KA011752997362216

#198505
18 / აგვისტო / 2016 წ.
დასკვნა

საჯარო რეესტრის ეროვნული სააგენტოს თანამშრომელთა მიერ 

დისციპლინური გადაცდომის შესაძლო  ჩადენის ფაქტებზე

2016 წლის 13 ივლისს, საჯარო რეესტრის ეროვნული სააგენტოს შიდა კონტროლის სამსახურის
მიერ, მიღებული ინფორმაციის საფუძველზე დაიწყო სამსახურებრივი შემოწმება, საჯარო რეესტრის
ეროვნული სააგენტოს რიგი თანამშრომლების მხრიდან შრომის დისციპლინის, ზნეობრივ-ეთიკური
ნორმებისა და სააგენტოს საქმიანობის მარეგულირებელი აქტების შესაძლო დარღვევის ფაქტებზე.

შიდა კონტროლის სამსახურის მიერ მიღებული ინფორმაციის თანახმად დგინდება, რომ საჯარო
რეესტრის ერთ-ერთი თანამშრომელი სამუშაო საათებში, სამსახურში იმყოფება ალკოჰოლური
თრობის მდგომარეობაში. შემოწმების პროცესში გაირკვა, რომ საჯარო რეესტრის გეოდეზიისა და
გეოინფორმაციის დეპარტამენტის სივრცითი ინფორმაციის სამსახურის გეოინფორმაციული
სისტემების ადმინისტრატორის ზურაბ ყიფიანის მხრიდან შესაძლოა ადგილი ჰქონდეს
დისციპლინური გადაცდომის ფაქტს, რაც გამოიხატა მის მიერ 2016 წლის 13 ივლისს, 16:42 საათზე,
ალკოჰოლური სასმელის ზემოქმედების ქვეშ სამსახურში (თბილისის იუსტიციის სახლის შენობაში)
ძაღლთან ერთად გამოცხადებასა და წესრიგის დარღვევაში.

საქმის გარემოებების დაზუსტების მიზნით შესწავლილი იქნა სააგენტოს თავმჯდომარის მიერ

მითითებული ფაქტები და სააგენტოში დაცული მონაცემები. ასევე, ახსნა-განმარტება ჩამოერთვათ:
გეოდეზიისა და გეოინფორმაციის დეპარტამენტის უფროსს ივანე ცარციძეს, ამავე დეპარტამენტის
სივრცითი ინფორმაციის სამსახურის უფროსს მარიკა აბულაძეს, გეოდეზიისა და გეოინფორმაციის
დეპარტამენტის სივრცითი ინფორმაციის სამსახურის გეოინფორმაციული სისტემების
ადმინისტრატორს ზურაბ ყიფიანს, პროექტების მართვის სამსახურის  შტატგარეშე მოსამსახურეს
გიორგი პეტრიაშვილს, იუსტიციის სახლის უსაფრთხოების სამსახურის თანამშრომლებს ჯანიკო
არსენიძიეს და ბესიკ ჩირაძეს.

საქმის ფაქტობრივი გარემოებები:

თბილისის იუსტიციის სახლის უსაფრთხოების სამსახურის თანამშრომლებმა ჯანიკო

არსენიძემ და ბესიკ ჩირაძემ განმარტეს, რომ 2016 წლის 13 ივლისს, ასრულებდნენ
სამსახურებრივ მოვალეობას ქ. თბილისის იუსტიციის სახლის შენობაში. დაახლოებით 16:30
საათზე, მოქალაქეთა შემოსასვლელიდან შემოვიდა ნასვამ მდგომარეობაში მყოფი მამაკაცი,
რომელსაც თან ჰყავდა ძაღლი. მას აშკარად ეტყობოდა, რომ  იყო ალკოჰოლის ზემოქმედების ქვეშ,
რადგან იქცეოდა არაადეკვატურად და მასთან ურთიერთობაში იგრძნობოდა ალკოჰოლის სუნი. ჯ.
არსენიძემ და ბ. ჩირაძემ მოქალაქეს არ მისცეს ძაღლთან ერთად შენობაში შესვლის უფლება და
მოუწოდეს, რომ დაეტოვებინა ადმინისტრაციული შენობა, რაზეც მიიღეს პასუხი, რომ იგი იყო
საჯარო რეესტრის ეროვნული სააგენტოს თანამშრომელი და უნდა ასულიყო სამსახურში. იქიდან
გამომდინარე, რომ უსაფრთხოების სამსახურის თანამშრომლებმა არ მისცეს ძაღლის შენობაში
შეყვანის უფლება, ზ. ყიფიანმა ძაღლი დატოვა შენობის შესასვლელთან (რომელმაც დაიწყო ხალხში
სირბილი და გამოიწვია ვიზიტორ მოქალაქეთა უკმაყოფილება) და თავად ავიდა იუსტიციის სახლის
თანამშრომლებისთვის განკუთვნილი ოთახებისკენ. ჯ. არსენიძემ და ბ. ჩირაძემ აღნიშნულის
შესახებ დაუყოვნებლივ აცნობეს საჯარო რეესტრის შიდა კონტროლის სამსახურის უფროსს.

გეოდეზიისა და გეოინფორმაციის დეპარტამენტის უფროსმა ივანე ცარციძემ განმარტა, რომ

2016 წლის 13 ივლისს, დაახლოებით 16 საათსა და 50 წუთზე, სააგენტოს თავმჯდომარის მისაღებში
ყოფნის დროს, მას დაურეკა სააგენტოს შიდა კონტროლის სამსახურის უფროსმა ნოდარ ეფრემიძემ
და ჰკითხა სივრცითი ინფორმაციის სამსახურის თანამშრომლის ზურაბ ყიფიანის
ადგილსამყოფელის შესახებ. მისივე განმარტებით, როდესაც ზ. ყიფიანი არ დახვდა სამუშაო
ადგილზე, დაუკავშირდა ტელეფონის საშუალებით და ჰკითხა თუ სად იმყოფებოდა, რაზეც ზ.
ყიფიანმა უპასუხა, რომ იყო შენობაში, ხოლო დაახლოებით 10 წუთის შემდეგ გაარკვია, რომ
თანამშრომელი შესული იყო კადასტრის სამსახურის სამუშაო ოთახში.

