You are on page 1of 28

အချစ်သင့်ပုံပြင်

ခင်ငြိမ်းချမ်း

နိဒါန်း

လေယာဉ်ပျံက သိမ့်ခနဲတုန်ပနာ အာကာထက်သို့ တစ်ရှိန်ထိုး , ထိုးတက်လားစွာနန့် ရင်ဘတ်တစ်တောလုံး
ပြုတ်ကျကျန်ခရေပိုင် ၀မ်းနည်းအားငယ်မှုတိ လိုင်ခြောင်းဝသို့ ဆို့ပနာ တက်လာကတ်တေ။ အေချင့် အဂင့်လား ။
အိမ်မက်တစ်ခုရာလား။ “ နု “ ကိုယ့်ကိုယ်ကို မယုံကြည်နိုင်။ အိမ်မက်တစ်ခု မဟုတ်ဆိုစွာကို မ၀ံ့
ဒ၀ံ့လက်ခံပလိုက်တေခါ ထိုင်နိန်ယင်းနန့် “ နု “ တစ်ကိုယ်လုံးနုံးချိလာရေ။ “ မဟုတ်ပါကဲ့ ၊ အေချင့်
အဂင့်မဟုတ်ပါကဲ့ “ အယောင်ယောင် အမှားမှားနန့် တတိုးတတိတ် အသံထွက်လာပနာ ခေါင်းကို ဟွေဖက်အေဖက်
ယမ်းပလိုက်မိရေ။ ဘေးခုံက မမေချေက နားလည်ရခက်တေပုံစံနန့် “ နု “ ကို တစေ့တစောင်း အကဲခတ် ကြည့်နိန်
ခလား သသေ ချချာတော့ခါ “ နု “ မသိ ။ “ နု “ မြင်ကွင်းထဲမှာ ချစ်သူ့ပုံရိပ်တစ်ခုကရာ ထထင် ရှရှား ဟိပနာ
အရာအားလုံးက ၀ါးနိန်စွာ။ “ နု “ ရို့ဝီးကတ်ဗျာယ်လား ။ “ နု “ ချစ်သူနန့် အ၀ီးဆုံး, တစ်ခါချေလေ့သော့
ပြန်မတွိနိုင်ရေအ၀ီးဆုံးကို ထွက်လာခဗျာယ်လား။ ချစ်သူနန့် ပြန်မတွိနိုင်ယာဆိုစွာကို တွီးမိရုံနန့်ပင် ဟင်းလင်းပြင်
ကြီးထဲမှာ အဆုံးအစမဟိ မျောပါနိန်ရေပိုင်။ လွဲမှားခြင်းဆိုရေ လက်ဆောင်တစ်ခုကို “ နု “ အတွက် တစ်ဘ၀စာလုံး
ပီးခရေ ကံကြမ္မာကိုရာ အပြစ်တင်ရဖို့လား။ ယင်းပိုင်မဟုတ်ကေလေ့ ချစ်သူ့ရင်ခုန်သံချေတိထဲမှာ မမိန့်မမူး
ပျော်ဝင်စီးကျခွင့်ရခရေ ယင်းကံကြမ္မာကိုပင် ကျေးဇူးတင်လိုက်ရဖို့လား။ ဒေဂုတစ်အောင့်ချေမှာ“ နု “ မသိ။ ချစ်သူနန့်
ဆုံတွိခွင့်ပီးခရေ ညစာဖက်ကလွဲလို့ “ နု “ တစ်ခုချေလေ့သော့မသိ။

အခန်း ( ၁ )

“ ချစ်သူ့  ညစာဖက်တစ်ခု
လီအသော့နန့်
ပြုတ်ကျကျန်ခ “

ယင်းနိန့်ညစာဖက် ရုံးကဆင်းလာစွာနန့်ဘုတ်ကီး (Boat Quay) ဖက်ကို မဖြစ်မနိန်လားကြည့်ချင်ရေစိတ်က “ နု “ ကို
ပြပြင်း ထထန်လှုံ့ဆော်နိန်ခရေ။ စင်္ကာပူရောက်လို့ အလုပ်,လုပ်နိန်စွာ ရှစ်လလောက် ဟိယာကေလေ့သော့
အေဘုတ်ကီး ( Boat Quay ) နားတစ်ဝှိုက်ကို သသေ ချချာလှည့်ပတ်မကြည့်ဖူး။ ဖြတ်လား ဖြတ်လာလောက်ရာ
သမန်ကာလျှံကာကြည့်ပနာ လားဖူးသိမ့်ရေ။ ထိုသူရို့နည်းပညာတိုးတက်မှုတိနန့် အတင်းအဓမ္မလုပ်ယူထားရေ အေ
အလှအပ မြင်ကွင်းတိကို “ နု “ မခံစားကြည့်ချင် ( “ နု “ ရို့နိုင်ငံကလူတိ ကံမကောင်းတိုင်း “ နု “ စကာင်္ပူကို
စိတ်ပုတ်ပနာ ယင်းပိုင်ကိုယ့်အတ္တချေနန့် တမင်တကာ အတွေးချောင် ထားစွာလေ့ ဖြစ်တေ။ အေအတွက်နန့်တော့ခါ
“ နု “ မှာအပြစ်ဟိဖို့မဟုတ်တန်ရာကား )။ “ နင်ရို့ချောင်းစိကေချေ သာယာစွာလောက် ပျင်းတောင် ပျင်းသိမ့်ရေ

အရိုင်းအစိုင်းအတိုင်းလှနိန်ရေ နုရို့ ဘင်္ဂလားပင်လယ်အော်ကြီး နိန်ဝင်စအချိန် နင်ရို့ကို ပြလိုက်ချင်ယင့် “ လို့ “ နု

“ စိတ်ထဲမှာ ခနော်ခနဲ့သရော်နိန်ကျ။ ယေကေလေ့သော ယင်းနိန့်က “ နု “ ကို “ နု “ မသိလိုက်တေ
စိတ်တွန်းအားတစ်ခုစွာ ဘုတ်ကီး (Boat Quay) ဖက်ကို လားဖြစ်အောင် လားကြည့်ဖို့ ဆွဲဆောင်နိန်ခရေအတွက်နန့်
“ နု “ ရို့ အီးဖက်ဂျီ ( EFG ) ဘဏ်အရှိတတည့်တည့်က စင်္ကာပူပါလီမန်ဖက်ကို လမ်းဖြတ်ကူးလိုက်ပနာ
နော့သ်ဘရေ့ဒ်ဂ်ျလမ်းမထက်က (North Bridge Road) အယ်လ်ဂျင်းန်တန်းထား (Elgin) ထက်ကို
လျှောက်လာလိုက်တေ။
“ ယာ…, မဆိုးကားယေ အေနိန့်ညစာဖက်ချေ ……”
တန်းထားအလယ် တတည့်ကိုရောက်တေအခါ “ ဖူလတန်ဟိုတယ် ၊ မေ ဘဏ် ၊ ယူအိုဘီဘဏ် ၊ ကေဗင်နာ့ဂ်ျ
တန်းထား ( Cavenagh Bridge ) ရို့နောက်ခံနန့် တဗျင်းလှနိန်ရေ မြင်ကွင်းကို ကြည့်ပနာ “ နု “ ကိုယ့်စွာကိုယ်
မလုံမလဲ မှတ်ချက်ချမိယင့် ။ ညစာဖက် ခြောက်နာရီ
က

ကျော်နိန်ယာခါ ချောင်းကမ်းပါးဘေး

( River PoolSide )

စားသောက်ဆိုင်တိမှာ ကျကျိတ်တိုး စည်ကား နိန်စွာ မလား။ ဟွေက အေက ပျံ့လွင့် ထွက်လာရေ

ဂီတသံစိုင်တိ ထဲမှာဘီယာနံ့ ပေါင်းစုံကိုလေ့ “ နု “ ရှုပစ်လိုက်ရသိမ့်ရေ ။ " အဘာလေ ပျပျော် ပပါး
ခွက်ချင်းတေ့နိန်ကတ်လိုက်တေ၊ ဆိုနိန် ကနိန်ကတ်လိုက်တေ၊ စားကောင်းသောက်ဖွယ်တိ စားနိန်ကတ်လိုက်တေ ၊
မြူးထူး နိန်ကတ်လိုက်တေ အဖြူကောင်တိ ၊ အဖြူကောင်မတိ ၊ မဖြူတဖြူတိ အစုံဆိုမှ အစုံ

“ နု “

ဖြတ်လာယင်းနန့် မ၀ရီစာဘ၀ချေတိ အကြောင်းကို အလို,လို စိတ်ရောက်လားပနာ
ထိုသူရို့ပျော်ကြီးကျနိန်ကတ်စွာကိုလည်း မနာလိုဖြစ်လိုက်ပြန်သိမ့်ရေ ။
လူချင်းခလုတ်တိုက်လဲကျဖို့လောက် ၀ , ၀က်ကွဲ စည်ကားနိန်ရေ ယင်းဆိုင်တိအရှိက “ နု “ ကြောင်တိ
ကြောင်တောင် လျှောက်လာခစွာ ဆိုင်တိအဆုံး ဘိုတာရို ငှက်ရုပ်တု ( Botero ) ဟိရေ

ကမ်းဘားဘေးကို

ရောက်တေအခါမှရာ တနားကမွန်းကျပ်နိန်ခစွာတိ် ပြပြေ၊ လျလျော့ချေဖြစ်လာခပနာ သာသာယာယာ
ကြည်နူးမှုတစ်ခုကို စပနာခံစားရရေ။ ချောင်းထဲမှာ ခေါက်တုန့်ခေါက်ပြန် အပျော်စီးနိန် ကတ်တေ ဘုတ်တိကို
ကြည့်ယင်း ၊ တသွင်သွင်ချေ တိုက်ခတ်နိန်ရေ လီညှင်းရို့အရသာကို ယင်းကမ်းဘားဘေးမှာ ထိုင်ခံစားယင်း
နီဝင်ချိန်ကို နှုတ်ဆက်နိန်ကတ်စွာလေ့ လွမ်းစရာချေပင်ကောင်းသိမ့်ယင့်။ တစ်ယောက်တည်း ရူးကြောင် မူးကြောင်
လာခစွာကိုပင် “ နု “ အပြစ်တင်ပစ်လိုက်ချင်သိမ့်ရေ။ သူများရို့မှာအဖော်တိနန့်ချည်း။
တစ်ယောက်တည်း။

“ နု “ မှာရာ

အေအချိန်ထိ တစ်ကိုယ်တည်း လက်သီးဆုပ်ထားရေ“ နု “ ရွီးချယ်ထားမှုကို စောဒက

တက်ပစ်လိုက်ရဖို့လား။ ရင်ထဲမှာ ဟာတာတာချေ ဖြစ်လာစွာတော့ခါအမှန်ပင်။ ယေခါ
အကောင်းသားလို့ “ နု “ တွေးမိပနာ “ ကိုဦး “ ပါးသို့ “ နု “

“ ကိုဦး “ ကို ခေါ်လာခကေ

အတွေးက ရောက်လားခပြန်ရေ ။

ကိုဦးအတွက်တော့ခါ “ နု “ စွာ သူ ကကောင်းတန်ဖိုးထားမြတ်နိုးရရေ ချစ်သူတစ်ယောက်ဖြစ်နိန်လီဖို့ ။ “ နု “
အတွက်ရာဆိုကေ “ ကိုဦး “ ညည်းညူရေလို့ တစ်ခါလေ့သော့မဟိ ။

ဇာအချိန်ကြည့် ကြည့် “ ကိုဦး “

မျက်ဝန်းထဲမှာ “ နု “ ကို ချစ်ခင်မြတ်နိုးခြင်းတိနန့် အရောင် တောက်နိန်စွာ ။ “ နု “ သူ့ကို လှလှိုက် လှလှဲ
ခံစားတတ်လာဖို့အချိန်ကို ယယုံကြကြည်စောင့်နိန်စွာလတ် ။

“ နု “ ကတော့ခါ “ ကိုဦး “ကို အလိုအပ်ဆုံး

သူငယ်ချင်းပိုင် ၊ အားကိုးအရဆုံး အစ်ကိုတစ်ယောက်ပိုင် ခံစားရစွာ။ “ နု “ စိတ်ပျက်အားငယ်စရာတိနန့် ရင်ဆိုင်
ရတိုင်းလည်း “ ကိုဦး “ ပက်ခုံးထက်မှာငိုချပနာ ရင့်ကိုပေါ့ပစ်လိုက်တတ်တေ။ “ နု “ ၀မ်းသာစရာတိနန့် 
ကြုံရကေလေ့ “ ကိုဦး “ ကိုဝီမျှပနာ ပျော်ပစ်လိုက်တတ်တေ ။ ချစ်သူတစ်ယောက်ပိုင် ချစ်လားလို့ “ နု “

ကိုယ့်ကိုကိုယ်လေ့ မိန်းခွန်းထုထ်ဖူးပါယင့် ။ အချစ်ဆိုစွာက, ကကောင်း နားလည်ဖို့ခက်စွာလား “ နု “ မပြောတတ်။
“ ကိုဦး “ ကို ချစ်သူတစ်ယောက်ပိုင် အဂုထိ ချစ်လို့မရသိမ့်။ ယေကေလေ့ ဇာတစ်ခုပင်ဖြစ်, ဖြစ် “ နု “ “ ကိုဦး “ ကို
သတိရပစ်လိုက်တတ်စွာက အကျင့်ဖြစ်နိန်ယာ။ အဂုလေ့သော့ “ နု “ တစ်ယောက်တည်း
ဇာကိုလွမ်းပစ်လိုက်ရဖို့လို့လေ့မသိ။ ကိုယ့်ပြည်ကိုလွမ်းချင်ရေပိုင် ၊ ကိုယ့်မိကိုယ့်ဖ ဆွီမျိုးတိကိုလွမ်းချင်ရေပိုင် ၊
သူငယ်ချင်းတိကို လွမ်းချင်လာရေပိုင်။
တစ်ယောက်တည်း တောင်တိဗရနန်းအတွေး(တွီး) တိနန့် အားငယ်စိတ်က ၀င်လာပနာ
ကမ်းဘားတစ်လျှောက် ဖြဖြေးချေ လျှောက်လာ နိန်မိရေ။
မီးရောင်စုံတိနန့် ညစာဖက်အလှ က

တစ်စ တစ်စနန့် အမှောင်ဖက်သို့သမ်းလာရေခါ

ပိုပနာ အသက်ဝင် လာယင့်ကား။

မေဘဏ် အရိသ
ှို့ရောက်တေအခါ

နွားကာရီရုပ်တုအရှိမှာ “ နု “ ဓါတ်ပုံ ရိုက်ချင်စိတ်ပေါ်လာယင့် ။ ယေခါ ပြသနာက စရေ။ ဓါတ်ပုံရိုက်ပီးဖို့ အရင်းနှီးဆုံး
လူတစ်ယောက်လောက် “ နု “ ဘေး နားမှာ မဟိခရေ ယင်းညစာဖက်ကို ပထမဆုံးအကြိမ် စိတ်ကသိ ကအောက
်ဖြစ်မိပနာ မျက်နှာချင်းဆိုင်က လာနိန်ရေ အင်ဒိုနီးရှားမတစ်ယောက်ကို

ဓါတ်ပုံရိုက်ပီးဖို့

အကူအညီတောင်းလိုက်ရသိမ့် ယင့်ကား။ ဓါတ်ပုံရိုက်ပြီးရေ အခါ “ နု “ ခံစားနိန်ရစွာတိကို တစ်ယောက်,ယောက်ပါးသို့
ဖွင့်ချပစ်လိုက်မှရာ ရင်ထဲမှာ စိကေပေါ့လားဖို့ လို့တွေးပနာ ထုံးစံ အတိုင်း လက်က “ ကိုဦး “
ပါးသုိ့….နှိပ်မိပြီးသားဖြစ်နိန်ခယင့်။
“ ကိုဦး “
…………………….…………………………………………………,

နု တစ်ခုလေ့သော့မပြောပဲ
အေအတိုင်းရပ်ထားရေအခါ တစ်ဖက်က………..

“ နု တစ်ခုခု ဖြစ်နိန်စွာလာ “
……………………………………………..

“ ကိုဦး, နု ဘုတ်ကီး ( Boat Quay ) မှာ တစ်ယောက်တည်းဟိနိန်စွာ ကကောင်း အားငယ်နိန်ရေပိုင် ခံစားနိန်ရလို့

“ အဟား…. ဟား…

ဟား နု အရူးမချေ ၊ ကိုဦး က နု ဇာပြသနာမသေ ဖြစ်နိန်လဲလို့ “

ကိုဦးကပြောယင်းနန့် ဆက်ပနာ ရယ်နိန်ရေစွာကို နု ကြားနိန်ရရေအခါ ဇာပြောရဖို့လို့လေ့မသိ စိတ်ဆိုးဆိုးနန့်
ကေဗင်နာ့ဂ်ျတန်းထား ( Cavenagh Bridge ) ကို ခသုတ်သုတ်ချေဖြတ်ပနာ ချောင်းကမ်းဘေးအတိုင်းပင်
အေစီအမ်ပြတိုက် ( Asian Civilisation Museum ) ဟိရေဖက်ကို လျှောက်လားနိန်မိရေ။

နု ဖက်က

တိန်းလခရေအခါ နု စိတ်ဆိုးလားဗျာယ် သို့တည်းမဟုတ် ပိုပနာ ၀မ်းနည်းလားခရေလို့ ထင်စွာလားမသိ။ ကိုဦး
အသံက စိကေချေပျော့ပနာ ချော့သယောင် ၊ နှစ်သိမ့်ပီးသယောင်နန့် တစ်ခုခုအတွက်
သူ့ပါးကလိုအပ်တေအခါတိုင်း “ နု “ ကို သူပြောနိန်ကျ စကားလုံးတိနန့် ဖြီလျှော့ပီးခရေ။
“ နု တစ်ယောက်တည်းလို့ ခံစားရရေအခါတိုင်း နု ဘေးနားမှာ ကိုဦးဟိရေလို့ ပြောထားရေမနား “
ကိုဦးပါးက အေစကားလုံးတိကိုကြားရကေ “ နု “ မအီမသာခံစားနိန်ရစွာတိ အတန်အသင့်ပြေပျောက်လား ကတ်စွာ
အမှန်ပင်။ ယေခါမှရာ ကိုဦးပြောနိန်ရေစွာကို အင်း ၊ အဲ လုပ်ယင်း တစ်ချက်တစ်ချက် ဒူးရင်းသီးအဆောက်အအုံနန့်
( မြန်မာပြည်ကသူတိအခေါ် ) ဖူလတန်ဟိုတယ်ဖက်ကိုလည်း နောက်ပြန်လှည့်ပနာ ငမ်းမိသိမ့်ရေ။
အလင်းမဖျော့ခင် စစောချေက ဖြတ်လာခရေ မျက်နှာချင်းဆိုင်က ဘိုတာရိုငှက်ရုပ်တု ( Botero Bird ) ၊ မေဘဏ် (
May Bank ) ၊ လိုင်ပင်းတစ်ဆုံးမော့ကြည့်နိန်ရရေ ဆင်းတဲလ် ( SingTel )၊ ယူအိုဘီပလာဇာ ( UOB Plaza )နန့်
ကက်ပီတယ်လ်လန်းဒ် ( Capital Land ) အဆောက်အအုံရို့ ဇာလောက်ကြည့်လို့ေ ကာင်းရေ ဆိုစွာကိုလေ့
တစ်စုံတစ်ယောက်ကြောင့် “ နု “ မှင်တက်မလားခင်အချိန်ထိ အချေတစ်ယောက်ပိုင် ကိုဦးကို
ပြောပြနိန်ခရေ။ဟုတ်တေ။ ယင်းတစ်စုံ တစ်ယောက်ကို မပီဝိုးဝါးမမြင်ရခင်အချိန်ထိ ကိုဦးကို
ပြောပြနိန်ရေစွာကနိန်ပနာ ဖုန်းကိုဖြုတ်ချပလိုက်ဖို့ မလိုလောက် အောင် “ နု “ အတွက် “ ကိုဦး “ က
အရေးပါနိန်ခစွာပါ ။

