Putri Novita Sari

12020114025/2012 A
Analisis Stilisik Sajrone Geguritan Kampus Anggitane Suharmono K
KAMPUS
sumiyute angin gegojegan
antarane cemara, flamboyant, bougenville
kembang-kembang mawar
renyah rembuge mahasiswa, esem kang bingar

teratai ing kolam

wader pari pepasihan
ing dharatan jalu estri lagi dhiskusi
ngrembug masa dhepan
dadi guru harian, bayar ora cukup kanggo sewulan

kamus kamar perpustakaan

buku-buku kanggo nyamikan
uteg-uteg ngenam pikiran

kampus
ing kene dakcecep ilmu
ing kene aku tepung sliramu

Lelewaning Basa Sajrone Geguritan Kampus anggitane Suharmono K

Wujud lelewaning basa sing bakal dionceki kaperang dadi loro yaiku lelewaning basa
retoris lan lelewaning pambandhing.
Lelewaning Basa Retoris
Lelewaning basa retoris kang ngrenggani geguritan Kampus ing antarane yaiku purwakanthi
guru sastra, purwakanthi guru swara lan purwakanthi lumaksita. Amrih gamblange, setitekna
wedharan iki.
Purwakanthi Guru Sastra
Panganggone purwakanthi guru sastra kabukten saka pethikan iki.

renyah rembuge mahasiswa, esem kang bingar

(pd 1 gtr 4)

wader pari pepasihan

(pd 2 gtr 2)

kampus kamar perpustakaan

(pd 3, gtr 1)

buku-buku kanggo nyamikan

(pd 3, gtr 2)
Saka pethikan mau, kabukten yen geguritan Kampus nggunakake purwakanthi guru sastra
/r/,/p/,/k/. Panganggone tembung kang kapacak ing ndhuwur lan panggone purwakanthi guru
sastra ndadekake reroncene tetembung bisa katon endah.
Purwakanthi Guru Swara
Purwakanthi guru swara kabukten saka andharan iki.
.
kembang-kembang mawar
renyah rembuge mahasiswa, esem kang bingar

(pd 1, gtr 3-4)

Pethikan mau nuduhake anane purwakanthi guru swara /a/. Purwakanthi guru swara /a/
bisa diwawas saka tembung
kembang,mawar,renyah,mahasiswa,kang,lan bingar. Panganggone tetembungan kang
nunggal swara bisa nuwuhake rasa endah nalika diungokake.
..
dadi guru harian, bayar ora cukup kanggo sewulan
(pd 2, gtr 5)
Tembung harian,bayar,ora,kanggo,lan sewulan ing pethikan kuwi nuduhake
anane purwakanthi guru swara /a/. panganggone purwakanthi guru swara /a/ iki bisa ndadekake
geguritan luwih endah yen dirungokake. Swara /a/ nduweni surasa abot lan endhek, saengga trep
banget kanggo nggabarake kahanan sing ora kepenak. Kahanan nalikane pawongan ngrasa sedih
jalaran mahasiswa kang nyambut gawe dadi guru harian kanggo bayar kabutuhan uripe lan ora
cukup kanggo sawulan.
Purwakanthi Lumaksita
Panganggone purwakanthi lumaksita sajrone Geguritan Kampus bisa dideleng saka pethikan iki.
.
ing kene dakcecep ilmu
ing kene aku tepung sliramu
(pd 4, gtr 2-3)
Bisa dideleng menawa ing gatra kapisan pada 2 lan 3 nggunakake tembung kang padha yaiku ing
kene. Bab iki mbuktekake menawa geguritan Kampus iki nggunakake purwakanthi lumaksita sajrone
reroncening geguritan. Seje piguna nalika kagunakake sajrone tembang, panganggone purwakanthi mau
menehi piguna kanggo daya pambanget, kajaba iku uga kanggo nyengkuyung makna. Kanthi anane
tembung ing kene kang dibaleni mau nyurasakake menawa geguritan Kampus pancen ing Kampus
kuwi dheweke ngangsu kawruh uga tepung karo wong.

Lelewaning Basa Pambandhing

Wujud lelewaning basa pambandhing kang ngrenggani AGGP yaiku personifikasi lan simbolik.
Amrih cethane setitekna andharan iki :

Personifikasi
Personifikasi yaiku lelewaning basa kang nggambarake sing mati utawa ora nduweni nyawa,
kaya-kaya nduweni sipat kaya manungsa. Panganggone lelewaning basa personifikasi sajrone
Geguritan Kampus kaya kang kaandharake iki.
.................
sumiyute angin gegojegan
antarane cemara, flamboyant, bougenville
kembang-kembang mawar
(pd 1, gtr 1-3)
Pethikan geguritan Kampus

mau nuduhake anane lelewaning basa personfikasi.

Lelewaning basa bisa dideleng saka ukara sumiyute angin gegojegan. Panggurit madhakake
tembung sumiyute angin bisa nindakake pakaryan gegojegan. Panganggone lelewaning basa
personifikasi iki ancase kanggo mbangetake makna. Sumiyute angin kang asri uga kepenak
banget menawa dirasakake kaya wong kang lagi gegojegan. Panganggone lelewaning basa
personifikasi nduweni piguna kanggo mbangetake makna awit bisa makili rasa pangrasane
panggurit kang pengin nyemoni tumndake manunsa sing ora tanggap marang sasmita lan seneng
tumindake sakarepe dhewe.
Simbolik
Panganggone lelewaning basa simbolik sajrone geguritan Kampus kaya kang kaandharake iki.
..
buku-buku kanggo nyamikan
(pd 3, gtr 2)
Pethikan mau yaiku pethikan geguritan Kampus sing ngandhut anane lelewaning basa
simbolik. Panganggone tembung kang kacithak kandel mujudake sawijining simbolik. Tembung
nyamikan kang dikarepkake ing kene ora kaya teges sanyatane yaiku nyamikan kanggo
panganan nanging nyamikan kang dikanggo mahasiswa supaya buku wis biasa kaya panganan
sing ditemoni saben dina.