You are on page 1of 4

Página 8

Núm. 174

¿Qué ye persona?

1 de Mayu
Manifestación
Plaza
L’umedal
12:30 hores
Xixón
¡Acude!

D

icen que yera mui
neñu
cuando
pasó dalgo que
nun me dicen lo
que ye. Pero dicen que pasó.
Dicen que por eso quedé asina y
que nun toi bien. Dicen que nun
pasa nada, que nun voi morrer...pero qu’esto ye pa siempre. ¿Qué ye siempre?
Voi a un sitiu con
munchos neños y neñes como yo. Bono
como yo non. Ellos
abren la boca pa falar,
ríense, péguense, siéntense falar, cuerren,
mírense, tóquense...Voi
a una escuela pública
porque dicen que son
les que miren por mi.
Que les otres nun me quieren. Si
mio ma quierme, ¿por qué esos
sitios nun me quieren...? Dicen
que voi facer amigos pero los
otros neños mírenme raro. Dicen que voi xugar pasalo bien
y... Dicen que voi socializar.
¿Qué ye socializar?
Hai dalgunos que se ríen de
mi. Yo nun me río más que con

mio ma, como cuando taba dientro d’ella que me ría muncho
con ella y ella comigo. Yo bábome. Caime la baba ensin dame
cuenta. Siempre tengo’l cazu
moyáu y un pañuelu na mano
pero nun acierto a sécame. Mio
ma ta tol día pasándomelu pela
boca. Dícenme que suba la cabeza que nun me mire

l’embeligu, que mire p’alantre.
¿Qué ye alantre?
Dicen que tengo que me
relaxar pa ser a coyer les coses.
Que si nun me relaxo nun soi a
abrir la mano y voi siguir aventando les coses allalantrones.
Entós glayen y dicen ¡reláxate!
¿Qué ye reláxate?
Mio ma péñame tolos díes y

llávame y vísteme y échame
coloña pa goler bien y tar bien
guapu. Pero los demás siempre
tan lloñe de mi. Ellos sí que son
guapos, toos. Sicasí, ellos dícenme que güelo mal y que soi raru.
¿Qué ye raru?
Cuando taba dientro mio ma,
sentíala falar y caminar y movíame cuando ella conciaba, y banciábame
selemente. Prestábame que me falare, por eso me movía porque quería vey los güeyos y los
llabios y la llingua...
Amás yo, daquella,
nun sabía falar.
Agora sí. Bono, agora, cuando falo, los
demás nun me contesten porque nun abro la boca: mírenme
y sorríen; pero mio ma sí fala
conmigo y yo con ella. Los demás non. Falen conmigo pero
nun falen conmigo. Dicen que
como yo nun falo nun soi persona. ¿Qué ye persona?
Berto Cobreros 2010
Maestro en I.E.S

D.L. AS 90/1986

boletín

mayu 2015

www.suatea.org
Email: suatea@suatea.org
www.facebook.com/suatea
www.twitter.com/suatea
Tfno. 985274343
C/ Telesforo Cuevas, 2, 1º A
33005 UVIÉU

Conteníu:
Campaña de SUATEA
pola meyora de les
condiciones llaborales
del profesoráu

1

La Especialidá de Llingua Asturiana: otra
oportunidá perdida

2

Integración de la educación de 0 a 3 na
Conseyería
d’Educación: la llucha
sigue

4

Propuesta calandariu
escolar cursu 20152016

4

Resoluciones del Conseyu Escolar
d’Asturies.

5

#ElCantarDelVasu

5

El TTIP y el TISA: Historia de dos vampiros

6

Foro Social Mundial de
Túnez

7

¿Qué ye persona?

