ANG SACRAMENTO SA ORDEN / HOLY ORDER

Panudlo sa Sta. Iglesia; Ang Sta. Iglesia nagatudlo nga ang Santos nga Pagordenar (Holy Order) usa ka sakramento nga gitukod ni Cristo, nga kini mobadlis sa dili mapapas nga timaan diha sa kalag. Pinaagi niining maong sakramento anaay natukod sulod sa Iglesia nga herarkiya nga naglangkob sa mga Obispo, mga pari, ug mga diakono. Ang pagka-Obispo labaw sa pagka-Pari, kay naa sa mga Obispo ang kinatibuk-ang pagka-pari ni JesuKristo ( the fullness of the priesthood of Jesus Christ ), sila ang naghupot sa gahom sa pag-Confirmar ug pagOrdinar.

 Ang mga Pari usab naghupot sa gahom sa pagconsagrar ug paghalad sa Lawas ug Dugo sa Ginoo ( the celebration of the Holy Eucharist ) ug pagpasaylo sa mga sala sa ngalan ni Cristo diha sa Sakramento sa Kompisyon. Sa ubos nga kahimtang sa mga Obispo ug mga Pari anaa ang mga Diacono, nga midawat usab sa pagpandong sa kamot, dili sa pagkapari, kundili diha sa sagradong mga bulohaton, isip mga katabang sa mga Obispo ug mga pari sa pagsaulog sa mga diosnon nga misteryo ilabi na sa Santos nga Misa.

 Ang Sakramento sa pag-ordenar ( Holy Order ) usa ka sakramento nga mohatag ngadto sa usa ka tawo sa gasa sa Espiritu Santo, sa paagi nga makahimo siya sa pagbuhat nga valido ug takos sa mga sagradong mga bulohaton sa Diacono, Pari, o Obispo. Busa kining maong sakramento mahimong ikahatag sa tulo ka hugna, pagka- diacono, pagka-pari, ug ngadto sa pagka obispo.

 PAGSUPAK; 1. Heb.7:24 = Diha sa Bag-ong Tugon wala nay laing pari, tungod ka yang iyang pagkapari wala itugyang sa lain. 2. Efeso 4:11 = Diha sa Iglesia wala na hisgoti nga dunay mga pari kundili mga apostoles, mga propeta, mga ebanghelista, mga pastor, ug mga magtutudlo na lang. 3. Mat. 23:9 = Ang mga pari magpatawag ug amahan apan si Jesus nagdili sa pagtawag ni bisan kinsang tawo dinhi sa yuta nga amahan tungod kay usa ra ang atong Amahan nga tua sa langit. 4. 1 Tim. 3:2 = Matod pa ni San Pablo ang Obispo bana sa usa ka asawa, apan ang mga Obispo nga katoliko walay asawa busa wala makasunod sa gitudlo ni San Pablo. 5. 1 Tim. 4:1-3 = Ang mga paring katoliko ang katumanan niini nagpatalinghog sa pagtolun-an o doktrina sa yawa nga nagpugong sa pagpangasawa ug naglikay sa pagkaog karne.

 TUBAG; Sa Daang Tugon ang Dios miingon sa iyang katawhan mga pinili;

Exo. 19:6 = Mahimo kamong usa ka nasod nga magalagad kanako ingon nga pari.
Heb. 7:11 = Apan taliwala sa katawhan duna say gipili nga mga pari nga moalagad sa altar nga gikan sa laray ni Levi ug Aaron. 1 Ped. 2:5 = Sa Bag-ong Tugon ang Iglesia mao ang bag-ong katawhan sa Dios, ug gitawag kini ug balaang mga pari nga maghalad sa espirituhanon ug makapahimuot nga mga halad ngadto sa Dios pinaagi kang Cristo.

 Luc. 6:13 = Apan taliwala sa iyang mga tinun-an si Jesus nagpili lang ug napulog-duha nga gitawag niya ug mga apostoles.

