1

SIDSID
Mark 5:21-43
Tumong: Nga ang mga sakop sa iglesia maaghat sa ilang pagkinabuhi ingon nga mga katawhan
sa pagtuo bisan na ug gibati nila nga sila mga ordinaryong sakop lamang sa iglesia tungod kay
bisan na tuod ug mao kana ang ilang pagbati, sila agianan ug instrumento gihapon sa kabag-ohan
ug kaluwasan alang sa uban.

Maayong hapon kanatong tanan! Kung kalipay ang akong gibati last week sa
akong paghatag ug mensahe kaninyo ingon nga preacher sa atong pagsimba, karon
nagsagol kaikog ug ka-dyahe ang akong pagtindog dinhi atubangan ninyo ingon
nga maghatag sa mensahe. Basi ang uban maka-ingon nga wala pa ko matagbaw o
di ba kaha giganahan ko sa pag-atubang ninyo diri, apan ang tinuod mao nga
misugot lamang ako sa hangyo sa atong pastor nga mao usab ang akong bana nga
akoy muhatag sa mensahe karong Domingoha tungod sa meeting sa church
council, ug dili sya makauban kaninyo sa pagsimba karon. Maayo na lang gani kay
ania si Pastor Grace nga mitugot usab sa akong pagtindog karon dinhi, ug hinaut
unta nga okay ra pod mo nga ako ra gihapon ang inyong magwawale karong
Domingoha, sa ikaduhang higayon.
Mag-ampo ta. Daghang salamat O Dios sa imong balaang presensya nga
naga-uban kanunay kanamo ilabina sa among pagpamalandong sa imong mga
pulong alang kanamo karon. Ubani kami aron malamdagan ang among mga
kasingkasing sa imong mensahe. Amen.
Sidsid. Mao kini ang parte sa panapton o sinina nga anaa sa kilid o tumoy
nga bahin (ipakita ug itudlo ang sidsid sa imong sinina Ga). Alang kanatong mga
inahan nga maoy kasagarang manglaba sa mga sinina sa atong mga bana ug mga
anak, mao kini ang kasagarang atong tan-awon ug kusokusohon tungod kay nia diri
makita ang mga hugaw, di ba? Kini tungod kay ang mga sidsid anaa man sa tumoy
nga mga bahin sa atong mga sinina ug kasagarang mubag-id sa mga abog, sa mga
panit sa kamot, bukton, liog ug bisan sa tumoy didto sa atong mga tiil ug sapatos
kung kini pantalon o palda ba kaha.

Sa atong gibasa sa Balaang Kasulatan diha sa Marcos 5:21-43, gipakita

kanato ang saysay sa milagro ni Jesus mahitungod sa pag-ayo sa duha ka mga
babaye, ang usa mao ang anak ni Jairus ug ang usa, sa usa ka naghilumhilum nga
babayeng dose anyos na nga nag-antos sa walay undang nga pagregla. Aron di
kaayo ta makatag sa atong pagpamalandong, akong gipili karon ang pag-focus sa
panghitabo sa saysay mahitungod niadtong babayeng gi-regla. Sa paghangyo bitaw
ni Pastor Callum nako, nangutana ko kung nganong ako, ug sya miingon nga ako
gyud kuno kay mas makasabot daw ko sa pagbati niadtong babaye tungod kay
babaye lagi ta ug dili na bag-o nato ang kasinatian sa binulan nga pagbisita sa
atong period.
Sa atong kasinatian ingon nga mga kababayen-an, naay uban kanato nga
kung bisitahan na gani sa atong period, okay lang, padayon lang sa atong mga
gimbuhaton bisan ug lain na ang atong paminaw. Makainom lang ug pain relievers,
okay na. Apan adunay uban kanato nga lahi gayud ug bation, ug ang uban gain dili
gyud kabangon sa kasakit ug kaluya sa maong kasinatian. Alang kaninyong mga
lalaki nga nagpaminaw, maayo pod nang mahibalo ug makasabot gyud mo namong
mga babaye ilabina niining maong kasinatian namo nga mga babaye.
So, sa atong saysay nga gibasa nato, adunay babaye nga nakasinati niini nga
walay undang, dili lamang sa pipila ka bulan, dili lamang sa usa katuig, kondili sa
dose ka tuig. Pagkalisod gyud siguro sa iyang kinabuhi nga nag-agwanta niiing
kahimtanga sa sulod sa dose ka tuig. Mao nang sa pagkadungog siguro niya nga
adunay tawo nga ginganlan ug Jesus nga nagabuhat ug milagro, ug nga kini siya
muagi didto duol kaniya, nakahunahuna gayud siya nga bisan na lamang kon
makahikap siya sa sinina niining naila na nga mananambal, maayo usab siya.
Sa atong gibasa sa Marcos, ang saysay nag-ingon nga sinina o bisti ni Jesus,
apan sa parallel niini nga saysay didto sa Mateo ang detalye nga saysay nag-ingon
nga ang gihikap sa maong babaye mao ang SIDSID sa sinina ni Jesus ang tumoy