8

Campaña de SUATEA pola meyora de les condiciones
llaborales del profesoráu

E

sta campaña, que yá
se ta espardiendo
pelos institutos y escueles, céntrase na
meyora de les condiciones llaborares del personal, incluyendo
ente otres reivindicaciones la recuperación del poder alquisitivu,
la reducción de la xornada y el
refugu a la contratación de becarios con funciones docentes que

meteríen la precariedá, nel términu más absolutu, ente los enseñantes.
La Conseyera, pesie a les sos
declaraciones grandones contra
la Llei Wert lo que fai ye siguir
metiendo recortes y, en cuantes
a los currículos, aplicala de pe a
pa. Por ello, consideramos
qu’esti ye’l momentu de denunciar que siguir cola implantación

de la nueva llei d’educación supondrá imponer, ensin debate
social nin conocimientu con antelación abonda, una nueva organización nos centros que llevará a una reconversión de parte
del profesoráu como consecuencia de la perda de la carga horaria pa munches especialidaes.
Consideramos qu’esti ye un
momentu clave pa retomar les

Página 2

se presen a les elecciones de
mayu.
Creemos que ye importante la
participación y el debate nos centros d’estes reivindicaciones que
presentamos. La nuestra campaña va siguir cola celebración
d’asamblees y l’unviu a los centros de propuestes de documentos pa que los claustros garren
postura pidiendo la paralización
de la implantación de la LOMCE.
La propuesta organizativa que
la conseyería d’Educación pon
enriba la mesa supondrá ente
otres coses la desapaición d’unos

80 puestos de profesoráu técnicu
de FP yá qu’elimínase l’apoyu al
área práctica, la reconversión
d’abondos docentes d’especialidades de los que la so carga
horaria disminuirá o sufrirán la
obligatoriedá de tener un
númberu mínimu pa constituyir
grupu
Dende SUATEA dirixímonos
pues a toles organizaciones esmolecíes pol enseñu públicu y al
profesoráu asturianu pa dicir yá
valió a esta situación que pon en
peligru ún de los encontos de la
nuestra sociedá.

La Especialidá de Llingua Asturiana: otra oportunidá perdida

C

Nel últimu
Plenu del
Conseyu, otra
vuelta,
aprobóse por
mayoría
encamenta-y
al gobiernu
estatal la
criación de la
Especialidá de
Llingua
Asturiana. La
propuesta,
como siempre
fíxola STEs y
defendióla
Beatriz
Quirós.

uantayá que SUATEA
vien
proponiendo
nel Conseyu Escolar
del Estáu (CEE) la
criación de la especialidá de Llingua Asturiana y la dignificación de
la nuestra llingua.
Nesi CEE, onde s’ellaboren un
informe añal y dellos encamientos
al gobiernu, la voz del asturianu
ta siempre presente gracies al
llabor de los representantes de
STES, Augusto Serrano Olmedo,
José Luis López Belmonte y la
nuestra compañera Beatriz Quirós
Madariaga.
Nel últimu Plenu del Conseyu,
otra vuelta, aprobóse por mayoría
encamenta-y al gobiernu estatal
la criación de la Especialidá de
Llingua Asturiana. La propuesta,
como siempre fíxola STEs y defendióla Beatriz Quirós.
Nesti mesmu cursu, el Ministeriu d’Educación presentó un
Proyeutu
de
Decretu
d’Especialidaes Docentes nel
enseñu secundariu, réxime especial y FP, onde nun se falaba pa
nada
de
la
Especialidá
d’Asturianu. Depués de retirase’l
primer Proyectu, el MEC presentara otru de calter “técnicu”. Por
cierto que tovía nun ta espublizáu
esi nuevu Decretu nel BOE. Nesi
tampoco taba recoyida la existencia de la Especialidá de Llingua
Asturiana. Énte esa situación,
dende SUATEA entamamos delles
acciones pa que d’una vez se
reconociera esi derechu.
El Proyectu de Decretu tenía

