Azágua pa tudu banda!

By Dr. Azágua

Nu koba!
Nu simia!
Nu monda!
Nu ramonda!
Nu kebra-flôr!

Mindju tâ dâ!
Fijon ku bongolon
Faba ku batata
ta nada na padjigal!

Baza mindju na pilon!

Kada kenha ku sê pó!
Kôtxí pa faze katxupa!
Pila pa faze kuskus!
Tente pa trâ farélu...
Tente pa trâ farinha...

Kukus kenti
na kuatu bindi;
Kafé ferbêdu
na três xalêra;
Katxupa riba lumi
na dôs kaldêra;
Batata ku mindju asadu
na ladu fogon,
na brasada!

Ê txuba ki ben!
Ê azágua ki dâ!
 Garnel na kintal
Ka un, ka dôs
Mantêga na karman
Lêti na bulí
Kêju na balaín
Kárni sargadu na fundu póti
Txôrisu ku longísa
na kanbilítxi.

Di dia, ê sabura ku fartura

Di nôti, ê konta-párti
y konta-stória!

Nha gêntis:
Ê txuba ki ben!
Ê azágua ki dâ!
Xâ txuba ben!
Xâ azágua dâ!