ივანე ცარციძემ ასევე განმარტა, რომ მან და ნოდარ ეფრემიძემ ზ. ყიფიანს მოსთხოვეს მისი
ქმედების ახსნა, რა დროსაც მან დაადასტურა, რომ იყო ნასვამ მდგომარეობაში, ასევე მოიხადა
ბოდიში და განაცხადა, რომ ასე არ უნდა მოსულიყო სამსახურში.

ივანე ცარციძემ ისიც განმარტა, რომ  იმავე დღეს, დაახლოებით 17:30 საათისთვის, შიდა
კონტროლის სამსახურის უფროსის სამუშაო ოთახში, ზ. ყიფიანმა უარი განაცხადა შიდა
კონტროლის სამსახურის უფროსის ნ. ეფრემიძის მოთხოვნაზე, მიეცა წერილობითი ახსნა-
განმარტება, რადგან მისი თქმით ეს გამოიწვევდა მის სამსახურიდან გაშვებას. ამასთან, მოითხოვა
განმარტება იმის თაობაზე, თუ რას აშავებდა ნასვამ მდგომარეობაში ყოფნით. შიდა კონტროლის
სამსახურის უფროსის მოადგილის ლევან სანებლიძის მიერ, სამსახურში ალკოჰოლური თრობის
მდგომარეობაში გამოცხადების ამკრძალავი ნორმის და თანამშრომლის მიერ ახსნა-განმარტების
მიცემის სავალდებულობის თაობაზე განმარტების მიუხედავად, ზ. ყიფიანმა არ შეასრულა
მოთხოვნა და თვითნებურად დატოვა სამუშაო ოთახი იმის მითითებით, რომ იგი არ წარმოადგენდა
თავისუფლებააღკვეთილ პირს და ვერ მოხდებოდა შიდა კონტროლის სამსახურის ოთახში მისი
დაკავება. შიდა კონტროლის სამსახურის თანამშრომლების მოთხოვნისა და უშუალო
ხელმძღვანელების არაერთი რჩევის  მიუხედავად ზ. ყიფიანმა არ დაწერა ახსნა-განმარტება
ინციდენტის თაობაზე.

ი. ცარციძის განმარტებით, იმის გამო, რომ სამუშაო საათები სრულდებოდა, თვითონ დაბრუნდა
სამუშაო ოთახში კორესპონდენციების შესასრულებლად და როდესაც დაასრულა მუშაობა,
აღმოჩნდა, რომ  ზ. ყიფიანს თვითნებურად ჰქონდა დატოვებული სამსახურის შენობა.

ი.  ცარციძემ ასევე განმარტა, რომ გეოდეზიისა და გეოინფორმაციის დეპარტამენტში დასაქმებულია

63 თანამშრომელი და ყოველდღიურად მის მიერ ვერ ხერხდება ყველა თანამშრომლის
ინდივიდუალური გადამოწმება მათი სამუშაოზე გამოცხადების შესახებ, თუმცა თვითონ მათი
მხრიდან იღებს შეტყობინებებს სამსახურში არ გამოცხადების ან დაგვიანებების თაობაზე, რაც ამ
კონკრეტულ შემთხვევაში ზურაბ ყიფიანის მხრიდან არ განხორციელებულა, ხელმძღვანელობის
მხრიდანაც არ ყოფილა ისეთი დავალება, რაც შეიძლება გამხდარიყო მისი სამსახურში დაგვიანების
მიზეზი, შესაბამისად მასაც არ შეუმოწმებია აღნიშნული თანამშრომელი შიდა კონტროლის
სამსახურის უფროსისგან ინფორმაციის მიღებამდე.

ი. ცარციძის განმარტებით, ზ. ყიფიანის მხრიდან ბოლო პერიოდში ადგილი ჰქონდა დაგვიანებებს და

სამსახურის საათებში სამუშაო ადგილის უნებართვოდ მიტოვების შემთხვევებს, რის შესახებაც იგი
ინფორმირებული იყო სამსახურის უფროსის მარიკა აბულაძის მიერ და ზ. ყიფიანს თავადაც
რამდენჯერმე მოსთხოვა განმარტება აღნიშნულ საკითხთან დაკავშირებით. ზ. ყიფიანი მიზეზად
ასახელებდა მკურნალობას და ასევე პროფესიული სწავლების მიზნით სხვადასხვა კურსებზე
სიარულს. ი. ცარციძის განმარტებით, ზემოთ ხსენებული გარემოებებიდან გამომდინარე, ცდილობდა
მაქსიმალურად შეეწყო მისთვის ხელი, რათა ზ. ყიფიანი დაბრუნებოდა სრულფასოვან სამუშაოს,
თუმცა მისი ძალისხმევის მიუხედავად დადგა საწინააღმდეგო შედეგი.

გეოდეზიისა და გეოინფორმაციის დეპარტამენტის სივრცითი ინფორმაციის სამსახურის

უფროსის მარიკა აბულაძის განმარტებით, ყოველ დილით, სამსახურში გამოცხადების შემდეგ,
ამოწმებს სამსახურებრივ ელექტრონულ ფოსტას, „დეს“ პროგრამის საშუალებით შემოსულ
კორესპონდენციებს, ტაბელს და აფიქსირებს თანამშრომლების სამსახურში გამოცხადებას. მისი
განმარტებით, 2016 წლის 13 ივლისს, დილით, ზ. ყიფიანი სამუშაო ადგილზე არ გამოცხადებულა.
ამასთან, ზ. ყიფიანს წინასწარ არ უცნობებია მისთვის შესაძლო დაგვიანების თაობაზე და არც
ჰქონია ისეთი სამსახურებრივი დავალება, რასაც შეიძლება გამოეწვია დაგვიანება. აღნიშნულის
მიუხედავად, ვინაიდან მას ჰქონდა ინფორმაცია ზ. ყიფიანის ჯანმრთელობის მდგომარეობის
შესახებ (ის ხანგრძლივი პერიოდის განმავლობაში გადიოდა მკურნალობის კურსს და მიმდინარე
პერიოდში აწუხებდა არტერიული წნევები, რის შესახებაც ზურაბ ყიფიანმა სიტყვიერად აცნობა),
აღარ ჩათვალა საჭიროდ დამატებითი განმარტების მიღება სამსახურში გამოუცხადებლობის
შესახებ.