que pasar pel dictame del CEE. col compromisu. Nin FETE, nin
Como’l Conseyu yá se pronuncia- CCOO nin CEAPA (M. Virgós
re en favor de la Especialidá, n’Asturies) mandaren la enmienl’Academia de la Llingua Asturia- da qu’ellos mesmos ayudaren a
na plantegó que yera bono axun- redactar n’Asturies. Quien sí
tar a toles organizaciones que tán mandó’l documentu foi CSIF.
representaes nel CEE y con preLes votaciones quedaron asisencia n’Asturies (los cinco sindi- na: 10 a favor de la enmienda
catos que formaben parte de la (tolos sindicatos, CONCAPA, EduXunta Personal, les asociaciones cación y Gestion y la Asociación
de pas y mas y el Sindicato de d’Estudiantes CANAE), 5 en conEstudiantes) A la reunión convo- tra (MEC, Vicepresidenta, Persocada na Academia col envís de nalidá de reconocíu prestixu y
facer un testu conxuntu pa ser representante d’universidá. Absdefendíu nel CEE namás fuimos tención 4 (CEAPA 2 votos: persoSUATEA, FETE y CCOO amás de la nalidá de reconocíu prestixu y
CONCAPA. El SE y la Federación
CEOE).
Virgós
(CEAPA)
escusen
Una ocasión perdida p’amosar
l’asistencia pero dícense interesala
unidá
de la Comunidad educatios na propuesta. Decídese consensuar un testu sofitando la cria- va pero un trunfu pal asturianu
ción de la Especialidá pa que se- nel Conseyu.
ya refrendáu pola Comisión PerMientres,
la
Conseyera
d’Educación nesti casu de viaxe
manente del CEE.
El representante de STES na con dellos músicos de la OSPA en
Comisión Permanente faló direc- Nueva York, unvia a la recién
tamente colos responsables de puesta de Directora Xeneral a una
col
Ministeriu
los sindicatos estatales pa que reunión
fexeren lo mesmo: unviar la en- d’Educación onde se tenía que
mienda conxunta pa facer presión defender la especialidá.
sobre’l MEC y que vieren en MaAgora, la situación ye esta: la
drid que nun yera solo una pro- Conseyería entrugó-y al Ministeriu
puesta asturiana sino que taba cuála yera la normativa pola que
sofitada poles organizaciones la Comunidá Asturiana podía desenrrollar la normativa pa criar la
estatales.
Cuando se cellebra en Madrid especialidá.
la Comisión Permanente, resulta
El oMinisteriu respondió yá a
Pie de imagen
que de les organizaciones gráfico.
que esta entruga: namás si la Llingua
n’Asturies se comprometieren a Asturiana ye oficial podrá criase la
mandar el documentu, namás Especialidá. Ta claro que nun
SUATEA al traviés de la Confede- podemos dexar de siguir emburación de STEs, Sindicato de Estu- rriando p’algamar esta reivindicadiantes y CONCAPA cumplieron ción histórica.

Pola escuela pública
En defensa de los y les trabayadores
Campaña pola meyora de les condiciones llaborales

reivindicaciones docentes: de primeres enfrentámonos a un
carráu de cambios col trabayu extra qu’ello implica cuando sábese
que la LOMCE puede tener fecha
de caducidá y sería un esfuerzu
inútil; de segundes la cercanía de
les elecciones autonómiques oblíganos a dexar clares les necesidaes urxentes del profesoráu y
del propiu sistema educativu asturianu pa qu’éstes les recueyan
les diferentes organizaciones
polítiques ente los sos compromisos electorales. Nesi sentíu dende SUATEA solicitemos entrevistes colos principales partíos que

Página 3

Meyores salariales

Reducción xornada

Recuperación de la
baxada de les retribuciones aplicada en 2010.
Recuperación del poder
alquisitivu perdíu nos
últimos años.
Xuba llinial, pa tol profesoráu, ensin discriminaciones.

Recuperación, como
mínimo, de les condiciones anteriores al branu del
2012, eliminando les dos
hores llectives impuestes
en Secundaria.
Regularización de les
hores de guardia afitando
un máximu común pa tol
profesoráu.
Reducción xornada llaboral pa mayores de 55
años ensin mengua de
les retribuciones.
Estes trés midíes
impliquen l’ampliación de la plantiya
per aciu de la convocatoria d’oposiciones
pa facer más mozu al
profesoráu asturianu.

