Sa dumaang Cinemalaya Goes To UP 8, aking pinanood ang isa sa mga featured na
pelikula rito Aparisyon. Ang nasabing indie film ay binigyan ng parangal sa pagkakaroon ng Best Sound sa Cinemalaya 2012. Ipinapakita nito ang mga maaring nangyayari sa mundo ng mga madre na hindi natin inakala o inasahan kailanman. Sa aking panonood ng pelikula, masasabi kong tama lamang ang pagkakapanalo nila ng Best Sound. Naipadama ng mga ginamit nilang sound effects ang tamang emosyon sa ibat ibang parte ng palabas. Napansin din ng aking mga kasama na ang ginamit lamang nilang mga sound ay puro para lamang sa effects, gaya ng malakas na hangin at ibon sa gitna ng gubat. Hindi sila gumamit ng sound na kinanta at inedit sa computer; ang natatanging kanta nilang ginamit ay a capella at walang edit edit. Sa likod nito, naiguhit nila ang dapat nilang maipadama sa ating mga manonood. Ang wikang ginamit dito bagaman tagalog ay hindi ganoong kapormal. Mayroong kolokyal marahil ay mayroon ding mga lalawiganin ngunit wala naman akong napansing mga pabalbal na salita. Mapapansin din na may mga dyalogo na minsan ay nagiging napaka pormal ng artista siguro ay binabase lamang sa nasaulong script. Sa aking palagay, sa mga pagkakataong ito, nagiging hindi natural ang palabas lalo na kung hindi ganoon ang tamang paraan ng paguusap ng karakter. Ang Aparisyon ay nabuo sa direksyon at istorya ni Vincent Sandoval, pinangunahan naman ni Jay Abello ang cinematograpiya nito. Hindi nabigo ang direktor sa paglalahad niya ng ibat ibang katotohanan, ang pagpapakita niya ng mga kasalanan na maaring magbunga sa mas malalaki pang kasalanan na tunay namang babagabag sa ating mga konsensiya hanggang tayo ay maputol na lamang. Ipinapakita din nito ang pagkamalaya ng mga madre sa kumbento sa mga epekto ng politika, at sa pagbisita ng kanilang pamipamilya, mararamdaman ang ng ilan sa kanila na ito ay isang kakulangan sa pagiging makabayan. Sa pelikula, nakita na dahil sa liberasyong ito, nagkasala ang madreng ginaganapan ni Mylene Dizon at isinama pa niya rito si Lourdes (Jodi Sta. Maria). Dahil sa unang pagkakasalang ito, nagsanga sanga na ang mga pagkakasala hanggang sa nagkaroon ng ng walang hanggang pagkonsensiya ang kanilang aparisyon ng mga pangyayari. Itinuturing kong makabuluhang indie film ang Aparisyon. Sa kabila ng pagiging indie film nito, nanalo ito ng Best Sound. Naipakita nito ang mga kahihinatnan at posibleng pinsala ng ating mga ginagawa. Nandito din ang katotohanan na sadyang mapahanak ang mundo at kailangan nating magingat. Sa katapusan ng pelikula na akala ko ay isang horror movie, puminta sa aking isipan ang mga aral nito na sadyang dapat ay hindi ko malimutan.