Thupuak
Vol 01, Issue 01 July 09, 2017
TOPA hoih hi, ciam unla mu dih un; amah beel mi thupha ngah ahi hi (Late 34:8)
SINNA 01 - LAISIANGTHO, PASIAN' THUBU
Thupatna - Lai Siangtho in leitunga a khanghampen
laibu ahi hi. Kam nam tul valin kikhen khia-a, laibu dang
dangte' sangin bu tam kilei zaw ahih manin, a khangmoipen
le a kisimpen laibu zong ahi hi. Tuma kum tul tampi lai mah
bangin tu hunin zong mi awn tampite in amau' nuntakna
sangin Lai Siangtho it zaw uh hi. Banghang in tua zahta-in
kideih hiam?
Thuciam Lui le Thuciam Thak ci-in Lai Siangtho khenpi
nih kisuah hi. A nihin a manphatna kikim hi. Thuciam Thak
pen Thuciam Lui sangin kum 400 phial zekai zaw hi. Lai
Siangtho sungah abu tuamtuam 66 om a, mi 40 khawng in
kum 1600 sung bang agelh uh ahi hi. Kimkhatte kamsang,
kimkhatte kumpi, kimkhatte ngabeng, kimkhatte vaihawm
ulian, kimkhatte siampi, cih khawng ahi uh hi. Amaute a
kampau uh atuam ciat, a tenna mun uh atuam ciat, a laigelh
hun uh atuam ciat hi napi-in, a thute a ki-elpuak om lo-in
kithuhual kim ahih manin, Laibu khat takpi suak thei hi.
A thu atom lua laibu tawmkhat longal, Lai Siangtho bu
khempeuh phial aphung (alian) le a taang (aneu) in kikhen
hi. Tua in i deih-na mun i zon nading olsak tuam hi. A ma-
sa-in abu min, tua ciangin aphung, tua ciangin ataang in
hong zui hi. Lai Siangtho buppi a kipatna lam a, a kigualsuk
abu neuneute' min phen in i sim nop laibu kizong thei hi.
1. Pasian in mite' kiangah A thu koici puak hiam? (Amos
3:7).
Theih ding: Lai Siangtho sung buppi ah, "Topa'n ci hi,"
"Topa in hih bangin ci hi," "Topa' kammal ka kiang hong
tung hi," cih kammalte tamveipi tak kimu hi.
2. Kamsangte in mai lam thupiang dingte koici theih uh
hiam? (2 Timothy 3:16 & 2 Peter 1:21).
Theih ding: Mai lam thupiang ding ahi bang lian a agen
kholh theihna in Lai Siangtho a maanna sittelna lianpen ahi
hi. Hih pen mihing' hih theih hi vet lo-a, Pasian bek in ahih
theih ahi hi. Kamsang kimkhatte in Pasian' hopihna awging
za uh a, kimkhatte in mangmuhna panin Pasian' thupuak
ngah uh hi.
3. Kamsangte' laigelhte bang kici hiam? (Rome 16:26).
Theih ding: Kamsangte' laigelhte Pasian' kiang pan a
hong pai thu siangtho ahih manin Lai Siangtho kici hi.
4. Mite' kianga Pasian' thupuakte bang kici lai hiam? (1
Thessalonian 2:13).
Theih ding: Lai Siangtho sunga a kigelh thute pen Pasi-
an' makaihna banga kamsangte in agelh Pasian' kammal ahi
hi.
5. Bang deihna tawh Lai Siangtho hong kipia hiam?
(Rome 15:4).
Theih ding: Thutheihna le lametna i neih ding hong
deih-sakna in Pasian in Lai Siangtho ahong pia ahi hi.
Khang khat sunga ding bek a A piak hi lo-in, akhang akhang
a mi khempeuh' a ding ahi hi.
http://www.maranatha-zomi.com
6. Ei' a dingin Lai Siangtho a kimanna bang hiam? (2
Timothy 3:16,17).
Theih ding: Lai Siangtho in (a) thumaan thutak i mai
ah hong lui hi, (b) ih khialhnate hong lak hi, (c) ih
khialhnate ih kipuah phatna ding dan hong gen hi, (d) pi-
cinna dong ih kalsuan dan ding hong hilh hi.
7. Pasian' kammal a omzia koi bang hiam? (Hebrew
4:12).
Theih ding: Pasian in mite' lungsim le a kitangsapna uh
thei khin ahih manin, mihing khempeuhte' kitangsapna ahut
nadingin A Thubu ahong pia ahi hi. Tua Thubu in asia le
apha, a maan le a khial khentelna, nuntakziate kikhelsak zo
hi.
8. Pasian' kammal bang tanvei kip ding hiam? (Isaiah
40:8, Matthew 24:35).
Theih ding: Lopa vul a, paak pulh hi; ahih hangin i
Pasian thu kho tawntung ding hi. Van le lei a mangthang
ding hi; ka thu ahih leh a mangthang ngei kei ding hi.
9. Lai Siangtho sim dan ding koi bang hiam? (Isaiah
28:9,10).