O nunca
Agora

Meyora de les condiciones llaborales
Refugu dafechu de la contratación de becarios con funciones docentes.
Disminución del trabayu burocráticu.
Contratación de personal alministrativu nos centros.
Dotación de personal dinamizador de les biblioteques.
Regulación específica de los horarios del profesoráu que
trabaya a doble turnu.
Disminución de les itinerancies o compensación especial
en casos de penosidá.
Reducción curiosa de les medies xornaes ente los docentes interinos.
Reducción de les ratio.
Garantizar en tolos centros una hora d’atención a les families pol profesoráu non tutor. Nel casu de los especialistes tutores seríen dos hores, una pal so grupu y otra pal
restu d’alumnáu.
Criación de la especialidá de Llingua Asturiana que normalice la situación llaboral de los docentes que la imparten.
Reconocimientu de los representantes de los trabayadores elexíos. Non a la utilización de les direcciones como
intermediarios pa negociar condiciones llaborales del profesoráu.

En defensa del enseñu públicu
Paralización de la LOMCE : non a la privatización del sistema educativu.
Integración de les enseñances de 0 a 3 años nel sistema públicu.
Ampliación de la ufierta de Bachilleratu y FP en zones rurales.
Defensa de la laicidá na escuela.
Reivindicación d’un enseñu públicu verdaderamente de baldre, qu’abarque
llibros, tresporte, comedores, beques, etc.
Presencia de personal de los servicios d’asistencia social que podian detectar situaciones familiares que requieran intervención.
Ellaboración d’un plan estratéxicu d’obres y meyora de los centros.
Dotación de recursos y renovación de los existentes: informáticos, llaboratorios, talleres, biblioteques, materiales manipulables, etc.
Reforma del calendariu escolar pa racionalizar los periodos llectivos y afayalos a ritmos más amañosos pal
alumnáu.

Página 4

Página 5

Integración de la educación de 0 a 3 años na Conseyería
d’Educación: la llucha sigue

E

l sábadu 18 d’abril
fíxose la II Marcha del
chupu. Dende la RENFE d’Uviéu hasta’l
Paséu los álamos, educadores,

families, docentes y personal de
les escueles infantiles reivindicaron otra vez la integración del ciclu
d’Infantil 0 a 3 na Conseyería
d’Educación. Trátase de facer reconocer el so carácter educativu y
algamar la so gratuidá y la igualdá

nel accesu pa toles families que
quieran ensin discriminación pol
sitiu onde vivan o los ingresos que
tengan.
La recoyida de firmes entamada dende principios de cursu, que
yá perpasó cuantayá la cifra de
16.000, sigue vixente y la campaña sácase de los centros educativos pa treslladala al restu de la
sociedá, amosando que los derechos de les persones y los servicios
públicos
tienen
qu’interesanos a toes y toos como
ciudadanes y ciudadanos.
En vísperes de les elecciones
n’Asturies, consideramos importante mantener esta reivindicación, y que’l próximu gobiernu sepa que nun renunciamos a ella. A
pesar de llograr parar el proyectu
de Llei de Consorciu que pretendía
xestionar les Escueles Infantiles
con un modelu refugáu por tola
comunidá educativa, entá ta por
definir cuála va ser la fórmula que
s’use, quién asumirá de verdá les

competencies y si va siguise poniendo pilancos a la equidá nel
accesu a esti serviciu.
Pola calidá y calidez de les Escueles de 0 a 3 será necesario
tamién siguir lluchando pola meyora de les condiciones y requisitos
que tienen que cumplir. Ta acabante de publicase nel BOPA el
decretu que define les característiques que tienen que tener estos
centros. Igual que cola Llei de Consorciu, esta norma fíxose de llombu a les reivindicaciones plasmaes
en reuniones y movilizaciones, y
nun queda más que siguir denunciando y pidir, ente otres coses,
que'l númberu de rapacinos por
unidá seya menor y que se ponga
la pareya educativa, garantizando
la presencia de 2 persones a
xornada completa en cada grupu y
qu'hebia tiempu p'atender a les
families y pa planificar l'acción
docente dientro del so horariu
llaboral.

