Servants of the Lord Community

Family & Life Apostolate

Bien Unido, Bohol
Couples Recollection 2014 Module
Topic 1: Ang Kaminyoon Isip Tawag Sa Gugma
(Time: 1 hour & 15 minutes)

Ang tawag sa gugma mao ang kinauyokan ug nagaunang tawag sa matag tawo. Sa
bokasyon sa kaminyoon, makita nato nga ang gugma sa bana ug asawa nahimong
hulagway sa hingpit ug dili mapakyason nga gugma kansang sumbanan, tinubdan ug
kinaiya mao ang gugma nga iya sa Dios.

Ang kaminyoon usa gayod ka tawag gikan sa Dios, tawag sa paghigugma. Ang
bokasyon usa ka personal nga tawag. Ang kaminyoon isip personal nga tawag gihatag
nga gawasnon ug kinahanglan dawaton usab nga gawasnon. Ang kaminyoon, isip
bokasyon dili dayon makita sa uban isip tawag kay bisan naminyo na sila, wala paman
nila kini mapuy-i sa paagi nga gilatid sa Dios.
Ang pagpamalandong kanunay makatabang sa matag usa, bana o asawa nga mas
masabtan kining maong bokasyon.
Ang kaminyoon isip bokasyon, usa ka tawag alang sa paghigugma ug pagkinabuhi
subay sa gugma sa Dios. Taliwala sa daghan unyang mga pagsulay nga moabot sa
kinabuhing minyo, nagpabilin ang maong tawag sa pagpuyo diha sa paghigugma.
(Ipaambit sa team couple ang ilang panaghigugmaay bisan paman taliwala sa daghang
mga pagsulay sa kinabuhi nga naagian.)
Ang gugma diha sa kaminyoon wala lamang gipanalanginan sa Dios aron mulungtad,
kondili gipanalanginan kini sa Dios aron molahutay latas sa mga katuigan hangtod nga
ang kamatayon mobuwag sa managtiayon.
Aron mulahotay ang panaghigugmaay, gikinahanglan nga tamdan sa mga magtiayon
ang mga musunod: (ipaambit ang matag usa ka tamdanan inubanan sa personal nga
mga kasinatian)

Makanunayon nga panag-istoryahanay matag adlaw

Pagpaubsanay ug pagdinawatay sa mga kahuyang sa usag-usa

Pagpamati sa habig sa kapikas sa dili pa muhimo ug desisyon

Pagpabatiay sa paghigugma dili lamang sa pulong kondili diha sa buhat

Pagpaambitay sa mga pagbati ug hunahuna

Pagtambayayong sa pagsagubang sa mga kalisod ug pagsulay

Makanunayon nga pag-ampo alang sa usag-usa

Mugahin ug panahon alang sa usag-usa alang sa mahigugmaong panag-uban

Daghan pang mga angayan nga tamdan sa managtiayon nga wala nato mahisguti dinhi
apan ang mahinungdanon mao nga kitang mga managtiayon makamao gayod mususi
sa matag usa kung hain nga mga luna ang gikinahanglan pa nato palamboon alang sa
mas malinawon ug mahigugmaon nga pagpuyo.

Angay natong hinumdoman sa kanunay nga ang Dios mismo mao ang nagtawag
kanato sa panaghigugmaay matag adlaw. Kini gilatid sa Balaang Kasulatan busa
angayan nato kini pagapuy-an.