მ. აბულაძის განმარტებით, ზ. ყიფიანს სამსახურში შეხვდა დაახლოებით 17:35 საათისთვის,

როდესაც ის ესაუბრებოდა  შიდა კონტროლის სამსახურის უფროსს ნოდარ ეფრემიძეს და შეესწრო
მათ დიალოგს, რომლის დროსაც ზ. ყიფიანი უარს აცხადებდა ნ. ეფრემიძის მოთხოვნაზე, რომ
დაეწერა ახსნა-განმარტება. ზ. ყიფიანს ასევე არაადეკვატური რეაქცია ჰქონდა ნ. ეფრემიძის
შეთავაზებაზე, რომ ჩატარებულიყო ექსპერტიზა მისი ალკოჰოური თრობის მდგომარეობაში ყოფნის
შემოწმების მიზნით და ვიდრე ნ. ეფრემიძე ტელეფონზე საუბრობდა, ზ. ყიფიანმა თვითნებურად
დატოვა მისი სამუშაო ოთახი.

მ. აბულაძემ ასევე განმარტა, რომ ზ. ყიფიანი ბოლო ერთი თვის მანძილზე, სამუშაო დღის
განმავლობაში ხშირად არ იმყოფებოდა სამუშაო ადგილზე და დაფიქსირდა დაგვიანების
შემთხვევებიც. სამუშაო ადგილის ყოველი დატოვების შესახებ ზ. ყიფიანს მისთვის არ უცნობებია.
არყოფნის მიზეზად ასახელებდა იმას, რომ მკურნალობდა და გადიოდა ტრეინინგებს
კვალიფიკაციის ამაღლების მიზნით. ზოგადად, ზ. ყიფიანს ის ზეპირსიტყვიერად ჰყავდა ჩაყენებული
საქმის კურსში თავისი ჯანმრთელობის მდგომარეობის შესახებ, ზოგჯერ, ასევე ელექტრონული
ფოსტის ან ტელეფონის საშუალებით ატყობინებდა იმის თაობაზე, რომ თავს შეუძლოდ გრძნობდა,
ჰქონდა ჩანიშნული ექიმთან ვიზიტი, პერიოდულად იტარებდა გამოკვლევებს და ა.შ. ზ. ყიფიანის
ხსენებული პრობლემების გამო სამუშაო ადგილზე მისი შესაძლო არყოფნის შესახებ, მ. აბულაძის
მიერ ინფორმირებული იყო მისი უშუალო ხელმძღვანელი, გეოდეზიისა და გეოინფორმაციის
დეპარტამენტის უფროსი  ი. ცარციძე.

პროექტების მართვის სამსახურის  შტატგარეშე მოსამსახურის გიორგი პეტრიაშვილის

განმარტებით,  2016 წლის 13 ივლისს, ზ. ყიფიანს შეხვდა დაახლოებით 17:30 საათზე საკუთარ
სამუშაო ოთახში, როდესაც ნ. ეფრემიძე მას სთხოვდა ახსნა-განმარტების დაწერას და სთავაზობდა
ექსპერტიზის ჩატარებას ალკოჰოლური თრობის დადგენის მიზნით, თუმცა ამ უკანასკნელმა
ორივეზე უარი განაცხადა. ამის შემდეგ ნ. ეფრემიძემ გ. პეტრიაშვილს სთხოვა გასაუბრებოდა ზ.
ყიფიანს და აეხსნა მისთვის სიტუაციის სიმძიმე, მაგრამ ამ დროს ზ.ყიფიანს დაურეკეს მის კუთვნილ
მობილურ ტელეფონზე, რომელიც  გადააწოდა ნ. ეფრემიძეს და ისე, რომ არ დაელოდა შიდა
კონტროლის სამსახურის უფროსის ნ. ეფრემიძის მიერ საუბრის დასრულებასა და ტელეფონის
დაბრუნებას, დატოვა სამუშაო ოთახი. აღსანიშნავია, რომ ზ. ყიფიანმა არ გაითვალისწინა შიდა
კონტროლის სამსახურის უფროსის მოადგილის ლ. სანებლიძის მოთხოვნა, არ დაეტოვებინა
სამსახურის შენობა და დალოდებოდა ნ. ეფრემიძესთან საუბრის დასრულებას, რასთან
დაკავშირებითაც მან კიდევ ერთხელ აღნიშნა, რომ იგი ვერ იქნებოდა დაკავებული შესაბამისი
სამართალდამცავი ორგანოების გადაწყვეტილების გარეშე.

გეოდეზიისა და გეოინფორმაციის დეპარტამენტის სივრცითი ინფორმაციის

სამსახურის                      გეოინფორმაციული  სისტემების ადმინისტრატორის ზურაბ ყიფიანის
განმარტებით (განმარტება მიღებულია 2016 წლის 14 ივლისს), 2016 წლის 13 ივლისს, დილიდან
ჰქონდა მაღალი არტერიული ჰიპერტენზია და გულის უკმარისობა, მიიღო წნევის დამწევი აბები,
რის შემდეგაც ჩაეძინა. ხელმძღვანელობისათვის ვერ მოახერხა სამსახურში დაგვიანების მიზეზის
შეტყობინება, რადგან არ ჰქონდა მობილური ტელეფონი. მისივე განმარტებით დაახლოებით 12:00
საათისთვის გაიღვიძა და გამოცხადდა სამსახურში. მოგვიანებით, ისევ ცუდად იგრძნო თავი და
14:09 საათზე დაბრუნდა სახლში. სამსახურის დატოვებაც მოხდა ხელმძღვანელობის
ინფორმირების გარეშე, რაც მისივე განმარტებით, გამოწვეულია ავადმყოფობით და დიდი ხნით არ
გეგმავდა სამსახურიდან წასვლას. სამსახურში დაბრუნდა 16:42 საათზე.