o kilid lamang nga bahin sa sinina ni Jesus. Ug tuod, diha diha human sa iyang
paghikap sa SIDSID sa sinina ni Jesus, mibati siya ug kalingkawas, mibati siya ug
kaayo gikan sa iyang sakit. Siya naayo!
Nakabantay si Jesus ug siya nangutana kung kinsay mihikap niya, ug ang
babaye, uban ang dakong kulba, miduol kang Jesus ug mahadlukong miangkon sa
iyang gibuhat. Apan si Jesus midayeg hinuon kaniya nga nag-ingon, Anak, naayo
ka gumikan sa imong pagtuo. Pauli nga malinawon kay dili ka na mag-antos.
Pagkaanindot nga pasalig sa atong Ginoo!
Sa atong kalibutan karon, adunay daghan sa atong mga kaigsoonan sa atong
palibot nga daw susama sa kahimtang niadtong babaye nga nangita sa
kalingkawasan. Siguro dili actually sama niadtong babaye nga gidugo, apan anaa
sa malisod ug nag-atos nga kahimtang not necessarily sa physical nga aspeto niini.
Ang uban siguro anaa sa kalisdanan nga financial, o emotional o spiritual ba kaha
sa ilang kinabuhi ug nangita sa bisan asa na lang alang sa kalingkawasan niini nga
mga pagbati ug mga kahimtang. Kung atong tan-awon ang atong mga palibot,
makita nato kini sa mga kinabuhi sa mga kaigsoonan nato nga daw walay
padulngan o walay klaro o di ba kaha walay meaning o kahulogan ang ilang mga
kinabuhi. Kinahanglan nila ang kaayohan nga nagagikan lamang bisan na sa
paghikap sa SIDSID sa bisti o sinina sa atong Ginoo.
Ang pangutana, unsaon kaha nila paghikap bisan na lamang ang SIDSID sa
sinina sa atong Ginoo nga wala na man siya karon dinhi physically uban kanato?
Wala na ba silay pag-asa nga makahimo niini? Wala na ba silay paglaom nga
malingkawas gikan niining ilang mapait ug malisod nga kahimtang?
Ang atong Ginoong Jesu-Cristo, ang atong Manluluwas, sa wala pa siya
mibiya sa iyang mga tinun-an, naghatag kanila, ug kanatong mga sumusunod
kaniya, sa usa ka dakong hagit ug buluhaton sa pagpadayon sa iyang gisugdan nga
ministeryo alang sa kaluwasan sa tanan. Gitawag kitang mga sumusunod niya nga

