD in IOM tung zasak in, IOM in hih vai-ah bangciang hong vaihawmpihzo di’am cih ki ngak laitak ahihi. Panpih ding hanthotna Cimawh dongtuak Zomi sanggamte innkuan aa dingin, zato kilahna aa beiding tawh kisai, UNHCR-IAD in ahun sim mahin athu hong theihpih toto lai uh aa, IOM lam ah hong zopsak uh

in, IOM in USA kumpi lampang ciangdong tawh hong zopsak ding thu kiza hi. Ahi zongin, gamthumna tungtheita dinmun a tungkhin sihna atuak ki-om nai lo bilbel ciding maw, IOM in zong policy/ procedure khat nei hamtang ding aa, zato vai aa bei dingte hong piaksak ding maw, piaksaklo ding ki genthei nai vetlo hi. Tua ahih manin, a nungtalai a hehpihhuai mahmah Zomi naupangnote unau mailam ding ngaihsutsakna leh a tanau meltheihte ii van gikpi puakpih zawhzah ih puakkhop theihna ding ngimna tawh sum leh pai tha lamah panpih ciatding ZAM pan akuama peuh tung kong hanthawn uhhi. Hihtawh kizui-in, ZAM EC kikupna tawh, a masa-in Malaysia gamsung aa om biakna pawlpite, pawlpi mite tung, panpih ding hanthotna lai khatta ong kihawm ding hi. Hih pen, ahun simin Zomi vai aa naseppih Pawlpi Sia, Makaite tawh ma ih pan’khop kisam leuleu hi. Pawlpi mintawh ahikei zongin mimal mahmahin zong van gik ih puakpih zawh tekding kong hanthawn uhhi. Siatvatna, vehna, panpihna ki piathei Hih anuai-aa palaite leh ZAM zum ah ki piathei hi; Sia Kam Sang (014 738 1459), Pa Dai Kam (017 991 0457), Thaa Mung (016 646 5375).

IOM Pan Contact Kingahlo
April 17, 2012 ni si sitding: Cing Lawh Niang (MY113816) Tua Maung (MY115212) Thawng Tha Hnin (MY118102) Zau Nang (MY127995) April 18, 2012 ni si sitding: Van Ko (MY102816) Kap Khan Pau (MY104011) Tuan Go Kap (MY120175) April 19, 2012 ni si sitding: Ciin Nuam Mang (MY111241) Ling Hung (MY111664) April 20, 2012 ni si sitding: Tan Aung (MY103919) Par Ti (MY113515)

DAHPIHNA
ZAM ah hunbit palai semin, ZSM ah Thuzekpi panmun tawh Zomi genvai khempeuh phial ah a madawk den Sia Kap Lian Thang ii apa Pu Pau Za Vungh (Kum 73, Phuaktung Beh) in ten’na Cikha khua-ah, April 14, 2012 ni-in leitung leh a mipihte hong nusiata hi. Thuzakna om bangin, Cikha khua-ah, April 15 nitak dak 3:30pm hunin hun nunung vaihawmna kinei ding hi. Malaysia aa om Zomi te aa ding, Malaysia atun’ aa kipan hunbit palai khat aa thatang leh theihna, siamna khempeuh apiakhia Sia Kap, a nu leh a sanggamte tawh kikim in ZAM naseppihte ih dahkhawm hi. Haksa mah taleh mabante hong zop tantan ding ih lunggulh hi. Naseppihte