ယေကေလေ့သော့ အေစီအမ်ပြတိုက် ကျကျော်ချေလောက်က ဘုတ်စီး လက်မှတ်ရောင်း

အဆောက်အဦးကိုကျော်ပနာ ရီတမာပင်ပိုင် အပင်တိ အရှိဖက်နားထိုင်ခုံတန်းချေတိထက်က ထိုင်ခုံတစ်ခုမှာ “ နု “
နန့်အရှိတတည့်လည်းမဟုတ်၊ ဘေးတိုက်လည်းမကျတကျထိုင်နိန်ရေ
ရှပ်လက်ရှည်အပြာနုရောင်နန့်သူတစ်ယောက်ကို “ နု “ ၀ဝေ ၀၀ါး မြင်လိုက်ရရေအခါ ကိုဦးနန့်
ဖုန်းပြောနိန်စွာကနိန်ပနာ အလိုလို တန့်ပစ်လိုက်ပြီးသားဖြစ်နိန်ခရေ ။ ဇာကြောင့်မှန်းမသိ သူ့ ကိုမြင်လိုက် တေစွာနန့် “
နု “ ရင်ထဲမှာ ၀မ်းသာရေပိုင် ၊ ၀မ်းနည်းအားငယ်မိရေပိုင် ၊ ရရင်းနှနှီးသိကျွမ်းဖူးရေပိုင် ခံစားချက်တိကို
တစ်ပြိုင်နက်တည်း ခံစားလိုက်ရရေ။ “ နု “ အေအတိုင်းပင် ရပ်ကြည့်နိန်မိခရေလား။ ဇာလုပ်နိန်ခရေဆိုစွာ “ နု “ ကို
“ နု “ သတိမထားမိလောက်ရေအထိ ကိုဦးပါးက ဖုန်းထပ်ခေါ်လာခါမှရာ ကိုဦးကို ပြန်ထူးဖို့သတိရရေ။

“ ဟုတ် , ကိုဦး အရာတစ်အောင့်လောက်ကျကေ နု ပြန်ဆက်လိုက်မေ “

ဆိုပနာ ဖုန်းကို ပိတ်လိုက်မိရေအထိ။ ကိုဦး “ နု “ ကို စိတ်ပူနိန်ဖို့လား ( သို့ ) ဇာပိုင်တွေးနိန်လီဖို့ လဲဆိုစွာ “ နု “
မစိုင်းစားနိုင်ခ။ “ နု “ အသံကြောင့်လား၊ အခြားတစ်ခု ခုကြောင့်လား သူ “ နု “ ဖက်ကိုလှည့်ကြည့်လာရေအခါ သူ
နန့် နု တိုင်ပင်မထားပဲ အကြည့်ချုင်း ဆုံဖြစ်လိုက်ကတ်တေ။ ရင်ထဲမှာ စကားလုံးတိနန့် ဖော်ပြဖို့ခက်ခဲရေ
စီးကြောင်းတစ်ခု ဖြတ်ဆင်းလားခရေ စွာကို နု တအံ့တသြ ခံစားလိုက်ရရေ။ အဂုမှ တိမ်ခွပ်ပစ်လိုက်တေပိုင်
တစ်ချက်စိကေချေ။ အဂင့်တစ်ချက်စိကေချေရာ မျက်နှာချင်းဆိုင်လိုက်ရရေ သူတစ်ယောက်ကို “ နု “
အေပိုင်ခံစားချက်တိနန့် တုန်လှုပ်သင့်ပါယင့်လား?။ “ နု “ ဆယ်ကျော်သက်ချေတစ်ယောက်ပိုင် ဇာတ်ကား
တိကိုကြည့်ပနာ အရူးထမိရေစွာလေ့မဟုတ်ပါပဲနန့် အေပိုင်ဖြစ်သင့်ပါယင့်လား?။ တနားချေအတွင်း
အာရုံကိုစုစည်းပနာ “ နု “ ကိုယ့်ကိုကိုယ် ပြန်ထိန်းလိုက်တေ။

သူထိုင်နိန်ရေခုံတန်းကို ကျော်ပနာ ရီတမာပင်ပိုင်အပင်တိ တန်းစီရာလမ်းအတိုင်းလျှောက်ဖို့ ခြီလှမ်းကို
ဖြဖြေးချင်းအားယူရေအခါ အံ့သြဖို့ ကောင်းလောက်တေအထိ “ နု “ ခြီလှမ်းတိကတုန့်ဆိုင်းနိန်ခရေ။
ယေကေလေ့မဖြစ်။ “ နု “ ထိုသူ့နံပါးက ထွက်လားဖို့ကို တုန့်ဆိုင်းနိန်ရလောက်တေအထိတော့ခါမဖြစ်သင့်။
တတ်နိုင်သမျှ အတည်ငြိမ်ဆုံးဖြစ်အောင် ကိုယ့်ကိုယ်ကိုထိန်းယင်း သူ့နောက်နား (သူက နုကို
နောက်ခိုင်းထားရေအနိန်အထားနန့် မျက်နှာချင်းဆိုင် ချောင်းထဲက ဘုတ်တိလားနိန်ကတ်စွာကိုကြည့်နိန်ရေလား၊
ဓါးလွယ်ခုတ်အနိန်အထားနန့်ဟိနိန်ရေ ဘုတ်ကီး စားသောက်ဆိုင်တန်းတိက လူရောင်စုံ ၊
မိန်းရောင်စုံတိကိုကြည့်နိန်စွာလား၊ ဆင်းတဲလ်နန့် ယူအိုဘီပလာဇာရို့ကို ကြည့်နိန်စွာလား၊ နုမသိ ) က
ဖြတ်လျှောက်လာခရေ။ သူ့နောက်နားတတည့်က ဖြတ်ရရေအခါ သူ့ပါးက သသင်းချေမွှီးနိန်ရေ ရမွှီးနံ့တိကို “ နု “
တတိုးတတိတ်ချေ ခိုးရှူပစ်လိုက်ခသိမ့်ရေ။ နောက်ကိုတော့ခါ “ နု “ ပြန်လှည့်မကြည့်ဝံ့ခ ။ ပတ်ဝန်းကျင်ကို “ နု “
သတိထားမိလိုက်တေအခါ ယင်းညစာဖက်စွာ အမှောင်သို့ ထထဲ ၀၀င်ဖိတ်ကျလခယာ။ သူက ဇာပိုင်
ကျန်နန
ိ်ခရေလဲ။ “ နု “ နန့် သူ မျက်နှာချင်းမဆိုင်မိခင်မှာ သူ ဇာတိလုပ်နိန်ခရေလဲ။ သူစွာဇာလူမျိုးတစ်ယောက်လဲ ။
စင်္ကာပူလူမျိုး တစ်ယောက်လား ။ အေ အရှိတိုင်းသားထဲက တစ်ယောက်ဖြစ်စွာတော့ သေချာရေဆိုရေ
အတွေးပေါင်းစုံနန့် “ နု “ ရင်ထဲမှာ ရရောင်း သတ်နိန်ကတ်တေ။ “ နု “ သူ့ရှိမှာ ကကောင်းသိသာ လောက်ရေအထိ
အိနြေ္ဒပျက်နိန်ခရေလား မပြောတတ်ယာ။ သူနန့်တွိပြီးရေ အချိန်စိကေချေလောက်ကပင် စပနာ

“ နု “ အတွက်

ယင်းညစာဖက်စွာ လင်းလာလိုက် မှောင်လားလိုက်။ ၀မ်းသာမိရေပိုင်။ အားငယ်မိရေပိုင်။ ခရီးလားဟန်လွဲ တစ်ချက်ချေ
အကြည့်ချင်းဆုံမိခကတ်တေစွာကို “ နု “ အေလောက် ကတုန်ကယင်ဖြစ်မိရေအခါ ကိုယ့်စွာကိုယ်
အထင်သေးစိတ်ပင် ဖြစ်မိပါယင့်။

“ နု “ နင်က ငါသိထားရေ “ စောနုသွင် “ မဟုတ်ရေအတိုင်းလို့ အပြစ်တင်မိလိုက်သိမ့်ရေ။ ကိုဦးပါးက
တယ်လီဖုန်းလာနိန်ရေခါမှ တစ်အောင့်နိန်ကေ “ နု “ ပြန်ဆက်ဖို့ပြောထားခစွာကို သတိရပြန်ရေ ။

“ နု ဇာဖြစ်န်ိန်စွာလဲ , တစ်ခု ခု ဖြစ်နိန်ရေမဟုတ်လား ? “

ကိုဦးအသံက စိုးရိမ်နိန်ပုံရပနာ အယင်စလိုမိန်းလာရေအခါ နု ကိုယ် နု

မထိန်းထားလိုက်နိုင်ပဲနန့် ကိုဦး

နားမလည်နိုင်ရေ ယင်းစကားလုံးတိကို ဗြုန်းကနဲထွက်လားခပြီးသားဖြစ်နိန်ရေ။

“ ကိုဦး , နု ယင်းသူတစ်ယောက်နန့် တွိနိန်ခရေ “

နု စကားလုံးတိ အဓိပ္ပါယ်ကို ကိုဦး သဘောပေါက်ပုံမရ ။ တစ်ခု ခုဖြစ်နိန်လောက်ယင့်လို့ အသေအချာတွေးပနာ
စိတ်ရှုပ်လားခပုံ လည်းရရေ။ ဆက်ပနာ “ နု “ ဇာပိုင်ပြောရဖို့ဆိုစွာကို စကားစထပ်ရှာ(ဟြာ) မရရေပိုင်
ပြောချင်ရေစိတ်တိလေ့ လီးလံနိန်ကတ်လို့ ကိုဦးကို တောင်းတောင်း ပန်ပန်နန့် ဖုန်းပြန်ချပလိုက်ရသိမ့်ရေ ။ ဘုတ်ကီး
ဝန်းကျင်ကို လုံးဝကျော(ကြော)ခိုင်းလိုက်ပြီးကေ MRT ( ရထားဘူတာရုံ )သို့ တရွိချင်း လျှောက်လာရေအခါ
ရှပ်လက်ရှည်အပြာနုရောင်နန့် သူ့ပါးမှာ “ နု “ စိတ်တိ ဖိတ်ကျ ကျန်နိန်ခစွာကို အရူးတစ်ယောက်ပိုင် သိလိုက်ရပနာ
တစ်နိန်ရာမှာ သူ့ကို မြင်ဖူးခလားဆိုရေ ၀ိုးတိုးဝါးတားအတွေးစတစ်ခုက နု အာရုံမှာ လာငြိတွယ်ကတ်ပြန်ရေ ။ သူနန့်

မျက်နှာချင်းဆိုင်ခရေ ယင်းတစ်ချက်ချေကို ပြန်အတွက်ပေါ်မိရေအခါ ယင်းညစာဖက်ထဲမှာ “ နု “ ကြေ ကြေ နပ်နပ်
ကျဆုံးလားခယာဆိုစွာကိုလည်း သိလိုက်ရပါရေ။

အခန်း ( ၂ )

“တိမ်မဆင်ဘဲ
ပြိုကျချင်ရေ
မိုးစက်ချေတိ “

မိုးထဖက်ကပင် တစီစီနန့်ရွာနိန်ခရေ မိုးကြောင့်ဟိဖို့ ဘုတ်ကီးတစ်ဝှိုက်မှာလည်း လူလားလူလာတိကြဲပနာ ဆွဲဆောင်မှု
ကကောင်း ကင်းမဲ့နိန်ရေလို့ “ နု “ ထင်ရေ။ ယေတောင်မှ “ နု “ ရင်ထဲမှာတော့ခါ ဘုတ်ကီးဝန်းကျင်ကို
တတိတ်ချေသာယာမိပနာ အေနိန်ရာ အေ၀န်းကျင်ကို နု စွဲစွဲ လန်းလန်းဖြစ်လာမိစွာ သီတင်းပတ် သုံးပတ်တောင်
ပြည့်လာခယာ။ တစ်ချက်စိကေချေ မျက်နှာချင်းဆိုင်ခရရေ လူတစ်ယောက်ကို အေပိုင်သတိရ တမ်းတခြင်းတိနန့်
ညစာဖက်တိုင်း “ နု “ သူ့ကိုလာရှာ(ဟြာ)နိန်တတ်စွာလေ့ အကြိမ်တိမနည်းယာ။ သူ့အရိပ်အယောင်ကို မတွိရပဲနန့်
အိပ်ပြန်လာရရေအခါ “ နု “ ရင်ထဲမှာ ဟာတာတာ။ လလီး လလံလေ့တွိပိုင် အိမ်သို့ရောက်တေ အခါဆိုကေ
ခြီကုန်လက်ပမ်းကျပနာ စားချင်သောက်ချင်စိတ် ကုန်ခမ်းရေအထိ သူ့အရိပ်က “ နု “ ကို လွှမ်းမိုးနိန်ခပြန်ရေ ။ ခါတိုင်း
ကိုဦးနန့်ဖုန်းပြောကေ အနည်းဆုံးနာရီဝက်လောက်အထိ ပြောပြီးမှရာ အဆုံးသတ်တတ်ကေလေ့သော့ အဂုကျကေ
ကိုဦးကိုတောင် ဟဟက် ပပက်ပြောချင်စိတ်မဟိ ။ အယင်ကဆိုကေ ကိုဦး အလုပ်ဆင်းစွာ နောက်ကျဖို့ဆိုကေတောင်
မရ အရခေါ်ပနာ စီးတီးဟော ( City Hall ) တစ်ဝှိုက်မှာ လားသရမ်းနိန်ကျ။ အဂုတော့ခါ ကိုဦးလာဖို့လို့
ကြိုဆက်ထားကေတောင် အကြောင်းအမျိုးမျိုးပြရှောင်ပနာ ဘုတ်ကီးနားမှာ ငငူ ငငိုင်လားထိုင်မိရေအထိ “ နု “
ရောဂါက ရင့်လာခဗျာယ် ။
ကိုဦးက “ နု “ လူတစ်ယောက်နန့် ပတ်သက်လို့ ထထူး ဆဆန်းချေဖြစ်နိန်ရေ ဆိုစွာကို ယင်းနိန့်က “ နု “ ကယောင်
ကတမ်း ပြောလိုက်တေ စကားတိအရ ရိပ်မိပုံရကေလေ့ ဇာက ဇာပိုင်ဖြစ်တေ ဆိုစွာကို ကောက်ချက်ချတတ်ပုံမရပဲနန့်
အူကြောင်ကြောင် ဖြစ်နိန်ပုံရယင့်။ ယေကေလေ့ ကိုဦးရေ ကကောင်း လိမ်မာ ပါးနပ်တေသူဖြစ်တေအတွက်နန့် “ နု
“ အေပိုင်အပြောင်းအလဲ ဖြစ်နိန်စွာကို မသိကျိုးကျွံပြုပနာ တတိတ်ချေ အကဲခတ်နိန်စွာကို “ နု “ သိပါရေ ။
ယင်းပိုင်သိယင့်နန့်ပင် “ နု “ အတွက် “ ကိုဦး “ က အရေး မကြီး ယာလား ။ အမှန်အတိုင်းဝန်ခံရကေ “ နု “
ကိုဦးကို ချစ်သူတစ်ယောက်ပိုင် ချစ်လို့မရစွာကလွဲလို့ “ နု “ အတွက် တန်ဖိုးထားလေးစားရဆုံး သူတစ်ယောက်။
အခက် အခဲတစ်ခုခုနန့်ကြုံလာခတိုင်း ကိုဦးရာ “ နု “ နံပါးသို့ ရောက်လာကေ “ နု “ အတွက် ပြသနာကို တစ်ဝက်
လောက် အောင်မြင်လားယာလို့ ခံစားရရေအထိ “ နု “ အတွက် အရေးကြီးပါလျက်နန့် ဇာဖြစ်လို့ တစိမ်းပြင်ပြင်
သူတစ်ယောက်ကို အရူးပိုင်စွဲမက် တမ်းတမိရေလဲဆိုစွာ

“ နု “ ကိုယ့်စွာကိုယ်လေ့

ကကောင်းအံ့သြတုန်လှုပ်မိပါယင့် ။ နု ကကောင်း အရူးထနိန်မိယာနန့် တူပါရေ ။ ဟုတ်ပါယင့် ကိုယ့်စွာကိုယ်
ယင်းပိုင်တွေးမိရေအခါမှရာ ပိုပနာ စိတ်တိုင်းမကျဖြစ်လာပြီးကေ နု အကြောင်းပြချက် တစ်ခုလေ့သော့ မဟိပဲနန့်
ကြိုင်းကြီး ကြိုင်းငယ်ချလို့ ငိုပစ်လိုက်ချင်လာရေ ။

မိုးစဲလားခယာတာလေ့သော့ မိုးဖွဲစိကေချေတိ ကျနိန်သိမ့်လို့ ထိုင်စရာနိန်ရာလေ့ မဟိရေတတူ ဖြဖြေးချေငေး
ယင်းတွေးယင်းနန့် လျှောက်လာနိန်ခစွာ “ နု “ သူနန့်တွိခရေ ယင်းနိန်ရာသို့ရောက်လာပြန်ရေ။ ရီတမာပင် (အပင်နာ
မည်မသိ နု ကိုယ့်စွာကိုယ် ပီးထား ရေနာမည် ) တိက မိုးရီသောက်ထားရလို့ လလန်းဆဆန်းချေ
ဖြစ်နိန်ကတ်ပုံရကေလေသော့ “ နု “ ရင်ထဲမှာကား နွနွမ်း နနယ်။ ချောင်းကမ်းဘေးက
လက်ရမ်းထက်မှာလက်ထောက်ပနာ ယူအိုဘီဘဏ်အောက်ခြီနားက အလှစိုက်ထားရေ၀ါးပင် စစိမ်း စစိုချေတိကို
အဓိပ္ပါယ်မဲ့ ငေးမောကြည့်နိန်လိုက်တေ။ ရင်ထဲမှာ လလွမ်း ဆဆွေးချေနန့် အထီးကျန်လိုက်တေဆိုရေ
ခံစားမှုကဇာကဇာပိုင် ရောက်လာကတ်ပြန်ရေမသိ ။ နု အဂင့် ငိုချင်နိန်မိယာလား ။ နံဘေးမှာ ပပူ နနွီးလာဟပ်တေ
ကိုယ်ငွိတစ်ခုရလို့ “ နု “ ဇ ဇတ်ချြေ ဖြစ်ပနာလန့်လား ခရေ ။
“ ကိုဦး …………..“
ဖျတ်ကနဲလှည့်အကြည့်မှာ ကိုဦး ကို “ နု “ တွိလိုက်ရစွာ ။ ကိုဦး “ နု “ ကို တစ်ခုလေ့သော့မပြောပဲ “ နု “
ခေါင်းထက်မှာ ဟွေတစ်စက် အေတစ်စက် တွဲလောင်းခိုနိန်ကတ်တေမိုးရီတိကို ခြောက်လားအောင်
သူ့လက်ချောင်းချေတိနန့် ခဖွဖွချေဆွပနာ သုတ်ပီးနိန်ရေအခါ နု တစ်ခုလေ့သော့ မပြောနိုင်ပဲနန့် ငြိမ်ခံနိန်လိုက်ရရေ ။
အေရက်ပိုင်းမှာ အကြောင်းပြချက်မဟိ အရူးထနိန်ခစွာတိအတွက်လေ့ “ နု “ ကိုဦး ကို တစ်ခု ခု ပြောဖို့ စကားလုံးတိ
ရှာ(ဟြာ) လို့မရ ။ သူ စိတ်ကြေနပ်တေအထိ “ နု “ ဆံပင်တိကို ပွတ်သပ်ပီးလို့ပြီးရေအခါ…….
“ မက်ဒေါနားလ် ( Mc Donald‘s )ကို လားကတ်မေနန့်

“ အမိန့်ပီးစွာနန့် ချော့စွာရောထားရေ သူ့ရွီးချယ်မှုကို

အာစီးနိန်ရေ သူတစ်ယောက်ပိုင် “ နု “ ငြင်းပစ်လိုက်ဖို့တော့ခါ စိတ်ကူးမဟိ ။ မိုးရီထဲမှာ တစ်ညစာဖက်လုံး အလွမ်း
သင့်နိန်ခရေ “ နု “ အတွက် သူရွီးချယ်ပီးလိုက်တေ ကော်ဖီတစ်ခွက်က ဂုအချိန်မှာ အနွီးထွီးဆုံးဖြစ်နိန်လီဖို့ ။
သူ့စိတ်တိုင်းကျချည်း ဆရာကြီးလုပ်တေဆိုရေ အဓိပ္ပါယ်နန့်

ကိုဦးကို မျက်စောင်းတစ်ချက်ထိုးပစ်ခပနာ

နု “ အရှိက အယင်ထွက်လာခရေ ။

“ အဟား ဟား စိတ်ကြီးလိုက်တေစွာမှာလေ့ နှစ်ယောက် မဟိပါကား မေးမေစောနုသွင် “
ကိုဦးက “ နု “ ကို စပနာ နောက်က ဖြဖြေးချေ လိုက်လာခယင့် ။ ရီတမာပင်တိကို တစ်ပင်ချင်းဖြတ်တိုင်း
ရှပ်လက်ရှည်အပြာနုရောင်နန့် သူ့အရိပ်တိက “ နု “ နန့်ထပ်ကြပ်မကွာလိုက်နိန်ကတ်တေစွာကို,
ကိုဦးရာသိလိုက်ကေ အေပိုင် ရယ်နိုင်ဖို့သိမ့်လားဆိုရေ စိုးရိမ်စိတ် တစ်ခုက
ထထန်ဝင်ဆောင့်နိန်ခရေ ။

အခန်း ( ၃ )