mahimong iyang lawas, iyang mga katawhan nga mupadayon sa iyang gipanudlo
ug gisugdan nga buluhaton dinhi sa kalibutan. Ug sa mga katuigang nanglabay,
kini nga tawag ug mando gipasa kini ngadto sa mga magtutuo sa mga katuigang
tanan ug hangtod kanato karon.
Si San Pablo nagtawag kanatong mga sumusunod ni Cristo nga iyang lawas,
iyang mga representante dinhi sa kalibutan karon nga nagalihok ug nagabuhat sa
iyang kabubut-on sa pagpadayag sa iyang gugma ug kaluwasan. Sa atong
Statement of Faith sa UCCP ato kining gipamatud-an sa pag-ingon nga ang Iglesia,
kitang mga magtutuo, mao ang lawas ni Cristo dinhi sa kalibutan, ug gitugyanan
kita sa buluhaton sa atong Dios.
Diha sa sulat ni San Pablo ngadto sa mga taga-Corinto, gipaklaro niya nga
kitang tanan mga sakop sa lawas ni Cristo ug sa ingon ang kada-usa kanato adunay
specific role o buluhaton diha sa pagtukod sa iyang Gingharian sa kalibutan ang
uban pastor, ang uban magtutudlo, ang uban sa paghatag sa mensahe sa kaalam,
etc., etc. Maayo kini. Ug kining tanan sakop kini sa Lawas ni Cristo, the Body of
Christ, ug tagana gayud nga mo-apil ug musalmot sa buluhaton sa iglesia.
Ang problema mao nga daghan kanato wala maghuna-huna o wala gibati
nga gitugyanan niining mga ngilngig ug mga bug-at nga mga gasa ingon nga bahin
sa lawas ni Cristo. Kung ang uban gibati nga sila mga kamot, o mata, o baba, o tiil
diha sa Lawas ni Cristo, ang uban gibati nga siguro kuko o buhok lamang kami
diha sa lawas ni Cristo ug nga wala ra kaayo mi matabang diha sa buluhaton sa
iglesia. Dili ra mi muapil diha sa mga activities sa simbahan kay uyamot ra man
tawon mi, mosimba ra mi human mupauli ra dayon.
Apan mga kaigsoonan, walay bahin sa Lawas ni Cristo nga walay pulos,
adunay katungdanan ug kapuslanan tanan. Gani diha sa atong gibasa sa atong
kasulatan karon, bisan gain ang SIDSID sa sinina sa atong Ginoo, nahimo man
ganing agianan sa iyang gahum ug panalangin. Ang sidsid ug sinina, technically

dili na kini bahin sa iyang lawas apan tungod kay gisuot man kini niya, nahimo
nang kabahin sa iyang lawas. Kon mibati kita ug kagamay ug kawalay
importansiya diha sa lawas ni Cristo ug gibati nato nga dili kita importante, ug daw
SIDSID lamang sa iyang sinina, hunahunaa, nga kini nga sidsid, sa dihang gihikap
kini niadtong babaye nga nag-dugo ug nag-agwanta niini tungod kay walay
nakaayo kaniya, sa dihang gihikap niya kining SIDSID, siya naayo, tungod kay
kining sidsida, iya man sa atong Ginoo.
Daghan kanato gibati siguro nga kita mga sidsid lamang sa sinina sa atong
Ginoo, apan timan-i mga igsoon, bisan pa ug mao kana ang atong gibati, dili nato
kalimtan nga ang atong Ginoo magalihok gihapon diha sa atong mga kinabuhi nga
mahimo kitang tabang sa uban, mahimo kitang agianan sa kaayo ug panalangin
ngadto sa uban, kon ang atong pagtuo sa atong Ginoo atong ikinabuhi diha sa
atong adlaw-adlawng pagkinabuhi, sa bisan asa kita ibutang sa atong Ginoo.
Di na kinahanglan nga mahimo kitang maayong magwawale o maayong
mamumulong, ang importante mao nga atong ikinabuhi ang atong pagtuo, ug kon
kini atong buhaton, makita sa uban ang atong Ginoo diha sa atong mga kinabuhi,
ug sa ingon makasinati sila sa atong Ginoo, sa kaayo ug gahum sa atong Ginoo,
bisan na pinaagi lamang kanatong mga daw SIDSID lamang sa iyang sinina.
Amen.