Propuesta calandariu escolar cursu 2015-2016

L

’otru 14 d’abril la
Xunta de Personal
Docente presentó, a
propuesta de SUATEA y consensuada por toles organizaciones sindicales, a la Conseyería d’Educación la so propuesta
de calandariu escolar pal cursu
2015-2016. Cola preceptiva obligación de 175 díes llectivos
(marcada por Llei), el retu del nuevu calandariu yera un mayor aprovechamientu escolar, onde’l procesu de enseñu-aprendimientu

fuera más acordie a les necesidaes, descansos y desenrrollu del
alumnáu. Divídese esta propuesta
en 5 períodos llectivos (ente 31 y
38 díes) y con una semana, polo
menos, non lectiva lluego de cada
períodu. Amás, incluiríense nel
calandariu escolar los díes 1, 2 y
3 de setiembre (pa secundaria)
por coincidir con exames y evaluaciones. Anque la Conseyería
d’Educación ye la que tien la última palabra, na reunión que suponemos tendremos (a la qu’asisten

tamién organizaciones sindicales
de la concertada-privada, representantes de padres y madres,
representantes de los directores
de primaria y secundaria) vamos
defender esta postura por entender qu’esta propuesta (númberu
proporcional de díes anantes de
caún de los descansos) favorecerá un mayor y meyor desenrrollu
académicu del alumnáu asturianu.

Pie de imagen o
gráfico.

Resoluciones del Conseyu Escolar d’Asturies

Pero’l gobiernu asturianu, vasallu
fiel a los mandaos de Madrid, quier siguir alantre
aplicando la
contrarreforma educativa,
anque faga
esparabanes
intentando
convencer de
que lo faen
mal agustu y
obligaos.

L

’otru 9 d’abril celebróse
un plenariu del Conseyu Escolar d’Asturies,
onde diben votase les
propuestes de dictame a los proyectos de decretu de currículu, tanto
de la ESO como de Bachilleratu.
D’aprobase estos currículos, impliquen l’aplicación de la LOMCE
n’Asturies, con tola llaceria qu’ello
implica pal enseñu públicu, y amás
teniendo en cuenta que l’actual llei
educativa tien la fecha de caducidá
puesta, dao que tolos partíos del
arcu parlamentariu, sacante’l PP,
comprometiéronse a derogala en
teniendo ocasión pa facelo.
Pero’l gobiernu asturianu, vasallu fiel a los mandaos de Madrid,
quier siguir alantre aplicando la
contrarreforma educativa, anque
faga esparabanes intentando convencer de que lo faen mal agustu y
obligaos. Asina, al plenu del Conseyu Escolar d’Asturies presentáronse
delles enmiendes al currículu de
Bachilleratu, que ye onde se fai la

V

a un añu, coincidiendo con Día de les
Lletres, dábase a
conocer el proyectu
que taben desenvolviendo 3 mayestros del Sistema Educativu Públicu
Asturianu col enfotu de trabayar la
tresmisión xeneracional de la llingua
asturiana dende una perspectiva
lúdica, con un cantar y un vasu.
Esta iniciativa en manes d'Iván
Huerga, Pablo Quiroga y Poli Mencía
salía de les aules y los patios de los
centros educativos pa tomar la cai y
presentase en sociedá realizando
una actividá en La Pola Siero na que
buscaben implicar a tola sociedá
asturiana entamando la grabación
d'un vidiu musical nel qu'un vasu,
metáfora del idioma, pasaba de

mayor estroza, que nesti casu los
representantes de l’alministración
nun tuvieron otru remediu que votar
favorablemente.
Polo tanto, si’l currículu de la
ESO cuntaba col preste casi unánime del Conseyu, nun pasó lo mesmo col de Bachilleratu. Les enmiendes aprobaes por casi unanimidá
fueron la que defende que la Historia de la Filosofía siga siendo obligatoria en 2º de Bachilleratu en toles
especialidaes del mesmu, la que
propón que siga habiendo una hora
presencial de tutoría nesi mesmu
cursu, y la que pide eliminar
l’asignatura de Relixón en 1º de
Bachilleratu. Sicasí, les referentes a
Llingua Asturiana amosaron bien a
les clares lo poco que-y importa la
mesma a esti gobiernu. Nel borraor
propuestu l’asignatura baxaba de 4
hores a 1, tanto en 1º como en 2º
de Bachilleratu, y salió alantre una
enmienda que proponía dexalo como taba nel primer cursu, pero non
nel segundu. L’Alministración, otra