“ အိမ်မက်တစ်ခု ဆန်းကြယ်နုသစ်
ချစ်သူ့ခြီရာ ကောက်ရလိုက်တေ “

“ နု “ ရင်ဘတ်ကို ပြပြင်း

မီးရောင်စုံတိနန့် လှပသာယာနိန်ရေ ယင်းညစာဖက်မှာ နု ရို့ စီးလာရေကား ( SFP999C ) စွာ ၆၉ နှစ်မြောက်
စကာင်္ပူ - ကိုးရီးယား သံအမတ် မစ်စတာဂျောင်ဆောင်အဲလ် ( Mr.Jong Song Rol ) မွီးနိန့်ပွဲသို့
အချိန်မှီရောက်အောင် မိုင်နှုန်းကို အမြင့်ဆုံးတင်ပနာ ပြေးလမ်းမထက်မှာ ပန်းဝင်ဖို့ ကြိုးစားနိန်ခရေ။ နု နံဘေးက
ခရစ်စတီးနား ( MS Christina ) က နာရီကို ငုံ့တစ်ကြည့်ကြည့်နန့်။ အိုင်ဖုန်းထဲက လမ်းညွှန်ကိုကြည့်ပနာ ကားသမား
ဂျိုးလီ ( Mr.Joeli ) ကိုလည်းတတွတ်တွတ်နန့်ပြောနိန်ရသိမ့်ရေ။ “ ငါရို့တော့ခါ ကကောင်းနောက်ကျနိန်ယာ“
ဆိုစွာကို တရုတ်ပိုင် ပြောလိုက် အင်္ဂလိပ်ပိုင်ပြောလိုက်နန့် ခရစ်စ်တစ်ယောက် စိတ်မွန်းကျပ်နိန်ပုံရယင့်။ နု
ကတော့ကေ ကိစ္စမဟိ ။ ယင်းသူရို့နန့် သိစွာလေ့မဟုတ်လို့ ကကောင်းမျက်နှာပူဖို့မလို။ ခရစ်စ်ခေါ်လို့
လိုက်လာခရရေ သူစိမ်း တစ်ယောက် ဖြစ်နိန်လို့ အနိန်အထိုင်မသေ ကျုံ့နိန်ဖို့လားဆိုစွာကိုရာ စိတ်ထဲမှာ
တတိတ်ချေ စိုးရိမ်မိရေ ။
“ အိုကေ အရှိက လမ်းက ဂျိုးချိုင်းယက်လမ်းသွယ် ( Joo Chiat Lane ) “ လို့ ခရစ်စ်က ပြောလိုက်တေအခါ
မကြာခင်မိနစ်ပိုင်းမှာ ကိုးရီးယားသံအမတ် အိမ်တော်ထဲကိုရောက်ဖို့ယာလို့ နု သိလိုက်တေ။ ဂျိုးလီက ကားကို
အိမ်ရှိတစ်ခုမှာ ထိုးရပ်ပစ်လိုက်တေအခါ

( No.60 Joo Chiat Lane ) ဆိုရေစာလုံးကို အိမ်အ၀င်ဝ

မုခ်ဘေးမှာ ချိတ်ဆွဲထားစွာကိုတွိလိုက်ရလို့ အေအိမ်ဗျာယ်ဆိုစွာသိလိုက်ပါယင့်။ နုရို့သုံးယောက်
ကားထက်ကဆင်းလာကတ် တေအခါ အာဂန္တုတိကိုကြိုဖို့လူတစ်ယောက်ကလွဲလို့ အပြင်မှာမဟိကတ်ယာ။
နောက်ကျနိန်ခစွာအတွက် “မျက်နှာပူလိုက်တေ” လို့ ခရစ်စ်က နု ကိုအသာချေကပ်ပြောပနာ အရှိကဦးဆောင်ဗျာယ်
ဝင်လားရေအခါ နု နန့် ဂျိုးလီက နောက်ကလိုက်လားကတ်တေ ။
အိမ်တန်းခါးမကြီးကိုဟရုံချေ ဟလိုက်စွာနန့် ငြိမ့်ညောင်းညင်သာရေသံစိုင်ချေတစ်ခု တတိုး ညှညှင်း ထွက်နိန်ရေစွာကို
အယင်ဆုံး ကြားလိုက်ရရေ ။ အ၀င်ဝကနိန်ပနာ အာဂန္တုခန်းမထဲကို လှည့်ဝင်လိုက်ကတ်တေအခါ လူတစ်ယောက်
တေးချင်းတစ်ပုဒ်ကို ဆိုနိန်ပနာ သူ့တေးချင်းထဲမှာအားလုံး နနစ် ပပစ်မြုပ်ဝင်နိန်ကတ်ပုံရရေ ။
နောက်ကျနိန်ရေသူတိဖြစ်လို့ ဘေးဘီ ၀ဲယာကို ကကောင်းအကဲ မခတ်ဝံ့သိမ့်ပဲ တေးချင်းဆိုနိန်ရေသူပါးသို့ မျက်နှာကို
ရွှိကြည့်လိုက်တေအခါ နု ကြက်သီ သီလားခရေ။ ဘုရားသခင်! သူ,ယင်းသူမှ ယင်းသူစစစ်။ နု အံ့သြသင့်အားကြီးလို့
သူတေးချင်းဆိုနိန်စွာကို ကြောင်တောင်တောင်ပုံစံနန့် ငေးကြည့်နိန်မိရေ။ ကိုးရီးယားရိုးရာဝတ်စုံ ၀တ်ထားရေ

,မေချေတစ်ယောက် အအေး(အီး)လာကမ်းပီးရေအခါ “ နု , ယူလိုက်ပန “ ဆိုရေသဘောနန့် ခရစ်စ်က နု
တန်းတောင်ဆစ်ကို မသိမသာချေ တွန်းပစ်လိုက်တေအခါမှ နု ကြောင်နိန်စွာက ဖျတ်ကနဲအသိဝင်လာရေ။ နု
ရှက်စိတ် မွှ,မွှန်ချေနန့် လောင်ဗန်းထဲက တတည့်ကျရေခွက်တစ်ခွက်ကိုကောက်ယူလိုက်ပနာ သူ့ကိုလေ့ လှမ်းကြည့်
မိရေအခါ နု အနိန်အထားကို သူနားလည်ရေပိုင် အပြုံးတစ်စချေနန့် တေးချင်းဆိုနိန်ယင်းက တုန့်ပြန်လိုက်လို့ တစ်ချို့
နောက်ကိုတောင် လှည့်ကြည့် လိုက်ကတ် သိမ့်ရေ ။ သူဆိုနိန်ရေတေးချင်းက ဇာတေးချင်းဆိုစွာ နု မသိ ။
တတိုးတတိတ်နန့် ငြငြိမ့် ညညောင်းချေထွက်ပေါ်နိန်ရေ ကန်းထရီး စတိုင်အင်္ဂလိပ်တေးချင်းက ရင်ထဲကို အအေး(အီး)
ချချမ်း စီးဆင်းလားကတ်တေလို့ နု ခံစားရစွာတော့ခါအမှန်ပါရာ။ တေးချင်းတစ်ပုဒ်ကို အေလောက်ပပိုင် နနိုင်
ဆိုနိုင်ရေသူ့ကို ချီးကျူးမိပါယင့်။ တစ်ဆက်တည်းမှာ သူစွာ ဇာပိုင်လူတစ်ယောက်လဲ ၊ သူဇာလုပ်လဲဆိုရေ သိချင်စိတ်
တိက နု အတွင်းစိတ်မှာ ယောက်ယက်ခတ်နိန်ကတ်ပြန်ရေ ။
သခွါးမသီးအရောင် ရှပ်အင်းကျီလက်ရှည်နန့် စတိုင်ဘောင်းဘီအမဲရောင်ကို
တွဲဝတ်ထားရေ သူ့ပုံစံက ၀င်းဖန့်ကျော့ရှင်းပနာ

ကကောင်း ကြည့်လို့ကောင်းရေ ယောကျာင်္းတစ်ယောက်ဆိုစွာ နု

စိတ်ထဲမှာရရိုးသသားဝန်ခံ ပစ်လိုက်တေ။ တေးချင်းဆိုကေ တစ်ကြောင်းဆုံးအောင်မရရေ နု က သူနန့်
ဝါသနာတစ်ခုတော့ခါ လွဲလားခဗျာယ်လို့ မဆီမဆိုင်အတွေးဝင် ပစ်လိုက်သိမ့်ယင့်။ လက်ခုပ်သံတိ ခအုပ်
အုပ်ထွက်လာရေအခါမှရာ သူ တေးချင်းဆိုစွာ ပြီးလားဗျာယ်လို့ အသိဝင်လာပြန်ရေ။ သူ ဆိုလို့ပြီးရေအခါ
ကိုးရီးယားလူကြီးတစ်ယောက်က သူ့ပါးက မိုက်ကိုယူပနာ စက်ထဲမှာ အသင့်ထည့်ထားရေ တီးလုံးနန့်
ကိုးရီးယားခေတ် ဟောင်းလို့ထင်ရရေ တေးချင်းတစ်ပုဒ် ကိုဆိုဖို့ တီးလုံးအ၀င်ကို စောင့်နိန်ယင့်။
တေးချင်းဆိုလို့ပြီးလားရေအခါ သူ ဇာလုပ်ဖို့လဲ ၊ သူ ဇာသူတိနန့် ဇာပိုင်ဆက်ဆံရေးတိ
ဟိကတ်ဖို့လဲဆိုစွာကိုတွေးပနာ နု တတိတ်ချေ ရင်ခုန်နိန်မိပြန်ရေ။

အအေး(အီး)နန့် ၀ိုင်မျိုးစုံတင်ထားရေ ကောင်တာသို့ သူအယင်ဆုံးလျှောက်လားလိုက်ပနာ
ဝိုင်တစ်ခွက်ကိုလှမ်းယူလိုက်တေလို့ နု ထင်ရေ။ သသေ ချချာမကြည့်ဝံ့လို့ ဖျတ်ကနဲတစ်ချက်ချေခိုးကြည့်ပနာ
မျက်လွှာကိုချဖို့ ပျင်ရုံရာဟိသိမ့်ရေ သူ့အပြုံးစ, စချေတိနန့် နု ပါးကို တတည့် မမတ်လျှောက်လာနိန်ရေအတွက် နု
အိုးတိုးအန့်တန့်နန့် ပြန်ပြုံးပြ လိုက်တေ။ပါးစပ်ကတစ်ခုလေ့သော့မပြောသိမ့်ပဲ လက်ထဲက၀ိုင်ခွက်ကို
သူကအယင်မြှောက်လိုက်ပနာ နု မြှောက်လာဖို့ကို စောင့်နိန်ရေအတွက် နု လက်ထဲကခွက်ကို သူနန့်အမြင့်
တတူတူလောက်အထိ လိုက်မြှောက်ပစ် လိုက်တေအခါ စပျစ်ဝိုင်နှစ်ခွက် နခမ်းအနားသားချင်း ထိပစ်လိုက်ကတ်တေ
အသံတစ်ခု နုရို့ ကြားရုံချေ ထိုးဖောက် ထွက်လာခယင့်။ နု ရင်ထဲမှာ အေး(အီး)မြညင်သာရေမြစ်တစ်စင်း
နှလုံးသားတည်နိန်ရာ တတည့်က ဖြတ်ထွင်းစီးဆင်း လားခရေ။ ခွက်ချင်းတေ့ထားရေ နိန်ရာက
သူ့လက်ကိုပြန်ရုပ်ပနာ သောက်ကတ်မေဆိုရေဟန်နန့် ခွက်ကိုမေးစောင်းထိုးပြပြီးကေ မျက်နှာကိုစိကေချေ
မော့လိုက်တေ။ စပျစ်ဝိုင်ကို သူ့နခမ်းဝနားရောက်ခါမှ တစ်ဝက်လောက်သို့ ပြန်ချပနာ……..
“ တွိရစွာဝမ်းသာပါရေ နု “ လတ်။
ယင်းစကားတစ်ခွန်းကိုပြောပြီးကေ ခွက်ထဲက ၀ိုင်တစ်ကျိုက်လောက်ကို သူမော့သောက်ပစ်လိုက်တေ။ နခမ်းပေါက်ဝ
တတည့်တည့်မှာ သောက်ချလိုက်ဖို့ပျင်နိန်ရေ ၀ိုင်ကိုအရှိန်သတ်ပနာ နု သူ့ကိုတအံ့တသြ မော့ကြည့်မိရေ။ နု
နားကြားမှားလားခစွာလား။ ကိုယ့်ကိုကိုယ် နဝေတိမ်တောင်ဖြစ်နိန်စိုင်မှာပင်………..
“ နု ကို ကိုယ်သိနိန်လို့ အံ့သြနိန်စွာလား၊ ယင်းနိန့် က ကိုယ်အမှတ်မထင်ကြားလိုက်ခလို့ပါ “ …………
ဘုရားသခင် ! ။ နု စိတ်ထဲက ရွတ်ပစ်လိုက်မိရေ ။ ယင်းနိန့်ကဆိုကေ သူအစစ် မှန်ရေပ ။ယင်းနိန့်ကို သူလေ့ မှတ်မိ
နိန်ရေပ ။ …………………။

“ ယေကေ ရခိုင်တစ်ယောက် ဟုတ် , ဟုတ်ပါလား “

နု မယုံဝံ့ ယုံဝံ့နန့် သူ့ကို ထထစ် အ အ လှမ်းမိန်းလိုက်တေ ။
“ ကိုယ် ရခိုင်တစ်ယောက်ဖြစ်နိန်စွာ နု အတွက် အေလောက်အံ့သြစရာ ကောင်းနိန်လား ? “
ဟုတ်တေဆိုရေ အဓိပွါယ်နန့် နု သူ့ကိုပြုံးပြနိန်လိုက်တေအခါ သူကလေ့ နုကိုပြန်ပြုံးပြရေ ။

“ နု ၀တ်လာရေ၀တ်စုံနန့် ကကောင်းလိုက်ပါရေ “
လို့ သူက ကောက်ကာ ငင်ကာ ထပြောရေအခါ နု ဇာပြန်ပြော ရဖို့မှန်းမသိပဲ ခရှက် ရှက်ချေဖြစ်မိသိမ့်ယင့် ။
“ အမှန်အတိုင်းပြောစွာပါ နု ကိုယ့်ရိုးရာဒီဇိုင်းကို အေပိုင်အိုင်ဒီယာ ကကောင်းချေနန့် အေနိန့်ဝတ်လာခစွာ
ဂုဏ်ယူပါရေ “

သူ ပြောလိုက်တေ ယင်းစကားလုံးတိထဲမှာ အဓိပွါယ်တိ အများကြီးပါရေဆိုစွာ နု သိလိုက်တေ ။ ဇာဖြစ်လို့လေ့ဆိုကေ
အိမ်တော်ထဲက မ, မတိ

အကြီး အငယ်မရွီး အားလုံးသူစွာ သူရို့ကိုးရီးယား ရိုးရာအ၀တ်အစားကို ၀တ်ထား ကတ်

လို့ပင်ဖြစ်တေ ။ ဂုမှရာ နု ကိုယ်ဝတ်လာ ခစွာကို ပြန်သတိပြုမိရေ ။ အနက်အောက်ခံမှာ အနီရောင်ချိတ်တိနန့် ဒီဇိုင်း
ဆဆန်းချေထိုးထားရေ ရခိုင်ရိုးရာအဆင်ကို စကပ်နန့်တွဲပနာ လက်အတိုချေကို အပ်ခြည်ကြောင်းတိနန့် ပန်းပွင့်ချေ
ပုံစံချုံ့ခြုပ်ထားရေ မရိုးမဆန်းပွဲတက်ဝမ်းဆက်အဖြစ် နု ၀တ်ထားစွာပါ ။လိုင်ပင်း မှာ ပုလဲပုတီးချေတစ်ကုံးကိုဆွဲထား
ပနာ

လေဒီရှူးအနက်ရောင်ဒေါက်မြင့်ဖိနပ်ကို စီးထားရေအခါ ပြောင်ဝင်းနိန်ရေအသားနန့် ယယဉ် ချေ လိုက်ဖက်နိန်

ရေ နု စွာ လူမျိုးခြားတစ်ယောက်အနိန်နန့် တစ်မျိုးကြည့်လို့ကောင်းနိန်လီဖို့ ။ နု ၀တ်လာစွာကို မြင်, မြင်ချင်း
ခရစ်စ်က........
“ နု နင် ကကောင်းလှရေ ၊ အေစွာနင်ရို့ ရိုးရာအဆင်လားလို့ “
မိန်းခစွာကို သတိရလိုက်သိမ့်ရေအခါ နု ၀မ်းသာကြေနပ်မှုအပြည့်နန့် ကိုယ့်စွာကို ပြုံးမိပနာ သူ့ကို စစောင်းချေ
လှည့်ကြည့်လိုက်တေ ။ အိုး ,သူ နန့် နု မျက်လုံးချင်း ဆိုင်မိပြန်ရေကား။ နု ခွက်ထဲက စပျစ်ဝိုင်ကို သောက်ဖို့ရည်ရွယ်
ချက် နန့်မဟုတ်ပဲ ကယောင်ကတမ်း မော့ချလိုက်တေအခါ စပျစ်နံ့နန့်ရောနိန်ရေ ၀ိုင်နံ့ မွှ မွှီးချေတိ ရင်ထဲကို ဖိန်းတိန်း
တိန်း ရှိန်းတိန်းတိန်း စီးဆင်းလားခရေ ။
“ နု နင်ရို့က အသိတိလားလို့ “
ခရစ်စ်က မိန်းလာရေအခါ နု ဇာပြန်ပြောရဖို့မှန်းမသိပဲ ကြောင်အမ်း အမ်းချေဖြစ်နိန်စိုင်မှာ…….
“ ကျွန်တော်ရို့က ငယ်သူငယ်ချင်းတိ ဂုမှပြန်တွိကတ်စွာ “
လို့ကြားဖြတ်ပြောပနာ သူ့အေကနာမည်က “ Royl “ ဖြစ်ပနာ မြန်မာပြည်ကနာမည်က “ အောင်မြတ်လင်း “ လတ် ။
ရွိုင် နန့် အောင်မြတ်လင်း။ ယင်း နာမည်နှစ်ခုကို မိန့်ကျလားဖို့ကြောက်တေသူပိုင် နု တစ်ချက်ချေအတွင်း
အခေါက်တိမနည်း စိတ်ထဲက နိန်ပနာရွတ်နိန်စိုင်မှာ ခရစ်စ်နန့် သူ စကားလက်ဆုံကျလားခကတ်တေ။
အင်္ဂလိပ်စကားကို လီယူလီသိမ်းကောင်းကောင်းနန့် ပပိုင် နနိုင်ပြောနိန်ရေ သူ့ပုံစံကိုကြည့်ပနာ နု သဘောကျမိရေပိုင်
အထင်ကြီးစိတ်လေ့ဖြစ်မိပြန်ရေ။ အရှိက တေးခင်းဆိုနိန်ရေ သူရို့အစီအစဉ်ပြီးလားခဗျာယ်ဟိဖို့ လှုပ်စိ လှုပ်စိနန့်
အသံ ဗလံတိထွက်လာပနာ အစားအသောက် အစီအစိုင်ဖက်ကို အာရုံပြောင်းကုန် ကတ်တေအတွက် တချို့ကအစား
အသောက်ခန်းမမှာ လားတန်းစီနိန်ကတ်တေပိုင် တချို့ကလေ့ အချင်းချင်းလက်ဆွဲနှုတ်ဆက် စကားစမြည်ပြော
နိန်ကတ်တေ။
“ ဟိုင်း မစ္စတာ ရွိုင် “
လို့ဆိုပနာ လက်ဆွဲနှုတ်ဆက်လာကတ်တေသူတိ လေးငါးယောက်ထက်မကလို့ နု အလိုက်တသိ သူ့နံပါးက ခ,
ခွါခွါချေ နောက်ဆုတ်ပီး ရေအခါ သူက ကိုယ်ကိုစိကေချေယို့ပနာ “ နု အိတ်က်စ်ကျုစ်မီ “ လို့ပြောလိုက်သိမ့်ရေ ။
ခရစ်စ်နန့်ဂျိုးလီကလည်း သူရို့အသိတိနန့် တွိပနာ နှုတ်ဆက်နိန်ကတ်သိမ့်လို့ယင်းတစ်ချက်ချေမှာတော့ခါ နု
တစ်ယောက်တည်း ကြောင်အမ်း အမ်းချေဖြစ်နိန်ခယင့်။ ခုနစ်မိနစ်လောက်ကြာရေအခါ …….
“ နု ကိုယ်ရို့ဘူဖေး တန်းစီဖို့လားကတ်မေ “
ဆိုစွာကို အင်္ဂလိပ်ပိုင် တတိုးချေ ကပ်ပြောပနာ အရှိကထွက်လားခလို့ နု သူ့နောက်က လိုက်ပါလားလိုက်တေ ။ နုရို့
တန်းစီရုံယာဟိသိမ့်ရေ ဂျိူးလီနန့် ခရစ်စ်က တစ်ပွဲတောင်ကုန်ခါနီးယာ ။
“ နု ကြိုက်စွာ အားလုံးယူစားပါ “