ზ. ყიფიანის განმარტებით, სახლში მისულმა მიიღო წნევის დამწევი აბები და აპირებდა დაწოლას,
მაგრამ ძაღლი გაექცა გარეთ და როდესაც ცდილობდა მის დაჭერას, სახლის კარი ჩაიკეტა და
ძაღლთან ერთად დარჩა ქუჩაში. აღნიშნულის გამო ძაღლთან ერთად გადაწყვიტა სამსახურში
დაბრუნება. ვინაიდან  იცოდა, რომ სამსახურში შინაურ ცხოველთან ერთად არ შეუშვებდნენ,
იძულებული გახდა დროებით გარეთ დაეტოვებინა.

ზ. ყიფიანმა ასევე განმარტა, რომ 2016 წლის 13 ივლისს, სამუშაო საათების პერიოდში (09:00 -18:00
საათებში) ალკოჰოლური სასმელი არ ჰქონდა მიღებული და ბოლო პერიოდში საერთოდ არ
ღებულობს ალკოჰოლს, რადგან სვამს წნევის მარეგულირებელ წამლებს.

ზ. ყიფიანი ახსნა-განმარტებაში აღნიშნავს, რომ  შიდა კონტროლის სამსახურის უფროსმა ნ.

ეფრემიძემ მას მოსთხოვა ახსნა-განმარტების დაწერა, მაგრამ რადგან იყო სამუშაო საათების
შემდგომი პერიოდი და თავს შეუძლოდ გრძნობდა, ითხოვა, რომ ახსნა-განმარტება დაეწერა მეორე
დღეს. მისივე განმარტებით შიდა კონტროლის სამსახურის უფროსმა ასევე შესთავაზა
ალკოჰოლური თრობის ფაქტზე ჩაეტარებინა ექსპერტიზა, რაზეც მან თანხმობა განაცხადა.

ზ. ყიფიანმა განმარტა, რომ 2016 წლის 13 ივლისს, სამსახურიდან გავიდა 18:42 საათზე. გასვლამდე
მის სამუშაო ოთახში იმყოფებოდნენ, როგორც შიდა კონტროლის სამსახურის უფროსი ნ. ეფრემიძე
და მისი მოადგილე ლ. სანებლიძე, ასევე მისი უშუალო ხელმძღვანელი მ. აბულაძე, დეპარტამენტის
უფროსი ი. ცარციძე და თანამშრომელი გიორგი პეტრიაშვილი.

ზ. ყიფიანმა ასევე აღნიშნა, რომ 2013 წლის 05 ივლისს, სამსახურში გამოცხადდა დაგვიანებით,
12:51 საათზე, ხოლო 06 ივლისს - 11 საათზე, რაც გამოწვეული იყო შეუძლოდ ყოფნით. მისივე
განმარტებით, დაგვიანების თაობაზე ხელმძღვანელობას შეატყობინა თუ არა, არ ახსოვს, თუმცა
მსგავს შემთხვევებში ყოველთვის აყენებს საქმის კურსში ხელმძღვანელს.

სამსახურებრივი შემოწმების პროცესში სააგენტოს ინფორმაციული ტექნოლოგიების

დეპარტამენტიდან გამოთხოვილი იქნა ზ. ყიფიანის სამუშაო დროის გამოყენების აღრიცხვის
ტაბელის მონაცემები 2016 წლის 01 ივნისიდან 14 ივლისის ჩათვლით, რის შედეგადაც გაირკვა
შემდეგი:

ზ. ყიფიანის სამუშაო დროის გამოყენების აღრიცხვის ტაბელის მონაცემების მიხედვით,  2016 წლის
13 ივლისს ის სამსახურში გამოცხადდა 12:31 საათზე, შენობიდან გავიდა 14:09 საათზე, სამსახურში
შემოსვლა დაფიქსირებულია ასევე 16:42 და 17:26  საათებზე და სამსახურიდან საბოლოოდ გავიდა
18:42 საათზე.

2016 წლის  ივნისის თვეში დაფიქსირდა ზ. ყიფიანის მიერ სამსახურში დაგვიანებით შემოსვლის 5
შემთხვევა (13.06.2016 - 11:12:07სთ; 14.06.2016 - 09:56:45სთ; 20.06.2016 - 10:43:04სთ; 21.06.2016
- 10:54:20სთ; 28.06.2016 - 10:31:56სთ.) ხოლო ივლისის თვეში (14 ივლისის ჩათვლით), სამი
შემთხვევა (05.07.2016 - 12:51:31სთ; 06.07.2016 10:59:57სთ; 13.07.2016 - 12:31:47სთ).

ასევე აღსანიშნავია, რომ ზურაბ ყიფიანი ხსენებული თვეების განმავლობაში სამუშაო საათებში
ხშირად გადიოდა სამსახურიდან გარკვეული დროით. კერძოდ, ასეთი შემთხვევები
დაფიქსირებულია 2016 წლის 02, 03, 06, 10, 13, 14, 15, 16. 17, 20. 21, 22, 23, 24, 27,  28, 29, 30
ივნისსა და 01, 04, 05, 06, 07, 08, 12, 13 ივლისს.  თუმცა, იმის გამო, რომ შენობიდან გასვლა და
შემოსვლა ხდებოდა დადგენილი სამუშაო საათების შუალედში, ელექტრონულ ტაბელში
ფიქსირდება სრული - 8 საათიანი სამუშაო დღე, გარდა შემდეგი შემთხვევებისა: 13 ივნისი - 5 საათი,
14 ივნისი - 7 საათი, 20 ივნისი - 6 საათი; 21 ივნისი - 6 საათი, 28 ივნისი - 6 საათი;  05 ივლისი - 4
საათი,  06 ივლისი - 6 საათი.

