Oríxenes del societarismu familiar asturianu

Xaviel Vilareyo y Villamil

La familia rural n'Asturies tradicionalmente vieno iguándose meidante un sistema de normes y derechos que configuren un modelu de societarismu familiar o de familia amplia que nomamos Sociedá Familiar Asturiana. Sobre los posibles oríxenes del societarismu na familia tradicional asturiana, entendíu como círculu de parentescu básicu que conforma’l modelu tradicional de la familia astur, suelen apuntase con reiteración los raigaños que l’asocien con otros modelos familiares del ámbitu européu, como son el núcleu familiar célticu o “Sept” y la estirpe familiar xermánica o “Sippe”. Anque’l modelu familiar desendolcáu n’Asturies bien pudiera orixinase autónomamente como espresión propia del carácter peculiar d’una sociedá perantigua como lo ye l’asturiana y como manifestación propia d’un pueblu asitiáu dende mui vieyo nuna tierra del too peculiar y aisllada como ye'l país astur, nun cabe dulda que les estreches semeyances con otros modelos familiares célticos y saxones fáinnos camentar ciertamente nes posibles rellaciones ente la organización familiar y social de tipu xentiliciu típica del pueblu asturianu y les d’otros pueblos del so mesmu continente européu. La tendencia nel tipu d’organización familiar asturianu hacia’l matriarcáu o bien hacia una equiparación en términos de parentescu y sucesión ente homes y muyeres fairía per otru llau camentar nun sustratu autónomu nel orixe de la organización familiar asturiana o como muncho más averada a sustratos culturales célticos que xermánicos. Esti tipu de rellación vendría a presuponer la idea de qu’hai países o pueblos d’Europa onde esti tipu d’organización familiar amplia se caltuvo a lo llargo les dómines con plena vixencia y ensin influencies d’otros esquemes societarios que yá se xeneralizaren n’Europa dende antiguo. El caltenimientu d’estes sociedaes familiares, que per otru llau quizá seyan el tipu d’organización social y primariu más vieyu y más afín a la naturaleza orixinaria del ser humanu, pudo debese al fechu de tar inxertaes estes

sociedaes dientro d’unos territorios y países bastante alloñaos físicamente de los grandes espacios migratorios o de mestizaxe humanu como ocurre precisamente nos finisterres europeos y nos países de montaña, como ye’l casu d’Asturies, y tamién hai que tener presente qu’esti conservacionismu pudiera asinamesmo esplicase pol carácter intrínsicamente más impermeable a les nueves formes d’organización social y familiar y menos predispuesta a asimilar los influxos culturales foriatos por parte d’estos mesmos pueblos asitiaos nestes zones dende cuantayá. De toes formes, el sustratu celta y/o xermánicu, inclusu considerando l’elementu más específicamente étnicu, ye una constante temporal apreciable non sólo n’Asturies sinón tamién en tol nordés peninsular y anque la xeneralidá y la gran diversidá cultural d’esti tipu de sustratos globales nun permita ufiertar más soluciones al problema de los oríxenes antropolóxicos que les que podamos atopar nes semeyances que recíprocamente apreciamos nestos grupos familiares, obligándonos a camentar quizá nun posible aniciu o sustratu común o polo menos xeneral a toles sociedaes-raigañu d’Europa, esto ye, un tipu d’igua social común a tolos pueblos vinculaos a una tierra o país d’orixe propiu y non asistiaos recién nun territoriu d’inmigración o de conquista, lo que camudaría dafecho los primitivos modos d’organización social y familiar menos vinculaos a la sangre y al territoriu. Nesti sentíu, Asturies, como otros países, íguase como una sociedáraigañu, orixinada y formada en redes sociales de tipu básicu como la estirpe o familia amplia de varies xeneraciones en llinia ascendente y descendente y tamién texía por otru tipu d’organización superior como sedríen los grupos comarcanos o xuntes de parroquia y por otres instituciones de tipu cuasi estatal como asociaciones de los valles o xuntes de conceyu xeneral. Pel contrario, naquellos territorios d’inmigración, de frecuente pasu o comerciu y de constante intercambiu humanu y cultural o simplemente de conquista, les redes familiares y de parentescu nun yeren tan fuertes y inda siéndolo, tienden a una menor cohesión y estabilidá y polo tanto alcuéntrense más predispuestes pa fundase o establecese sobre nueves bases y rellaciones más desvinculaes y non tan referentes a una rigurosa consanguinidá tribal, sinón más bien establecíes y rexíes por principios menos conservadores como podría ser la autonomía de la voluntá (el matrimoniu) y perpetuada por vínculos más estrechos de parentescu (fíos,