လို့ သူက နု နောက်သို့လှည့်ပနာ ပြောလိုက်သိမ့်ရေ။ တီဗွီဇာတ်လမ်းထဲမှာ မြင်ဖူးသမျှ ကိုးရီးအစားအစာတိနန့်
မမြင်ဖူးသိမ့်ရေ အစားအစာတိလည်းအစုံ ဆိုမှ အစုံ။ အမျိုးအမည်တစ်ခုချင်းစီအလိုက် စာကပ်ထားပနာ နာမည်
တစ်ခုကိုတော့ခါ စာမကပ်ပဲထား,ထားလို့ ယင်းနားကိုရောက်တေအခါ သူက နုကို လှည့်ပနာ မိန်းခွန်း ထုတ်လိုက်
သိမ့်ရေ။

“နု အေချင့်ဇာလဲ သိရေမဟုတပ
်ါလား “ …
သူ့ပုံစံက ရယ်ကျဲကျဲချေနန့်။ တစ်ချက်ချေမှာ နု ကြောင်လားခရေ ။ ယေကေလေ့ နု ချက်ချင်းသိလိုက်နိုင်ပါယင့်။
………………………။

“ သိပါရေ အေချင့် ဂင်ချီ “
ဂေါ်ဖီထုပ်တိနန့်လုပ်ထားရေ ကိုးရီးယားရို့ အသည်းစွဲ ဂင်ချီ တစ်မျိူးတည်းကို နာမည်မရေးပဲထား, ထားစွာပါ ။ နု
အဖြေ တတည့်ကျလို့ သူက နု တော်လိုက်တေဆိုရေ အဓိပွါယ်နန့် လက်မထောင်ပြသိမ့်ရေ ။ အပျော်လှိုင်းတိ နု
ရင်ထဲသို့ ပပူ နနွီးဆင်းနိန်ကတ်စွာမနား။ ထိုင်ဖို့နိန်ရာလို့ သီးသန့်ချထားစွာမဟိရေအတွက် ဟွေတစ်စု အေတစ်စု
မတ်တပ်ရပ်ပနာ စားနိန်ကတ်ရရေစွာကပင် တစ်မျိုးချေ စိတ်လှုပ်ရှားဖို့ ကောင်းနိန်ပြန်သိမ့်ရေ။ စားဖူးသမျှညစာတိ မှာ
နု အတွက်အေနိန့်ညစာက ပိုပနာအရသာ ဟိနိန်သယောင် ။

နု , ပြန်ဖို့စွာအဆင်ပြေပါလား ၊ ကိုယ် လိုက်ပို့လို့ရပါလား “

ဖရဲသီးတစ်စိတ်ကို ခက်ရင်းနန့်ထိုးဆွယင်း သူက နု ပြန်ပြောဖို့စွာကို စောင့်နိန်ပုံရရေ ။ အယ်… နု ဇာပိုင်ပြန်ပြော
ရဖို့လေ့မသိ အကျပ်ရိုက်လားခရေ။ ခရစ်စ်ရို့နန့်လည်းမတိုင်ပင်ရသိမ့်။ အမှန်တော့ခါ ခရစ်စ်နန့်ဂျိုးလီက ခရမ်း
ရောင်လမ်းကြောင်းမှာ နိန်ရေသူတိဖြစ်လို့ သူရို့ နှစ်ယောက်က လမ်းကြောင်းတစ်ကြောင်းတည်း ။ အနီရောင်
လမ်းကြောင်းမှာ နိန်ရေ နုအတွက်တော့ခါ သူရို့နန့်တစ်ခြားစီ။ ယေပြီးကေ သူ့ကိုက ဂုမှရာ သိကျွမ်းရသိမ့်ရေ
သူစိမ်းတစ်ယောက် ။
“ ကကောင်းစိုင်းစားနိန်ပါကား ကိုယ့်ကိုယ်မယုံလို့တော့ခါ မဟုတ်လောက်ပါနန့် “
ရယ် ကျဲကျဲချေပုံစံနန့် သူက နုကို ထပ်ပြောပြန်သိမ့်ရေ ။ ယေမှာပင် ခရစ်စ်က နံပါးကိုရောက်လာပနာ……….,
“ နု , ငါရို့လားဖို့ယာ၊ တစ်ခါတည်းလိုက်ခဖို့လား၊ အဂုမှပြန်တွိရရေ သူငယ်ချင်းနန့် စကားပြောကျန်ခဖို့လား “
ဆိုစွာကိုမိန်းရေအထိ နု ဇဝေဇ၀ါဖြစ်နိန်တုန်းသိမ့်။ အမှန်တော့ခါ နု မသိစိတ်ထဲမှာ သူနန့် တတူ တူ ပြန်ချင်ရေလို့
ပြောလိုက်စွာက အကြိမ်ထောင်သောင်းမကယာ။ သိစိတ်မှာက နု ဆင်ခြင်တုံတရားနန့် နု သိက္ခာကို ထိန်းကွပ်
ပီးနိန်ရစွာ ။
“ ငါက ပြောရာပြောနိန်ရစွာ၊ မစ္စတာရွိုင်က နု ကို ကကောင်းလိုက်ပို့ချင်နိန်ပုံရရေ, မဟုတ်ကေ
ငါရို့အလိုက်မသိဖြစ်နိန်ဖို့သိမ့်“

လို့ဆိုစွာကို ခရစ်စ်က စရေ နောက်ရေပိုင်ပြောပနာ သူ့အတွက်လမ်းကြောင်းထပ်ဖွင့်ပီးလိုက်တေအခါ သူ့မျက်နှာမှာ
အပျော်ရိပ်ချေတစ်ခု မသိလိုက် မသိသာ ဖြတ်ပြီးလားခစွာကို နု ဖမ်းယူလိုက်နိုင်ရေ ။ခရစ်စ်က သူပြောထားရေအတိုင်း
နု ရို့ အမှန်ပင် ငယ်သူငယ်ချင်းတိထင်လို့ အေပိုင်လမ်းကြောင်းဖွင့်ပီးခစွာဖြစ်ပါဖို့ ။
ခရစ်စ်နန့်ဂျိုးလီရို့ထွက်လားခကတ်တေအခါ အိမ်တော်ထဲမှာက နု နန့် သူ အပါအ၀င် အားလုံးဆယ်ယောက်
ကျကျော် လောက်ရာဟိယာဖြစ်တေအတွက် ပြန်ကတ်ဖို့ယာဆိုပနာ သူက သံအမတ်ကြီးနန့် တစ်ယောက်ချင်းစီကို
လိုက်နှုတ်ဆက်နိန်ရေ။ အားလုံးက နု ကို တစေ့(စိ)တစောင်းအကဲ ခတ်နိန်ကတ်တေအခါ သူက ခရစ်စ်နန့်ဂျိုးလီကို
မိတ်ဆက်ပီးခရေပိုင် ငယ်သူငယ်ချင်းတိ ဂုမှပြန်တွိကတ်တေဆိုစွာနန့်ု သူ သိထားရေအတိုင်း “ နု “ နာမည်တစ်လုံး
တည်းကို မိတ်ဆက်ပီးရေအခါ အားလုံးက “ နု “ လို့ မပီ တပီလိုက်ဆိုကြည့်ပနာ ရယ်နိန်ကတ်သိမ့်ယင့် ။
သူနန့်တတူပြန်ဖို့ အိမ်ရှိကို ထွက်လာကတ်တေအခါ စစောကထက် နု စကေချေ မသိမသာတုန်လှုပ်နိန်ခရေ။ ဂုမှသိရေ
သူစိမ်း ယောင်္ကျား တစ်ယောက်နန့်ညည့်ခါသား ကိုးနာရီလောက်မှာ တတူတူ ပြန်သင့်ပါယင့်လား။
အေပိုင်လိုက်ဖြစ်ဖို့အထိ တွန်းအားပီးခရေ အခြေအနိန်တိအရလေ့ နု သူနန့်မလိုက်ဖြစ်ဖို့ ငြင်းခွင့်မဟိခရေပိုင်
ငြင်းလေ့မငြင်းချင်ခ ။

နောက်ဆုံးတော့ခါ သူ့ကိုအကောင်းဖက်က ဖြည့်တွေး(တွီး) ပနာ နု သူ့ကားနောက်တန်းခါး

ဘယ်ဖက်ပေါက်က ၀င်ဖို့ရပ်နိန်ရေအခါ သူနန့်တတူတူ အရှိကခုံမှာထိုင်ဖို့ တန်းခါးလာဖွင့်ပီးလို့ နု ကယောင်
တောင်တမ်း ၀င်ထိုင်လိုက်ရပြန်သိမ့်ရေ။ မျှော်လင့်မထားပဲ ထိုင်ခုံခါးပတ် ကိုနုခေါင်းထက်က ကျော့ယူပနာ
ပတ်ပီးရေအခါ သူ့ကိုယ်သင်းနံ့ မွှမွှီးချေတိကို နု မမိန့် မမူးရှူပစ်လိုက်မိခရေလား….. ။

အခန်း ( ၄ )

“လြီပီတစ်ချက် ညင်သာတိုက်ခတ်
အပြုံးစနန့် လီမှာလွင့်မျော
ပျော်ဖူးကတ်တေ “

“ အောင် “ လို့ သူ့နာမည်ကို အဖျားဆွတ်ပနာ ခေါ်ခွင့်ရရေလူတစ်ယောက်ဘ၀ထဲသို့ နု နနက် ရှရှိုင်းနန့်
တစိမ့်စိမ့်တိုးဝင်နိန်မိရေအခါ သူ့ပါးမှာဟိနိန်ရေ ဆန်းကြယ်မှုရို့ကို စိတ်လှုပ်ရှားမှုတိနန့် နု ဖတ်နိန်တတ်ခရေ ။ သူစွာ
ထူးချွန်ထက်မြက်ပနာ စိတ်သဘောထား မြင့်မြတ်ပြီးကေ နူးညံ့သိမ်မွိမ့်သူ တစ်ယောက်လည်းဖြစ်ယင့်။ ဖဖော်ရရွေ
နိန်တတ်ပနာ တစ်ဖက်သားကို ကကောင်းနားလည် သည်းခံ တတ်သူလေ့ ဖြစ်တေဆိုစွာကို တစ်ဖြည်းဖြည်းနန့် နု
သိလာခရရေ ။ ယေကေလေ့ တတ်နိုင်သလောက် သသီးသသန့်နိန်တတ်တေ သူ့စရိုက်ချေတစ်ခုကို သတိပြုမိရေပိုင်
စကားလုံးတိနန့် နု ပြောပြဖို့မတတ်တေခံစားချက်တစ်ခု သူ့ရင်ထဲမှာ ကိန်းအောင်း နိန်ကတ်တေလို့ နု ခံစားမိပြန်
သိမ့်ရေ ။ စင်္ကာပူ ရုံးခွဲတစ်ခုဖြစ်တေ “ The Kids First Fund “ ဆိုရေ ကမ္ဘာတစ်ဝန်းက , ကလေးသူငယ်
ပြုစုစောင့်ရှောက်ရေးအဖွဲ့အစည်းတစ်ခုမှာ နည်းဗျူဟာစီစစ်ရေးနန့် စီမံကိန်းရေးဆွဲရေးဌါနက ( Strategic Analysis
and Planning Department) မန်နေဂျာတစ်ယောက်အနိန်နန့် လုပ်ကိုင်နိုင်ရေ သူ့စွမ်းရည်ကို နု လေးစား
အားကျမိပါယင့်။ နု သိထားသလောက် သူ့အကြောင်းတိကို ပြန်တွေး(တွီး)ပနာ သူနန့်တတူတူ သီးသန့် ဘွတ်ကင်
ယူထားရေအခန်းတစ်ခန်းမှာ လူတစ်ယောက်ကို စောင့်နိန်ခကတ်တေ ။ တန်းခါးလက်ကိုင်ကို တွန်းဖွင့်ပနာ ၀င်လာရေ
အသံကြောင့် လှည့်ကြည့်လိုက်တေအခါ နု ကကောင်း အံ့သြသင့်လားခစွာမနား ။

ဘုန်းကြီးတစ်ပါးနန့် ဘုန်းကြီးအသိမိတ်ဆွေလို့ထင်ရရေ လူတစ်ယောက်ဝင်လာစွာကို တွိရေအခါ နု
ခကြောင်ကြောင်ချေ ငေးပနာ ကြည့်နိန်မိရေ။ အောင်က နု ကို တစ်ခုလေ့သော ကြိုမပြောထားခရေအတွက် နု
ကြောင်တောင်တောင်ဖြစ်နိန်စွာကိုကြည့်ပနာ သဘောကျနိန်ပုံရယင့် ။ ဘုန်းကြီးက ၀င်လာ,လာချင်း နုရို့
နှစ်ယောက်ကို အကဲခတ်နိန်လိုက်ပနာ “ ယာ ဇာပိုင်လဲဒကာ အေတစ်ခါ တိုးတက်နိန်ယာဟန်“ လို့ အရိုးခံ
အတိုင်းဆိုင်းမဆင့် ဗုံမဆင့် ပြောချပစ်လိုက်ရေအခါ ရှက်(ဟြက်)စိတ်နန့် နု မျက်နှာ တတွတ် ရဲနိန်ခ လီဖို့။
မသိမသာချေ “ အောင့် “ ကိုလှမ်းကြည့်လိုက်တေအခါ သူ့မျက်နှာမှာ ကြည်နူးရိပ်တိသမ်းပနာ အပြုံးရိပ်ချေတိ
ကြေကြေ နပ်နပ် ဖိတ်ကျနိန်စွာကို တွိလိုက်ရရေ။
“ နု ၊ ဆရာတော်ဘွဲ့နာမည်က ဦးခေမာစာရ ။ ကျောက်ဖြူမြို့နယ်ထဲကမင်းပြင်ရွာမှာ ကျောင်းစားနိန်ရေ “
ဆရာတော်ဘွဲ့နာမည်နန့် အောင်က နု ကို မိတ်ဆက် ပီးရေအထိ သူရို့ဇာလုပ်နိန်ကတ်တေဆိုစွာ နု မသိသိမ့် ။
တစ်ဖြည်းဖြည်းနန့် သူရို့ ပြောဆိုဆွေးနွီးနိန်ကတ်တေ အကြောင်းအရာတိကို ချိတ်ဆက်မိလာရေအခါ အကြောင်း
အရာတစ်ခုကို နု ကောက်ကြောင်းဆွဲ လိုက်နိုင်ခရေ။ အလယ်တန်းကျောင်းအထိဟိရေ မင်းပြင်ရွာမှာ ကျောင်းလာ
တက်ကတ်တေဆင်းရဲနွမ်းပါး အချေသူငယ်တိနန့် မိဘမဟိရေ အချေသူငယ်တိကို ပြုစုပျိုးထောင်ပီးနိန်ရေ
ဆရာတော်တစ်ပါးပင်ဖြစ်တေ။ ဆရာတော် ပြုစုပျိုးထောင်ထားရေမိဘမဲ့ အချေသူငယ်တိထဲက “ မောင်မြင့်ထန
ွ်း “
ဆိုရေအချေက ပညာထူးချွန်ပနာ ဆယ်တန်းအောင်လို့ ဆီးကျောင်းဝင်ရေအခါ ပေသာမဟိလို့
ကျောင်းဆက်မတက်နိုင်ရေအခြေအနိန်နန့်ကြုံခရရေ။ ဆရာတော်လေ့ အလှုရှင်တိကို နည်းအမျိုးမျိုးနန့် ရှာ(ဟြာ)ဖွီ
စုံစမ်းယင်း “ အောင် “ နန့် ဆက်သွယ်မိခကတ် စွာနန့်တူယင့်။ မောင်မြင့်ထွန်း ပညာသင်စရိတ် လေးဆယ်
ရာခိုင်နှုန်းလောက်ကို အောင်က ထောက်ပံ့ပီး နိန်ရေဆိုစွာ သိလိုက်ရရေအခါ နုရင်ထဲမှာ ၀မ်းသာဝမ်းနည်းဖြစ်မိစွာကို
တစ်ပြိုင်နက်တည်းခံစားလိုက်ရရေ။ သူ့ကို အထင်ကြီး လေးစားမိရေစိတ်တိ တစ်ဗွိဗွိပေါ်လာပနာ ဇာကြောင့်မှန်းမသိ
သူ့ကိုကြည့်ပြီးကေ ဆဆွေးမြမြေ့ချေခံစားလာရပိုင်လည်းတွိရေ။ ပုံပြင်ချေတစ်ပုဒ်ပိုင် နု သိနိန်ခရေအဖြစ်မှန်ချေ
တစ်ခုကိုလည်း တတိုက်ဆဆိုင် အတွက်ပေါ်လိုက်ပနာ “ ယင်း ဟန်ထူးဆိုရေ ကလေ့ချေ “ ကို နု သနား
လိုက်မိပြန်သိမ့်ရေ။ နု ကြားခပုံအရဆိုကေ ယင်းကလေချေဟန်ထူးလေ့ မိကောင်းဖကောင်းနန့်တွိလို့ ပျပျော်
ရွှရွငဟ
်ိနိန်လီဖို့ရာမတောင်လို့ ဖြေတွေး(တွီး)ပနာ စိတ်မကောင်းစွာကို အတင်းဖျောက်ပစ်လိုက်ရသိမ့်ယင့် ။
ဆရာတော်နန့် ကိစ၀
္စိစ္စတိပြီးရေအခါ နု ရို့နှစ်ယောက် ဘုတ်ကီးက

( Boat Quay ) “ L Opertta “

သို့ရောက်လာကတ်တေ။ ရာသီဥတုကလေ့မိုးအုံ့နိန်ပနာ မမှိုင်းဆဆိုင်းချေ ဖြစ်နိန်စွာကပင် တစ်မျိုးချေ နိန်လို့
ထိုင်လို့ ကောင်းနိန်ခပြန်ရေ။ နိန်လည်း မစောင်းသိမ့်လို့ လူတိနည်းနိန်သိမ့်ရေအခါ တတိုး ငြငြိမ့်ချေ ဖွင့်ထားရေ
တရုတ်တေးချင်းတစ်ပုဒ်ကိုနားထောင်ယင်း သူနန့် တတူတူဟိနိန်ရစွာက ရင်ထဲမှာ သံစိုင်တစ်ပုဒ်ကို အချိုးကျကျ
တီးခတ်နိန်ရရေပိုင် သာယာချမ်းမြေ့စီခရေ။ ပန်းအိုးထဲက အနားတတွန်ု့ချေနန့် ဥကန်းစွန်းပင် ပေါက်စချေတိ
လီထဲမှာသသွယ်တတန်း လွင့်ကျနိန်ကတ်စွာတိ၊ ထင်းတုံးအပိုင်းချေတိကို မပြီတပြီဖြီပနာ ဖရိုဖရဲချထားစွာတိ၊
ပန်းရောင်ရရင့်ချေတိ အဆုပ်လိုက်,အဆုပ်လိုက် ပွင့်နိန်ကတ်တေစွယ်တော်ပင်ပျိုတိကအစ နု အတွက်
ကဗျာဆန်လှပနိန်ကတ်ပြန်ရေ ။
“ ကိုယ် ဆရာတော်နန့်ကိစ္စ ကြိုမပြောထားခရစွာ… “
လို့ဆိုပနာ သူ့စကားကို တစ်ဝက်တစ်ပျက်တန့်ထားလိုက်ပြီးကေ ပဲစိပြုတ်နနူးအအိချေတိကို တူနန့်တစိချင်း
ကောက်စားနိန်ရေ သူ့ကိုကြည့်ပနာ တစ်ခုခုပြောစရာဟိနိန်ရေလားလို့ နု အတွေး(တွီး)၀င်မိလိုက်သိမ့်ရေ။ တစ်ခုခု
ကို ဖွင့်ပြောပြဖို့ အနိန်ကျပ် နိန်လားမသိလို့ စိုင်းစားမိပနာ ……….
“အောင့်ကိုနားလည်ပါရေ ကိစ္စမဟိ“

လို့အဓိပွါယ်ရစွာ ကို သူနန့် နု နှစ်ယောက်တည်းရာ နားလည်ထားရေဘာသာဗေဒပိုင် နု က ခေါင်းကို ဟွေဖက်
အေဖက် စစောင်းချေ ယမ်းပနာ လုပ်ပြရေအခါ သူ က နု လုပ်ပြစွာကို သဘောကျရေပုံစံနန့်တတိတ်ချေ ရယ်နိန်ခရေ

“ ကျေးဇူးတင်ပါရေ နု ၊ တခါတလီ ကိုယ်က ကိုယ့်ကိုယ်ကို အသူမှန်းမသိလည်းဖြစ်တတ်သိမ့်ရေ “
ယင်းပိုင်ပြောပနာ နု ကြိုက်တတ်တေ မှိုဟင်းဖတ် ပျပျော့အအိချေတိကို တယုတယထည့်ပီးနိန်ခယင့် ။

