Vol 23, No.

9, pages 3-8
October, 2009

The War of the Worlds

K. Lalchhandama
Department of Zoology
Pachhunga University College

I lo hre ve tawh pek ang chu maw? Kum 2012 khian khawvêl a tâwp dâwn. Krismas ruai
pawh kan \heh hman dâwn lo, December ni 21-ah chuan ‘Ka sual rit tak phurh leh lei ninawm
hi’ kan ti tâwp hmak dâwn. Vânsâng zirna lama sûlsutu lian ber National Aeronautics and
Space Administration (NASA) meuh pawhin 1983 khan an lo chhui chhuak daih tawh. Kan la
hmuh ngai loh khawvêl pakhat, Nibiru an tih, a chânga Planet X emaw Wormwood emaw an
tih bawk chuan kan Ni khi a hêl ve reng a, Lei hi a rawn pan mêk a, 2012-ah he khawvêl
tawrawt hian kan Lei hi a rawn su buaih emaw su thawi thuak emaw dâwn a. Lei vir lai hi
tâwp chawtin a hawi zâwng a sawn dawrh ang a, a chhûnga chêng nungcha tawh phawt te tân
\ah leh ha \hialna vâwrtâwp a thleng ang; ha balte pawn hahni an \hial râwt râwt mai dâwn ni
âwm tak a ni. Tin, hun bi rêng a awm tawh lo vang. An ti.

Chanchin \ha lo lâwmawm lo: Khawvêl tâwp tûr chungchâng hi Zoram khawvêla ni tin
chanchinbu zahkai Vânglaini (August 18, Thawhlehni, 2009, phêk 5-na, Zara Bihchianna)
hialin ‘Sakhua leh science: Vân lam Olympics a thleng dâwn em?” tiin min hlui hluai mai le.
Mahse ka inthlahrung viau na a, “An ti,” tih chu, “Dâwt,” an ti. Science hi chu a lo ropui
ngang a ni ang e. A thâwk a phita, “Science-ah chuan,” tih te, “Scientist-ten an ti,” tih dêk
dêk tawh hi chuan a engakhawlawilovah kan mit del thing serh vawn deuh ngawt zêl a; a si
leh a tak thliar hran hmasakna châng kan hre \hin lo. Science hminga dâwt mu hlûm, titi
puarpawlêng, zêldin thu bâwl hi inbumna leh intihderna hmanrua atâna rin tlâk, keini
bengtawiate chhûngina kan hnualsuat lawk lawk theih loh tûr niin a lang.

Hetiang thu dêngkhâwng hi internet, titi thangva leh a video [planetxvideo.com en mai
theihin a awm] te a tam tawh mai a. Zau zâwka a darh lêm loh chuan tiin ka lo uipui tui lian
thlir liam ve mai mai rih a. Tûnah a puak darh ta, a va tihzia lo êm ve le. A lei kuai thei ang
ber tûra Vânglaini meuhin min han \heh tâkah chuan ka dawhthawihnaten min rauhsan
chawpchilh a, ka tisa châkna – he thu ziak tûr hian ka tihna – a kaitho lo thei ta lo; thil ka
hmuh leh ka hriatte sawi lovin ka awm thei lo. Thudik hriattir hi he khawvêla ka lo pian
chhan a ni, te han ti ve hluai ila.

Zâwlnei derte kâ a\angin: A ni lah taka, insawi \haih nana a \angkai vâng te pawh ni
fahmiang, khawvêl tâwp chungchâng hian ngaihsak a hlawh phian a. Kristiante tâna se dai
ngul Tirhkoh Paula meuh pawhin a lo hisâp sual fe tawh a (cf. 1 Thes 4:16&17),
Nostradamus a\anga kan pûm chhuak tualchhûng intizâwlnei chhumchhia deuh chenin hun
tâwp hrilhlâwk hi an riruat fuh hlei thei lo tih kan hriat \hin kha. Hrilhlâwkna a tam poh leh
dawheh an pung ting mai.

