Welcome to Scribd!

071 Rama Dasaratha

Uploaded by

0% found this document useful (0 votes)

108 views5 pages

అన్నమయ్య సంస్కృత కీర్తనల అర్థ వివరణ సేవలో 71వ కీర్తన 20-06-2015 071. రామ దశరధ రామ నిజ సత్య - (శ్రీరాముని గుణ గణాలను సంబోధిస్తూ అన్నమయ్య రచించిన సంస్కృత కీర్తన ఇది.) (కీర్తన సంఖ్య 156సంపుటము4 రాగిరేకు సంఖ్య 327) రామా దశరథ రామా నిజ సత్య - కామా నమో నమో కాకుత్థ్స రామ ll కరుణానిధి రామ కౌసల్యానందన రామ పరమ పురుష సీతాపతి రామ శరధి బంధన రామ సవన రక్షక రామ గురుతర రవివంశ కోదండ రామ ll దనుజహరణ రామ దశరథ సుత రామ వినుతామర స్తోత్ర విజయరామ మనుజావతారా రామ మహనీయ గుణ రామ అనిలజప్రియ రామ అయోధ్యారామ ll సులలితయశ రామ సుగ్రీవా వరద రామ కలుష రావణ భయంకర రామ విలసిత రఘురామ వేదగోచర రామ కలిత ప్రతాప శ్రీ వేంకట గిరి రామ ll ఓ రాముడా! దశరథుని కుమారుడా! సత్యము మాట్లాడుటలో ప్రీతి కలవాడా!కకుత్థ్సవంశములో జన్మించినవాడా! రామా ! నీకు నమస్కారము. దయకు నిలయమయిన వాడా ! రామా ! కౌసల్యాదేవి కుమారుడా! రామా! ఓ పరమాత్మా ! సీతాదేవికి పతియైన వాడా ! రామా! సముద్రంపై వంతెనని నిర్మింపచేసినవాడా ! రామా ! విశ్వామిత్రుని యాగమును కాపాడిన వాడా! రామా! గొప్పదైన సూర్యవంశములో జన్మించినవాడా! నాలుగు మూరల విల్లును ధరించినవాడా! దనువునందు జన్మించినవాడు దానవుడు. ఆరాక్షసులను సంహరించినవాడా!రామా ! దశరథుని కుమారుడా ! రామా! వినయముతో ఉన్న దేవతలతో నమస్కరింపదగిన వాడా ! విజయములు పొందే రామా! మనుష్యుని అవతారమెత్తిన రామా! గొప్పవైన గుణములు కలిగిన రామా! వాయు కుమారుడైన హనుమంతునికి ఇష్టమైన వాడా! యోద్ధుంశక్యా = యోధ్యా- నయోధ్యా. యుద్ధముచేసి ఆక్రమింప అలవికానిది అయోధ్య, శత్రువు యుద్ధం చేయడానికి సాధ్యం కాని అటువంటి అయోధ్యలో జన్మించిన వాడా! అందమైన కీర్తిని కలిగినవాడా! సుగ్రీవునికి రాజ్యమును లభింపచేసెదనని వరమునిచ్చి కాపాడిన వాడా! పాపాత్ముడైన రావణాసురునికి భయంకరమైన వాడా ! రామా! కాంతితో ప్రకాశించే రామా ! వేదములలో కనిపించే వైభవము కలిగిన రామా ! ప్రతాపము కలిగినవాడా !శ్రీవేంకటాచల పర్వతముపై వేంకటేశ్వరుని అవతారములో ఉన్న రామా ! నీకు నమస్కారము. విశేషాలు కాకుత్థ్స రామ ఇక్ష్వాకుని పౌత్రుఁడగు వికుక్షి కొడుకు. ఇతఁడు విష్ణువు యొక్క అనుమతిచే వృషభరూపుఁడైన దేవేంద్రుని ప్రార్థనంబున అతనిమూఁపురము ఎక్కి రాక్షసులతో యుద్ధముచేసినందున ఇతనికి కకుత్స్థుఁడు అనియు, ఇంద్రవాహనుఁడు అనియు పేర్లు కలిగెను. ఇతనికి పురంజయుఁడు అని నామాంతరము కలదు. వికుక్షి ఇక్ష్వాకు కొడుకు అని కొన్నియెడల చెప్పి ఉండినను వాల్మీకి రామాయణమునందు అతఁడు ఇక్ష్వాకు పుత్రుఁడైన కుక్షి కొడుకు అని చెప్పి ఉన్నది. మఱియు వికుక్షి కొడుకు బాణుఁడు అనియు ఉన్నది. అది కకుత్స్థునికి నామాంతరముగా ఉండవచ్చును.పురాణనామచంద్రిక (యెనమండ్రం వెంకటరామయ్య) 1879 సత్యకామా సత్య కాముడు అనే పేరు ఉపనిషత్తుల్లో కనబడుతుంది. ప్రశ్నోపనిషత్తులోపిప్పలాదుడు అనే బ్రహ్మవేత్తను ఆరుగు మహర్షులు వచ్చి ఆరు ప్రశ్నలు వేస్తారు. సుకేశుడు, సత్యకాముడు, సౌర్యాయణి, కౌసల్యుడు, భార్గవుడు, కబంధి - ఇందులో సత్య కాముడు ఒకడు. ఛాంద్యోగపనిషత్తులో గోసేవ చేసిన సత్య కాముడు కనబడతాడు. అయోధ్య మోక్షదాయకములగు పుణ్య నగరములు ఏడింటిలో మొదటిది. అయోధ్య, మథుర, మాయ, కాశి, కాంచి, అవంతి పురి, ద్వారక - ఇవి పుణ్యనగరములు. స్వస్తి. -డా.తాడేపల్లి పతంజలి