ZAM THUPUAK ZAM Kipialo Ding, Kilalo Ding Aci Om
Hih kammal pen, Malaysia sungah kiza thei kiaukiau aa, gam pualam panin zong ki zathei zel hi. Tukum 2012 sung bekin a kiza thuging hilo bilbel hi. Thuging cih ciang, a gen masa khat om hamtang ding aa, kigenlopi-in athu kizalo ding hi. A genkhia masa pa/nu in ngimna khatpeuh nei aa genmaw, ahih kei leh ama muh bangin agen maw, banghang tua thu gen cihpen tua a gen pa/nu in telpen ding hi. ZAM kipialo ding, ZAM kilalo ding cih kammal bilbel pen, kammal thak hilo-in 2006 sungin zong kiza kha ding hi, 2007 sungin zong ki za kha ding hi. 2008 kum ciangin zong tuabang thu kiza lua hi. 2009 kum hong tungto, ki gen veve lai! kum 2010 hong lut, ki za kiaukiau lai veve! Kum 2011 hong hita tuabang thu ki tamzak phalo bilbel! Banghang? UNHCR in mobile registration dan vaihawm lo uh. A lamdang leh a telhak mahmah thu khatin banghiam cih leh, hih Zomi Kipawlna vai negative (aphalo lam) a genkhiate pen Zomi Zopau zang tangtang sung vive pan mah hihtuak bilbel hi. Banghang Zomi pau kibang sungpan ki cithei hiam cih leh, tu ciangciang, namdangte Kipawlna khat peuhpeuhin tua bang gen hiveh aw, kici ngeilo zaw in, lawmte-in tuaci gen, khuapihte’n tuaci gen, siapa-in tuaci gen, ka makaipa-un tuaci gen, cihdan vive ahih manin, Zomi Zopau zang tangtangte kam pan a pusuak sawnsawn kammalte na himawk hi! Ahi zongin, kum (5) val sungah tuabang kammal kiza zelzel, a kigenna a maanloh ciang tawlkhat hong daii leuleu, a sawtlo khatteh, ZAM tuacilo ding, ZAM tuaci ding cih kiza leuleu zel hi. A deuhdeuhin, 2009 leh 2010 sung aa mobile registration hun sung bangin zong lamdang liang hi! ZAM Khawk (10) val tham pan Zomi Zopau zang sinsen tul tampi-in registration a ngah ziahziah sung mahin tuabang thu kigen kiza lai veve hi. Banghangin kha simin thu kikhahlo hiam Banghangin 2011 sungin ZAM kipialo ding, ZAM kilalo ding cih thu khawng kizalo hiam? Banghangin 2012 hong lutzawh khutme mekding vai-ah, ZAM member te khutme meksaklo ding cihkhawng kizalo hiam? Cidamna lam nasepnate, sang lam nasepnate, sihna genvaite, pawi bawlnate, kimawlnate, nisim aa kizolo thei zumlai gelhsaknate, kimat-kihen panpihna vaite, thusuahna (informaiton) nasep vai khawngah ZAM member te UNHCR in sanglo, mulo, theilo ci aa banghang kigenlo hiam? Khasim, a hunsim aa tuabang kammal kigenlo na piin, UNHCR registration vai hong om khawng ciang, ahih kei leh tukum aa hong pat uh data collection vai a om ciang ZAM tuacilo ding cih kiza cihpen, a gen pa/nu in deihna khat, ngimna khat neilo-in gen hetlo ding cihna hi. Thu kigen khempeuh ki encik man ngeilo Ei Zomi te-in, UNHCR te nasepzia ki thupi sim ahih manin, cikmah hunin a sep ngeiloh ding uh deidanna cihte, thu langgenna cihte kizang ngeilo hi! Kizanglo ding hi! Ahi zongin, Zomi sung veve pan thu langgenna khatkhat nihnih in a zat teitei leh, tuapen sulzuih manlo ding hihang. Data collection vai tawh kisai vai khempeuh ZAM THUPUAK Volume 6, Issue 44 (April 8) ah kicing takin kigelh khin ahih manin, a vekpi aa ih simkhit zawh kei leh thu omzia zong kitel vetlo pahding hi. iNFO

April 15, 2012

Penang ZAM Member Te Data Kaihkhopna
April 14, 2012 ni-in, Penang aa om ZAM member te biodata kaihkhopna UNHCR in vaihawm sakthei hi. Hih vai ding kigin’kholhna-in, UNHCR pan thuzakna omsa mah bangin April 12, 2012 ni-in ZAM Lutangpi leh Thuzekpi Huh te Penang va zinthei uh aa, April 14 ni ZAM member te vai a mankhit ciang KL hong zuankik uh hi.