“ နု ကို ကိုယ် တစ်ခုလောက် တောင်းဆိုချင်ပါရေ “
လလေးနနက်ပြောလာခရေ သူ့အမူအယာကိုကြည့်ပနာ ဇာလဲမသိလို့ နု ခတွန့်တွန့်ချေဖြစ်လားမိသိမ့်ရေ ။ ……
“အေနိန့်ဆရာတော်နန့်ကိစ္စကို ကိုယ့်အမိနန့်အဘာကို မသိစီဖို့ပါ “
သူ့ပါးကယင်းစကားလုံးတိကို ကြားရလိုက်တေအခါ နု စိကေချေထက်မက သူ့ကိုအံ့သြသင့်မိရေပုံစံနန့် ဆတ်ကနဲ
ခေါင်းထောင်ကြည့်မိရေအထိ ။ နနွီးထထွီးချစ်ခင်မှုတိနန့် အပြန်အလှန်လေးစားမှုဟိရေ သူနန့်သူ့မိဘရို့ကြားမှာ
အေပိုင်လျို့ဝှက်ချက်တိလေ့ ဟိပါရေလား။ နု အံ့သြသင့်လားခစွာကို သိယင့်နန့်ပင် ယင်းအတွက်သူ့မှာ ရှင်းပြဖို့
စကားလုံးတိ အဆင့်သင့်ဟိနိန်ပုံမရ ။ အမှတ်မထင်ပဲဖြစ်လားခရေ နု တအံ့တသြပုံစံကို ပြန်ထိန်းပနာ

သူ့ကို

အားနာဟန်နန့် ……………………..
“ ဆောရီး အောင်, နု…… “……
နု စကားလုံးတိ မဆုံးသိမ့်ခင် စ, စောချေက နု သူ့ကိုလုပ်ပြခရေပုံစံအတိုင်း သူက “ နု ကိုနားလည်ပါရေ “ ဆိုရေ
အဓိပွါယ်နန့် သူ့ခေါင်းကို ဟွေဖက်အေဖက် စစောင်းချေ လှုပ်ပြရေအခါ နု ရို့နှစ်ယောက်စလုံး တိုင်ပင်မထားပဲ ပြိုင်တူ
အသံထွက်ပနာ လှလှိုက် လှလှဲရယ်ပစ်လိုက်ခကတ်တေ။ အချစ်ဆိုစွာ ချစ်မြတ်နိုးရေသူတစ်ယောက်နန့် တတူတူဟိ
နိန်ရရေအချိန်မှာ သာယာကြည်နူးခြင်းတိနန့် ရင်ခုန်သံချင်းလေ့ကြားနိန်တတ်ပနာ သောကတိအားလုံးကိုပြေပျောက်
စီနိုင်ရေအစွမ်းတိလေ့ အလိုလိုဟိနိန်တတ်ပါရေလားဝေ ။

အခန်း ( ၅ )

“ နာကျင်ခံခက် အသိနက်လေ့
ထားခဒဏ်ရာ

အလွမ်းနွီနန့်

သူ ငိုနိန်လီဖို့လား “

နိန်ရာသစ်တစ်ခုကို မမျှော်လင့်ပဲရောက်လာခရေယင်းညည့်က တတိုက်ဆဆိုင်လကွယ်ရက်ဖြစ်လို့
ပတ်ဝန်းကျင်တစ်ခုလုံး ပိန်းပိတ်အောင်မှောင်ပနာ လင်းဆွဲလို့ထင်ရရေအကောင်တိ နားရွက်နားက ဖြတ်ဗျာယ် တ၀ှီးဝှီး
နန့်ပျံနိန်ကတ်တေအခါ နု နကြောတိ စိမ့်လားခရေအထိ ကြောက်စိတ်ဝင်စပြုလာရေ။ ကြောက်စိတ် ၀င်နိန်ရေ
အာရုံကိုပြောင်းပနာ အခြားရယ်စရာပြုံးစရာချေတိနန့် အစားထိုးကြည့်ကေလေ့ ယင်းကြောက်စိတ်ကို ဖျောက်ပစ်
လိုက်လို့မရ။ လူသူလေးပါးတိတ်ဆိတ်နိန်ရေ ယင်းပိုင်ညည့်မှာမှ နု ဇာကြောင့်အေပိုင်နိန်ရာမှာ အန္တရာယ်ကိုတောင်
မကြောက်ပဲအရဲစွန့်ပနာ တစ်ယောက်တည်းဖြစ်နိန်ရစွာလဲ။ အမှန်တော့ခါ နု အသံတစ်သံကိုကြားလို့ ယင်းအသံရှင်ကို
လိုက်ရှာ(ဟြာ)ယင်းနန့်အေနိန်ရာသို့ရာက်မှန်းမသိရောက်လာလတ်စွာ။ဝမ်းနည်းအားငယ်သံ ပေါက်နိန်ရေ ယင်းအသံ
ရှင်က နု နန့် ၀ီးလားခလိုက် အပြီးကေ ပါးလာပြန်လိုက်နန့် နု သူ့ကိုရှာ(ဟြာ)ရစွာ ကကောင်း ညောင်းလာရေပိင
ု
ကြောက်အားကြီးလို့ဒူးတောင်တုန်လာခယာ။ နောက်ဆုံးရှ(ဟြာ)ကြည့်ရေအနိန်နန့် အရှိသို့ စိကေချေရွိကြည့်လိုက်
မေလို့ဆုံးဖြတ်ပနာ ခြီလှမ်းငါးလှမ်းလောက် တိုးကြည့်လိုက်တေအခါ အရှိဒေါင့်ချိုးနားမှာ မီးဇာကုန်ခါနီးမှန်အိမ်ကို
ကိုင်ထားရေလူတစ်ယောက် ထိုင်နိန်ရေပိုင်အရိပ်တစ်ရိပ်လှမ်းမြင်ရလို့ နု အသာချေတန့်ပနာ အကဲခတ်ကြည့်နိန်
လိုက်တေ။ ဟုတ်တေ။ ယင်းချင့် နု လိုက်ရှာ(ဟြာ)နိန်ရေအသံရှင်ဟိဖို့။ နု သူ့ကို လှမ်းခေါ်လိုက်ရကေ
ကောင်းဖို့လို့အတွေး(တွီး)၀င်လာပနာ ပါးစပ်ကိုဟဖို့ရာပျင်သိမ့်ရေ ဧရာမရလင်းဆွဲငှက်ကြီးတစ်ကောင် နု
ပါးတစ်ဖက်ကို အရီဖတ်ပိုင်သူ့အတောင်တိနန့်တစ်ဖြန်းဖြန်းလာသပ်တေအခါ နု ကြောက်အား လန့်အားနန့်ထအော်
ပစ်လိုက်မိရေ။ ထူးဆန်းစွာက ကြောက်ကြီးကျနိန်လို့ နု အော်လို့မရ။ ဇာပိုင်လုပ်ဖို့လဲ ။ အေနားမှာအသက်ဟိရေလူ
ဆိုလို့ နု နန့် ထိုသူနှစ်ယောက်တည်းရာဟိဖို့။အော်လို့မရရေအခါ နု လက်ဝါးနှစ်ဖက်ကို တီးပနာ အရှိကလူ
ကြားအောင်လုပ်တေ။ ယေကေလေ့မရ။ အေအမှောင်ထုနန့် အေငှက်တိအထဲက နု ဇာပိုင် ထွက်လို့ရပါဖို့။
ဟွေလူကလေ့ ရွိလေ့မရွိ၊ လှုပ်လေ့မလှုပ် အသက်ဟိရေသူပင်ဟုတ်ပါယင့်လားလို့ နု စိုင်းစားနိန်တုန်း ယင်းသူ
ဖြေးဖြေးချင်း နု ဖက်သို့လှည့်လာနိန်ရေ ။ မီးဇာကုန်ဖို့ယာခါ မှန်အိမ်အလင်းကလည်းဖျော့ဖျော့ချေရာဟိယာ ။
အမိယေလေ ဘုရားသခင်! အလင်းမှမှိန်ချေအောက်မှာ နွမ်းခွီနိန်ရေမျက်နှာနန့် နု ဖက်ကိုလှည့်လာရေသူက
ဇာသူဟုတ်ဖို့လဲ “ ကိုဦး “ ဖြစ်နိန်ရေ။ မျက်နှာချင်းဆိုင်က နု ကိုမြင်ရေအခါ ကိုဦး အားတက်လားခပုံရရေ ။ ဖြဖြူ
ဖဖပ်ဖြစ်နိန်ရေ သူ့မျက်နှာက နုကိုမြင်စွာနန့် ချက်ချင်းဆိုရေပိုင် သွီးရောင်ချေပြည့်လာစွာကို မီးရောင်မှမှိန်ချေ
အောက်မှာ မြင်နိန်ရရေ ။ ယင်းအချိန်မှာပင် ဧရာမရလင်းဆွဲငှက်တိ ကြောက်ဖို့ကောင်းရေအသံတစီစီနန့် တ၀ှီးဝှီး
ပျံလာနိန်ကတ်တေ ။
“ နု မီးဇာကုန်ဖို့ယာ ကိုဦးပါးသို့အယင်လာလတ် “
ကိုဦးက နု ကို သတိပီးပနာ ဟိသမျှအသံနန့် အားကုန်အော်ရေအခါ နုလေ့ ဟိသမျှအားတိနန့်
ကုန်းရုန်းထပနာ ကိုဦးပါးသို့
ပြီးလားဖို့ ကြိုးစားရေ။ ယေကေလေ့ထလို့မရ။ ကြောက်စိတ်နန့် အသက်ထွက်ကျဖို့ပိုင်ဖြစ်နိန်ရေ အချိန်မှာပင်
မီးဇာကုန်ပနာ မှန်အိမ်လေ့ ကိုဦးလက်ထဲကလွတ်ကျလို့ ကွဲကျလားခရေအသံကိုပင်ကြားလိုက် ရသိမ့်ရေ။
အမှောင်တကာ့ အမှောင်တိနန့် ပိန်းပိတ်လားပနာ ကိုဦးကိုလည်း မမြင်ရယာအခါ နု လိပ်ပြာစိုင်လားယာ
လို့တောင်ထင်မိရေ ။

“ ကို..…ကိုဦး ….ကိုဦး ဇာဖြစ်လားခဗျာယ်လဲ “
နု ဟိသမျှ အသံတိနန့်ကုန်းအော်ပနာ ကျုံးထလိုက်တေအခါ လက်ထဲမှာ ထွီးလုံးပတ်လုံးတစ်ခုနန့် ငြိပနာ
မှောက်ခုံထိုးလဲကျလားခရေ ။ ဘုံး ……အင့် ။
နု ကုတင်ထက်က အရုပ်တစ်ရုပ်နန့် ထွီးလုံးပတ်လုံး ပြုတ်ကျလားခစွာဖြစ်ပါယင့် ။ ကြောက်ဖို့ကောင်းရေ
အိမ်မက်တစ်ခုကိုတင်ပနာ နု ဇောချွေးပြန်နိန်ခစွာမနား ။ အိမ်မက်ထက
ဲ ကြွက်နသီးပိုင်နန့် လင်းဆွဲအကြီးမသန်တိကို
မြင်ယောင်မိရေအခါ နု ကြက်သီးဖြဖြန်း ထလာမိရေအထိ။ အာခြောက်ပနာ ရင်တုန်နိန်သိမ့်လို့ ရီတစ်ခွက်
သောက်လိုက်ရေခါမှရာ ရင်စိကေငြိမ်းလားပနာ တည်တည် ငြိမ်ငြိမ်ပြန်ဖြစ်လာရေ။ ညစာဖက်က ကိုဦးမွီးနိန့်မှာ
နုကိုပီးခရေ မွီးနိန့်လက်ဆောင်ဝက်ဝံရုပ်ကြီးကို ဖက်အိပ်ပနာ နု လူးကျလားခစွာ

( ကိုဦးက

သူ့မွီးနိန့်တာလေ့သော့ နု ကို အမှတ်တရတစ်ခု ခုပြန်ပီးနိန်ကျ ) ။ အိမ်မက်ထဲမှာ နု , ကိုဦးကို စိတ်ပူရလိုက်တေပင် ။
ဖြူဖြူ ၊ ဖပ်ဖပ်ဖြစ်နိန်ရေ သူ့မျက်နှာမှာ

ဝမ်းနည်းအားငယ်နိန်ရေစွာကို ထင်ထင်ရှရှားမြင်ရပနာ

တစ်ခုခုဆုံးရှုံးလိုက်ရလို့ သူ ကြီကွဲခံစား နိန်ရစွာက ပေါ်လွင်နိန်ရေအခါ အိမ်မက်ထဲမှာကေလေ့ နု စိတ်မကောင်း။
ကိုဦးနန့် နုရို့နှစ်ယောက်စ လုံး မွီးနိန့်တိကို ပျော်ပျော်ပါးပါး ဖတ်လာခကတ်တေနှစ်တိက နည်းတောင်မနည်းယာ။
ယေကေလေ့သော့ ညစာဖက်က သူ့မွီးနိန့်မှာတောင် ကိုဦး ပျော်ရွှင်မနိန်ရေအခါ နု ရင်ထဲမှာမကောင်း။ အထူးသဖြင့် နု
ကိုယ်တိုင် မျှော်လင့်မထားဖူးရေ ဆန်းကြယ်မှုတစ်ခုကို နု နှနှစ်ခြခြိုက်ငြိတွယ်စပြုလာရေအခါ (သို့ )
ယင်းလူတစ်ယောက်နန့် တူညီရေခံစားချက်တိကို ပြောပြစရာမလိုပဲ
အလိုလိုသိနားလည်နိန်ကတ်တေနှောင်ဖွဲ့ခြင်းတစ်မျိုးနန့် ကိုဦးပါးက နု မသိလိုက်မသိသာ ၀ီးကွာ
လာနိန်ခယာလို့ထင်ရေ ။
“ နု အေ Reality ကို, ကိုဦး ရင်ဆိုင်နိုင်ပါဖို့လားလို့ စိုးရိမ်စပြုလာယာ “
အဆက်အစပ်မဟိ ကောက်ပြောပနာ နု ဆံခြည်မျှင်ချေတိကို

ပွတ်ကစပ်နိန်ခရေ သူ့မျက်နှာမှာ

နာကျင်ကြီကွဲမှုတိ အပြည့်နန့်။ ဂုမ,ှ မကြာခင်ကမှရာ သိကျွမ်းခရရေလူတစ်ယောက်ကို နု တစ်ချိန်လုံး
သတိရနိန်တတ်ပနာ ယင်းလူနန့် ဆုံနိုင်ခွင့်မဟိဖို့စွာကိုလေ့ တွေး(တွီး) ကြောက်နိန်တတ်တေဆိုကေ ဆယ်စုနှစ်တိနန့်
နနောင်းနနင်း အမြစ်တွယ်ထား ရေရီသောက်မြစ်တစ်ခုကို ဆွဲနှုတ်ပစ်ရဖို့စွာက ကိုဦးအတွက်
ဇာလောက်ခက်ခဲလိုက်ပါဖို့။ အချစ်ဆိုစွာ ဇာပိုင် ဆန်းကြယ်မှု တိနန့် ပြုစားတတ်တေ တန်းခိုးရှင်လဲမသိ ? ။

“ နု အသံကို မကြားရရေ ညစာဖက်တိမှာ ကိုဦး နိန်သားမကျနိုင်သိမ့်ပါကားဝေ “
တမင်တကာ လုပ်ယူထားရေအရယ်အပြုံးတိနန့် ကိုဦးက သူ့သောကကို ၀ှက်ဖို့ ကြိုးစားကြည့်ပုံရရေ ။ တစ်ခုခု
ပြန်ပြောဖို့ စကားလုံးတိကို ရွီးချယ်နိန်ရစွာကပင် နု ကိုဦးပါးက ထွက်လာနိန်ရေသဘောတိ ဖြစ်နိန်ဗျာယ်လား ။
အခြားလူတစ်ယောက်ကို တွယ်ငြိမိလားရေစွာက ကိုဦးနန့် နု ကို မျုိုင်းကြောင်းတစ်ကြောင်းပိုင် ခြားပစ်လိုက်မေလို့ နု
မတွေး(တွီး) ထင်ဖူးခ ။
“ ကိုဦးကို နု တစ်ခုခု လုပ်ပစ်လိုက်မိယာလားမသိ “
အေထက်ရွီးချယ်လို့မရနိုင်ရေ စကားလုံးတိနန့် ကိုဦးကို တောင်းပန်ကြည့်မိစွာလား (သို့) နှစ်သိမ့်ပီးမိစွာလားဆိုစွာ နု
ကိုယ်တိုင် သသေချချာမသိ ။
“ နု သူ့ကိုချစ်မိလားစွာ အပြစ်တစ်ခုမဟုတ်ပါကားဝေ၊ ကိုဦးက နု ကိုချစ်တေပိုင်ပ ။ ယေကေလေ့ နု ကိုဦးနားမှာ
မဟိရေရက်တိကို ဇာပိုင်ရင်ဆိုင်လားရဖို့လဲဆိုစွာ ကြောက်နိန်မိရေ “

သက်ပြင်းချပနာ လီပူတိကိုမှုတ်ထုတ်ယင်းပြောနိန်ခရေ ကိုဦးပုံစံက နု မျက်စိ(စေ့)ထဲကမထွက် ။ ညစာဖက်တိုင်း
အလုပ်ဆင်းရစွာ တဗျင်းနောက်ကျဗျာယ် ထွက်လာလို့မရရေအခါတိကလွဲလို့ ကိုဦးက နု အရိပ်တစ်ခုပိုင် ဖြစ်နိန်ခ
စွာကနိန်ပနာ ယင်းညစာဖက်တိကို ဖဲ့ယူခံရလိုက်ရရေခံစားချက်တိက သူ့အတွက် ကကောင်းခါးနိန်လီဖို့ဆိုစွာ နု
နားလည်နိုင်ယင့်နန့်ပင် အခြားတစ်ယောက်ပါးမှာ တွယ်ငြိနိန်ရေ စိတ်တိကို ပြန်ကောက်ယူလို့မရနိုင် ။ ရှုပ်ထွီးမှုတိနန့်
မွန်းကျပ်နိန်ခါ နု ပြန်အိပ်ဖို့ ကြိုးစားကြည့်လို့မရ ။ တစ်စုံတစ်ယောက်ကို ချစ်မိခြင်းအတွက် တစ်စုံတစ်ယောက်က
နာကျင်ခံစားရရေအထိ အချစ်ဆိုစွာ အဆိပ်သင့်တတ်ပါရေလား ။

အခန်း ( ၆ )

“ ရင်ခုန်
ချိုမြ
အနမ်းတစ်ပွင့် သူပီးခဗျာယ်… “

ယင်းနိန့်က စနိန်နိန့်ညစာဖက်တစ်ခုဖြစ်ပနာ နု စိတ်တိလီးနိန်ခရေ။ ညာဖက်မျက်စိအောက်ဖက် တစ်ချိန်လုံး
လှုပ်နိန်ရေအခါ အမှန်အတိုင်းပြောရကေ နု အပြင်သို့ထွက်ချင်ရေစိတ် လုံးဝမဟိခ ။ ယေကေလေ့သော့ အောင့်ကို
ပီးထားခရေ ကတိတစ်ခုကို မျက်စိလှုပ်တေအကြောင်းပြချက်တစ်ခုနန့် ဖျက်ပစ်လိုက်ဖို့လောက်အထိ နု သူ့ရှိမှာ
အယူမသီးဝံ့ခါ အောင်နန့်တတူတူ စကာင်္ပူ - ကိုးရီးယား ချစ်ကြည်ရေးအထိမ်းအမှတ် ပြဇာတ်ကပွဲတစ်ခုကို လားဖြစ်
ခရေ ။ ကိုးရီးယားသံအမတ်တူဖြစ်တေ မစ္စတာပါ့ခ် ( Mr. Kim Myong Pak ) က အောင်နန့်တတူတူ “ The Kids
First Fund “ မှာဖြစ်လို့ သူရို့နှစ်ယောက်က ဇာလုပ်လုပ် တစ်ပူးတွဲတွဲဖြစ်နိန်တတ်တေ ။ မစ္စတာပါ့ခ်က နု နန့်
ရင်းရင်း နှီးနှီးဖြစ်လာယာခါ နု ကို စတတ်ပြောင်တတ်လာပနာ တခါတလီ အောင်နန့်ပတ်သက်တေ အတည်ပေါက်တိ
ကိုလည်းဖွင့်ချတတ်သိမ့်ရေ။
“ နု နင် ကကောင်းကံကောင်းရေ။ ရွုိင်ကိုကြိုက်တေ ကလေမေချေတိ တစ်ပုံတစ်ပင်ဟိစွာထဲက နင့်ကို
သူရွီးလိုက်စွာယေ “
လို့ဆိုစွာတိကို ပြောနိန်တတ်သိမ့်ရေကား။ အဂုလေ့သော့ မစ္စတာပါ့ခ်ဖိတ်လို့ နုရို့ ပြဇာတ်ကြည့်ဖို့
ရောက်လာကတ်စွာဖြစ်တေ။ ပြဇာတ်က စင်္ကာပူကတစ်လှည့်၊ ကိုးရီးယားကတစ်လှည့်စီ တင်ဆက်ကပြရဖို့ ဖြစ်ပနာ
ရှန်ဂရီလားဟိုတယ်က ( Shangri La Hotel ) ခန်းမတစ်ခုမှာ စစည် ကကား ကျင်းပနိန်ခစွာဖြစ်ယင့်။
အာဂန္တုဖြစ်တေ ကိုးရီးယားက အယင်ကပြခွင့်ရပနာ ကိုးရီးယားရှိဟောင်းရာဇ၀င်တစ်ခုကို အချိတ်အဆက်မိမိနန့်
တင်ဆက်ကပြနိန်စွာက, ကကောင်းစိတ၀
် င်စားဖို့ကောင်းယင့်နန့်ပင် နုမှာ စိတ်မ၀င်စားနိုင်ပဲ ချမ်းအားကြီးလို့
ခိုက်ခိုက်တုန်နိန်ခရေ။ ညစာဖက်က လားချင်လာချင်စိတ်မဟိပဲ လလီးလလံဖြစ်နိန်ရေအတွက်နန့် သင့်တော်ဖို့လို့
ထင်ရေ၀တ်စုံတစ်စုံကို ကောက်ဝတ်လာခစွာက လက်အတို၊ စကတ်အတိုဖြစ်ပနာ အဲယားကွန်းအောက်တတည့်က
ထိုင်နိန်ရအခါ ချမ်းအားကြီးလို့ နု ခခိုက်တုန်လာခဗျာယ်။ အဘာလေ ,အေပုံစံအတိုင်းရာဆိုကေတော့ခါ နု
သီရလီဖို့ယာ။ နု တစ်ခု , ခုဖြစ်နိန်စွာကို အောင် ရိပ်မိလားခပုံရပနာ နု လက်ချောင်းတိကို လာစမ်းကြည့်ရေ။
လက်နှစ်ဖက်စလုံး ရခဲတုံးပိုင် အေး(အီး) စက်နိန်ပြီးကေ တစ်ကိုယ်လုံး ခခိုက်တုန်နိန်ရေ နုကို ထိုင်ခုံထက်ကအတင်း
ဆွဲပနာအပြင်သို့ ခေါ်ထုတ်လာခယင့်ကား။

