PH 101 HH Doc Guss Rodriguez Ito yung feeling ko eh Sa bawat kilos ng mga tao sa mundo kaakibat na rito ang desisyon. May mga desisyon na hindi masyado napag-iisipan ng matagal, mayroon naman na napakaraming isinasaalang-alang bago humantong sa isang desisyon. Sa lahat ng desisyon na ginagawa ng mga tao, masasabing kaya nitong mapaliwanag at makatuwiran ang ginawang iyon dahil ito ay pinag-isipan sa ibat ibang lebel. Ang pangangatwiran ay isang prosesong dinadaanan bago makagawa ng desisyon. Simula sa pagtanggap sa ideya gamit ang mga datos ng pandama, sa pagsusuri nito at pagbibigay kahulugan gamit ang sistema ng pag-unawa, hanggang sa paglikha ng desisyon gamit ang sistema ng pagpapahalaga, lahat ito ay pangangatwiran. Isang halimbawa ng pangangatwiran ay ang pagpapalipat ng mga palugit o pagsusulit dahil kaniya-kaniyang dahilan. Maaaring ituloy pa rin ng guro ang pagsusulit kahit na hindi pa nito natapos lahat ng kailangang ituro at sasabihin na aralin na lang ito sa sarili dahil sa tingin niyay makatwiran ito. Katulad sa nabanggit na halimbawa, para sa mga mag-aaral, makatwiran ang dahilan kung bakit nais nilang ipagpaliban muna ang palugit o pagsusulit, marahil dahil sa kulang talaga sa oras, ngunit hindi talaga ito maaari dahil ipinapaalam naman ang mga palugit at araw na itinakda para sa pagsusulit ilang linggo bago ito. Ibat iba ang katwiran na nabubuo ng bawat tao ngunit dapat nating tandaan na ang mga ito ay may kakayahang magbago at magpaintindi sa pamamagitan ng pagbubukas ng sarili rito. Kasama na ng pangangatwiran ng tao ang nakatakda at dinamiko. May mga bagay na masasabing nakasanayan na kaya ito nasa pangangatwiran ng isang tao. Ang paggamit ng mga salitang po at opo, sinanay na ng mga nakakatanda na turuan ang mga kabataan na gumamit nito. Kung sa pangangatwiran ng isang tao na hindi naman kailangan ng mga salitang po at opo para makapagpakita ng respeto ay nasasakanya na lamang ito. Ipagpalagay na natin ang isang mag-aaral na kumukuha ng isang pagsusulit, kung sa pangangatwiran niya ay tama na mangopya para lang hindi bumagsak sa pagsusulit na iyon, mangongopya na lamang ito sa kanyang katabi. Sa pangangatwiran ng ibang tao ay panlalamang ito sa kapwa ngunit hindi para sa kanya. Mali ito ngunit dahil sa kagustuhan niyang pumasa, nagiging kapalaran na ng mag-aaral na iyon na mangopya na lamang at dahil dito ay nabubuo ang isang katwiran na makatwiran para sa kaniya. Dahil sa pagtatakdang ito, nalalaktawan na ang puspusang pag-iisip at pagbibigay kahulugan dito na nagdudulot ng paghadlang sa pagkamit ng kanilang buong potensiya. Nasabi na kasabay ng pagkatakda ang pagiging dinamiko ng pangangatwiran. Ang tingin natin sa tama o mali ay nakatakda na. Ngunit may mga bagay na nakapagpapabago rito. Ang kapalaran ay isang laro, may mga kilos na nakakapagpabago nito at ito ay makakaimpluwensiya sa pangangatwiran. Kung makasalamuha ang isang tao ng taong mayroong pangangatwiran na lihis sa kanya, mapapaisip ito at isasaalang-alang ang mga katwiran para makabuo ng isang bagong pagpapaliwanag. Maaaring mabago nito ang unang pagtingin sa mga bagay bagay o kaya namang wala lamang itong epekto. Hindi pare-parehas ang pangangatwiran ng mga tao. Nakadepende ito sa kaniyang sistema ng pangangatwiran, pagpapahalaga, at tingin sa mundo. Makakaapekto ko rin kung saan nagmula ang tao. Magagamit na halimbawa ang pagpapaaral ng mga anak sa kolehiyo. Sa Amerika, nagtratrabaho na ang karamihan habang nag-aaral maliban na lamang kung talagang nakakaginhawa sa buhay ang pamilyang kinabibilangan. Sa Pilipinas, bihira ang mag-aaral sa kolehiyo na nasa poder pa ng mga magulang ang nagtratrabaho habang nag-aaral. Ang dalawang magkaibang pananaw na ito ay maaaring magtalaban hanggang sa makabuo ng panibagong pananaw na maaaring maging susi sa unti-unting pagharap sa katalahagan. uhm, okay. Makatwiran kaya talaga ang mga katwiran ko?