vuelta, depués de pasar una lexislatura mareando cola tema de la especialidá docente pa qu’al final de
la mesma se constate que la única
posibilidá de dignificar la llingua
asturiana nel sistema educativu ye
oficializándola, sigue siendo tafuña
y fuina en tolo que toca al idioma
del país.
Pa rematar, una bona decisión
tomada
por
unanimidá.
N’aprobándose’l dictame favorable
al currículu, el presidente del Conseyu, Alberto Muñoz, propunxo una
resolución
que
pidiera
a
l’Alministración asturiana la non
aplicación de la LOMCE pal cursu
que vien, dada la premura del mesmu y el pocu marxe pa desendolcala. La propuesta salió alantre por
unanimidá, curiosamente colos
votos de los representantes de la
mesma Alministración que, díis
depués, negaba tala posibilidá.
Definitivamente, tan bon vasallu
merez un meyor señor.

#ElCantarDelVasu
mano en mano simbolizando la trasmisión xeneracional de la llingua
asturiana como pegollu fundamental pa la normalización llingúística
de la mesma.
El trabayu siguió pel branu grabando escenes con futbolistes del
Sporting de Xixón y del Rial Uvieo,
asina como otres persones nomaes
nel ámbitu cultural y social
d’Asturies como los etnógrafos Xosé
Ambás y Ramses Ilesies, les actrices
María Cotiello y Blanca Romero, los
cantantes Melendi y Paula Rojo, o’l
presentador de la TPA Camilo Sousa. Asina mesmo ficiéronse dellos
talleres como'l que se desenvolvió’l
Día de la Reciella nel Muséu del
Pueblu d'Asturies de Xixón.
Un trabayu que foi tresmitiéndo-

se a traviés de les redes sociales
xenerando simpatíes y muncha espectación por ver el resultáu final
que se presentó publicamente na
entrega de los Premios Andrés Solar
qu'organiza la Xunta pola Defensa
de la Llingua Asturiana, recibiendo
numberoses crítiques positives.
El vidiu espardióse peles redes
sociales como regalu de Reis algamando les 20.000 reproducciones
en menos de 15 díes, con presencia
en casi tolos medios de comunicación d'Asturies, y teniendo repercusión en páxines irlandeses d'onde
saliere la idega orixinal.
El proyectu #ElCantarDelVasu ta
garrando vida propio nes escueles y
institutos d'Asturies, onde yá se
repartieron casi 3.000 vasos mariellos. Con motivu de la celebración
del Día de les Lletres Asturianes
2015 hai actividaes preparaes en
centros educativos de Navia y Llubarca, Xixón, Mieres, Lluanco, Cangas del Narcea, Onís, Ponga, Arenas
de Cabrales, Llangreo, Llanera, Les
Arriondes,...
Na páxina www.xuncir.net tienes
tola información al respective del
proyectu asina como los sos perfiles
sociales en Facebook, Youtube,
Twitter, Tumblr o Instagram.

Página

6

Página 7

¿El TTIP y el TISA: Historia de dos vampiros

Podemos
resumir en
poques
palabres
l’envís del
TTIP como
la eliminación
final de
cualisquier
torga pa la
llibre
circulación de
capitales,
empreses,
trabayadores
y productos
ente los
países
firmantes.

L

’Asociación
Transantlántica pal Comerciu y la Inversión ye la pomposa
denominación n’asturianu del
tratáu de llibre comerciu ente la
Unión Europea y Estaos Uníos que
lleva años negociándose en secreto y que dio en llamase TTIP poles sos sigles n’inglés.
De magar hubiera delles filtraciones de los sos borraores y les
negociaciones (ente otros por
Wikileaks) la oposición a esta
última vuelta de tuerca del lliberalismu nun dexó de medrar en
munchos de los países afectaos
pol mesmu, ente los que desgraciadamente, de momentu, nun
s’atopa España, principalmente
porque la práctica totalidá de los
principales medios de comunicación ignoráronlu dafechu.
Podemos resumir en poques
palabres l’envís del TTIP como
la eliminación final de cualisquier
torga pa la llibre circulación de
capitales, empreses, trabayadores y productos ente los países
firmantes. Eses torgues, dao que
les barreres arancelaries ente los