ပြဇာတ်ကနိန်ရေအချိန်ဖြစ်လို့ နုရို့နှစ်ယောက် ပျာယီးပျာယာ ထွက်လာခစွာက စိကေချေ
ဝရုန်းသုန်းကားဖြစ်နိန်ခပနာ ပွဲကြည့်သူ တချို့တလီ စိတ်အနှောင့်အယှက် ဖြစ်ကတ်လီဖို့။ ခသုတ်သုတ်ချေ
ခေါ်ယူလာခရေ သူ့နောက်သို့ နု လိုက်ရာလိုက်လာခရေ ဇာလုပ်ဖို့ခေါ်လားမှန်းလေ့မသိ။ တန်းခါးသုံးလေးခုကို
ခယင်ယင်ချေ ဖြတ်ပလိုက်ကတ်ပနာ ဓါတ်လှေကားသို့ရောက်တေအထိ ဖြတ်လားရဖို့ ထွက်ပေါက် ( Exit )
အခန်းထဲကို ရောက်တေအခါ သူဇာလုပ်လိုက်တေဆိုစွာ နု တစ်ချက်ချေကြောင်လားခသိမ့်ရေ။ နု ကို သူ့ရင်ခွင်ထဲသို့
ဆွဲသွင်းလိုက်ပနာ နု တစ်ကိုယ်လုံး သူ့ပါးကလွတ်ကျလားဖို့ကို ကြောက်တေပိုင်ပုံစံနန့် သူ နုကို
တတင်းကျကျပ်ဖက်ထားခရေ။ နု လက်ချောင်းတိကို သူ့လက်တိနန့် ပွတ်သတ်ပီးနိန်ခစွာလား။ နု နခမ်းတိ
သွီးရောင်လွှမ်းဗျာယ် ပူနွီးလာခဗျာယ်လား နု မသိ။ နု သိစွာကရင်ခွင်တစ်ခု။ ပပူ နနွီးစီးဆင်းနိန်ရေ နု နန့်
အပါးဆုံးရင်ခွင်တစ်ခု။ အပြီးကေ တတိုးတတိတ် ကြားလိုက်ရရေ မထင်ဝိုးဝါးအသံချေတစ်ခု။
“ ကိုယ့်ကိုယ်ကို အသူမှန်းမသိကေလေ့ နုကို, ကိုယ်မချစ်ပဲ မနိန်နိုင်ဆိုလား ဇာလား ဗလုံးဗထွီးစကားတိ “
ကိစ္စမဟိ အေစကားတိကို ကြား ကြား, မကြားကြားကိစ္စမဟိ။ ဟုတ်တေ။ ဂုအချိန်မှာ နု နန့် အပါးဆုံး
စီးဆင်းနိန်ရေရင်ခွင်တစ်ခု ဟိ့နိန်ဖို့လောက် ဇာအရာကလေ့သော့ ယင်းထက်ပိုပနာ အရေးကြီးမနိန်ခပါဝေ ။

အခန်း ( ၇ )

“ပဲ့ကြွီနှလုံးသား
လောင်မြိုက်ကျွမ်းစီ မရွယ်ရည်လေ့
ဝင်လာမုန်တိုင်း ငြိုးမာန်ဖွဲ့က…. “

ချိုမြိန်မိန်းမူးဖို့ကောင်းရေ သူ့အနမ်းစ,စချေတိအောက်မှာ ပူနွီးခွင့်ရခရေနခမ်းတစ်စုံကို ပြန်ပွတ်သပ် နိန်မိယင်းက
ရင်ခုန်ခရရေ ယင်းညည့်မှာ အမှတ်တရကြယ်စုချေတိလည်းအများကြီး။ လွန်ခရေလေးနှစ်လောက်က ယူနီဆက်ဖ်နန့်
မြန်မာအစိုးရရို့ ပူးပေါင်း လုပ်တေ

မိဘမဲ့ကလေးသူငယ်တိ ကာကွယ်စောင့်ရှောက်ရေးအစီအစဉ်က

ကျင်းပရေဆီမီနာတစ်ခုမှာ နု ၀တ်လာခရေ ရိုးရာဖြစ် ခရမ်းရောင်ချည်ထည်ဝမ်းဆက်ကိုနန့်ပင် သူ မှမှတ်ရရ
ပြောပြနိန်ခစွာက နုအတွက် အိမ်မက်တစ်ခုပိုင်။ ဘုရားသခင် ! ယင်းနိန့်က နု သူ့ရှိမှာ ဇာပိုင်ပုံစံနန့်ဟိခပါလေ့။
တစ်နိန်ရာ,ရာမှာ သူ့ကို ရင်းနှီးကျွမ်းဝင်ဖူးခရေလို့ခံစားမိနိန်စွာက ယင်းကြောင့်ပင်လား။ ယေကေ နုကို သူသိနိန်ခစွာ
လွန်ခရေလေးနှစ်ကျော်လောက်ကပင်နန့်ရာ။ အိုး ! ဇာလောက်တောင် ရင်ခုန်ဖို့ကောင်းရေ ဆန်းကြယ်မှုတစ်ခုပါလေ့။
ရောင်စုံအိပ်မက်ချေတိနန့် အလှပဆုံးဖြတ်သန်းခရရေယင်းညည့်ကို အိမ်မက်ထဲမှာတောင် မကုန်ကျလားချင်ခ ။
နှစ်နှစ် ခြိုက်ခြိုက်အိပ်လို့ ကောင်းခကား နု နိုးလာရေအခါ ကိုးနာရီတောင်ထိုးပြီးပါဗျာယ်။ စိတ်ကူးဖြဖြောင့်ချေနန့်
အိပ်ရီးဝလို့ ဖောင်းနိန်ရေမျက်နှာနန့် ကပိုကရို ဖြစ်နိန်ရေကိုယ့်ပုံစံကို မှန်ထဲမှာတစ်ချက်ကြည့်ပနာ မျက်နှာသစ်ဖို့
ပပေါ့ပါးထွက်လာခလိုက်တေ။ မျက်နှာသစ်လို့ ပြီးခါနိန်းဆဆဲမှာ ရီချိူးခန်းတန်းခါးကို တဒုန်းဒုန်းလာခေါက်တေ
အသံကြောင့် အလန့်တကြားနန့်တန်းခါးကိုဖွင့်လိုက်တေအခါ မျှော်လင့်မထားရေ သတင်းတစ်ခုက နု ရင်ဘတ်ကို

အရှိန်အဟုန် ပြပြင်းနန့် ၀င်ဆောင့်လာကတ်တေ။ နု အခန်းထဲက ဖုန်းကိုခေါ်လို့မရရေအခါ ဧည့်ခန်းမှာဟိရေ
ဖုန်းကတစ်ဆင့် တစ်ဖက်ခန်းက မသွယ်ကို ယင်းသတင်းပီးထားခပုံရရေ ။
“ နု , ကိုကျော်မင်းဦး ညည့်ခါက ဆိုက်ထဲမှာပြုတ်ကျလို့ ၊ ခေါင်းထိလားခရေနန့်တူရေ ၊ အရေးပေါ်တင်ထား
ရရေလတ် “
နု နားကြားလွဲစွာတော့ခါမဖြစ်နိုင်။ ယိုင်လားရေခြီလှမ်းတိကိုထိန်းပနာ ကုတင်ထက်သို့ရောက်အောင်
မသွယ်အကူအညီနန့် မနည်းကြိုးစားလျှောက်လာခရရေ ။ မျက်ရည်တိက ဒလဟော စီးကျလာကတ်ပနာ ညည့်ခါက
အပျော်ကြီး ပျော်နိန်ခရေကိုယ့်ကို တနားချေမှာ ရွံမုန်းပစ်လိုက်ချင်စိတ်ပင်ပေါက်လာရေ။ ညည့်ခါကဆိုကေ သူ
အိုတီဆင်းနိန်ရလို့ဟိဖို့။ ဇာဖြစ်လို့ စနိန်နိန့်ညည့်ကိုနန့်ပင် အိုတီကဆင်းနိန်ရသိမ့်လဲလို့ စိတ်ထဲကလေ့
အပြစ်တင်ပနာ သူ့ကို စိတ်ပူအားကြီးလို့ ရင်ထဲမှာဗလောင်ဆူနိန်ကတ်တေ ။
မသွယ်နန့်တတူတူ ဆေးရုံကိုလာခရေလမ်းထက်က ပြန်ပနာလှည့်ပြီးလားချင်ရေစိတ်ကို မနည်း ထိန်းထားရရေ။
အရေးပေါ်ဆိုကေ ဇာအခြေအနိန်ထိဆိုးရွားနိုင်လဲ နု မသိ။ ကြားရဖို့သတင်းစကားတိကို နု ရင်ဆိုင်နိုင်ပါဖို့လား။
ကိုဦးဟိနိန်ရေ အခန်းပေါက်ဝ ရောက်တေအခါ သူ့အခန်းဖော် ကိုထွန်းလင်း နန့်ပက်ပင်တိုးရေ ။ နု
တံတွီးကိုကျိတ်ပနာ အသာချေမျိုချပလိုက်ပြီးကေ ကိုထွန်းလင်းပြောဖို့စကားကို ပင်ပမ်းတကြီးစောင့်နိန်လိုက်တေ ။
“ ကံကောင်းလို့ ခေါင်းကိုမထိခ ဂုနချေကသတိရပနာ ပြန်အိပ်ပါလားခရေ ၊ ယေကေလေ့ ဘယ်ဖက်လက်,
လက်ကောက်ဝတ် အခြေအနိန် ကကောင်းဆိုးရေ၊ ကျိုးလခရေနန့်တူရေ “
ကိုထွန်းလင်းပြောအပြီးမှာ သက်ပြင်းတစ်ချက် ခိုးရှူလိုက်ပနာ တတုန် ယယင်နန့် ဆေးရုံထရံမှာ
မှီနိန်လိုက်ရသိမ့်ယင့်။ အသက်ဘေးက လွတ်ခစွာနန့်ခေါင်းတစ်ခုခုမဖြစ်ခစွာကိုပင်ကျေးဇူးတင်ရဖို့လားမပြောတတ်
ဗျာယ်။ ကိုထွန်းလင်းက ကင်တင်းလားကတ်မေလို့ နု တစ်ယောက်ထဲကို ခေါ်ထုတ်လာစွာက တစ်ခုခုပြောစရာ
ဟိနိန်ပုံရရေ။ ကိုဦးနန့် ပတ်သက်နိန်ဖို့ဆိုစွာကို အလိုလို သိနိန်တာလေ့ ဇာဖြစ်ဖို့ဆိုစွာ ရှရှင်းကြီးတော့ခါမှန်းလို့မရ

“ နု ရို့ ဇာဖြစ်ကတ်လဲဆိုစွာ ကျွန်တော်မသိ။ ကိုကျော်မင်းဦး အေလေး-ငါးလမှာ ကကောင်းပြောင်းလဲလားခစွာပါ ။
အခါတိုင်းအေလောက် တက်တက်ကြွကြွနိန်တတ်တေသူ မှိုင်မှိုင်ချေဖြစ်နိန်ခစွာကြာယာ။ အစက ကျွန်တော်မသိလို့
သူ့ကိုတောင် စလိုက်မိသိမ့်ရေ “
ကိုထွန်းလင်းက စကားကိုတထောက်ချေတန့်ပနာ ကော်ဖီတစ်ကျိုက်သောက်နိန်လိုက်တေ။ ကိုထွန်လင်း ပြောနိန်ရေ
လမ်းကြောင်းတိက နုပါးသို့တတည့်လာနိန်မှန်းသိကေလေ့ ပြန်ပြောဖို့ စကားလုံး, တစ်လုံးတောင် နု ပါးမှာဟိမနိန်ခပဲ
သူဆက်ပြောလာဖို့စွာကို ရာစောင့်နိန်မိရေ ။
“ ယေကေလေ့ သူ ကကောင်းတော်ရေလူရာနန်း။ သူ့ခံစားချက်ကို တော်ရုံနန့်ထုတ်ပြတတ်ရေသူကားမဟုတ် ။
ကျွန်တော်တောင် သူ့အခန်းဖော်ဖြစ်လို့ရိပ်မိစွာ။ အေရက်ပိုင်း ကျွန်တော်ထင်ရေ သူ လုံးဝအိပ်မရနန့်တူရေ ။
အိပ်ရေးဆက်တိုက်ပျက်နိန်ခရေအထဲ ကွန်ကရစ်လောင်းစွာကို ညည့်လုံးပြတ်ကြီးကြပ်နိန်ရရေအခါ သူ……..“
ကိုထွန်းလင်းက သူ့စကားကို တိုးလိုးတန်းလန်းနန့်တန့်ထားလိုက်တေ။ နု ကို တစ်ချက်အကဲခတ်လိုက်ပြီးခါ
………………..
“ ကျွန်တော် နု ကို တစ်ခုခု တွန်းအားပီးချင်လို့ မဟုတ်ပါ ၊ အေလောက်တော့ခါ သိထားသင့်ရေဆိုရေ သဘောနန့်ရာ“

လို့ ပြောလာရေ ကိုထွန်းလင်းကို နု တစ်ခုခုတောင်ပြန်မပြောနိုင်ခ ။

နိန့်ခင်းဖက်တစ်နာရီလောက်မှာ ကိုဦး

ပြန်နိုးလာခရေ။ ခေါင်းနန့်တစ်ကိုယ်လုံးမှာ ပတ်တီးတိ ဖဖွေးဖြူနိန်ရေ သူ့ကိုကြည့်ပနာ နု ရင်ထဲမှာ
ဆို့နင့်နိန်ကတ်တေ။တမိုးထလုံးငိုချင်သမျှ အောင့်ထားရလို့ နှာပိတ်တေလည်းမချိယာ။ သူ့တစ်ကိုယ်လုံးကို
ကြည့်ပြီးခါမှ သူ့မျက်နှာကို စစေ့ကြည့်ဖို့မ၀ံ့ဒ၀ံ့။ ဘုရားသခင် ! ကိုဦး အေပိုင်ဖြစ်ရစွာ နု ကြောင့်လို့ နု
ကိုယ်တိုင်ခံယူမိနိန်ရေလား။ နုနန့်မျက်လုံးချင်း တတည့်ဆုံရေအခါ ကိုဦးက အပြုံးတစ်ခုကို အားယူပနာ ပြုံးပြရေ။
သူ့ကို မစိုးရိမ်ကဲ့ဖိဆိုရေသဘော။ နုကြောင့် ကိုဦး အေပိုင်ဖြစ်ရစွာမဟုတ်ဆိုရေသဘော။ ယင်းသဘောတိကို
စကားလုံးတိနန့်မပြောပြပဲတောင် နု နားလည်နိုင်ပါယင့်နန့် ဇာဖြစ်လို့ သူ့ပါးကထွက်လာမိရေ ဆိုစွာ နု
ကိုယ့်ကိုယ်ကို အပြစ်တင်နိန်မိပြန်ရေ ။
ပတ်တီးစတိလွတ်နိန်ရေ သူ့လက်ဝါးတစ်ဖက်ကိုအသာချေဆုပ်ကိုင်ပီးရေအခါ သူ့လက်ဖ၀ါးနန့်တင်းနိုင်သမျှ
တင်းအောင် နု ကိုပြန်ဆုပ်ထားခကေလေ့ အယင်ကပိုင် အားနန့်အင်နန့် နနောင်းကျကျစ်မဟုတ်။ မှေးမှိန်နိန်ရေ ကိုဦး
အကြည့်တိထဲမှာ သူ့မျှော်လင့်ချက်တိကို အပြီးသပ်လွှတ်ချပြီးခယာတောင်မှ နုကို သူ့ပါးကထွက်မလားကဲ့လို့
ပြောနိန်ကတ်စွာလား။ သူ့ ချစ်ခြင်းတိနက်ရှိူင်းမှုကို သူ့မျက်လုံးတိကတစ်ဆင့် နု ကိုပြောပြနိန်စွာလား။ သူ့မျက်လုံး
တိက ယင်းပိုင်ဖွင့်ဆိုမှုတိနန့် နုကို အသနားခံတောင်းပန်နိန်ကတ်စွာလားဝေ။ နင့်သီးပနာ ရင်ဝသို့အလှိုက်,
အလှိုက်တက်လာကတ်တေ ၀မ်းနည်းမှုတိကို ပစောင်ပိုင်မှုတ်ထုတ်ရပါဖို့။ တခါတလီဘ၀ဆိုစွာ အေပိုင်နာကျင်
ကြေကွဲစရာတိ၊ အထစ်အငေါ့, အကွေ့အကောက်တိနန့်ရာ ရင်းနှီးကျွမ်းဝင် နိန်တတ်ပါရေလား ။

အခန်း ( ၈ )

“ နှစ်ယောက်တစ်သက် ကိုင်းချင်းနွယ်ယှက်
ချစ်သူပျော်ကေ ကိုယ်လည်းပျော်ရေ
ချစ်သူနွမ်းကေ ကိုယ်လည်းနွမ်းရေ “
လေဆိပ်ကပြန်လာရေ လမ်းတစ်လျှောက်လုံး

နု ရင်ထဲမှာ ဟာတာတာနန့် ၀မ်းနည်းနိန်မိရေ ။ ဂုရက်ပိုင်းမှ

လေဆိပ်ကို လာကြိုရစွာ ကပင် တိုက်ဆိုင်လွန်းနိန်လားမပြောတတ်ယာ။ လေဆိပ်ရောက်ကေ လွန်ခရေသုံးလ
လောက်ကအိမ်ပြန်လားခရေ ကိုဦးကို ပိုပနာသတိရ, ရလာတတ်တေ။ လက်ကောက်ဝကျိုးလားခလို့
စတီးရိုးထည့်ထားရရေအခါ ယင်းချင့်ပြန်ဆက်မိရေအထိ အချိန်တစ်ခုကို ကိုဦး ပီးဆပ်လိုက်ရဖို့သိမ့်။ အင်ဂျင်နီယာ
တစ်ယောက်အတွက် လက်တစ်ချောင်းကိုရာ ဆုံးရှုံးလိုက်ရဖို့ဆိုကေ နု စိတ်ကူးနန့်တောင် မတွေး(တွီး)ကြည်ဝ
ံ့ ။
အေလောက် ခါးသီးဖို့ကောင်းရေ မှားယွင်းမှုတိကို ရင်ဆိုင်ဖြတ်သန်းရစွာ ကိုဦး ဇာလောက် ပင်ပမ်းလိုက်ပါဖို့။ ကိုဦး ,
နု ကို နာကြည်းမိလီဖို့လား ။
“ ဘယ်လိုလဲ ဒေါ်စောနုသွင် တိတ်လှချေလား “
နု ရို့( MPDB )ဘဏ်ဒုဥက္ကဌ ဦးသူရိန်မော်( မန္တလေးဇာတိ)က ကားရှိခန်းကနောက်ပြန်လှည့်ပနာ လှမ်းစလိုက်တေ
အခါမှရာ နု ဇာလောက်ထ,ိ တိန်းပါလာခစွာကို သတိရပြီးကေ ဆရာ့ကို အားတုန့်အားနာဟန်နန့်ပြုံးပြမိရေ ။

