CCC

Established 2004 THANGLAWI

Vol. 5 No. 3 May 2009

A Nung in Pekchanhmi Thawinak (Rom 12:1)

Sianguk Aanka

Hmasabik ah dam tein 2008-2009 cacawn kum a dongh tiang lam a kan hruaitu
Pathian kan thangthat. Minung kan sining i a thuhnak bik hmun in Halleluiah tiah kan au.
Zeicahtiah kan tonmi harnak cu voi dang harnak bantuk a si lo, a zual khun.

Kan ram ah Nargis thlichia nih zaangfahnak a pelte hmanh ngei loin a kan den.
Vawlei cung chawtuah le chawkawlnak sining a tum thluahmah. Lairam ah mautaam a
tlung. Mautaam nih a phak lonak ah pam a tlung. Kum a vui lo. Hibantuk harnak lakah
kum dongh tiang a kan umpitu Pathian cu thangthat loin kan um kho lo.

Cun 2009 in 2012 tiang CACC riantuantu thimnak ah sianguk rian tuan ding ah
CACC hruaitu upa nih nan ka thim than tikah lunglawmhnak tampi ka ngei. Pathian ka
thangthat fawn. Lai phungthluk “Aa lung lo nih tumka bawh hlah” ti a si. Tlamtlilonak lei
khel in tuak ahcun keimah nakin tumka bawh ngamtu an um ko lai. Sihmanhselaw
Bawipa nih a kan umpi ko lai ti zumhnak le nanmah pakhat cio dirkamhnak bochan in
sianguk rian cu lunglawm tein ka cohlan. Zapi hmai ah biakamnak kan tuah lo nain ka
lungkil saduhthah cu Bawipa sin ah ka chim.

Mi-phung le sa-lam khin CCC caah tuan na duhmi zeidah a si tiah ka hal hna seh
law pakhatnak ah kumsau ca saduhthah ahcun Chin Christian University dirh a si ko. Cu
ti kan dirh khawh nakhnga fimthiamnak lei thil kalning (Education system) hi biatak
deuh in hlathlai kan hau tiah ka ruah. Zeicatiah vawlei cung fimthiamnak kalning hi aa
nawnnok ngai. Kap khat lawng in hmuh a fawite. Vawlei cung dihlak nih i hrawmmi
kalning (system) a um lo. Cun university sining hmanh a hei cuan kho cangmi sianginn
ah degree allowance pek tbk hi cu a rauh hlan ah kan kaltak zau lai tiah ka ruah. Vawlei
cung ah degree allowance aa pemi sianghleiruun hi an um hmanh ah cawntlak cu an si lai
lo dah.

Pahnihnak ah tuahcolh ding saduhthah cu 2010 ah M Div parawkrem thawk le

innpi (main building) sak hi a si. Sianginnn tha timi cu inn le lo thatnak ah a si bik lo.
Oxford le Cambridge tbk minthang sianghleiruun hna zongah inn hlun tete an tam pi ko.
Sihmanhselaw cacawnnak khan hmanh i za setsai lo le pumhnak hmun zong ngei reprai
loin a riangvai mi sianginn cu sianginn tha tiah kan ti kho lo. Lai miphun sersiamnak le
mission rian kan ti mi zong ahhin CCC a tha a thawn lo ahcun mah duh bangin hma a kal
kho lai lo.

Nan theih cio bantuk in Jimmy Carter kha USA President ah an thim i biakamnak
a tuah lio ah mah Baibal ca hi a rel: “Nan nih hmun kip kaa kip i a um mi vialte hna,
Pathian nih thil tha kha zeidah a si ti cu an chimh cang ko tung hna. An halmi hna cu,
ding tein thil ti le zaangfahnak ngeih le nan Pathian hmai i toidor tein khuasak kha pei a
si ko cu” (Micah 6:8). Baptist Khrihfa upa a si caah maw zei dik, Jimmy Carter cu mi
thakhrang asi theng lo nain ka upat ngai.

Profet Micah chimmi dinnak, zaangfahnak le toidornak chungah rian kan tuan ti
lai, ca kan chim ti lai, thla kan cam ti lai, miphun sersiamnak rian paoh ah kut sih in kan
tang ti lai. Democratic education cu zeidah a si set ti hi CCC tal ah a muisam lang kho
seh law ti cu saduhthah a si.

CACC Triennial Meeting

A voi sarihnak CACC Triennial Meeting cu March 14-17, 2009, Salem Baptist
Church, Tahan ah tuah a si. “Zumhnak Hman” timi tlangtar in Thawngtha Bia an kan
chimh.