Heti hi a ni a, nu pakhat, a hming Nancy Lieder a awm a, Lei piah lam mite nêna lo intawng
fo tawh a ni. Eng emaw ti hnuah phei chuan arsi hla tak Zeta Reticuli-a chêngte, Zeta a tihte
chuan a thluak rawn thlun zawmin an rawn be pawp ta a. A ti. Lieder hi US-a California-a
awm \hin, Wiscosin-a awm ta a ni a. Chutia Zeta mite nêna thu khûnkhân, khawvêl tâwpna
leh chhiatna lo thleng tûr an inhrilh hnu chuan an thu puang chhuak tûrin kum 1995 khân
zetatalk.com a din ta hial a ni. A sawi dân chuan Zeta mite chuan khawvêl lianpui Planet X
(sâwmna) chuan 2003-ah kan lei hi hnai takah a rawn kal pêl fua ang a, leilung hian chhiatna
namên lo a tawng dâwn a ni tih an hrilh.

Chu Planet X chu kan Lei lêt li vêla lian a ni a, May 27, 2003 ni takah Lei hi su thawin Lei
vir lai chu ni 5.9 lai a tichâwl ang a, Leiin a hawi lam a sawn dawrh (pole sift) dâwn a ni a ti.
Thlabâr hlauhlawpa May 27, 2003 lo nghâk fan fantute chu a hun a lo thlen chuan an thaw
huai a. Rokhawlhna eng emaw avângin Planet X chuan a ruahmanna a rawn pâm\ûl ta thut a,
hemi nia piangten birthday lawm an \hulh ta lo. Lieder chu zakin kimki mah se pau tikhauhin
a tlâwm hlen chuang lo. Beidawn aia hun tiam sawn hlat thlang zâwkin kum 2010 a tin zâwn
leh ta poh a. Mi sehhel tak chu a ni phawt e.

Han sawi zau tâkah chuan kum 1995-a scientist-ten Comet Hale-Bopp an hmuhchhuah pawh
khan, a kalkawng chhûtin he arsi them thlâwk hian Lei hi kum 1997-ah a rawn su thawi thuak
dâwn tih an hrilhlâwk a. Lieder ta pek chuan Zetaho thuchah sawi chhâwngin, “Comet Hale-
Bopp hi a awm lo. Inbumna a ni, a rawn kal hrep [‘hrep’ tak hi chu a ti lo!] lo vang,” tiin thu
hnu dâwn lo lêkin a lo tlâk dêng ni kang mau chang puah ve phawng phawng a, a êk chhe
lârpui phian leh nghâl. Tin, ni kin ni-ah chuan, Comet Hale-Bopp chu scientist-te beisei ang
takin thlasik anga khêl lovin mawi takin an rawn lang a, kum zabi 20-naa comet lang rei leh
chiang ber a ni a, mit lâwng pawhin thla 18 chhûng, April 1997 a\angin a hmuh theih a ni.
Lieder pawhin mathei lovin a thute zûkin a website ata a thian fai vat a. Zeta-ho kha an
dawthei hlawm ngawt mai.

Bum nuam tak tak hi kan lo piang ve zêl a. Lieder hnungzuitu pawh an lo pung zêl a, a
vengva zualte chuan chhiatna hun atân hmakhawsâng mi Mayan-ho calendar-a tâwpna ni tûra
an sawi December 21, 2012 chu inhmeh ta êm êmin an hria a, chu hun chu an han riruat leh ta
zâwk a. Hei zet chu \âwmpuitu an ngah ta, 2012 millenarianism an ti hial. Chu chu kan tûnlai
thil awmizia chu a ni. Amaherawhchu Mayan calendar-ah hian December 21, 2012 hi
khawvêl tâwpna tûr tihna engmah a awm lo va, kum bi thar in\ânna a ni ringawt; a
chhiarkawp chhût dân dangah chuan he kum bi in\anna hi December 23 zâwk pawh a ni thei
an ti bawk. A eng zâwk pawh ni se ‘ur lâwk zân’ kan miss tho tho dâwn!