Thu Tomno Kaihkhopna Bangci Vaihawm Uh
Mang kamin Data Collection ci-in, April 9, 2012 ni pan UNHCR in KL pan a gamla lam khuate-ah vaihawmna a kipat pen zom toto uh hi. Ei kamin a naithei penin thu tomno kaihkhopna ih cimai ding aa, hih vaihawmna-ah, UNHCR in anuai aa bangin mi khatkhatta-in vaihawm sak uh hi; Kipawlnate tung a khaksa uh Basic Biodata form laidal tung bulphuhin, Min, Suahni, Tun’ni cihte dong uh aa, form laidal khatteh mi khatta hipah in, maan (photo) zong zaih tangtang uh hi. Hih thu tomno kaihkhopna pen minsan’na (UN piakna) hilo hi, a cihmah bang un, tu ciangciang a vaihawmnasate uh en le’ng, nidang aa registration (UN piakna) te tawh kibang vetlo pah hi. Ahi zongin, UN te minsan’na (UN card) deih/kisam mi khatin, a gampan ataiikhiatna hang cihkhawng, lim takin a kigin’ tawntung ding mawhpuak khat ahihi. Hun khat ciang, hih a kaihkhop uh thu tomnote leh maan/ photo te tungtawn mahin registration (UN piakna) hong neilo ding a ci ngam ki omlo hi! Hong pia ding na um hiam?

KL, Selangor State Leh Negiri Sembilan Sung Aa ZAM Member Te Aa Ding Kigin’kholhna
Ei gendanin KL sung leh a kiimteng aa ding ZAM member te form laidal khumsakna April 5, 2012 ni pan a kipan hi aa, kigin’kholhna cihmah bangin tu April kha sungin zawhsawm ding hihang. Meltheih kiim leh pamte zasak tek ni. ZAM member (pawlmi) sungpan, KL leh a kiimnai aa om, UN ngahnailo, kum 18 leh atungsiah, innkuan lutpihna a ngak ahilo khempeuh in tua form laidal pen, mi khatin khatta ZAM zum ah pai-in khumding ahihi. Theih hamtang, zuih hamtang ding Kum tampi, kha tampi ZAM card tawite ahi zongin, tunai aa bawlte, tutawm aa bawlte ahi zongin, tutung aa form laidal thak tungah na thu na khum tektek kei leh, data collection vaiah kihel theilo thei hi teh. Nidang khawng aa ih khum ei form laidalte tawh kisai nawnlo hi! Tu-in mi khat laidal khat hita hi. Sum bangzah beiding cih dotna tawh kisai Tu tadih ZAM card tawi member khempeuh in zum hong pai aa form laidal sungah thute khumding/gelhding ciang ki vaihawm ahihi. UNHCR pan hong kaihkhop uh ciang aa beiding khempeuh ZAM member akihelkha dingteng mahin sum tawh ma ih pan’khop hun hong om veve ding, cih theikhol tek ni.

Zongeina Sialsawm Kumthak Pawi Sapna
Malaysia gam sung a om, Zomi ulenau, nulepa, siate aw, kum 2012 April kha 21 ni in, Zomite’ Kumthak ni, Zing kha, khadet ni 1 ni hi a, ZOCUS te makaihna tawh amasa pen Sialsawm Kumthak muakna pawi kibawl ding hi. Nasepna gam ahih maniin, mi a tamzaw hun ngah theih ni ding, mi atam theithei ih kihel theih nading lunggulhna tawh April 22, 2012 ni a bawl dingin ZOCUS Committee in, hoih kisa hi. Tha leh ngal, sum leh paai leh ih siamna ciat sitt loiin, Zomi kici khempeuh kihel ciat ni. Zongeina laamte, gam itna late, minam itna late a kipan, ih hih theihna ciat tawh maa pangkhawm ciat ni, ci-in minam itna tawh kong zawn uh hi. Amun: FGA Rawang Zomi Innkuan, 14/Jalan Water Fall Ani: April 22, 2012; Ahun: 2:00 – 6:00 p.m. Kizopna’ng: 017 332 5220, 017 329 1810, 016 673 6691 ZOCUS (Zomi Ngeina Zuun Kipawlna) Malaysia

Sign up to vote on this title
UsefulNot useful