27 NOPEMBER 2013

KARANGAN ESEY
NGUNGKAB RUSIAH ORGANISASI FREEMASON
MUHAMMAD FIKRI AZIS
SMAN 1 CIAMIS
XII-IPA 1/16

NGUNGKAB RUSIAH ORGANISASI FREEMASON

Freemason nyaeta ngaran hiji organisasi duduluran anu diadegkeun sacara resmi taun
1717 di Inggris. Asal-muasalna ieu organisasi teh henteu jelas sabab aya sabab miboga
sababaraha versi anu beda-beda caritana. Lambang tina organisasi ieu nyaeta mangrupa
panggaris jeung jangka anu ditengahna biasana sok aya hurup G. Organisasi ieu dibagi-bagi
jadi sababaraha kapangurusan di masing-masing nagara anu biasana disebut Loji (tina Basa
Inggris Lodge). Tiap-tiap kapangurusan miboga kabijakan jeung prinsip sewang-sewangan
anu beda jeung kapangurusan sejenna. Loji anu miboga prinsip sarua jeung Loji sejenna
disebut Loji Reguler. Sedengkeun anu miboga prinsip anu lian ti Loji sejen disebut Loji
Gelap.
Salah sahiji versi ngeunaan asal-muasalna ieu organisasi teh nyaeta Freemason asalna
tina kalompok pajuang Perang Salib anu ngaranna Knights of Templars. Kalompok ieu
mangrupakeun kalompok tentara bayaran anu disewa ku kaum Nasrani pikeun ngarebut kota
Yerusalem ti pasukan Muslim Turki. Namung, salian ti eta ieu kalompok miboga tujuan
rahasia nyaeta pikeun ngadegkeun deui Kuil Sulaiman. Ieu wangunan teh mangrupakeun
tempat suci pikeun maranehanana jeung kaum Yahudi Zionis anu pernahna teh di handapeun
Masjidil Aqsa. Pikeun nyumponan eta tujuan teh maranehanana ngadegkeun hiji organisasi
rahasia nyaeta Freemason anu salah sahiji simbolna nyaeta Kuil Sulaiman. Kusabab ieu kaum
Muslim nganggap yen Freemason mangrupakeun antek-antekna kaum Yahudi pikeun
ngarebut Masjidil Aqsa jeung ngawangun deui eta Kuil Sulaiman.
Versi sejenna nyaeta Freemason mimitina mangrupakeun organisasi anu nandean jalmajalma anu miboga prinsip kabebasan jeung anti-dogma. Tujuan tina organisasi ieu nyaeta
pikeun nyejahterakeun sakabeh anggotana sarta tempat pikeun silih patukeur pamanggih
jeung anggota anu sejen. Kusabab baheula mah para biarawan Katolik miboga kawasa pikeun
ngendalikeun hukum jeung elmu pangaweruh, organisasi ieu henteu wani nyatakeun
pamanggih, pamadegan, jeung kagiatanana sacara togmol. Kaum biarawan Katolik anu
miboga kawasa bakal ngahukum sakabeh jalma atawa organisasi anu miboga pamadegan anu
mahiwal ti pamadegan manehna sakumaha kajadian anu tumiba ka Galileo Galilei. Tapi, nepi
ka ayeuna ieu organisasi teh henteu wani ngajelaskeun kagiatanana sacara rinci. Kusabab ieu
kaum Kristen Katolik nepi ka ayeuna oge nganggap yen ieu organisasi mangrupakeun
organisasi anu bakal ngabahayakeun agama Kristen.

Kadua versi carita diluhur sabenerna teu aya nu tos pasti bener. Tapi lamun ditilik-tilik
deui mah versi carita nu kahiji teh aya kalemahanana. Knight of Templar anu cenah
mangrupakeun luluhur Freemason lain mangrupakeun pangagem agama Yahudi, tapi Kristen.
Dina ajaran agama Kristen teu aya anu ngajentrekeun yen Kuil Sulaiman mangrupakeun
tempat suci umat Kristen. Sedengkeun anu ayeuna usaha pikeun ngarebut Yerusalem ti
Palestina nyaeta bangsa Israel anu mayoritas pandudukna ngagem agama Yahudi. Kusabab
kitu, dugi ka ayeuna teu acan aya bukti yen Freemason teh mangrupakeun organisasi anu
sesat jeung ngabahayakeun.