Ug gihatagan niya ug gahom sa pagtudlo nga wala niya gihatag ngadto sa uban. ( Mat. 28:19-20 ) Ug sa pagpasaylo ug mga sala ( Jn. 20:22-23 )
Sa paghukom ug pagdumala ( Mat. 18:17-18 ) Ug gahom sa paghalad sa iyang lawas ug dugo ubos sa bayhon sa pan ug bino. ( Luc. 22:19-20 )

 Ug pagpili ug mga sumusunod pinaagi sa pagpandong sa mga kamot ( 1 Tim.4;14 ) Sa Biblia atong mamatud-an nga pinaagi sa pag-ampo ug pagpandong sa kamot ( ordination ) ang mga apostoles nagpili ug mga kaabag ( deacon ) ug mga sumusunod nga mga pari. Buhat 6;3-6 = nagpili sila ug pito ka tawo ug ilang gidala ngadto sa mga aposles, ug ang mga apostoles nag-ampo kanila ug nagpandong sa ilang mga kamot. Buh.13:3 = si Pablo ug Bernabe gi-ordinahan sa mga pangulo sa Iglesia sa Antioquia pinaagi sa pag-ampo ug pagpandong sa kamot ug unya gipalakaw sila.

 ( Busa pinaagi ning maong rito sa pag-ampo ug pagpandong sa kamot si San Pablo ug Bernabe nahimong embahador ni Cristo nga may autoridad sa pagwali ug pagbalaan.

2 Tim. 1:6 = Si San Pablo nagpahimangno ni Timoteo; tungod niini, pahinumduman ko ikaw sa paggamit sa gasa nga gihatag sa Dios kanimo sa dihang gipandongan ko ikaw sa akong mga kamot.
Dinhi napamatud-an nga ang mga apostoles nagpili ug mga kaabag ug mga sumusunod nga mga pari pinaagi sa pag-ampo ug pagpandong sa ilang mga kamot. Kining pag-ampo ug pagpandong sa kamot Usa kini ka makita nga timaan sa paghatag ug gahom o autoridad sa pagka-Pari.

 Dugang pang mabasa, nga si San Pabo ug Bernabe sa matag Iglesia nagtudlo sila ug mga pangulo; ug uban sa pag-ampo ug pagpuasa ilang gitugyan sila ngadto sa Ginoo. ( Buh. 14:23 ) Dinhi masabot nga si San Pablo ug Bernabe mga Obispo kay may gahom man sila sa pag-ordenar usab sa uban. 1 Tim. 5:22 = si San Pablo nagpahimangno usab kang Timoteo, nga maila nga usa usab ka Obispo; Ayaw ipandong pagdalidali ang imong mga kamot kang bisan kinsa alang sa buluhaton sa Ginoo.

 ( Kining Sacramento sa pagka-Pari nga tinukod gayod Cristo dili lamang mabasa sa Biblia, gipamatud-an usab sa unang mga magtutudlo sa Iglesia ( Church Fathers ) ug mga karaang mga tagsulat ( ancient historians ).

San Ignatious sa Antiquia, 107 A.D. = ( Philad. I; Ephes. VI).

San Cypriano = ( Opera Cypriani, Ep. 66, p.729 / Ibid. App.94,3 ) Bishop Clarus = ( Ibid, Sent. Epesi. N, 79). Firmilian, Bishop of Caesarea, 269 A.D. = ( Ibid, Ep. 75, p. 821).