Babulon arsi buaipuiawm: He khawvêl \ihbaiawm Planet X an tih hi 2012 chhiatna thleng
tûr ringtute chuan hmânlai Babulon/Sumerianho thawnthua arsi lian pakhat Nibiru an tih ngei
kha a nih an ring leh zêl a. Nibiru tih hi Sumerian-ho lung ker (cuneiform), kum 5,000 laia
upa a\anga an hmuhchhuah a ni. Babulonho ngaihdân chuan Nibiru chu lei leh vânram inkâra
awm a ni a, an sulhnu cuneiform-a a lan dân chuan Nibiru hi a changin Jupiter kan tih hi a ni
a, a chângin Mercury kan tih hi a ni thung. Hrangchhuana leh Chawngmawii an hriat pawlh
hle a ni phawt mai.

Tin, Nibiru tih hming a lo lâr viauna chhan chu Babulonho chanchin zir mi Zecharia Sitchin
thuziak a\angin a ni a. He pa hian ngaihdân maksak pui pui hmangin Babulon mite chanchin
a ziak chiam chiam a, hmânlai mite zingah hian vân lâwn mi (ancient astronaut) an lo awm
reng tih ang reng suangtuahna \ha rai lo vawrh lâr peih êm êm a ni. Kum 1976-a a lehkhabu
The 12th Planet-ah chuan Nibiru chu khawvêl lian tak a ni a, kum 3600 chhungin Ni hi vawi
khat a vêl chhuak \hin, a ti a. Lei a kal pelh lai tak chuan mihringte leh Nibiru mi chêngte
pawh an inkal pawh \hin tih a târ lang. Heng mite hi Babulon pathian lo ni ta, milian,
Annunak-ho an ni tih a sawi bawk a. An chhui zaunaah chuan Annunak chu Hebrai ten
Nephilim an tih nen thuhmun a ni leh zêl a. Bible-a milian, Nephilimte [Genesis 6:4 chho en
la] pawh chu Nibiru a\anga lo kal ngei niin an ring. Sitchin chuan Nibiru kalhmang chu
Mayan calendar nên inzawmna thûk tan a neih a ring bawk.

2012 millenarianism ringtute chuan Planet X leh Nibiru chu thil pakhatah an pawm nghet
thlap a. Mahse Lieder leh a chekawihote ang lo takin Sitchin hi chuan Nibiru-in chhiatna
engmah a thlenna chhan tûr a hre lo. Kum 2007-a a lehkhabu The End of Days-ah phei chuan
600 BCE vêl khan lei a rawn pêl tawh a, a lehpek chu kum 1000 tal nghah leh a ngaiin a ring;
2012 phei chu a ring lo bur. Kan mi rinhlelhawm pahnihte pawh rinthu huang khatah an la tla
thei lo zui a, rin duap chungchuang tak zawng an ni.

Tin, han sawi tâk zêlah chuan wormwood an tihna chhan chu Thupuan 8:11-a vân a\anga
chhiatna rawn thlen tûr arsi hming a ni. Zo\âwng chuan ‘sai’ a ni a, a scientific hming chu
Artemisia a ni. Thlai te tak, hnah sin nêm tak nei a ni a, a hnah a\ang hian rulhût hlo leh
malaria damdawi thar (artemisin, artemether, artesunate tih ho) an hmuchhuak; hnâr thi \hin
tân a \ha hle bawk. Vân a\anga rawn tla a nih pawhin, kei chuan ka hlau lêm lo.