ñetos). El tipu d’organización tribal y xentilicia que controla y ordena la vida de los sos miembros propiu del primer tipu de sociedaes señalaes daría pasu a un segundu tipu de sociedá fundada y orixinada a partir del contratu matrimonial y les consiguientes lleis de la sucesión hereditaria en llinia vertical y descendente. El primer frayamientu importante esperimentáu n’Asturies nes redes familiares y nos círculos de consanguinidá o parentescu entamó cola Reconquista y cola Repueblación, cuando les sociedaes xentilicies del norte, perfectamente encuadraes y inmóbiles durante sieglos escomenzaron a esmembrase por causa del ésodu dica’l sur de parte de los sos miembros. Dende l’Alta Edá media families enteres astúriques asitiaron per tola meseta sur del Dueru y rompíen por consuigiente los sos orixinarios vínculos de familiaridá y rellaciones societaries coles xentilidaes del norte. Ello favoreció precisamente un cambiu de mentalidá grande nel sen d’organizar les rellaciones familiares y de parentescu baxo unes nueves normes tendentes a primar la consanguinidá directa y la descendencia en llinia recta descendente, formandose nueves families en semtíu vertical y escaeciendo poco a poco la primitiva rede o organización familiar xentilicia d’estirpes colaterales. Los siguientes frayamientos de la rede xentilicia astur materializáronse nun constante caudal migratoriu pa fuera del país que rompió llazos y estructures cuasi imposibles de restaurar debío al total cambiu cultural qu’esperimentaben los emigrantes y los sos descendientes que nun podíen volver integrase nel bierzu y na estructura familiar xentilicia primitiva. Asina, les orixinaries estirpes foron camudando n’estructures familiares cada vez más autónomes y autosuficientes y tamién más reducíes y desvinculaes ente sí. Los llazos de consanguinidá reducíénse simplemente a eso, a tener un mesmu sangre, pero la idea de pertenencia a una mesma familia diba debilitándose. Y dientro d’una sociedá cada vez más estatalizada y desruralizada ye onde s’afaya y consolida la familia nuclear, formada esclusivamente por unos padres y los sos fíos (culturalmente y progresivamente reducíos en númberu a dos o trés como términu mediu), hasta qu’éstos llogren una emancipación efectiva de tipu económicu. Anguañu, la nuestra sociedá tecnoloxizada tien fabricao families monoparentales (padres viudos o solteros) y tamién esisten güei abondes unidaes familiares formaes paradóxicamente por una sola persona.

La función de promoción social, apoyu, desenrollu personal y protección qu’ufiertaba la sociedá xentilicia, la estirpe o’l clan familiar vese güei suplantada pola que proporcionen les entidaes estatales. Pero penriba de tolo anteriormente dicho, la Sociedá Familiar Asturiana supón la escepción d’esta tendencia cultural sobre los cambios nos modelos familiares, conservando un tipu d’agrupamientu humanu ancestral y ritual, dotáu de lleis propies y funciones perimportantes pal desenrollu económicu y humanu del individuu integráu nel so grupu societariu básicu, y la so esistencia actual y el so puxu incuestionable vien a confirmar que los vínculos humanos se caltienen cuando la voluntá se manifiesta nel sen de respetar los vezos societarios y familiares que durante dómines favorecieron al individuu na so doble faceta individual y social , vezos que ficieron posible caltener les condiciones que posibiliten la estabilidá d’esi sustratu ancestral, cultural y humanu, que ye la familia societaria astur.

Sign up to vote on this title
UsefulNot useful