ამათგან არის შემთხვევები, როდესაც ზურაბ ყიფიანი ფაქტობრივად მთელი დღის განმავლობაში არ
იმყოფებოდა სამუშაო ადგილზე. კერძოდ, 2016 წლის 13 ივნისი (შესვლა - 11:12:07; გასვლა -
11:17:12; შესვლა - 22:00:34, გასვლა - 22:03:31), 30 ივნისი (შესვლა - 09:00:42; გასვლა  09:01:13,
შესვლა - 19:51:22. გასვლა -  20:03:19), 06 ივლისი (შესვლა -  10:59:57. გასვლა - 11:22:09. შესვლა -
19:21:02. გასვლა - 19:25:22).

სამართლებრივი შეფასება და დასაბუთება:

სსიპ საჯარო რეესტრის ეროვნული სააგენტოს სისტემაში დასაქმებულ პირთა შრომითი ურთიერთობები
რეგულირდება სსიპ საჯარო რეესტრის ეროვნული სააგენტოს შრომის შინაგანაწესის დამტკიცების შესახებ
სააგენტოს თავმჯდომარის 2009 წლის 20 იანვრის N35/ს ბრძანებით (შემდგომში სააგენტოს შინაგანაწესი).
აღნიშნული შინაგანაწესის მე-3 მუხლის პირველი და მე-2 პუნქტების თანახმად, შინაგანაწესის მოქმედება
ვრცელდება სააგენტოში დასაქმებულ ნებისმიერ პირზე, მიუხედავად მისი თანამდებობრივი მდგომარეობისა
(პირველი პუნქტი) მის მოთხოვნათა შესრულება სავალდებულოა სააგენტოში დასაქმებული ნებისმიერი
პირისათვის და მათი დარღვევა იწვევს შესაბამის პასუხისმგებლობას (მე-2 პუნქტი).

სააგენტოს შინაგანაწესით ასევე განისაზღვრება სამუშაოს დაწყება-დასრულების და შესვენების

დროები. სააგენტოს შინაგანაწესის მე-4 მუხლის მე-2 პუნქტის თანახმად, სამუშაო დღე იწყება 9:00
საათზე და სრულდება 18:00 საათზე. ამავე ნორმის მე-3 პუნქტით დადგენილია, რომ სააგენტოს
თავმჯდომარის (მოვალეობის შემსრულებლის) თანხმობით შეიძლება განისაზღვროს სააგენტოში
დასაქმებულ ცალკეულ პირთათვის სამუშაო დღის დაწყებისა და დასრულების განსხვავებული დრო.

სააგენტოს შინაგანაწესის მე-5 მუხლის პირველი პუნქტის თანახმად, სააგენტოში დასაქმებულ

პირებს სამუშაო დღის განმავლობაში გარანტირებული აქვთ შესვენების უფლება. მე-2 მუხლის
თანახმად, შესვენების დაწყებისა და დამთავრების დრო განსაზღვრულია 13:00 საათიდან 14:00
საათამდე. ამავე მუხლის მე-3 პუნქტის თანახმად, სააგენტოს თავმჯდომარის (მოვალეობის
შემსრულებლის) ბრძანებით შეიძლება განისაზღვროს სააგენტოში დასაქმებულ ცალკეულ
პირთათვის შესვენების დაწყებისა და დასრულების განსხვავებული დრო.

სააგენტოს შინაგანაწესის მე-9 მუხლის პირველი პუნქტის მიხედვით, დროებითი შრომისუუნარობის გამო
სამსახურში გამოუცხადებლობისას სააგენტოში დასაქმებულმა პირმა აღნიშნულის შესახებ შესაძლოდ მოკლე
ვადაში უნდა აცნობოს უშუალო უფროსს.

სააგენტოს შინაგანაწესის 381 მუხლის პირველი პუნქტის „ბ“ ქვეპუნქტის თანახმად, დისციპლინური
წარმოების პროცესში ყველა პირი ვალდებულია სააგენტოს შიდა კონტროლის სამსახურს ან
იუსტიციის სამინისტროს გენერალური ინსპექციის თანამშრომელს, მოთხოვნისთანავე წარუდგინოს
ყველა მოთხოვნილი დოკუმენტი თუ ინფორმაცია, მოთხოვნისთანავე გამოცხადდეს შიდა
კონტროლის სამსახურში, მისცეს წერილობითი ან/და ზეპირი ახსნა-განმარტება მის მიერ
სამსახურებრივი მოვალეობის შესრულებასთან დაკავშირებულ საკითხებზე.

განსახილველ შემთხვევაში, 2016 წლის 13 ივლისს, ზ.ყიფიანი სამსახურში გამოცხადდა

ალკოჰოლური თრობის მდგომარეობაში საკუთარ ძაღლთან ერთად, რომელმაც დამატებითი
დისკომფორტი შეუქმნა თბილისის იუსტიციის სახლის ვიზიტორებს.

ზ. ყიფიანის ალკოჰოლის ზემოქმედების ქვეშ ყოფნის დადასტურების საშუალებას იძლევა ის

გარემოებები, რომ ზ.ყიფიანის მოქმედებები იყო არაადეკვატური და თავი აარიდა სათანადო
ექსპერტიზის ჩატარებას, რაც გამოიხატა შიდა კონტროლის სამსახურის უფროსის შეთავაზებაზე
უარით. ასევე, გამოკითხული პირები ადასტურებენ, რომ მისგან იგრძნობოდა ალკოჰოლის სუნი და
ჰქონდა ნასვამი ადამიანისთვის დამახასიათებელი ქცევები. ამასთან, ზ. ყიფიანის განმარტება, რომ
შიდა კონტროლის სამსახურის მოთხოვნაზე - ჩატარებულიყო ალკოჰოლურ თრობაზე მისი
შემოწმება მან განაცხადა თანხმობა, ვერ იქნება გაზიარებული, რადგან მისი მხრიდან უარი,
როგორც ალკოჰოლური თრობის შესამოწმებლად ექსპერტიზის ჩატარებაზე, ასევე შიდა
კონტროლის სამსახურისთვის ახსნა-განმარტების მიცემაზე დადასტურებულია ი. ცარციძის, მ.
აბულაძის და გ. პეტრიეშვილის განმარტებებით.