2009 in 2012 tiang chelkhat ca caantling riantuantu ah thim mi hna cu:

1. General Secretary ah Rev. Dr. Hla Aung;

2. Literature and Publication Secretary ah Saya Ram Mang;

3. Culture and Audio-Visual Department Secretary ah Pastor Van Lal Hngak;

4. Social Service and Development Department Secretary ah Rev. Amos Di Van, le

5. Education Department Secretary ah Rev. Dr. H. Siang Kung an si.

Awnnak Dikari Peknak

A voi hleiruknak awnnak dikari peknak cu March 8, 2009, Hakha Baptist Church
ah kan tuah. Awnnak a hmu mi B Th 25; Dip Th 11; BAE 14; BRE 2; an dihlak 52 an si.
1994 in 2009 tiang CCC in a awngmi 722 an si. Pathian kan thangthat ko.
Nihchuak Bia

Chin Christian University tuah khawhnak caah bia ruahnak:

Sang Cem: Ka awnmi dikari a sang bik.

Tha Kil: Ka kainak sianginn a tha bik

Pa Duai: Ka cawnmi subject a biapi bik.

Tenglam: Nan dihlak M P nan si kho.

Sang Cem: Professional si hi kaa duh deuh

Tha Kil: Politiks cu ka zuam nemmam lo.

Tenglam: M P cu nan si ko.

Pa Duai: Zeibantuk MP?

Tenglam: Mah Porh (M P)

ZBC BM Meeting

A voi riatnak ZBC BM meeting cu March 19-22, 2009, Pinkhungci, LBA ah tuah
a si. ZBC ram chung Baibal sianginn in pakhat cio kai khawh a si i CCC principal a kai
ve. “Pathian Lam Kha Din Ter U” (Isaiah 40:3-5) timi tlangtar in Thawngtha Bia an
chim. ZBC General Secretary a si mi Rev. M. Thawng Kam nih Thawngtha a chimnak
ah, “Pathian nih kan caah lam a kan sial piak lai tiah an ruah lio ah amah Pathiantu nih a
caah lam sial ding a fial hna,” a ti. Pathian kan i bochan bantuk in Pathian nih a minung
hna a kan bochan ve ti kha CCC zong nih a hngalh zungzal a hau.

CCFDK Building

Chin Christian Fellowship in Denmark thazaang in sakmi CCC staff quarters

tlakrawh tenh inn dawhte dotkhat (two units) cu March 10, 2009 ah Pathian sinah
pekchanhnak tuah a si. CCFDK cung ah lunglawmhnak tampi kan ngei. A rauh hlan ah
Librarian le zung riantuantu chungkhar pakhat nih an hngah colh lai.
2009- 2010 cacawn kum caah

Sohhlua (Application Form) pakhat ah Ks. 1000 in cawk khawh a si.

Cawk khawhnak hmun:

* CCC Library

* CACC zung

* Henry Siang Kung inn

* Rev. Tin Hmung inn

Sohhlua cu a hnubik May 20, 2009 ah CCC zung phanhter ding a si. May 25,
2009 ni ah B.Th. Programme caah Luhnak Camipuai (Entrance Exam.) a um lai. A tutan
cu Bible ca teltheng lo in English lawng camipuai tuah a si lai.

Siangcachim Thar

April 30, 2009 i tuahmi CCC Boardof Trustees biachahnak bantuk in a tanglei hna
hi CCC siangcachim ah lak an si i June 1, 2009 in an lut lai.

1. Rev. Dr. Lian Do Kham (Ph D, Theology)

2. Lecturer Thlia Caan (M Th, CE, South Korea)

3. Leeng Hta Cin Sung (BA English, MUFL)

*Lecturer Ceu Cin cu a kum 60 a tling cang nain Mirang cachimtu ah a kumlinak
pehchap in a tuan lai.

* Lecturer Tial Peng (M Th, Hong Kong) cu second semester in a lut lai.

Main Building

2009 thal chungah CACC ramchung Khrihfabu hna sinah CCC Siangngakchia le
Sayate CCC innpi caah fund kawlpah in le thawngtha chim pah in an tlawn hna. Tutan
ah CACC ramchung zumtu hna nih CCC innpi caah an pekmi a dihlak Ks. 7,375,920/- a
si.
2009-2010 caah pek ding fees

Cawnman (Tuition): Ks. 100,000

Eidinman (Messing): Ks. 90,000

A dangdang : Ks. 9,500

Sianginn luh ka ah hin a tlawmbik ah pekdingmi a dihlak i 50% pek a si lai

Sangchin ah

Siangcachim William Khen Chum Bik cu MF, Oslo, Norway ah MTh kaiding in
admission a hmuh pin ah scholarships zong a hmu. A tu hi visa kong ah khual a tlawn lio
a si.

Chawnh na duh ahcun:

Ph: 21339 Office le Nu Hostel

Ph: 21888 Library le Pa Hostel

Ph: 21528 Principal

Ph: 21750 Academic Dean

Ph: 21800 Rev. Tluang Ceu

__._,_.___
.

__,_._,___