St. Gregory of Nyssa, 395 A.D. = ( Orata In Bap.Christi )

 MGA TUBAG SA PANGUTANA; 1) Ang wala itugyan sa uban mao ang paghalad sa iyang kaugalingon sa krus. ( Heb.9:14 ) Pero ang buluhaton ingon nga mga pari, gipaambit. ( Exo. 40:15 ) Apostoles = gihimong mga pari, ( Luc.22:19-20 ) 2) Ang Iglesia dunay mga pari: 1 Ped. 2:5 ; Rom. 15:16; Tito 1:5; Pin. 5:10

 3) ANG PAGTAWAG UG AMAHAN SUMALA SA BIBLIA; 1. Amahan sa pagka-Magbubuhat = ang Dios ( 1 Cor.8:6 ) 2. Patriarca ( Abraham ) gitawag ug amahan, ( Luc. 16:14 ) 3. Propeta Elias, gitawag ug amahan, ( 2 Hari 2:12 ) 4. Amahan sa unod, gitawag ug amahan. ( Mat.15:4 )

5. Mga Pari gitawag ug amahan ( Mag.17:10; 1 Cor.4:15 )

6. Pangulo sa katawhan, mga amahan. ( Isa. 22:21-22 )

Ang gidili mao ang pagtawag sa yutan-ong mga amahan katumbas sa atong langitnong Amahan. Sama sa mga Paresio ug skriba.( Mat.23:6-7)

 4) Dili absoluto nga ang Obispo may asawa: Ang apostol usa ka Obispo. ( Buh.1:20 ) Si San Pablo miangkon nga Obispo. ( 1 Cor.9:2) Apan si San Pablo walay asawa. ( 1 Cor. 7:8 ) Si Cristo mao ang apostol ug labawng pari ug Obispo sa atong kalag. ( 1 Ped.2:25 ) apan si Cristo walay asawa. Sa sinugdanan dunay pipila nga sa pagtawag kanila minyo na daan, apan sa hinayhinay ilang gibiyaan ang ilang panimalay alang sa ebanghelyo. ( Mat.19:26; Mat.19:27 )

 5) Nga ang pag-asawa dautan? Usa kini ka erehiya nga gitawag ug Gnostisismo nga nagtuo nga ang butang material iya sa demonyo busa ang pag-asawa ug pagkaon ug karne dautan. ( World History by Obrien p. 147 ) Mat. 19:12 = dili dautan ang dili pagminyo kun kini alang sa Gingharian sa Dios.

1 Cor. 7:9 = Si San Pablo mismo dili minyo ug nagdasig sa uban nga sa pagsunod kaniya. Kay diha sa pagalagad sa Dios mas dako ug bentaha ang mga dili minyo.
1 Cor. 7:32-34 = Ang mga tawong minyo magkapuliki sa mga kalibutanong mga butang, apan ang dili minyo mas makatagad pag-ayo sa buhat sa Ginoo.

 Pin. 14:4 = Didto sa langit nakita ni San Juan ang mga alagad sa Ginoo nga nagpabilin nga putli ug wala magminyo nga maoy unang gihalad ngadto sa Dios. Mat. 22:30 = Ang pagkadili minyo sa mga pari maoy timaan sa umaabot nga katuigan, diin didto sa langit wala nay pagminyoay. Ang pagka-celibato sa mga kaparian gibansay na sa unang tulo ka gatusan ka tuig ( first three hundred years ) sa pagkatukod sa Iglesia. Ug sa tuig 400 gipakanaog kini nga balaod sa simbahan nga ang ordinahan sa pagka-pari kadto lamang may panaad ( vow of celibacy) nga dili magminyo alang sa gingharian sa Dios.

 Pagtulon-an; Kinahanglan nga atong hatagan ug doble nga pagtahod ang mga kaparian. Ato silang dasigon ug iampo sa pagtuman nila sa ilang buluhaton pinaagi sa pagtabang ug pag-suporta kanila. Gikan sa ilang mga kamot atong madawat ang kalan-ong langitnon ug gikan sa ilang mga baba atong madungog ang pulong sa Dios.

Kinahanglan usab nga atong dasigon ang gustong magpari sulod sa panimalay.
Ug ato usab nga iampo kanunay ang mga pangulo sa atong Simbahan lakip kadtong mga batan-on nga nagtuon sa pagkapari. Mat. 9: 37-38 = Daghang anihonon, apan diyotay lang ang mga mangangani. Busa mag-ampo kita sa tag-iya sa anihonon nga magpadala siyag dugang pang mamumoo nga moani niini.