Xa-m li, kêtinhu!

By Dr. Azágua

Tudu dia, ê dia!

Tudu nôti, ê nôti!

Dexa-m li, kêtinhu!

N ka ten pergunta
N ka ten respósta.
Ka ten palavras ki ta konsola-m.

Xa-m fika li-sin, kêtinhu!

Sintadu
Sérénu
Susegadu,
Báxu d’ês árvi.

Xa-m li kêtinhu!
Si kabra ka kume fódja
El ta kume papel.
Si ten papel.

N ka ‘mporta
Si ta ben txuba ó nãu!
Djâ bu obi?
N nase sen txuba
N pode morre sen txuba!

Bai!...
Ba ta bai!
Bá enbóra!
Xa-m li, kêtinhu!
N ka krê,
N ka stâ txora más!

Águ djâ seka-m na ôdju.

Xa-m djongo un pôku
Pa-n diskansa kabésa.
N ka tene présa!

Dexa-m li, kêtinhu!

Kô pergunta-m
Si stâ di dia
ó di nôti.

N ka ten respósta.

Tudu dia, ê dia!

Tudu nôti, ê nôti!