ამასთან, ზ. ყიფიანმა ნაცვლად იმისა, რომ გამოეჩინა იუსტიციის სამინისტროს სისტემის

თანამშრომლისთვის შესაფერისი მაღალი მორალური სტანდარტი და სამართლებრივი კულტურა
შექმნილი მდგომარეობის გამოსწორების მიზნით, თავისი შემდგომი მოქმედებებით არათუ შეეცადა
სიტუაციის გაუმჯობესებას, არამედ იუსტიციის სახლის უსაფრთხოების სამსახურის
თანამშრომელთა მოწოდებების მიუხედავად ცდილობდა შენობაში ძაღლთან ერთად შესვლას,
რითიც ხელი შეუშალა ვიზიტორთა თავისუფალ გადაადგილებას.

ზ. ყიფიანის მხრიდან მასზე დაკისრებული ვალდებულებების დარღვევა მოხდა სააგენტოს შიდა

კონტროლის სამსახურთან ურთიერთობის დროსაც, როდესაც შიდა კონტროლის სამსახურის
უფროსის არაერთგზის მოთხოვნის და უშუალო ხელმძღვანელის რჩევის მიუხედავად არ დაწერა
ახსნა-განმარტება მომხდართან დაკავშირებით. ამასთან, იგი გამუდმებით აღნიშნავდა, რომ ის ვერ
იქნებოდა თავისუფლებააღკვეთილი პირი და მისი სამსახურში შეყოვნება (ახსნა-განმარტების
ჩამორთმევის მიზნით) გამოიწვევდა მისი უფლებების დარღვევას. იგი სისტემატიურად გაურბოდა
შიდა კონტროლის სამსახურის უფროსთან და თანამშრომლებთან კომუნიკაციას და ცდილობდა
დაეტოვებინა სამსახურის შენობა იმ მოტივით, რომ მას უპატრონოდ ჰყავდა მიტოვებული ძაღლი.

ამასთან, გასათვალისწინებელია ის გარემოებაც, რომ ზ. ყიფიანის არაფხიზელ მდგომარეობაში

სამსახურში გამოცხადების მომენტიდან შიდა კონტროლის სამსახურის უფროსისა და
თანამშრომლების მიერ  უწყვეტად მიმდინარეობდა მცდელობა, დაეთანხმებინათ ზ. ყიფიანი ახსნა-
განმარტების დაწერაზე ან/და ექსპერტიზის ჩატარებაზე ალკოჰოლური თრობის დადგენის მიზნით.
შიდა კონტროლის სამსახურის თანამშრომლები  ზ. ყიფიანის მიერ სამსახურის შენობის დატოვების
მომენტამდე აძლევდნენ მას განმარტებებს შიდა კონტროლის სამსახურის უფროსის
მოთხოვნებისადმი დაუმორჩილებლობის შედეგების თაობაზე და აფრთხილებდნენ მას
სამსახურებრივი მოვალეობების შეუსრულებლობის შემთხვევაში შესაძლო პასუხისმგებლობის
ზომების გამოყენების შესახებ. შიდა კონტროლის სამსახურის უფროსმა და თანამშრომლებმა
როგორც ზ. ყიფიანთან პირადი საუბრით, აგრეთვე მისი უშუალო ხელმძღვანელების ჩარევის გზით
ყველა ზომა იხმარეს, რათა ზ. ყიფიანს თავისი ქმედებით, არსებულზე დამატებით, არ გამოეწვია
სააგენტოს შინაგანაწესის მოთხოვნების შემდგომი დარღვევის ფაქტები.

ზემოაღნიშნულიდან გამომდინარე, დადგენილად უნდა ჩაითვალოს, რომ ზურაბ ყიფიანი

სამსახურში გამოცხადდა ალკოჰოლური ზემოქმედების ქვეშ და ეს ყველაფერი ხდებოდა იუსტიციის
სახლში  ვიზიტად მყოფი მოქალაქეების, ადმინისტრაციულ შენობაში განთავსებული საჯარო
სამართლის იურიდიული პირების  თანამშრომლების თვალწინ. შიდა კონტროლის სამსახური
განსაკუთრებულ ყურადღებას ამახვილებს, იმ ფაქტზე, რომ იუსტიციის სამინისტროს სისტემის
თანამშრომელი,  საქმიანობისას უნდა ხელმძღვანელობდეს ღირსების, ნდობის, სამართლიანობის
პრინციპებით. სისტემაში მომუშავე ნებისმიერი პირისათვის სახელმძღვანელო პრინციპი უნდა იყოს
იმის განცდა, რომ სახელმწიფოს ემსახურება და წარმოადგენს მის სახეს. შესაბამისად, ზურაბ
ყიფიანის მხრიდან ზემოაღნიშნული ქმედებები ზიანის მომტანია საჯარო რეესტრის საქმიანი
რეპუტაციისთვის, მნიშვნელოვანი საფრთხის შემცველია საჯარო რეესტრის ეროვნული სააგენტოს
ავტორიტეტისთვის და შესაძლოა, უპრეცედენტოდ უარყოფითად აისახოს არა მხოლოდ საჯარო
რეესტრის, არამედ იუსტიციის სამინისტროს სისტემის ავტორიტეტზეც. აქედან გამომდინარე, ზურაბ
ყიფიანის ქმედება უნდა შეფასდეს, როგორც ზნეობრივ-ეთიკური ნორმების დარღვევა და სააგენტოს
დისკრედიტაციისკენ მიმართული უღირსი საქციელი.
ხაზგასმით უნდა აღინიშნოს, რომ შიდა კონტროლის სამსახურის უფლებამოსილი
თანამშრომლისთვის ახსნა-განმარტების მიცემა არის თანამშრომლისთვის შინაგანაწესით
დაკისრებული ვალდებულება და მისი შესრულება არ არის დამოკიდებული ამ უკანასკნელის ნებაზე.
არაერთი მოთხოვნის მიუხედავად, ზ. ყიფიანმა უარი განაცხადა (2016 წლის 13 ივლისს)
წერილობითი ახსნა-განმარტების მიცემაზე. ასევე დადგენილია, რომ (დასტურდება ი. ცარციძის, მ.
აბულაძის და გ. პეტრიაშვილის განმარტებებით და ზ. ყიფიანის შენობაში შემოსვლა-გასვლის
აღრიცხვის ამონაწერით) შიდა კონტროლის სამსახურის უფროსმა, ზ. ყიფიანს ახსნა-განმარტების
დაწერა სთხოვა სამუშაო საათების დასრულებამდე. შინაგანაწესის შესაბამისი ნორმის თანახმად,
სააგენტოში დასაქმებული პირი ვალდებულია ახსნა-განმარტება მისცეს შიდა კონტროლის
სამსახურს, იმის მიუხედავად, დასრულებულია თუ არა სამუშაო საათები. აღნიშნული გარემოებები
კიდევ ერთხელ წარმოაჩენს სამსახურის მიმართ ზ. ყიფიანის არასათანადო პატივისცემას და მის
დესტრუქციულ განწყობას.

