Fidju di Djârfogu

Sinza di Vulkan
By Dr. Azágua

Ê mi k’ê fidju di DjârFogu!

Ê mi k’ê sinza di Vulkan!

Na kêl monti...

Kêl monti bêra séu

N batizadu ku skóntra

N ta kazadu ku vinhu manêkon

N ta nterradu ku inxófri!

Ê mi k’ê galu

Maridu galinha!

Nha krista ê sérra

Nha biku ê gúdja

Nha aza ê spada

Nha spóra ê faka.

 Tó ki-n kanta

Galinhas ten ki labanta!

Mi na nha pulêru!

Bo na bu gudjêru!

Ê mi k’ê fidju di DjârFogu!

Ê mi k’ê sinza di Vulkan!

Ê mi k’ê galu di DjârFogu!

Ê mi k’ê donu di madrugada!

Na nos fésta stranhu ka ten!

Nos tudu ê branku, prétu, mulatu paxonadu!

N’es kalor umanu

Di tenpu y paixãu;

N’es luar di madrugada

Dâ mudjês drópis

Nôti ê di-bo!

Na ritmu violãu

Na konpásu kavakín

Na monzada vióla

Na txôru violin!
 Si terral riska

Paga kandía;

Si galu kanta

Torsê-l piskós!

Si kábu pega lúmi

Xa-l kema!

Xa-l kema!

Oj’ê nos nôti!...

Nôt’ê di nos!...

Nôt’ê di nos!...