dos bloques son mínimes, son les
“barreres non arancelaries”, esto
ye, les lleis y normes que regulen
la vida económica de los estaos.
N’otres palabres, los gobiernos de
los distintos países perderíen la
capacidá de lexislar nengún aspectu de la vida económica, dende la protección social al mediu
ambiente, yá que, en roblando’l
tratáu, tolos países taríemos obligados por él. Non sólo eso, el
tratáu contempla la so propia
irreversibilidá: n’aprobándose nun
va poder derogase nin modificase
por nengún estáu en nengún momentu. A esto hai qu’añedir que
la vixilancia pal so cumplimientu y
la decisión sobre posibles conflictos ente estaos y empreses tará
al cargu de tribunales privaos
d’arbitraxe formaos por miembros
“notables” de la xudicatura y del
mundu empresarial.Pa los pormenores del TTIP remítovos a los
enllaces na Rede qu’incluyo. Les
implicaciones y consecuencies del
alcuerdu pal llamáu estáu social
européu son evidentes; namás voi
añedir que les negociaciones ta
faciéndoles per parte europea la
Comisión Europea en solitario

y nun se contempla nengún tipu
de consulta popular sobre’l mesmu (vese qu’aprendieron la llección del NON francés a la supuesta Constitución Europea). Namás
será necesaria la so ratificación
polos gobiernos de los estaos
miembros.
Xunta’l TTIP siguen tamién les
negociaciones pa otru alcuerdu
rellacionáu: el TISA (sigles n’inglés
que podemos traducir como
“Alcuerdu pal comerciu de servicios”), nel que participen amás de
la UE y USA otros 21 países, y que
propón la lliberalización global del
comerciu de servicios. El so oxetivu ye acabar colo que la terminoloxía
ultralliberal
llama
“competencia deslleal de los estaos” en poner servicios públicos. El
tratáu pretende non solo permitir
el llibre accesu de cualisquier
empresa de cualisquier país a los
servicios d’otru, sinón torgar que
nengún estáu apurra esos servicios. La única escepción a esto
seríen los servicios qu’un país
firmante incluyera de forma esplícita nel alcuerdu final. Nel casu
d’España –y de la mayoría de los
miembros de la UE- nin la educación ni la sanidá podríen metese
nesa llista de servicios non privatizables, yá qu’anguaño la empresa
privada yá ta presente nesos sectores, lo que sigún los principios
del tratáu torga la so conservación como servicios públicos estatales. Por supuesto, igual que nel
casu del TTIP, en roblándolu les
diferentes partes, el TISA será
irreversible y nengún gobierno
podrá cambiar unilateralmente
los sos términos.
Imaxino que lo espuesto hasta
agora ye más qu’abondo pa face-

Pa más información sobre’l TTIP:
http://www.attac.es/no-al-ttip/
http://www.eldiario.es/agendapublica/proyecto-europeo/preguntas-Tratado-Transatlantico-TTiPrespuesta_0_315669128.html
http://es.wikipedia.org/wiki/Asociaci%C3%B3n_Transatl%C3%A1ntica_para_el_Comercio_y_la_Inversi%C3%B3n
http://noalttip.blogspot.com
La versión de la Comisión Europea ta en:
http://ec.europa.eu/trade/policy/in-focus/ttip/index_es.htm
Pie de imagen o
Sobre’l TISA:
gráfico.
http://www.attac.es/2014/07/05/acuerdo-sobre-el-comercio-de-servicios-tisa/
http://www.stop-ttip-ceta-tisa.eu/es/
http://www.rebelion.org/noticia.php?id=189052
Y equí el TISA sigún la Comisión Europea:
http://ec.europa.eu/trade/policy/in-focus/tisa/index_es.htm

se una idea de lo que se mos
vien encima si nun mos xuntamos a la xorreciente oposición
que se ta criando tanto nos USA
como n’Europa. El TTIP yá lu definieron como un “tratáu vampiru”:
si asoleya muerre enantes de
nacer, por eso’l secretu col que

se ta negociando (absolutu hasta
qu’empezó a haber filtraciones).
Permítome encamentavos a contribuyir a francer el secretu conociendo lo que ta pasando, primero, y depués comentándolo cola
xente que conocéis. Namás asina
seremos a valtar la muria de si-

lenciu que los medios españoles
–una vez más amuesen a quién
sirven- llevantaron alredol del
TTIP.
Jose Ignacio Muñiz
Profesor de secundaria

