You are on page 1of 2

BE ROMBEK SOKIRI

Kwes ya weledi, kan inta azu ruwa le mederesa ta Adivantis al fi Maser de, ana
fekir inta mumkin be ruwa, “Abu tai gal.” “Lakin inta yau bi dafa gurus ta medersa
taki. Ana, bel besit, mabi akider rasulu inta hinak. Inta aruf kef uwo saab le ana
ashan bi dafa le geraya taki fi mederesa yom ta hakuma hina fi Juba. Bes fi hilim
tatai yau ana bi akider dafa le geraya taki fi medersa kas al zo gi geni fi mahalu, bara
min Sudan.”

Fa, fi umur 16 sena, ana amsuku sika ma sabihat tai al sukerin ashan ligo
gurusgeraya min biyu kutoub ta Adivantis fi asima ta Sudan, Kartoum.

Rabau ana fi mujtama al mulakbat Mesihi wa ger muminin fi junub Sudan, fa genii
wa istakal fi medina al Muslim kan iktibar jedid le ana. Biyu kutub kan kasatan saab.
Baad arba suur ana wa sabi tani lisa ma ligo gurusgiraya taana.

Gulub taana kasuru sedid. Zeyad le de, ze shabab sukerin, aanna kafu abuhaat ta
aanna munkin bi nadi aanna ashan riga wara fi bet kan umon asuma an zuruf ta
aanna. Fa aanna seli. Wa aana istakal.

Fi nihaha, fi Sahar Itnasaar, baad aanna istakal sita suur, aanna wosulu le hadaf ta
taamna.

Sika ta Sahara

Aanna biyu tasakir ta rihla ta taanna wa fi 22 Itnashar, 1986, aanna amsuku sika
Kairo, musafirin le samal bewosut ta sahara. Aanna timu yom itnin al awel gi kongus
gowi fok fi ras arabi ta gatar al waska wa al maliyantuf al gi juru ma ras ta gatar
gedim min zaman ta Ingilizi. Baad de, bobur gi gedim silu aanna le safa tani ta
buhera Nasir, tenki kebir ta Nahar Nil. Fi wokit aanna wosulu medina ta mina ta
Masir ta Aswan, gurus ta aanna tegriban kalasu.

Aanna indu gurus kifaya al bibiyu wahid taskar ta gatar le Kairo. Aanna bi ligo gurus
ta taskar nimra itnin de kef? Ma indana sabihaat awu nas al aanna bi arufu fi Aswan.
Fi zaman sual de lisa gi taabu aanna, belfagaa, ana zekir saa Kasio ta riada al ana
libisu, al ana biyu fi kartum shahar gubal ma aanna bi amsuku sika safar ta anna de.
Hal zol al gi biyu tasakir de bi rudu saa de bidal gurus?

Ana silu saa de min ida tai wa midu le uwo. Mara de amsuku saa de wa ayinu-ayinu
giyafa tatou kwes ma niya. Fi nihaya, uwo midu le ana taskar. Aanna biga fi sika le
Kairo, gi megidu Alaa le rahma wa neyima bitou.

Barau fi Mojmu
Baad aanna nenzil min gatar fi Kairo, le huzun ta aanna aanna ligu nefsa fi hala batal
tani mara. Aanna kutu fi bal ta aanna gali talaba awu muderisin min mederesa hinak
bi ja gabilu aanna fi mahata ta gatar, lakin mafi wahid hinaak. Oujuru taksi kaman
bara min sual. Aanna ma indu gurus kifaya sala gurus abuhadid ta dugu telefun.
Wahid Shaab Marsri wodi le aanna gurus abuhadid, wa aanna jeribu dogu telefun le
mederesa de, bidun najaa.

Tabaniin baad arba nahar wa bilel ta safir bidun raha wa num, jiyaniin, barawu fi
medina al kebir al fogo 6 miliyon nas de, haja tani kelim le ana gali kede ana seli
bera fi gelba tatai; ana arufu Alaa bes yau be akider saidu aanna fi zuruf al aanna
fogo de.

Aanna asalu Masri al gelba tou kes de, al siadu aanna gubal suwiya de ashan keli silu
aanna le ayi mahata ta bas gerib hinak. Gi fekir ketir an kef aanna bi wosule le
mederesa de, aanna ma fekir sala degiga wahid kef aanna bi dafa ujura ta bas al
aanna mashiin arkab de. Aanna ruwa sawa fi ras kuburi ta kura fok shari muskul fi
wasat ta Kairo. Gisim tai gi rugus min hawa al barid ta misaa ta Kairo.

Fajaatan, aanna asuma wahid zol nadi isim ta tai. Fi zaman ana lefet asha suf kan
de munu yau nadi ana, ana ayinu itniin Junubiin gi ja le aanna, wusaat ta tomon gi
lama ma farah. Ana gadir aruf wahid min shabab del, al ana gabilu gubal sena fi
Kenisa ta Seven deyis Adivantis fi Juba, junub Sudan. Huwo kan geni hinak gubal ma
huwo bi safir ma mojmu ta shabab taniin ashan dum nefsa mederesa al aanna gi
taab ashan ligo de. Lakin, shaab tani al kan ma uwo de, zol al ana ma arufu gobul
kida, uwo yau arufu ana wa nadi isim ta tai. Uwo ayinu suru tai gubal kida ma wahid
min talaba ta mederesa de. Jain le suk, shabab del mustagrabiin ashan suf aanna ze
ma aanna Kaman mustagrabin ashan suf humon!

Aanna selimu badun ma dus, fi wokit de, moyo ena ta farah bada kubu tehet min ena
tai. Ana bel basata ma akider sedek gali Ala bel hagiga ja alagu aanna masilu 10
degiga baad ma ana seli sala le musaada. Ana lazim bi eterif: de ma teriga ana fekir
Huwo bi juwabu salawat ta tai de!

Fi ashiya dak, zaman aanna juwa bas mashin le mederesa de, afkar tai rija wara le
kilmaat al ja min Alaa le Dawud, “Alaa huwu malja wa guwa ta tai, musaada-al-
diaman- mujut fi muskila” Muzamir 46:1.

_________________________
Rombek Sokiri gi katifu min Kairo, mahal al huwa shakal fogo muhasib fi Maktab ta
Kenisa ta Seven deyis Adivantis.