Ayon sa mga matatanda noong una, ang kapilya ay naitayo pa noong
taong 1930s. Naging saksi ang kapilyang ito sa mga nagdaang una at ikalawang digmaang pandaigdig. Ang Alapan ay kabilang sa Freedom Trail, sapagkat noong ika-28 ng Mayo, 1898 ay unang napagtagumpayan ng ating mga ninunong katipunero ang tinatawag na Unang Labanan sa Alapan . Ang petsang ito ang ginawang taunang kapistahan ng Kapilya na nooy nagpaparangal sa banal na Krus at kay Santa Maria Magdalena na syang patron ng Kawit at ng pinunong Heneral Emilio Aguinaldo, na sinasabing unang naganap noong taong 1947. Matagal na panahon na napabilang ang kapilya sa nasasakupan noon ng Our Lady of the Pillar ng Katedral ng Imus, at ibat ibang pari ang nagmisa para sa mga mamamayan ng Alapan sa tulong ng mga matatandang lingkod simbahan ng Alapan at ilang kabataang nakilala sa katawagang Bulaklak at Paru-paro. Naitatag ang unang choir sa Kapilya sa pamamagitan ng isang lingkod simbahan ng Katedral ng Imus na si Bro. Vhir Fajardo, na nooy nanawagan matapos ang isang misa noong ika-25 ng Hulyo, 1982, na tinugon ng mga kabataan na nagsisimba noon at nakilala magpahangang ngayon bilang Sinag ng Kabataan ng Alapan. Ang samahang ito ang syang unang naging opisyal na katuwang ng Pari, kasama ang ilang matatandang lingkod upang maisagawa ang mga gawain ukol sa simbahan at maging ukol man sa lipunan, katulad ng pagsapi sa NAMFREL noong unang eleksyon upang makibahagi sa pagsupil sa diktadurya. Taong 1990 nang napabilang ang Kapilya ng Alapan, na nooy tinatawag ding Holy Cross Chapel sa bagong Parokya na ngayoy kilala bilang Immaculate Heart of Mary Parish sa ilalim ng pamamahala ni Fr. Jeff Bugayong, at sa tulong ng pamumuno ni Kuya Kiko Orcullo. Nagpatuloy sa paglaki ang Kapilya sa pamamagitan ng unti unting pagpapagawa nito. Nadagdagan din ang mga lingkod sa Alapan, naitatag ang Knights of the Altar, ang Legion of Marys, kasabay nito ang mga Block Rosary Groups, ang mga katekista at nitong bandang huli ang ME community ng MMHE-Imus Chapter. Taong 1997 nang maitalaga si Fr. Totie Bermudes bilang bagong Kura Paroko. Nagpatuloy bilang chairman ng kapilya si Kuya Kiko at hinalinhan naman ni ate Eder Remulla bago matapos ang termino ng nasabing Kura Paroko. Malaki ang naitulong ng bagong pinuno upang mailipat sa pangalan ng Inang Simbahan ang titulo ng lupang kinatatayuan ng kapilya ng Alapan. Noong Mayo 28, 2004, sa pangunguna ni Fr. Allan C. Valero, unang ipinagdiwang ang kapistahan ng San Agustin ng Kantirburyo. Unang gumanap bilang mga hermano ang mga pangunahing lingkod simbahan. At mula nooy lalong sumigla ang pananampalataya ng mga parokyano sa Alapan lalo na ang mga kabataan, sapagkat sa panahong ito naganap ang mga Youth Assemblies bilang paghahanda sa programang Communion of Communities. Sa kasalukuyan, sa napipintong ika-25 taon ng pasisinaya bilang parokya ay patuloy na nakikiisa ang mga lingkod simbahan ng Alapan upang tuluyang maisakatuparan ang nasabing programa. Tumutugon ang komunidad ng San Agustin ng Kanterburyo sa mga pagbabago na isinusulong ng kasalukuyang parokya na pinamamahalaan ni Fr. Paul at ni Fr. Benjie. Nakikita ang unti unting pagbabagong espiritwal ng mga lingkod simbahan, kasabay nito ang unti unti ring pagsasaayos ng pinansyal na kalalagayan, at ang pagpapatibay at pagpapaganda ng istruktura ng kapilya ng San Agustin ng Kantirburyo. Ang kapilyang ito ay patuloy na nagsisilbing daluyan ng mga pagpapala ng Dios, nagsisilbing kanlungan upang ang mga kabataan ay makaiwas sa kasamaan at kasalanan at nagsisilbing pangalawang tahanan upang mabuo ang isang pamilyang patuloy na naglilingkod at nagmamahal sa Diyos. MABUHAY KA SAN AGUSTIN NG KANTIRBURYO!!!