Foru Social Mundial de Túnez

D

La nuestra
Confederación
Intersindical
tuvo representada polos
compañeros
Juan Carlos
Guerra,
de STE-Ex
(Estremadura)
y Faustino Zapico, de SUATEA.

el 24 al 28 de marzu aconceyó na
ciudá de Túnez el
XII Foru Social
Mundial (FSM), l’alcuentru internacional de lo que dende hai
quince años vien
en llamase movimientu antiglobalización o altermundialismu. La nuestra Confederación
Intersindical tuvo
representada polos compañeros
Juan Carlos Guerra, de STE-Ex
(Estremadura) y
Faustino Zapico,
de SUATEA.
Anque’l FSM yera a la otra selmana de los brutales atentaos
wahabites del Muséu de Bardo,
que causaron 25 muertos, y había cierta incertidume sobre si
diba suspendese o non por mieu
a más ataques, la propia comisión organizadora fexo un llamáu
a la participación masiva nel foru
como amuesa de refugu al integrismu y de solidariedá col pueblu tunecín. Nesi sen, hai que
dicir que’l llamáu foi un éxitu, y la
participación foi masiva, especialmente de los países de la redolada.
La participación de los nuestros compañeros, aparte de la
manifestación antiterrorista del
día d’inauguración, consistió
nun alcuentru de sindicatos
d’educación entamáu pola Unión
Xeneral de Trabayadores Tunecinos (UGTT), y nos talleres entamaos nel Campus d’El Manar,
que yera onde se desendolaben
la mayor parte de les actividaes
del foru. Ente estos, destaca
l’entamáu pol nuestru sindicatu
hermanu en Francia, el SNESFSU, sobre los cambios nel ense-

ñu secundariu, y que cuntó cola
participación de sindicatos europeos (Francia, Alemaña, Turquía,
España y Portugal) y africanos
(Senegal y Costa de Marfil).
Ente los elementos negativos

hai que destacar que, más qu’un
foru social mundial, paecíalo
rexonal del Magreb y Oriente Mediu, dao que’l gruesu de participantes yera d’eses zones. Y esto
nun ye una crítica hacia ellos,
evidentemente, sinón a unes
organizaciones europees mui
ausentes. Ye entendible que del
continente americanu hubiera
mui poca xente (sacante los 140
delegaos brasileños) polo lloñe
que ta de Tunicia, pero ye inaceptable que la presencia europea
quedara reducida fundamentalmente a franceses y alemanes,
siendo
anecdótica
o inexistente la d’otros
países del
continente.
Pa rematar,
hai
que
dicir qu’a la
mesa reonda entamada l’últimu
día sobre la
delda esterna, pesie a

tar anunciada como parte fundamental de la mesma, nun asistió
SYRIZA, cuando yera una ocasión
escelente pa visibilizar el so proyectu. Lo mesmo podemos dicir
de toles organizaciones opuestes
al TTIP, que
perdieron una
bona ocasión
p’axuntar esfuercios
na
llucha común.
Ente los aspectos positivos, ta
la enorme solidariedá que se
notaba con dos
causes
mui
sensibles
pa
los
pueblos
árabes: Sah.ara Occidental y Palestina. Y tamién la enorme pluralidá del foru, onde podíen topase
tanto marroquinos unionistes
como sah.arauis del POLISARIO,
sirios baasistes y opositores, defensores y detractores del fracking, “misioneros” musulmanes y
laicos radicales. Nesi sentíu, el
del FSM como llugar d’alcuentru
de tolos que tienen qu’alegar a
les consecuencies de la globalización capitalista, hai que reconocer que, otra vez, foi un éxitu
completu.