Tağğalt ed wemnitru

Sγer : D.Messaoudi

Nnan tella zik deg yiwet n taddart yiwet n tağğalt tanesbaγurt uγur amayendin n teslatin. Deg taddart-nni yettidir yiwen wemnitru ur yesεin la axxam, la tawacult. Yal ma ara yellaẓ, ad yebdu ad yekkat γef tewwura akken ad as-d-ṣeddqen kra n tmečča. Yal tikkelt ara yaweḍ γer wexxam n tağğalt-nni, ad asd-tini: “Ma ulac cwiṭ n tceṭṭiḥt, ur ssaram seg weγrum-iw tariḥt”. Sakkin ad yebdu wergaz meskin ad yessergagay tuyat, ad yetthuzzu aqerruy arma yucaf seg tidi. Tağğalt akked teslatin-is ad ttaḍsant seg-s arma qqerḥen-tent yidisan-nsent. Γer taggara, ad as-d-tettunefk telqimt n weγrum aquran ed ad yeffeγ. Zrin wussan ed yisseggasen, tufa-d tağğalt-nni iman-is d tamγart, yerna arraw-is akk huğren-tt. Ur d-yeggri win ara tt-yesseččen, wala win ara tt-yesselsen. Teffeγ d tamnitrut. Dγa yiwen wass, imi tetteddu tessutur seg tewwurt γer tewwurt, tufa-d iman-is sdat n yiwen wexxam γef tettban tneflit. Mi tewwet γef tewwurt, yeldi-tt-id yiwen wemγar ačuṛan yelsan abeṛnus amellal γef tettmecruruq tezdeg. Nettat ur t-teεqil ara, maca netta yeεqel-itt. “Kra n tgella i wudem n Ṛebbi !” Ay as-tenna s timmuskent tameqqrant. “Kcem-d ! Kcem-d, a tamaγart !” Ay as-yerra bab n wexxam s wawal uḥnin. Mi tekcem temγart γer wexxam, tufa-t yelebbu s warrac, tullas ed yirgazen. Uqbel ad as-fken učči, yendeh wemγar γef teslatin-is yenna-asent: “Yallah, sucfemt-as, beddlemt-as icettiḍen ed tefkemt-as tamečča !”. Deg kra n wakud, tuγal temnitrut tawesxant tettirriq seg tezdeg. Mi tečča, teswa, tekker tessuden aqerruy n wemγar tini-as: “Ttxil-k, mel-iyi aniwa-k. Akk-n tettwaliḍ, nekk iẓri-w yenkeẓ, ur εeqqleγ medden”. Amγar-nni ur yebγi ara ad tt-yeḥeccem. Yenna-as: “Ur iyi-tettissineḍ γas mliγ-am-d aniwa-yi, acku ur aṭas aya ay lliγ deg taddart-a”. Mi tekker temγart ad teffeγ, neṭqen-d akk wayt n twacult n bab n wexxam-nni, inin-as: “Axxam tessneḍ-t tura a yemma, mi telluẓeḍ neγ teḥwağeḍ kra εeddi-d γer-neγ !”. Ččuṛent wallen n temnitrut d imeṭṭawen, tetteddu teqqar kan “Ad yernu Ṛebbi lxir i wayt lxir yehdu-d widen ur yesεin lxir uqbel ad ḥeṣlen deg wexmir !”.

Sign up to vote on this title
UsefulNot useful