Theih ding: Ruby, diamond suangmanphate ahoih le
ahoih lo theihna dingin a kiukiu panin neucinlang tawh et
kawikawi akul mah bangin, thu khat peuh tawh kisai-in Lai
Siangtho' hong hilhna i theih nadingin, Lai Siangtho gelhte
in bang gen uh cih mun khat le mun khat i etkak kawikawi
ding kisam hi. Tua teng i khuituah khit ciangin i theih nop
thu kitel thei pan hi.
10. Phattuamna ih ngahna dingin Lai Siangtho koici
sim ding ie hiam? (Sawltakte 17:11).
Theih ding: I pumpi in tha a neih nadingin nisim in
annek akul mah bangin, i nuntakna sungah Pasian in mun
hoih a ngah nadingin, nisim in Lai Siangtho i sim ding ki-
sam hi.
11. Nuntak kalsuanna ah Pasian in Ama kammal, ei' a
dingin bang hihsak nuam hiam? (Phatna La 111:105).
Theih ding: Hih leitung kha lam khuamial sungah
nuamtak a i kalsuan theih nadingin, Pasian' kammal in i
lampi hong taangsak hi.
12. Limtak a Lai Siangtho simna in bang phattuamna
hong pia ding hiam? (2 Timothy 3:15, 2 Timothy 2:15).
Thukhupna: Leitung buppi a mi tampi takte' nuntakna
sungah Lai Siangtho in mun golpi tak la hi. Banghang hiam
cihleh amaute in Lai Siangtho pen Pasian' kammal ahih lam
tel uh hi. Lai Siangtho hong pian nadingin Pasian mahmah
in asep khiat mah bangin, kum za tampi langpanna sung
tawntung ah Pasian in kem gige hi. Lungsim takpi tawh
asim mi khempeuhte' nuntakna sungah Lai Siangtho in,
siatna a zawh nading uh vangliatna lak a, thuthukpite thei
khia sak a, lungkhamna meii kaai lakah lametna guan hi.
Tua a lamdang vangliatna na ngah nadingin Lai Siangtho
maanmaan in sim lo ding na hiam?
 CIDAMNA THU
A masa pen in mihingte ading cidamna thupi mah-
mah kasa a ka theih le ka sin khak thu pawlkhat
kong hawmsawn nuam hi. Ei thu-umte phadiak i
biak Pasian in hong it luat manin a tapa khat bek hong
piakna tawh i kha gupkhiatna ding bek hi lo, hi leitung a
vak lai in cinate damsak in misi nangawn thosak in mi-
hingte hong itna hong lak hi. Laisiangtho sungah Note in
na Pasian uh TOPA aw limtakin ngai a, ama muhna ah
thumaanin na na sep uh leh, a thupiakte thupi sima, a
thukipte khempeuh na zuih uh leh keimah in note hong
damsak TOPA ka hi manin Egypt-te tunga ka tunsak
cinatnate no tungah kong tungsak kei ding hi(Paikhiatna
15:26) na ci hi.
I ci adam nop leh hi atung a thute hoihtak a i ngaihsut
ding kisam hi. I Cor 3:16-17 sungah agen mah bangin, i
pumpi pen Pasian Kha Siangtho tenna biakinn hi a, mi
khat peuh in Pasian biakinn suksia leh Pasian in tua mipa
susia ding hi, ci mawk ahih manin i pumpi cidam tak a i
kep ding thupi mahmah hi. Cidamna citak i ngahna dingin
pumpi, thatang le ngaihsut nate hoih tak a i kepcing ding
thupi mahmah hi. Tuateng i kep theihna dingin,
NEWSTART:
N = Nutrition (Anhoih Anpha)
E = Exercise (Thatang Sanna)
W = Water (Tui Siangtho)
S = Sunshine (Nitang)
T = Temperance (Kidek Kidamna)
A = Air (Huih Siangtho)
R = Rest (Akicing Tawlngakna)
T = Trust in God (Pasian Muanna)
Tutung in hih NEWSTART sung pan in N= Nutrition
(anhoih anpha) tawh kisai thu tawmkhat ki kum suk ni.
Piancil. 1: 29 ah, En un leitung maitang khem-peuh ah a
om, tang apiang sak kungnote khempeuh leh agah sungah
tang a om singkung khempeuh note tungah kong pia khin-
ta hi. Tuate an-in na nei ding uh hi. Leitung piancil lai
pek pan a kipan i nek dinga hong kipia ante in sa khawng
hi loin, gah le tang aneite (vaimin, tang, be, apple, hai )
te bek hi-in, mawhna hong lut khit ciangin anteh mehtehte
le lingkungte hong om pan nahi hi (Piancil 3:18). Tua hin
pumpi cidam nadinga an-hoih i cihte in tang aneite, gah le
tehte bek hi a, sa le aktui, bawngnawi cihte anhoih hi masa
lo hi. (Zop Lai Ding) Syama Aye Cing
KA PASIAN IN NA KHEMPEUH HIH THEI
C
ambodian galkap-pa pen Pasian um Christian khat
hi a, galkap a tumna ah, a kiniamkhiat mahmah le
Pasian asuang mahmah khat ahi hi.