“ ဒါနဲ့ညည်းတောင်ပြန်ရဖို့နီးလာပြီထင်တယ်။ ညည်းဒီမှာ ဘယ်လောက် နှစ်,နှစ်ခွဲရတာမလား၊ ခုဘယ်လောက်
ကျန်သေးလဲ “

ဆရာက မိန်းလဲမိန်း သူ့စွာသူလဲ ဖြည့်ပြောပနာ နု ပြန်ပြောစွာကို စောင့်နိန်ရေ။
“ သမီး ဒီမှာနေရမှာ လေးလပဲ ကျန်တော့တယ်ဆရာ “
ပြန်လားရဖို့ဆိုစွာကိုကြားရေအခါ စိကေချေစိတ်မပါသံပေါက်နိန်ရေလီသံနန့်ပြန်ပြောလိုက်မိရေ။
…………………………………………………….
“ ဘာလဲ ညည်း ဒီက မပြန်ချင်တော့ဘူးနဲ့ တူတယ်။ ဒီလိုလဲ မဖြစ်ပြန်ဘူးကွဲ့။ ဒီနှစ,် နှစ်ခွဲမှာ ရထားတဲ့ မင်းအတွေ့
အကြုံတွေကို ငါတို့ဘဏ်က အခုတကယ်လိုအပ်နေပြီ ။ မင်းလုပ်နိုင်မှာပါ ။ ဘရိုင်က မင်းသိပ်တော်တဲ့အကြောင်း
ခဏ, ခဏပြောတာပဲ “
နု လီပူတစ်ချက်အသာချေခိုးထုတ်ပနာ ယေပ။ ဟုတ်တေပလို့ ဆရာပြောနိန်စွာတိကို စိတ်ထဲက ဇာကို အလို
မကျမှန်းမသိ ဘုတော, တောနိန်မိရေ။ EFGဘဏ် ငွေကြေးစီမံခန့်ခွဲရေးတာဝန်ခံ မစ္စတာဘရိုင်ယန်က ဆရာ့
သူငယ်ချင်းဖြစ်လို့ နုကို အေမှာ ထရိန်နိန် နှစ်,နှစ်ခွဲ လာဆင်းခိုင်းခစွာဖြစ်တေအတွက် မကြာခင်မှာ နု ပြန်ရဖို့ယာ ။
ယင်းပိုင်ဆိုကေ လောလောဆယ် နုရို့နှစ်ယောက် ၀ီးနိန်ကတ်ရဖို့သိမ့်ဆိုရေ အတွေး(တွီး)တစ်ခုက ရင်ထဲကို မမော
ပပမ်းဝင်လာခပြန်ယင့်။ ဆရာ့ကို အာမိုကိုက သူ့နှမအိမ်သို့ဝင်ပို့ပြီးရေ အခါ နု အိမ်သို့တန်းပြန်လာခပနာ စိတ်ကြိုက်
အ၀တ်တစ်စုံကိုရွီးနိန်မိရေ။ အလယ်မှာခါးပတ်အမဲရောင်ပတ်ထားရပနာ ဒူးဆစ်လောက် ရောက်တေ
အပြာရောင်ဒီဇိုင်း ဆန်းဆန်းဘလောက်စ်ကိုရွီးဝတ်ပြီးရေအခါ ကိုယ့်ကိုယ်ကို မှန်ရှိမှာ ဘယ်ပြန်ညာပြန် ကြည့်ပနာ
စိတ်ကြေနပ်နိန်မိရေ ။ အိမ်ရှိအပေါက်ဝကိုထွက်လိုက်စွာနန့် ပန်းအိုးထဲမှာတတွတ်ရဲပနာ ပွင့်နိန်ရေနှင်းဆီပွင့်ချေတိ
လီသသွင်ချေနန့် ဘယ်ညာယိမ်းထိုးနိန်ကတ်တေစွာကအစ တစ်မျိုးချေကြည့်လို့ကောင်းသိမ့်ယင့်။
ချစ်သူနန့်တွိရဖို့ဆိုရေ တွန်းအား တစ်ခုနန့်ပင် အရာ ရာက နုပျိုဆန်းသစ်ခြင်းတိနန့် ကြည်နူးဖို့ကောင်းနိန်ပြန်ရေ။
စစောဖက်က မမှုန် သသုတ် ဖြစ်နိန်ခစွာချေတိ မသိမသာအရောင် ပါးလားခဗျာယ်။ အနီရောင်ဟွန်ဒါကားတစ်စီး
မြင်ကွင်းထဲကို ရောက်လာရေအခါ နု အပြုးံတိ ကကောင်းအသက်ဝင်လှပနိန်ကတ် လီဖို့ဆိုစွာ နု ကိုယ် နု
သိပြီးသားနန့်ရာ။ ဓါတ်လှေကားမှာကပင် ရင်တဒိတ်ဒိတ်ခုန်နိန်တတ်တေစွာက နုအတွက် ရိုးပင်မရိုးနိုင်။ ထိုင်ခုံခါးပတ်
ပတ်ပီးနိန်ရေ အောင့်ပါးက ကိုယ်သင်းနံ့ကို နု ခိုး,ခိုးရှုတတ်စွာလေ့ သူသိဖို့မဟုတ်။ အဖြူရောင်မှာ
ခရမ်းရောင်အစင်းတိဖောက်ထားရေ ရှပ်လက်ရှည်နန့် သူ့ပုံစံကတစ်မျိုးချေ သန့်ပြန့်နိန်ပြန်သိမ့်ရေ။
…………………………………………… …………………

ကိုယ်ရို့ ဇာကိုလားကတ်ဖို့လဲ မသိချင်ပါလာ “

ညကပင် နိန်ရာအတိအကျမပြောပဲတစ်နိန်ရာသို့ လားဖို့ဟိရေလို့ရာပြောထားခရေအတွက် ဇာသို့လားနိန်ရေ
လဲဆိုစွာ နု သသီးသသန့်မမီးချင်ခ။
“ အောင်ကမှ မပြောထားစွာ , နု ပစောင်သိပါဖို့လဲ “
ကြိုမပြောထားလို့စိတ်ကောက်ချင်ဟန်နန့် နု နခမ်းစူပြရေအခါ သူက ကားမောင်းနိန်ယင်းက ဘယ်ဖက်လက်နန့်
ယမ်းပနာ နုခေါင်းကို ဖွ,ဖွချေလှမ်းထုရေ။ တအောင့်လောက် ဆဆိတ်ချေဖြစ်လခပြီးခါ ငြိမ့်ငြိမ့် ညင်ညင် တီးလုံးချေ

တိနန့် ဖိတ်ကျလာရေတေးချင်းတစ်ပုဒ်က နု ပါးနှစ်ဖက်ကို ရဲတက်လာစီခရေ ။

“ Toby Keith “

ဆိုထားရေ

( You Shouldn’t Kiss Me Like this ……..)
“ …….မင်းနခမ်းတိနန့် ငါ့ကိုထိလိုက်တေယင်းတစ်ချက်ချေမှာ,ထူးဆန်းရေခံစားချက်တစ်ခု ငါ့ရင်ထဲမှာ
လှိုင်းတစ်စင်းပိုင်ဖြတ်စီးလားခ ……, …………., လျှပ်စစ်အားနန့်အတို့ခံလိုက်ရရေပိုင် အဂင့်တစ်ချက်စိကေချေရာ ။
အစကပင်ရာ မရည်ရွယ်ခဆိုကေ , မင်းယင်းပိုင် တော့ခါ မနမ်းသင့်ပါဝေ , …………., ………….., မင်းအနမ်းချေတိ
အေပိုင်ငါ့ကိုပီးရေအခါ,ယင်းချင့် မင်းပြောပြချင်ရေစကားလုံးတိမှန်း ငါ သိနိန်ပါယင့်။ ယေဇုနက် ဘေဘီ (အချစ်ချေ )
ငါ့ကို မင်းအနမ်းတိ တစ်ခါထပ်ပနာပီးလာလိုက်ပါဝေ ….. ”
ရှန်ဂရီလာဟိုတယ်မှာ ကိစ္စဖြစ်ပြီးရေနောက်ပိုင်း အေတေးချင်းတစ်ပုဒ်တည်းကိုရာ အောင် ဖွင့်,ဖွင့်နိန် တတ်တေ ။
တေးချင်းထဲမှာပိုင် နု သူ့ကိုပြန်နမ်းမိခရေလား ။ အိုး နု မမှတ်မိ ။ ချမ်းလို့ခခိုက် တုန်နိန်စွာက နု နခမ်းတိ
နနွီးထထွီးဖြစ်လာခစွာကိုရာ မှတ်မိနိန်ရေ။ နု ရှက်(ဟြက်)လို့ပါးနှစ်ဖက် ရဲတက်လာရာဆိုကေ ယင်းချင့်ကို
အောင်က အရသာခံပနာ လှည့်ကြည့်, လှည့်ကြည့်လုပ်တတ်သိမ့်ရေ။ ဘဒုတ်ဖက် ( Badok )ချိုင်းချီလမ်းက ခြံ
တစ်ခြံထဲကိုချိုးဝင်ဖို့ပျင်ခါမှ အောင်က တေးချင်းကို ပိတ်ပစ်လိုက်စွာ။ အသက် ၅၅ နှစ်လောက်ဟိရေ
တရုတ်မတစ်ယောက်ထွက်လာပနာ ကားနောက်ခန်းမှာ ထည့်လာခရေ ပစ္စည်းထုပ်တိကို နု ရို့ပါးကနိုင်သလောက်
ကူဆွဲပီးပနာ အိမ်ထဲသို့ဝင်လားကတ်လိုက်တေ။ အထဲသို့ရောက်တေအခါ နု အခြေအနိန်တစ်ခုကို နားလည်
လိုက်မိရေ။ တနိုင်တပိုင် ထူထောင်ထားရေမိဘမဲ့အချေတိ စောင့်ရှောက်ရေးဂေဟာချေတစ်ခု။ အောင်က
သူဝယ်လာခရေပစ္စည်းတိနန့် စကာင်္ပူဒေါ်လာ တစ်ထောင်ကို အလှုငွေဖြတ်ပိုင်းပုံစံမှာဖြည့်ပနာ တနားချေက
ထွက်ကြိုရေဂေဟာမှူးပါးသို့ လှူစွာကိုတွိရရေအခါ နုအတွက် စိကေချေအံ့သြဖို့ကောင်းနိန်ရေပိုင်။ ယင်းအချေတိ
လှုပ်ရှားမှုမျိုးစုံနန့်မှတ်တမ်းတင်ဓါတ်ပုံတိကို နု လှည့်ပတ်ကြည့်နိန်ယင်းက အချေတစ်ယောက်ကိုအတွက်ပေါ်လာ
ပြန်ရေ။ မိဘမဲ့အချေသူငယ်တိနန့် ပတ်သက်လာရေအခါတိုင်း နု ယင်းကလေချေကို သတိရမိတတ်စွာကိုလေ့
ကိုယ့်စွာကိုယ်တောင် အံ့သြမိရေအထိ။ ဂေဟာမှူး ချကျွေးရေမုန့်တိကို မကောင်းတတ်လို့တတို့ချေလောက် စားပနာ
စိတ်ထဲမှာက ယင်းကလေချေအကြောင်းကရာ စိုးမိုးနိန်လို့ ချိုင်းချီကပြန်လာရေ လမ်းတစ်လျှောက်မှာ နု ဆဆိတ်ချေ
ပါလာ ခရေအခါ , အောင်က………………………………..

“ နု ကကောင်းပင်တိတ်တေကား “ …………………………………“

“ အင်း , နု ဇာဖြစ်နိန်စွာလည်းမသိ ….”
နု စကားကိုက အူလလည်ဖြစ်နိန်လို့ အောင်ကနားလည်ပုံမရဟန်နန့် ခေါင်းကိုယမ်းပြရေ ။
“ နု ယင်းပိုင် သတိရနိန်တတ်စွာကို ကကောင်းထူးဆန်းရေလို့လည်း ခံစားနိန်ရပြန်ရေ “
ပြောစွာကို တိုးလိုးတန်းလန်းရပ်ထားလိုက်ပနာ နု စိုင်းစားပိုင်လုပ်နိန်ရေအခါ သူက ဇာပြောချင်လဲဆက်ပြောဆိုရေ
သဘောနန့်မပွင့်တစ်ပွင့်ချေပြုံးပနာ ခေါင်းညိတ်ပီးရေ။ နု အကျိတအ
် ခဲတစ်ခ,ု ခုဖြစ်နိန်စွာကို နားထောင်ပီးမေ
ဆိုရေသဘော ။

“အောင်သိလား လွန်ခရေဆယ်နှစ်ကျော်လောက်ကဟိဖို့။ နု ကုန်သွယ်ရေးဌါနမှာ တစ်နှစ်လောက် ၀င်လုပ်ခသိမ့်ရေ”

အောင်က “ အင့်၊ အင်း “ နားထောင်နိန်ရေ ဆက်ပနာပြောဆိုရေသဘောနန့် ခေါင်းညိတ်ပြပြန်ရေ ။
“ ယင်းခါက ညွှန်ကြားရေးမှူးအန်တီကြီးနန့် သူ့လက်ထောက်တစ်ယောက်ပြောနိန်စွာကို နု အဂုထိလေ့ သတိရပနာ
စိတ်မကောင်းဖြစ်နိန်ခစွာ “
နုက တထောက်ရပ်ပနာ အောင့်ကို လှမ်းကြည့်လိုက်တေအခါ အောင်ကလည်း နုကို လှမ်းကြည့်လိုက်လို့
အကြည့်ချင်းတောင် ဆုံပစ်လိုက်ကတ်သိမ့်ယင့် ။
“ ယင်း မ,မက မုဒုံဇာတိကဆရာဝန်ပေါက်စချေလတ်။ ယင်းသူ့ယောင်္ကျားကလေ့ ဆရာဝန်ပေါက်စချေ
ရန်ကုန်သားလတ်။ နှစ်ယောက်သား ဇာဖြစ်ကတ်တေဆိုစွာ အန်တီရို့လေ့အသေအချာတော့ခါမသိ။ ယင်းလူနန့်ရရေ
သားကို လုံးဝမယူချင်ဆိုပနာ ဟန်ထူးချေကို အင်ဂျင်နီယာတစ်ယောက်ပါးကို ပီးပစ်ခရေလတ်“
ကျွီကနဲ တစ်ချက်မြည်ပနာ ကားက ဘရိတ်မနည်းအုပ်ပလိုက်ရလို့ နု လန့်လခဗျာယ် ဘုရားတလိုက်မိရေ ။ အောင်
ဇာဖြစ်လဲမသိလို့ လှမ်းကြည့်လိုက်တေအခါ စတီယာရင်မှာလက်နှစ်ဖက်ကိုတင်ထားပနာ ကိစ္စမဟိ ဆက်ပြော
ဆိုရေသဘောနန့် ခေါင်းညိတ်ပြလို့ စ, စောက စကားကို နု ပြန်ဆက်လိုက်တေ ။
“ယေကေလေ့ ယင်းဟန်ထူးချေလေ, ကကောင်းကံကောင်းရေ ။ သူ့ကိုမွီးစပ်တေ မိဘတိကလေ့ သဘောကောင်း
မနောကောင်း၊ ပညာတတ် ဥစ္စာလည်းဟိ၊ အငယ်ချေလောက်ကပင် စင်္ကာပူကိုပြောင်းလားခကတ်တေလတ် ။ နု
စိတ်ထဲမှာ သူ့အမိန့်သေက သူ့ယောင်္ကျားကို စိတ်နာကေလေ့ သူ့သားအရင်းတစ်ယောက်လုံးကို ဇာဖြစ်လို့
အေပိုင်သူများကို ပီးပစ်ခရလဲဆိုစွာ စိုင်းစားလို့မရ။ ပေသာလည်းနှစ်ဖက်စလုံး ကကောင်းချမ်းသာရေလတ်။
သူများတိကတော့ကေ အရွယ်လည်းငယ်ကတ်သိမ့်ရေအခါ မရင့်ကျက်ကတ်သိမ့်လို့ နှစ်ယောက် မာနပြိုင်ကတ်စွာ
ဖြစ်ဖို့လို့ ထင်ကတ်တေ ။ နု ကတော့ခါ ယင်းဟန်ထူးချေကိုချည်း အလိုလိုအတွက်ပေါ်ပနာ သနားနိန်မိရေ “
တစ်ချိန်လုံးတနုံ့နုံ့ဖြစ်နိန်စွာကို ဖွင့်ချပစ်လိုက်တေအခါ ရင်ပေါ့လားခပိုင်တွိလို့ စိကေချေလန်းလာရေ မျက်နှာနန့်
အောင့်ကို ကြည့်လိုက်တေ။သူ့မျက်နှာက စစောကပိုင်ရွှရွှင်လလန်းမဟုတ်လားလို့။ နုပါးက စိတ်မကောင်းစွာတိ
သူ့ပါးသို့ကူးလားရေဟိဖို့လို့ ကိုယ့်စွာကိုယ် ပြန်တွေး(တွီး)ပနာ ဆဆိတ်ချေနိန်လိုက်တေ ။
“ နု , ရစီပီစ် ( RECIPES ) ကို ၀င်ကတ်ဖို့လား “
နုရို့ဘဏ်နန့်ဘေးတိုက်တစ်လမ်းကျော်က အေဆိုင်မှာ နုရို့စားနိန်ကျ။ နုက ဆာဆာနန့် အီတလီခေါက်ဆွဲ
တစ်ပွဲလုံးကုန်အောင် တီးပစ်လိုက်စွာကို အောင်က အေပိုင်ထိုင်ကြည့်နိန်ခပုံရယင့်။
“ အင်, ပီဇာ အေလောက်ကြိုက်တေသူက ဇာလို့မကုန်လဲ “
နုက အံ့သြသင့်ပနာမိန်းရေအခါ ,
“ ကိုယ် , တရုတ်မ တိုက်လိုက်တေ ကော်ဖီ ကကောင်းသောက်ပစ်ခလို့ ရင်ကယ်နိန်ရေ“ လတ် ။
သူ နု ကို အိမ်ပြန်လိုက်ပို့နိန်ခရေအခါ အပြန်လမ်းက စိကေချေတိတ်ဆိတ်နိန်ရေလို့နုထင်ရေ။ အခါတိုင်း
ဖွင့်နိန်ကျတေးချင်း (You Shouldn’t Kiss Me Like this )တောင် မဖွင့်ပြန်ရေအခါ တစ်ခ,ု ခုလိုနိန်ရေပိုင် နု
ခံစားမိသိမ့်ယင့်။ တစ်နိန်ရာရောက်တေအခါ သူရေ ကားကိုတုန့်ကနဲရပ်ပစ်လိုက်လို့ ချိုင်းချီကပြန်လာခါကပိုင် နု

လန့်လားပြန်သိမ့်ရေ။ ကားဇာဖြစ်လို့လဲမသိဆိုရေစိတ်နန့် အကဲခတ်ကြည့်လိုက်တေအခါ ကားတစ်ခုလေ့သော
ဖြစ်ပုံမရ။ အောင် စိကေချေထူးဆန်းနိန်ရေလို့ထင်နိန်တုန်းမှာပင် သူ နု ဖက်ကိုယိမ်းထိုး လာခပနာ နုကို
သိမ်းကျုံးဖက်ယူထားလိုက်တေ။ နု အသက်ရှုတောင်ကျပ်လားဖို့လောက်။ သူ ဇာဖြစ်နိန်စွာလဲ။ နု တစိချေ
ကြောက်စပြု လာပနာ သူ့လက်မောင်းတိတို ခွါချကေလေ့ ခွါလို့မရ။ ပြ ပြင်း၊ ရှရှ သူ့အနမ်းတိအောက်မှာ သူ့ကို
နားမလည်နိုင် ။ သူစွာ တဆိတ်ချေ စိတ်နန့်ကိုယ်နန့် လွတ်နိန်ရေသူပိုင် ။

“ ဆောရီး နု , ကိုယ် ……… “
ဆက်မပြောပဲအေလောက်နန့်တန့်ထားပနာ အချေတစ်ယောက်ပိုင် နု ပက်ခုံးထက်မှာ မှိန်နိန်ပြန်ရေအခါ နု သနား
စိတ်နန့်သူ့ကိုပွတ်သတ် ပီးနိန်မိရေ ။

