KABU VERDI, DI-MEU !

By Dr. Azágua

Kabu Verdi, di-meu,

Terra di monti
kutéluy txada
Lansiadu
na mar-Atlântiku;

Terra bistidu di verdi

y korpu nú-príti;
nosênti,
sima Déus manda-bu mundu.
Terra di tudu kór,
Praias di mar-vírjen sen fin,
Di areia prétu y branku!

Kabu Verdi, di-meu,

Terra d’ómis di férru
y mudjês di ôru;
Tók’es surri,
korasãu ta bate
Tók’es spia,
korpu ta treme.

Ê amor! Ê própi amor!

Ê amizadi na korasãu!

Kabu Verdi, di meu,

Lonji bo, N ta suspira
Má senpri N ta spia-bu
Ku ôdju di nha alma!

Ku karinhu prufundu
N ta spia-bu di lonji;
P’amor di bu fidju
Ka ten distánsia
n’es mundu entri nos!

Ka ten!
Ka pode ten!
Ka pode ten!