ასევე საყურადღებოა ის ფაქტიც, რომ სამსახურში დაგვიანება, თუ მისი უნებართვოდ მიტოვება არ

იყო პირველი შემთხვევა ზ. ყიფიანის მხრიდან და როგორც საქმის მასალებიდან ირკვევა, ბოლო
პერიოდში მსგავს ქმედებებს ჰქონდა სისტემატიური ხასიათი. ზურაბ ყიფიანი არ სარგებლობს
სამუშაოს ან შესვენების დაწყებისა და დასრულების განსხვავებული დროით, მისი სამუშაო დრო
იწყება 09:00 საათზე, ხოლო შესვენების დრო - 13:00 საათიდან 14:00 საათამდე. ამდენად, ზ.
ყიფიანის მხრიდან თვითნებურად, სააგენტოს საქმიანობის მარეგულირებელი აქტებით
დადგენილისგან განსხვავებულ დროს სამსახურში გამოცხადება ან შესვენების უფლებით
სარგებლობა წარმოადგენს შრომის დისციპლინის დარღვევას. ამასთან, ზ. ყიფიანის მიერ დაცული
არ ყოფილა დაგვიანების შესახებ ხელმძღვანელის ინფორმირების წესი, რაც ასევე სააგენტოს
შინაგანაწესით არის განსაზღვრული. ზ. ყიფიანი ვალდებული იყო სამსახურში დაგვიანების და
სამუშაო საათებში სამსახურიდან გასვლის შესახებ ეცნობებინა უშუალო უფროსისთვის, როგორც
სამსახურებრივი მოვალეობების შესრულებაზე ზედამხედველობის განმახორციელებელი
პირისათვის, მოცემულ შემთხვევაში მარიკა აბულაძისათვის.

ზ. ყიფიანის ქმედებების სწორ კვალიფიკაციასთან ერთად მნიშვნელოვანია იმის შეფასება, თუ რამდენად

ეფექტიანად ხორციელდებოდა მის მიმართ სამსახურებრივი ზედამხედველობა ხელმძღვანელი პირის
მხრიდან.

საჯარო რეესტრის ეროვნული სააგენტოს თავმჯდომარის 2016 წლის 16 მაისის N841/ს ბრძანებით
დამტკიცებული საჯარო რეესტრის ეროვნული სააგენტოს გეოდეზიისა და გეოინფორმაციის
დეპარტამენტის დებულების მე-16 მუხლის მე-2 პუნქტის ,,ბ“ ქვეპუნქტის მიხედვით, დეპარტამენტში
დასაქმებული პირი (ამ შემთხვევეაში ზ.ყიფიანი), ანგარიშვალდებული და პასუხისმგებელია
შესაბამისი სამსახურის უფროსის, მისი მოადგილის, დეპარტამენტის უფროსის, სააგენტოს
თავმჯდომარისა და მისი მოადგილის წინაშე, ხოლო ამავე დებულების მე-13 მუხლის მე-2 პუნქტის
,,დ“ ქვეპუნქტის თანახმად, სამსახურის უფროსი სამსახურის ფარგლებში ახორციელებს
ზედამხედველობას და პასუხისმგებელია თანამშრომლების მიერ სამსახურებრივი მოვალეობების
შესრულებაზე.

დადგენილია, რომ 2016 წლის 13 ივლისს, მ. აბულაძეს საერთოდ არ მოუკითხავს ზურაბ ყიფიანი და
არ მიუღია მისგან ინფორმაცია, თუ რატომ არ გამოცხადდა თავის დროზე ან სამუშაო საათებში
რატომ არ იმყოფებოდა იგი სამსახურში. ასევე დადგენილია, რომ მ. აბულაძის მხრიდან, მსგავს
შემთხვევებს ზ. ყიფიანთან მიმართებაში  არაერთხელ ჰქონდა ადგილი. კერძოდ, ზ. ყიფიანის მიერ
სამუშაო დროის გრაფიკის შეუთანხმებლად დარღვევის შემთხვევაში არ ხდებოდა განმარტების
მიღება და შესაბამისი რეაგირება. მ. აბულაძის განმარტებითვე, მან ზეპირსიტყვიერად იცოდა იმის
თაობაზე, რომ ზ. ყიფიანი გადიოდა მკურნალობას და ესწრებოდა კვალიფიკაციის ასამაღლებელ
კურსს, თუმცა ამის დამადასტურებელი დოკუმენტური მტკიცებულებები არ გააჩნდა.