အောင်ဇာဖြစ်လို့လဲ

နု မ၀ံ့၊ ဒ၀ံ့ မိန်းကြည့်ကေလေ့ သူကဆဆိတ်ချေပင် နု ပါးမှာမှိန်နိန်တုန်း။ ပုံမှန်ထက် စိကေချေယင်နိန်ရေ
သူ့အသက်ရှူသံတိကို နု အတိုင်းသားကြားနိန်ရယင့်။ လက်ဝါးချင်းထပ်ပနာ ဆုပ်ထားကတ်လို့ သူ့လက်ဖ၀ါးက
သွီးကြောချေတိ ဆဆတ်ချေခုန်နိန်စွာကိုလေ့ နု သိနိန်ရပြန်ရေ ။ တနားချေမှာပင် စိတ်လက်မအီမသာဖြစ်လာပုံရရေ
ချစ်သူကို နု ဇာပိုင်လုပ်ပီးရပါဖို့။ နှလုံးသားထဲမှာ သူ့ကို နနက် ရှရှိုင်းစိုက်ထားပြီးခယာဖြစ်လို့ ချစ်သူပျော်သမျှ နု
ကြေနပ်နိန်တတ်ပနာ ချစ်သန
ွူမ်းရိနိန်ပြန်ကေလေ့ နှလုံးသားကပါလိုက်ပနာ နွမ်းနိန်တတ်တေအခါ အချစ်ဆိုစွာ
ကိုင်းချင်းဆက် သစ်ပင်ချေတစ်ပင်ပိုင်လည်း ဖြစ်တတ်သိမ့်ပါရေလားဝေ ။

အခန်း ( ၉ )

“ ဒဏ်ရာတစ်စ နှလုံးသားမှာ
ချန်ခခြီရာ ရင်နန့် ရင်းခါ
ပုံပြင်တစ်ပုဒ် အချစ်သင့်စ…
ီ ………”
ဗေဒင်တစ်ခုလေ့မဟုတ်ခ။ ပုံပြင်တစ်ခုလေ့မဟုတ်ခ။ နု ရှိတတည့်မှာ မျက်နှာချင်းဆိုင် ပြောနိန်ခကတ် စွာဖြစ်လို့
နားကြားလွဲခြင်းလေ့မဟုတ်ခ။ ထိုခါက နု ကြားခရပိုင် တစ်ဆင့်စကားလေ့ မဟုတ်ပါပဲနန့် နု မယုံကြည်ချင်။
“ အရီးက ကိုယ့်ဝမ်းနန့် မလွယ်ခရစွာရာတစ်ခ,ု မွီးကင်းစ နှစ်ပတ်သားလောက်ကပင် ယင်းကလေ့မေချေ
လာပီးခစွာ၊ ပြတ်သလားမမိန်းကဲ့ တစ်နာရီတောင်မထိုင်ခပဲ အိမ်ထက်ကဆင်းလားခရေ ။ ယေတာလေ့အချေကို
အရီးရို့ပါးသို့ ပီးဖို့ကြိုတင်လေ့လာထားခပုံရရေ “
အောင့်အမိ အရီးအောင်မဖြူက မျက်ရည်စတိကို လက်သုပ်ပ၀ါနန့် စစမ်း၊ စစမ်းတို့ပနာ ပြောနိန်ခစွာတိ ။

“ အငယ်ချေခါ ချူချာအားကြီးလို့ သူ့နာမည် သက်ဟန်ထူး ကနိန်ဗျာယ် နိန့်နံကိုက်အောင် အောင်မြတ်လင်းလို့
အဖသေမှာပြောင်းပစ်လိုက်ခစွာ “
“ အော့ “
နု ဟန်လုပ်ပနာ သောက်နိန်ခရေကော်ဖီတိ လိုင်ခြောင်းအပေါက်ဝသို့ ပြန်ထွက်လာကတ်တေ ။

“ ဟန်ထူးချေကို အင်ဂျင်နီယာတစ်ယောက်ပါးကို ပီးပစ်ခစွာလတ် “
သူ့ရှိမှာမှ နု ပြောထွက်ခရရေလို့။ ညွှန်ကြားရေးမှုးအန်တီရို့က သူ့အသက်အရွယ်နန့် ယင်းအချေလို့ ပြောနိန်
ကတ်လေ့သော့ ယင်းအချေက နု နန့်ရွယ်တူတစ်ယောက်လည်း ဖြစ်နိုင်ရေလို့ ဇာဖြစ်လို့ မစိုင်းစားနိုင်ခပါလေ့ ။
“ ခြောက်တန်းလောက်မှာ သူ့အဖဖက်က အဘောင်မသေ အောင်ချေကို တွိချင်လို့ရောက်လာခရေအခါ အောင်ချေ
မသိအောင် အရီးရို့မှာ ဖုံးဖိရသိမ့်ရေ။ အဘောင်မသေက အောင်ချေခုနစ်တန်းမှာ တစ်ခါပြန်ရောက်လာပနာ
အချေကိုပြန်ပီးပါလတ်။ အရီးကိုယ်ချင်းစာကေလေ့ ဇာပိုင်ပြန်ပီးနိုင်ပါဖို့သိမ့်လေ့ ။ ယင်းကြောင့်ပင် အရီးရို့စင်္ကာပူကို
စစော၊ စစီးရောက်လာခကတ်စွာ။ အဘောင်မသေနန့် အရီးရို့ပြောနိန်ကတ်စွာ တချို့တလီကို အောင်ချေ
ကြားနိန်ခစွာမနား။ အချေမလို့ဆက်စပ်မစိုင်းစားတတ်ခစွာလတ်။ ယင်းနိန့်ခါေ အာင်ချေပြောပြမှရာ
အရီးရို့လင်မယားသိရစွာ ။သနားဖို့ကောင်းလိုက်တေအချေ ၊ အေအချိန်ထိ ကျိတ်ပနာခံနိန်ခစွာ “
မျက်ရည် ချချောင်းစီးဗျာယ် အရီးပြောနိန်ခစွာတိကို နု ကြားတစ်ချက် မကြားတစ်ချက်။ ရင်ထဲမှာနာကျင်
ရအားကြီးလို့ နှလုံးသားက တစ်စစီပဲ့ကြွီဖို့ယာ ။
“ အေလောက်ကြာပြီးခါမှ အရီးရို့ဝါထားခကတ်တေလို့ထင်ဖို့စွာကို အကြောက်ဆုံး “
…………………………………………………………………….”

ကျိန်စာတစ်ခုကို နု အရှင်လလတ် ကျခံနိန်ရစွာလား ။ နု ဇာဝဠ်ကြွီးတိဟိခလို့ မှားယွင်းမှုတိကို စနစ်တကျ ပီးဆပ်
နိန်ရစွာပါလေ့ ။
“…သူ့သားအရင်းတစ်ယောက်လုံးကို ဇာဖြစ်လို့ အေပိုင်သူများကို ပီးပစ်ခရလဲဆိုစွာ စိုင်းစားလို့မရ……”
ယင်းစကားလုံးတိနန့် နုချစ်သူကို နု မြှုပ်သပ်ပစ်လိုက်မိယာ ။ ယင်စကားလုံးတိနန့် သူ့စိတ်ကို အနာတရဖြစ်စီခယာ ။
ဘ၀မှာ အေလောက်ကြောက်ဖို့ကောင်းရေ တိုက်ဆိုင်မှုဆိုကေလေ့သော့ ယင်းတိုက်ဆိုင်မှုက ကျိန်စာတစ်ခုကို
အံထုတ်ပစ်လိုက်ခဗျာယ် ။
“ ကိုယ့်ကိုယ်ကို အသူမှန်း မသိကေလေ့ နု ကို,ကိုယ်မချစ်ပဲ မနိန်နိုင်ယာ “
ဆိုလား၊ ဇာလား ဗလုံးဗထွီးစကားတိကို နု နားမလည်နိုင်ခ။ သနားဖို့ကောင်းလိုက်တေချစ်သူ။ သူ့ကိုယ်သူ
ဇာသူလဲမသိဆိုရေ မထင်ဝိုးဝါးခံစားမှုတစ်ခုနန့်ရှင်သန်နိန်ခရလို့ရာ သူ့မျက်လုံးထဲမှာ နု မဖတ်တတ်တေ အရိပ်တစ်ခု
ဟိနိန်ခစွာမနား ။ မိဘမဲ့အချေတိကို ဇာပိုင်ခံစားမှုတိနန့် သူဖြည့်ဆည်းပီးနိန်ခလီဖို့။ ဇာဖြစ်လို့ နုရို့ ပါးကိုရာ

အေမှားယွင်းမှုက ရောက်လာခစွာလဲ ? အဟင့်, အေချင့် နု မယုံပါရစီကဲ့ ။ အေပိုငြ် ကွီကွဲမှုတိနန့် ချစ်သူကို
မပူလောင်ပါရစီကဲ့။ နု စိတ်တိ လွတ်ထွက်လားခဗျာယ်လား နု ကိုယ် နု မသိ ။ လမ်းလား ၊လမ်းလာတိက
နုကိုကြည့်ပနာ တစ်ခုခု ပြောလားကတ်တေလား နု မသိ။ နု ရင်ထဲမှာ စစူး နနစ်နာကျင်နိန်ရေစွာကိုရာ နု သိရေ ။
ရင်ငွိ့နနွီးချေတစ်ခု နု နောက်ကြောမှာ လာဟပ်စွာကိုရာ နု သိရေ။ အနောက်ကနိန် သိုင်းဖက်ပနာ အရှိသို့လျှောချ
လာရေ သူ့လက်နှစ်ဖက်ကို လှည့်ကြည့်စရာမလိုပဲနန့် တတင်း ကျကျပ်ဆုပ်ညှစ်ထားမိရေလား။ တစ်သိမ့်သိမ့်နန့်
ရှိုက်ငင်နိန်ရလို့ သူ့တစ်ကိုယ်လုံးပါ နုနန့် တတူတူလိုက်တုန်နိန်ခဖို့။ မျက်ရည်တိကို သူသုတ်ပီးနိန်ယင်းကမှ
တာကျိုးကျရေပိုင် စီးဆင်းလာကတ်ပြန်ယင့်။
“ နု “
ကြွီကွဲဆို့နင့်နိန်ရေ သူ့အသံမှာ အင်အားတိမဟိ။
“ အောင် ၊ နု ကို တစ်ခု ခုလုပ်ပစ်လိုက်ပါလာ………”
နု စကားတိဆုံးအောင် မပြောလိုက်ရသိမ့်ခင် သူ့လက်ချောင်းတိက နု နခမ်းကို လာပိတ်ထားလိုက်ကတ်တေ ။
“ နု ဇာမှားယွင်းခလို့လေ့၊ နု ရင်ဘတ်ထဲမှာ ဟန်ထူးချေဟိနိန်ခလို့ရာ ကိုယ်ရို့ချင်းတွိခွင့်ရကတ်စွာမနား ၊
ကိုယ်ရို့ချင်း မတွိခင်ကပင် ကိုယ်ရို့သိနိန်ခကတ်တေလေ “
ချော့သိပ်ပနာပြုံးပြနိန်ရေ သူ့မျက်နှာက နွမ်းနယ်လှပါယင့် ။ သူ အေချင့်တိကို ဇာပိုင်ဖြတ်ကျော်နိုင်ပါဖို့လေ့ ။ သူ့မိဘ
အရင်းတိကို သူဇာပိုင်စိတ်ထားမျိုးနန့် မွတ်သိပ်နိန်လီဖို့။ သူ့ချစ်သူကို ဇာပိုင်နှစ်သိမ့်မှုတိ၊ အကြောင်းပြချက်
တိနန့်စွန့်လွှတ်ပစ်ခ၀ံ့ဖို့။

“တွိခွင့်ရရုံသက်သက်က နုရို့အတွက်မရက်စက်လွန်းအားကြီးလား အောင် “
သူ့ရင်ခွင်မှာ မှိန်ထားယင်းကပြောရေ နု အသံက ထွက်တေဆိုရုံချေ ။
“ ကိုယ့်ကိုယ်ကို ရေရေ ၊ ရာရာမသိထားရေ လူတစ်ယောက်ကိုမှ ………. “
လီထဲမှာလွင့်ပါနိန်ကတ်တေ နု ဆံမျှင်စချေတိကိုလိုက်ဖမ်းယင်းက သူ့စကားလုံးတိကို တစ်ဝက်တစ်ပျက်နန့်
ရပ်ပစ်လိုက်တေ။

“ နု ရို့ အချိန်တစ်ခုနန့် ကုစားကြည့်ကတ်ဖို့လား အောင် “
သူ သက်ပြင်းတစ်ခုကို နု မသိအောင်အသာချေ ခိုးချဖို့ကြိုးစားယင်းက
“ ကိုယ်ရို့အဖြစ်က အချိန်နန့်ကုစားလို့ရနိုင်လို့လား၊ နုနန့် ကိုယ်က မျိုးနွယ်မတူကတ်ဗျာယ်လေ………..”
…သူ့အသံက……တိမ်ဝင်လားခရေလား ။……
“ အောင်, လသားချေကပင် ရခိုင်တစ်ယောက်ဖြစ်နိန်ခစွာလေ “

သူ့တစ်ကိုယ်လုံးကို လှုပ်ခါပစ်လိုက်ယင်းက နု စိကေချေ, ကျကျယ် လလောင်အော်ပြောပစ်လိုက်တေ ။
သူရယ်နိန်ယင့်။ ရယ်နိန်ရေသူ့မျက်နှာမှာ မျက်ရည်စတိ တွဲလွဲခိုနိန်ကတ်ဗျာယ်လား………။ …
“ အမှန်တရားတစ်ခုကိုသိယင့်နန့်ပင် ယင်းချင့်ကို မဟုတ်လို့ မသိကျိုးကျွံပြုထားရရေ စိတ်ဒုက္ခမျိုး နုကို, ကိုယ်
မရစီချင် ၊ နုရို့မျိုးနွယ်ကို နုမြတ်နိုးသလောက် ကိုယ် ယင်းချင့်ကို အလေးထားပါရေ နု ၊ “
သူ့စကားလုံးတိကို ခွန်းတုန့်ပြန်ဖို့ နုမှာ အင်အားတိ မဟိယာ။ ဧကန္တ သူ အေစကားလုံးတိနန့် နှစ်သိမ့်ပနာ
သူ့ချစ်သူပါးက ထွက်ခွါလားဖို့ ပျင်နိန်ယာလားမသိ။ နာကျင်နိန်ရစွာတိ ပြပြေ ပျပျောက်ဟိဖို့ဆိုကေ နု တစ်ချက်ချေ
သီးခံစောင့်ပီးပါမေ ။ ထွက်မလားပါကဲ့ချစ်သူ ။ တစ်ချက်လောက် ထွက်မလားလိုက်ပါကဲ့။ ………
“ နု ကတော့ခါ အရူးတစ်ယောက်ပိုင် ဖြစ်နိန်လီဖို့ထင်ရေ “
နု လက်ဖ၀ါးနှစ်ဖက်စလုံးကို ဆုပ်ကိုင်ပီးလာရေ သူ့လက်ဖ၀ါးတိက ဟွေတစ်ခါကပိုင် ပပူ နနွီးမဟုတ်။ ဘုရားသခင် !
သူ့လက်ချောင်းတိလေ့အေး (အီး) စက်လို့ပါကားဝေ ။
“ သတိရရေစွာတိကို နု ပြောရေ အချိန်တစ်ခုနန့် ကုစားလို့ရရေလေ, နောက်ဆိုကေ နု နိန်သားကျလားလိမ့်မေ “
သေချာရေ။ အေနှစ်သိမ့်မှုတိနန့် နု ကြားထားခရေအတိုင်း သူ နု ပါးက ထွက်လားဖို့ပျင်နိန်စွာ ။
“ အောင် အဂင့်ဆုံးဖြတ်ပြီးယာပ ၊ ယင်းကိုလားဖို့ “
တချိန်လုံး မမိန်းချင်ခရေစကားတစ်ခွန်းကို နု ခရီးမိုင်ထောင်ချီကလာခရေ ပင်ပန်းနွမ်းနယ်မှုပိုင်မျိုးနန့် သူ့ကို
မိန်းလိုက်တေ။ မပြောလိုက်ပါကဲ့။ ကိုယ်ဆုံးဖြတ်ပြီးယာလို့အချက်လောက် မပြောလိုက်ပါကဲ့ ချစ်သူ။ နု
ဆုတောင်းရေအတိုင်း သူ မပြောလိုက်ခ ။ အဂယင့်ကိုမပြောလိုက်ခစွာ ။ ယေကေလေ့ နု ဆုတောင်းမပြည့်ဝခပါဝေ ။
ဆ, ဆိတ်နိန်ခြင်းရေ ၀န်ခံခြင်းတစ်ခုဆိုစွာကို နု သတိလက်လွတ်ဖြစ်မိလိုက်တေမနား။

လတ်ဗီးယား ( Latvia )

အထိတောင်မှ။ ဘာလတစ်ပင်လယ်( Baltic Sea )နားက လတ်ဗီးယားဆိုရေနိုင်ငံတစ်ခုမှာ သူ့တာဝန်ကို
ထမ်းဆောင်းယင်း ဘ၀ထဲကအိမ်မက်ဆန်ရေရက်စက်မှုတိကို မိန့်နိုင်သလောက်မိန့်ပျောက်ပစ်လိုက်ဖို့ သူ
ထွက်လားဖို့ယာ။ ဟင့်အင်း လတ်ဗီးယားအထိမက သူချစ်မြတ်နိုးရေ မ,မတစ်ယောက်ပါးကပါ တစ်ဘ၀စာလုံး
ထွက်လားဖို့ယာ။ လားလီ အေလောက်လားချင်နိန်မှတော့ခါ လားလီ။ ၀ီးနိုင်သမျှ ၀,၀ီးလားလီ။ နု သူ့ရင်ဘတ်
တစ်ပြင်လုံးကို အရူးတစ်ယောက်ပိုင် ထုထောင်းနိန်မိစွာလား။

ပင်ပန်းအားကြီးလို့ သူ့ရင်ခွင်မှာ တနားချေ

မှိန်းနိန်မိလိုက်တေအခါ နားနန့်ကြားနိန်ရရေ တဆတ်ဆတ်တုန်ခါမှုတစ်ခုက သူ့ငိုသံလား။ ချစ်သူ့ငိုသံလား။
ချစ်သူ့ငိုသံဆိုမှတော့ခါ နာကျင်ကြွီကွဲရပါယင့်ဝေ ……..။

နိဂုံး

ခြီသံလုံလုံနန့် စိတ်ရှည်လက်ရှည်စောင့်နိန်ခရေဆန်းကြယ်မှုတစ်ခုက ပီးလာဖို့ဝမ်းနည်းကြေကွဲမှုတိကို
နှလုံးသားနန့်ရင်းပနာ ပီးဆပ် လိုက်ရဖို့လို့ ဆံခြည်မျှင်ချေတစ်မျှင်လောက်တောင် နု မတွေးမိဖူးခ။

ဆယ်စုနှစ်တိနန့်

နနောင်းနနင်း ရစ်ပတ်ဖွဲ့နှောင်ထားရေ လူတစ်ယောက် ကို နာကျင်ယင့်နန့်ပင် လွှတ်ချပစ်လိုက်ခဖို့အထိ
တွယ်ငြိစီးဝင်လာရေ အခြားနက်ရှိုင်းမှုတစ်ခုထဲမှာ ရင်ခုန်လှိုက်မော ခြင်း တိကို ပန်းချေတစ်ကုံးပိုင် သီကုံးနိန်မိ
လိုက်မေလို့လေ့ အိမ်မက်တောင်မမက်ဖူးခပဲနန့် ဂုတော့ခါရင်ဘတ်ထဲကအိမ်မက်တစ်ခုကို နု အမှတ်တရ

သိမ်းထားခွင့်ရလိုက်တေ ။ ယင်းအိမ်မက်ကို သိမ်းထားရဖို့စွာက အချိန်ကာလတစ်ခုအထိလား၊ တစ်ရာသီစာလုံးလား
နုမသိ။ လီဟာနယ်တစ်ခုထဲမှာ

ဦးတည်ရာမဲ့လွင့်ပါနိန်ရေဒြပ်စိုင်တစ်ခုပိုင် နှလုံးသားကလပ်ဟာနိန်ပနာ

လည်ခြောင်း ပေါက်ဝတစ်လျှောက် နင့်သီးမှုတိနန့် ပိတ်ဆို့မွန်းကျပ်နိန်ကတ်တေစွာကိုရာ သိနိန်မိရေ ။ ဖြူဖြူ လွလွှ
တိမ်တိုက် တိကြားမှာ

တဒုန်းဒုန်းနန့်ဆောင့်မိနိန်စွာက လေယဉ်ပျံကိုယ်ထည်လား။ နှလုံးသားတစ်ခုလား။

သို့တည်းမဟုတ် အချစ်သင့်စီခရေ ပုံပြင်တစ်ပုဒ် ရာဇ၀င်လား ။
လေးစားမှုနန့်
ခင်ငြိမ်းချမ်း ( ၀၂.၀၇.၂၀၁၁ )

( " အာရက္ခရသ စာစု " က ကူးယူဖော်ပြပါရေ )