Dedikadu pa tudu Zéma

k’ê kontra Zéma,

p’es ba bota xéma(grógi)
p’es konpo kabésa
Má sen présa…

Óra essa!...
Moskitu Mordê Zéma!
By Dr. Azágua

Moskitu mordê Zéma

Zéma panha déngi

Déngi korre trás di Bêga

Bêga vira pa trás

El frâ déngi

M'el ê un satanás

P'el dexa-l en pás

Ma déngi el ka ta pêga

Ma pa kâ tenta

sinaun kau ta rabenta!

El frâ aián!...

Pa moskitu ka xatia-m!

El pode rodia-m
 Má el ka ta mata-m!

Nha primu Náku

da-m un nháku

di tabáku...

Má kêl k’ê kankán!

N dâ pán!

N txêra

Moskitu txêra

El torna txêra.

Di tantu txêra

K’el txêra,

Kabésa mariâ moskitu

K’el ba kai lâ na rubêra

Pé-pa-séu

Sen kubridu véu;

K’obidu gritu

Ki farê apitu;

Na kêl sésta-fêra

Éra nôti-nogêra!

Xâ Kabu Verdi

Bira Verdi
 Sikrê moskitu

Mordê Kitu!

Si moskitu mordê Zéma

Ê ka prubléma!

Nu dexa di sinéma

Vida ê xei di diléma.

Xâ Zéma luta

Xa-l labuta;

Só asin nu ta panha fruta!

É pá!

Nhos xa-l xobra

ku sê pá

asin kuzas ta dâ ta sobra.

 

Éi!

 Frádu-frâ...

Ma moskitu mordê Kitu

Kitu ba frâ Kin

Kin ba frâ Kinkin

Kinkin ba frâ nho Rê

Nho Rê ba frâ Nhôr'Dés

Nhôr'Dés frâ:

Nada ka ten!!