მ. აბულაძეს, როგორც უშუალო უფროსს და თანაშრომლის საქმიანობაზე პასუხისმგებელ პირს,

უნდა გამოეჩინა გონივრული მენეჯერული გულისხმიერება, გადაემოწმებინა თანამშრომლის მიერ
სამუშაო გრაფიკის სისტემატიურად დარღვევის გამომწვევი მიზეზების საფუძვლიანობა, ასევე
ეწარმოებინა თანამშრომელთა სამსახურში გამოცხადებისა და მათი საქმიანობის
კანონშესაბამისობის ეფექტიანი მონიტორინგი.

მხოლოდ ის გარემოება, რომ მ. აბულაძემ თავის თანამშრომლის დისციპლინური გადაცდომის

ნიშნების შემცველი ქმედებების თაობაზე აცნობა ხელმძღვანელს, არ ათავისუფლებს მას
პასუხისმგებლობისგან, მითუმეტეს იმის გათვალისწინებით, რომ ზ. ყიფიანის მხრიდან
ზემოაღნიშნული დისციპლინური გადაცდომის ფაქტებს ადგილი ჰქონდა სისტემატიურად, თვეების
განმავლობაში.

მ. აბულაძემ, როგორც სამსახურის უფროსმა, ვერ შეძლო მის უშუალო დაქვემდებარებაში მყოფი
პირის მხრიდან დისციპლინური გადაცდომების ჩადენის აღკვეთა. მოცემულ შემთხვევაში მ.
აბულაძემ, როგორც სამსახურის უფროსმა, ვერ შეასრულა ჯეროვნად მასზე დაკისრებული ფუნქცია-
მოვალეობები, რაც გამოიხატა იმაში, რომ ვერ განახორციელა სათანადო კონტროლი მის
დაქვემდებარებაში მყოფი პირის ქმედებებზე.

ამდენად დადგენილია, რომ განსახილველ შემთხვევაში ზ. ყიფიანმა ჩაიდინა სააგენტოს

შინაგანაწესის 33-ე მუხლის შემდეგი პუნქტებით გათვალისწინებული დისციპლინური გადაცდომები:

ა) სააგენტოს საქმიანობის სპეციალური მარეგულირებელი კანონმდებლობის, ან სხვა

სამართლებრივი აქტების მოთხოვნათა დარღვევა;

ბ) სამსახურებრივ მოვალეობათა შეუსრულებლობა, არაჯეროვანი შესრულება ან მათდამი

დაუდევარი დამოკიდებულება.

ზ) ალკოჰოლური, ფსიქოტროპული ან ნარკოტიკული ნივთიერებების ზემოქმედების ქვეშ

სამუშაოზე გამოცხადება ან მათი სამუშაოზე მიღება, ან დასაქმებული პირისათვის სხვა
სახის შეუფერებელი ქმედება რომელიც ლახავს სააგენტოს ავტორიტეტს;
 კ) შრომის დისციპლინის დარღვევა;

მ) საქართველოს შრომის კოდექსის 37-ე მუხლის პირველი პუნქტის ,,ზ“ ქვეპუნქტით

გათვალისწინებული დარღვევა (დასაქმებულის მიერ მისთვის ინდივიდუალური შრომითი
ხელშეკრულებით ან კოლექტიური ხელშეკრულებით ან/და შრომის შინაგანაწესით
დაკისრებული ვალდებულების უხეში დარღვევა).

რაც გამოიხატა სამსახურში ალკოჰოლური სიმთვრალის მდგომარეობაში მისვლაში, სამუშაო

გრაფიკის დაუცველობასა და შიდა კონტროლის სამსახურისთვის ახსნა-განმარტების მიცემაზე
უარის თქმაში. ამდენად ზ. ყიფიანის მიერ განხორციელებული ზემოხსენებული ქმედებები უნდა
შეფასდეს, როგორც შრომის შინაგანაწესით დაკისრებული ვალდებულებების უხეში დარღვევა.

გეოდეზიისა და გეოინფორმაციის დეპარტამენტის სივრცითი ინფორმაციის სამსახურის უფროსმა 

მარიკა აბულაძემ ჩაიდინა საჯარო რეესტრის ეროვნული სააგენტოს შრომის შინაგანაწესის 33-ე
მუხლის „ბ“ პუნქტით (სამსახურებრივ მოვალეობათა არაჯეროვანი შესრულება)
გათვალისწინებული დისციპლინურ გადაცდომა, რაც გამოიხატა იმაში, რომ ვერ უზრუნველყო
თავისი თანამშრომლის საქმიანობის სათანადო კონტროლი და მის მიერ შრომის დისციპლინის
დარღვევის აღკვეთა.

ვიხელმძღვანელე რა საქართველოს იუსტიციის სამინისტროს საჯარო სამართლის იურიდიული

პირის – საჯარო რეესტრის ეროვნული სააგენტოს შრომის შინაგანაწესის 32-ე, 33-ე, 36-ე, 37-ე, 381-
ე, 382-ე, 383-ე, მუხლებით, დისციპლინური დარღვევის ხარისხისა და განვითარებული შედეგის
სიმძიმის გათვალისწინებით შიდა კონტროლის სამსახურს მიზანშეწონილად მიაჩნია:   

ზურაბ ყიფიანს - საჯარო რეესტრის ეროვნული სააგენტოს გეოდეზიისა და გეოინფორმაციის

დეპარტამენტის სივრცითი ინფორმაციის სამსახურის გეოინფორმაციული სისტემების
ადმინისტრატორს შეეფარდოს დისციპლინური პასუხისმგებლობის ზომა.

მარიკა აბულაძეს - საჯარო რეესტრის ეროვნული სააგენტოს გეოდეზიისა და გეოინფორმაციის

დეპარტამენტის სივრცითი ინფორმაციის სამსახურის უფროსს შეეფარდოს დისციპლინური
პასუხისმგებლობის ზომა.

დანართი: 7 (შვიდი) ფურცელი (ახსნა-განმარტებები);

                   Microsoft Office Excel File (სტატისტიკური მონაცემი).

შიდა კონტროლის სამსახურის უფროსი ნოდარ ეფრემიძე

შიდა კონტროლის სამსახურის უფროსის ლევან სანებლიძე

მოადგილე