_1 Corinto 13:4-8
Ang gugma mapailubon ug maluluy-on; ang gugma dili masinahon ni tigpasikat o garboso; ang
gugma dili bastos o hakog, o suk-anon; ang gugma dili madinumtanon; ang gugma dili malipay
sa daotan kondili sa kamatuoran. Ang gugma mapailubon, matinuohon, malaumon ug
molahutay gayod. Ang mga dinasig nga mensahe lumalabay lamang; ang mga hiyas sa pagsulti
mawala; ang kahibalo mahanaw, apan dili gayod matapos ang gugma.
_1 Corinto 13:13
Pagkakaron kining tulo magpabilin: pagtuo, paglaom, ug gugma; apan ang labing dako niini
mao ang gugma.
_Efeso 4:2
Pagmapaubsanon kamo, pagmaaghop, ug pagmapailubon kanunay. Ipakita ang inyong gugma
pinaagi sa pagtinabangay.
_1 Pedro 4:8
Labaw sa tanan, paghigugmaay kamo sa kinasingkasing gayod, kay ang gugma magtabon sa
daghang mga sala.
_1 Juan 4:7
Mga igsoon maghigugmaay kita kay ang gugma naggikan sa Dios. Ang nahigugma sa iyang
isigkatawo anak sa Dios ug nakaila sa Dios.
_1 Juan 4:18-19
Walay kahadlok diha sa gugma; ang gugmang hingpit magwagtang sa tanang kahadlok. Busa
kon mahadlok gihapon ang tawo, wala pa mahingpit ang iyang gugma kay ang kahadlok may
kalabotan man sa silot. Gihigugma nato ang Dios kay una man siyang nahigugma kanato.
_Efeso 5:25
Mga bana higugmaa ang inyong asawa ingon nga gihigugma ni Cristo ang iglesia ug gitugyan
ang iyang kinabuhi alang niini.
_Efeso 5:33

Apan alang usab kini kaninyo, ang bana kinahanglan mahigugma sa iyang asawa sama sa
iyang kaugalingon, ug ang asawa usab kinahanglan magtahod sa iyang bana.

Kung ato lamang gayod pagapuy-an kining atong mga gibasa gikan sa Balaang
Kasulatan, tino gayod kaayo ang atong dangatan, nga mao ang malinawon ug
malipayong pagpuyo isip managtiayon. Dili tuyo sa Dios nga mahimong miserable ang
atong mga kaminyoon, hinunoa, gitawag kita niya nga magpuyo sa kinabuhing
madagayaon.
Hinaot nga sa among mubo nga pagpaambit, mas naklaro alang sa matag usa kanato
ang atong tawag sa paghigugma. Daygon nato ang Dios hangtod sa kahangtoran,
Amen. Daghang salamat.
Servants of the Lord Community
Family & Life Apostolate
Bien Unido, Bohol
Couples Recollection 2014 Module
Topic 2: Ang Kaminyoon Isip Tawag sa Pagkabalaan
(Time: 1 hour & 15 minutes)
Daghan nga mga Cristohanon nagminyo ug nagpuyo sa dakong bahin sa ilang kinabuhi
diha sa kaminyoon. Gigugol nila ang ilang panahon diha sa pagpanginabuhi, pagatiman sa panimalay, pagkat-on sa pagpakig-ingon ingon sa uban ug pagpadako sa
ilang mga anak. Apan maihap lamang sa mga minyo nga Cristohanon ang naghatag ug
gibug-aton niining maong mga buhata isip maoy unang agianan sa pagkabalaan.
Daghan ang naghunahuna nga ang dalan sa pagkabalaan wala diha sa kaminyoon ug
anaa sa ubang dalan. Adunay daghang rason nganong adunay pakyas nga pag-ila sa
kaminyoon isip tiunay nga tawag ug dalan alang sa pagkabalaan.
Ang pagkapari ug relihiyosong bokasyon mao ang tradisyonal nga giilang mga nagunang dalan sa pagkabalaan. Gawasnon sa mga kalibotanong mga pagpakabana nga
sagad maoy gikahutdan sa panahon sa mga ordinaryong mga Cristohanon, ang mga
pari ug mga relihiyoso mas adunay panahon nga ikagugol sa espirituhanong
pagkinabuhi sanglit dili man sila mahasol sa mga kakulian nga anaa sa kaminyoon
sama sa panagbingkil nga magtiayon, pag-apas sa mga balayrunon, pag-atiman ug
pagpadako sa mga anak, pagpanginabuhi ug uban pa.
Ang pagkapari o relihiyoso sa mata sa kadaghanan mao gayod ang tawag ngadto sa
mas taas o mas hingpit nga kinabuhi. Kadtong mipili nga magminyo mubati nga sila
mga second class citizens. Ang pagkabalaan sa ilang rason, kinahanglan maglangkob
sa pagsunod sa kinabuhi sa mga pari ug mga relihiyoso.
Subay niining maong panglantaw, ang uban mugahin ug panahon alang sa matag
adlaw nga kinaugalingong pag-ampo, ang uban muhimo ug mga retreat ug mga adlaw
sa pamalandong. Ang uban muhimog pag-ampo sama sa divine office, ang uban
muhimog mga penitensya, muapil sa mga apostolado diin sila makagahin ug oras. Apan
sa gihapon, wala gihapon nila makaplagi ang pagkabalaan diha sa kaminyoon ug diha
mismo sa pamilya.