Khat vei teh, a bupa in hihpa pen Pasian ki umsak
mahmah in Pasian in na khempeuh hihthei ci ahih teh,
maizumsak ding, bawlsia ding ci-in ngaihsun hi. Ni khat a
nautangte tawh a kigualh laitak un, hih mipa amai ah sam-
khia in, mawtaw tawh khat pia aa, apaam vua om mawtaw
pen "Va hawl in la, hua zumkong lam ah va khawlsak in"
ci-in sawl hi.
Tua galkappa in, "Sia aw ke'n mawtaw hawl thei
keng" acih aleh, a bupa in "Ka Pasian in na khempeuh hih
thei naci ve leh" ci-in dawng hi. Tua ciangin galkap nau-
tangpa kap kawmsa in a mawtaw tawh la aa, tua mawtaw
lam hong zuan in thu nakpi takin hong ngen hi. Thu a nget
khit ciangin mawtaw sung hong lut hi. Tawh khum in
hong start a, tua mawtaw hong paisak in bupa cihna mun ah
va khawlsak hi.
A khawlsak khit ciangin lungdam takin a tawhtang
bupa pia kik hi. Bupa in lamdang sa mahmah hi. "Na biak
Pasian pen nungta a, na khempeuh hihthei takpi hi, ke'n
zong bia nuam ingh" ci'n tua ni-in mi tampi takin Pasian
muhlawh hi, kici hi.
Captain-pa in, "Hong pai inla, na mawtaw hawl pen va
en kik ni" ci-in sam aa, va etpih hi. Tua mawtaw aset
(engine) omlo pi khat nahi hi. Nang mawtaw hawl ngeilo
hilai, na Pasian in na khempeuh hihthei hi, na cih pen maan
mahmah hi. Tua ahihman in na Pasian ka bia ding hi, ci hi.
Na khempeuh akitangsap hun aa, a omlo panin a
omsak-pa, apian theihloh ding laitak a, apiangsak thei PA-
SIAN i neih khak, i biak khak pen i hamphat mahmahna
khat ahi hi. Ei zong upna tawh nungta in, I sep ngam leh
Topa in hong zawhpih ding hi. Engine omlo start aa, a
hawlsak apaisak theipa pen, nang le kei in, i biak i pa Pasi-
an mah ahi hi. UM LAH KE'N, MUANG LAH KE'N!
AMAH'N HIH THEIH LOH NEILO HI. Credited to Zomi Kpy
TATE KHANSUAH SIAMNA
Tate Lungmuan Nadingte: Eite in i naupangte lungmuan
nading tawh a ki nahvawh den leitung ah ih teng hi. US
gam ah naupangte lungmuan om tak a, kep theih nadingin i
phawk ding pawlkhat om hi:
1). Naupangte amau kia apua lam ah vak khia sak kei in;
2). Zan lam ah naupang tawh vak khia kei in;
3). Mikhual peuhmah amuan loh nading hilh in;
4). Naungekte le naupang neute a'dingin mawtaw sungah
naupang tutphah (car seat) zang in;
5). Setbing atuan uh ciangin sik-lukhu (helmet) zangsak in.
Naupang Tutphah Nam Thum:
1). Naupang kum 1 nuaisiahte in mawtaw sungah tut-
phah a nungngatte azat ding uh ahi hi. Anung lam nga tut-
phahte ah ahih theih laisiah tu sak in, amau ading alung-
muan huai pen ahi hi. A suah tunga kipan kum 3 aphak
dong zang sak leng hoihpen hi.
2). Amai ngat tutphahte in anung lam ngat tutphahte
pan hong khangto te ading ahi hi. A tutphah tungah atu thei
ding zah gihna kigelh hi. Kum 3 panin kum 7 te in tua tut-
phahte zat ding ahi hi.
3). Amai ngat tutphahte panin naupangte hong khan-
toh uh ciangin booster tutphah ah tusak ta in. Tutphah
kawnggak (seat belt) tawh kituak in atut linlian theih dong
booster ah tusak in. Seat belt ah atut theih hun dingin
kawnggak khau in gil tungah hi lo, phei tungah atuam hun;
liang a pai khau in gawl or mai peuh ah gak kha lo in, awm
le liangko mah tawh a kituak sitset hun ahi hi. (Zop Lai Ding)
ZAKSAKNA
MCS FREE Summer Class: July 9Aug 27, 2017 (Sunday,
Tuesday, Thursday) nitak 6:00PM-8:00PM sung khaal sang kihong
ding hi. Laisin sak dingte : Kawllai, Zolai, Music (Theory & Practi-
cal) etc. A lunglutte in kizop nading, Cady Siannu Sb (Ph: 616-432
7293); Hester Kiim (614-966 6159).
* MCS Address : 4447 Eastern ave SE, Suite A
Grand Rapids, MI 49508
* MCS Contact : 616-432 7293; 407-782 7644.
* MCS Email : mcs.of.gr@gmail.com
* MCS Thupuak ah laigelh nuamte in kizop nading;
Ph: 616-520 8192; 616-232 7153; 616-570 6386.
* Lai hong simsak khempeuh tungah LUNGDAM MAHMAH!