Ang Ikaduhang Konsiho Vaticano (Second Vsatican Council) mihatag ug dakong

pahimug-at diha sa maong kinaiya ngadto sa Cristohanong kaminyoon. Isip pagsugod,
gipahanap sa maong konsiho ang paglain sa first ug second-class nga mga
Cristohanon diha sa simbahan, usa ka paglain nga gihimo sulod sa daghang mga siglo.
Diha sa Dogmatic Constitution sa simbahan, imbes musugod sa paglatid sa hirarkiya sa
simbahan, mipunting hinuon kini ngadto sa kinatibuk-ang katawhan sa Dios, ang tibuok
lawas ni Cristo.
Uban niining maong hulagway sa simbahan, ang kapitulo nga giulohan ug Ang Tawag
sa Tibuok Simbahan Ngadto sa Pagkabalaan, gipahimug-atan gayod nga ang tanang
katawhan sa Dios gitawag ngadto sa pagkapuno sa Cristohanong pagkabalaan, ug nga
ang maong pagkabalaan madawat sa tanan, pinaagi ug diha sa ilang tagsa-tagsa ka
mga bokasyon. Bisan unsa ang ilang mga kaakuhan ug kakulian sa kinabuhi, ang
Cristohanon mutubo diha sa pagkabalaan pinaagi ug diha niining maong mga kakulian
sa ilang kinabuhi.
Misulti ang Konsiho direkta ngadto sa mga minyo, ug nagkanayon: Ang mga minyo ug
Cristohanong mga ginikanan angayan musunod sa ilang kaugalingong agianan sa
pagkabalaan pinaagi sa makanunayon nga gugma, magtinabangay sa usag-usa diha
sa grasya sulod sa ilang tibuok nga kinabiuhi.
Angay nato masabtan nga ang ato mismo nga kinabuhi isip mga minyo, kung ato
lamang kining pagapuy-an diha sa tinud-anay nga paghigugma sa usag-usa kauban
ang paghigugma sa Dios, ug pag-alagad sa uban, ilabina ang atong mga anak, usa kini
ka agianan alang sa pagkabalaan sa atong kinabuhi.
Angay natong makita kining maong mga kamatuoran diha sa unang duha ka santos nga
mga Pilipino, si San Lorenzo Ruiz ug San Pedro Calungsod. Silang duha mga laygo, dili
mga pari. Mga ordinanaryong mga Cristohanon nga naghimo sa ilang tawag sa gugma.
Atong puy-an kining sacramento sa kaminyoon isip usa ka buhing timailhan sa
presensiya ni Cristo ug agianan sa iyang grasya. Ang ato mismong mga kinabuhi mao
ang atong dalan sa pagkabalaan. Tugutan nato si Cristo nga mahimo gayod nga sentro
sa atong kinabuhi ug pagpuyo. Paharion ta siya ug ang iyang gugma diha sa atong
tagsa-tagsa ka mga pamilya aron mas mahimong sayon alang kanato ang pagkab-ot sa
kinabuhing balaan.
Mag-agakay kitang tanan padulong ngadto kang Cristo, mga bana muagak sa ilang
asawa, mga asawa muagak sa ilang mga bana, mga ginikanan muagak sa ilang mga
anak, ang mga anak makighugpong ug makigtambayayong sa ilang mga ginikanan
ngadto sa pagkabalaan.
Lisod kini buhaton kung magsalig lamang kita sa atong kaugalingon, apan sanglit ang
grasya sa Dios ato naman nga nadawat diha sa mga sacramento, dili halayo ang
pagkab-ot sa pagkabalaan.
Dunay 3 ka mga angayan timan-an aron mas mahimong sayon ang atong
espirituhanong paglambo padulong sa pagkabalaan isip mga minyo: (ipaambit ang
personal nga kasinatian sa musunod nga 3 ka timaan).
1. Makanunayong pag-ila ug pag-usisa sa atong mga kaugalingon

2. Paghimo ug desisyon nga musunod kang Cristo matag adlaw diha sa kinabuhing
minyo. (biyaan ang daan nga kinabuhi)
3. Mahigugmaong pag-alagad sa atong kapikas ug mga anak matag adlaw.
Ang kinabuhing minyo mao ang atong tawag. Mao kini ang agianan aron kita mahimong
balaan. Hangtod dili nato kini pagapuy-an sumala sa tawag sa Dios kanato, dili gayod
kini nato mahatagan ug kapuslanan.
Ang kaminyoon usa ka grasya ug gasa sa Dios. Hangtod magmakuli kita sa pagdawat
niini sa paagi nga gawasnon, magpuyo kita niining maong matang sa kinabuhi nga daw
adunay gaid o higot. Dili kita makatulin, wala kitay kapaingnan. Apan kung tugutan nato
nga mulihok ang grasya sa Dios diha sa atong kinabuhi, mahimo gayod kitang tinudanay nga gawasnon. Gawasnon nga mahigugma sa usag-usa, gawasnon nga
mualagad sa usag-usa.
Mao kini ang atong tawag, mag-ambahan kita mga igsoon ngadto Kaniya nga maoy
nagtawag kanato, Kaniya nga maoy unang nahigugma kanato. Adto na kita sa dalan sa
kalauwasan, ang dalan sa pagkabalaan. Musunod kita sa atong manunubos pinaagi sa
tawag nga iyang gihatag kanato, ang bokasyon sa kaminyoon. Daygon nato ang Dios
hangtod sa kahangtoran, Amen. Daghang salamat.
Servants of the Lord Community
Family & Life Apostolate
Bien Unido, Bohol
Couples Recollection 2014 Module

Topic 3: Ang Kaminyoon Isip Tawag sa Pag-alagad

(Time: 1 hour & 15 minutes)
Ang kaminyoon usa ka tawag sa pag-alagad. Sa dihang mihukom kita nga magpakasal,
nga atong igahin ang atong kinabuhi alang sa paghigugma ug pag-unong sa matag usa,
usa kadto ka hukom sa pag-alagad.
Ang gugma isip unang tawag diha sa kaminyoon, dili gayod hingpit nga mapabati
ngadto sa managtiayon kung dili sila maalagaron sa usag-usa. Sa atong kasal,
mibungat kitag mga panaad sa pag-ingon:
Itugot Ginoo, nga kami magkahiusa, sugod karong adlawa, sa maayo o daotan, sa
kahamugaway o kapit-os, sa sakit o maayong panglawas, maghigugmaay ug
magminahalay, hangtod ang kamatayon mubulag kanamo.
Nahinumdom pa ba kamo sa maong mga panaad? Lab-as paba sa inyong mga
panumdoman ang maong mga pulong? O bakaha, tungod kay wala kini mapuy-i maong
murag wala na lamay bili ug angayan ilubong na lamang sa kalimot?
Kining maong mga panaad makahuloganon kaayo alang sa matag-usa kung ato gayod
nga pamalandongan. Ang pinakauyokan nga bahin niining maong panaad mao ang
gugmang maalagaron ngadto sa usag-usa. Kini usa ka panaad sa pag-alagad. Bisan

unsa ang dangatan sa matag-usa, ang maong panaad nagapahinumdom sa matag

kapikas sa ilang kaakuhan ngadto sa usag-usa tungod sa gugma.
Ang gugma nga walay pag-alagad walay kapuslanan. Sama kini sa usa ka kahoy nga
walay bunga, nag-usik lamang sa katambok sa yuta.
Ang pag-alagaray sa usag-usa mao ang buhi nga pagpakita sa malungtaron nga
panaghigugmaay sa managtiayon. Gugma nga bisan pa sa paglabay sa panahon, bisan
pa sa mga bug-at nga palas-anon, bisan taliwala sa mga nagkadaiyang mga hagit ug
problema sa kinabuhi, bisan paman sa hulga sa lawasnong kahimsog, sa mga trahedya
ug mga pagsulay diha sa pamilya, nagpabilin nga mibarog ug nagmalig-on luyo sa
tanang mga kakulian nga maagian dinhi sa kalibotan.
Mao kini ang gugma diin kita gitawag sa Dios. Gugma nga tiunay. Gugma nga walay
kahadlok muatobang ug mangita sa kamatuoran. Gugma nga nagdala ug kagawasan,
gugma nga nagdala dili lamang sa kalipay nga hilabihan kung dili, naghambin usab sa
kaligdong ug katarong sa paglabay sa panahon.
(Ipaambit ang personal nga kasinatian sa mahigugmaong pag-alagad sa kapikas, sa
mga anak, sa pamilya, ug sa katilingban)

Mao kini ang atong kaminyoon, dili lamang tawag sa gugma, dili lamang tawag sa
pagkabalaan, kung dili tawag usab sa pag-alagad ngadto sa tanan. Maningkamot kita
nga sa kanunay mutubo kita diha sa pag-alagad sa Dios pinaagi sa pag-alagad sa
atong kapikas, mga anak, sa atong pamilya, mga silingan, sa katilingban ug sa tibuok
simbahan.
Ang kaminyoon isip bokasyon sa pag-alagad, usa usab kini ka tawag alang sa pagbago sa katilingban diin diha kita nahisakop. Sa atong pagbuhat sa atong mga trabaho sa
gobyerno man o sa pribado, kung kini tinud-anay nga maalagarong pagpangalagad,
dako kaayo kinig ikatampo alang sa kabag-ohan sa atong katilingban ug sa simbahan.
Sa atong pag-apil sa mga apostlado diha sa simbahan, dako kaayo kitag ikatampo
alang sa misyon sa Ginoo aron makabig ang kalibotan sa pagbiya sa kadaotan.
(Ipaambit ang mga personal nga kasinatian sibo sa gisulti sa unahan.)
Ang matinud-anon nato nga pagpangalagad sa atong isigkaingon, agianan gayod
ngadto sa pagkabalaan. Tino kini nga paagi alang sa pagbalaan sa atong mga kinabuhi.
Kini mao ang atong tawag busa dili kita magmakuli sa pagbuhat niini.
Dili man kita hingpit sa tanang panahon, apan kung magpabilin kitang maningkamot ug
makighiusa sa grasya sa Dios, makatubo gayod kita ngadto sa kinabuhi diin kita
gitawag sa Dios. Magpabilin kitang mag-ampo alang sa usag-usa nga unta buligan sa
Dios ang atong mga pagpaningkamot pinaagi sa iyang grasya.
Mag-ampo kita sa kanunay nga mutubo pa ang matag-usa kanato diha sa gugma ug
pag-alagad. Dili kita magtapol sa pagsangpit sa panabang sa Dios aron sa kanunay
malamdagan ug matultulan kita sa Espiritu Santo nga maoy maghimo kanatong duol sa
dalan sa katarong, dalan diin anaa ang pagtuo, paglaom ug gugma; dalan nga diin kita
gitawag, ang dalan sa pagkabalaan, nga mao ang atong bokasyon, ang kaminyoon.

Ato untang Makita ug mahinumdoman si Santa Maria ug si San Lose, mga balaan diha
sa bokasyon sa kaminyoon. Ato untang makat-onan ang mga hiyas sa ilang balaan nga
kaminyoon. Ato untang pagapuy-an ang sulundon nga banay, ang Sagrada Familia. Dili
unta kita masilaw sa kinabuhi nga gibaligya karon sa kalibotan isip baylo ug haylo sa
kinabuhing balaan diin kita gitawag. Mopadayon unta kitang mulawig nga puno sa
pagtuo, paglaom ug gugma ngadto sa panaw sa kinabuhi, kinabuhing walay lain nga
kapaingnan kung dili ang pagkabalaan.
Daygon nato ang Dios hangtod sa kahangtoran, Amen. Daghang salamat.