Scientist-te teivet vâng: Scientist-te pawhin an ti, an tihna chhan ber chu hetiang hi a ni.
NASA chuan kum 1983 khân Infrared Astronomy Satellite (IRAS) hmangin vân thengrenga
khawvêl leh arsi awmte a zir chiang a. Infrared chi hrang 350,000 zet an hmuchhuak rêng a.
Mahse an thil hmuhchhuah an puanzâr khân eng nge a nih an hriat mai loh avângin khawvêl
sawmna, ‘Planet X’ a niang ti tâwk an awm a; an thupui hman ‘Unidentified point sources in
the IRAS minisurvey’ (Astrophysical Journal Letters, 1984) kha a chichawm deuh bawk a ni.
Chu chu 2012 millenarianism lo vul chho khan thu tak hla taka lo lain, “Hei ngei hi kan
‘buaina râl lian’ Nibiru chu le,” an lo ti ta mai a ni. A khawvêl taka pawh chu an hmuchhuak
hauh si lo. IRAS hmanga an thil hmuhte hi a hnu lawkah chuan arsi tlim pui (galaxy) chi
hrang hrang an ni tih an finfiah leh nghâl tho (cf. Nature, 1984; Astronomical Journal, 1985,
1986; Astrophysical Journals Letters, 1985). Heng hi kan bengtululho chuan an bengkhawn
leh tawh si lo.

Chu bâkah khâng hun lai kha chuan planet (khawvêl) 9 a awm tih \hin kha a ni a, khawvêl
dang hmuhchhuah belh a nih tâkin tih thuah scientist-te chuan ni thei âwma an ngaih chu
‘Planet X’ tiin hming lem vuah an ching a. Chung zinga langsâr ber chu Neptune leh Uranus
inkâra awm tûra an rin chu a ni. A chhan chu heng khawvêl pahnihte kalkawng hi a pângngai
thlap lo va, tibuai thei khawvêl dang a awm dah law maw tiin an zawng chiam a ni.

Mahse California Institute of Technology-a mi E.M. Stanysh Jr. chuan planet kalkawng buai
chu Neptune hipna vâng a ni tih leh planet dang a awm lo tih a finfiah ta mai a (The
Astronomical Journal, 1993). Tûnah phei chuan planet 9-na tih \hin Pluto hi planet a ni lo,
tiin scientist-te lungrual takin an khawi thlâr nghin dal dal tawh bawk a. Kan ni hêltu planet
thar an hmuchhuak a nih pawhin Planet IX a ni chauh dâwn, Nibiru a nih hmêl chuang hlek
lo. Planet X chu engti kawng zâwng pawhin a la hlauhawm rih lo a nih chu!

Chuti chung chuan, “NASA-in an hmuchhuak chiang,” tia lo âr mit \et khuanpui peih tâwk
bo lo. NASA hian Nibiru leh chhiatna thleng thei record engmah an nei lova, chutiang thil a
awm lo tih leh inbumna thu vuvûk mai a ni tih erawh chu NASA Astrobiology Institute-a an
senior scientist leh hmuipui pu David Morrison chuan a sawi chiang ngam khawp mai (cf.
Skeptical Inquirer, Sep/Oct 2008). I awih loh leh zâwl rawh. Chu bâkah Nibiru thlalâk
[Youtube-ah a awm] nia hahipa an sawite hi vânsâng zirna telescope rinrâwl Hubble thlalâk a
ni a, arsi V838 Mon an tih hual vêla boruak zâm thla a ni tih an lo hrilhfiah hrep thei bawk
ang che [nasa.gov-ah a finfiah theih reng].

Dâwt lêng an sêl: Hei le, fiahna dik tak an rawn lek e. Nephilim-te hi an awm ngei tih
tichiang tûrin ruangruh hrawl êm êm thlalâk, kum 2004 a\ang khân a rawn lâr chho va. An
hmuhchhuahna hmasa Saudi Arabia-a tuialhthei an zawnna ‘Empty Quarter’ an tiha mihring
ruang chu 60 ft lai ni thei tûr a ni a, a lu ruh ringawt pawh patling pângngai aiin a lian zâwk.
2012 millenarianism nemnghettuah an ngai hmiah bawk. Planet X video-ah [Youtube-a pawh
a awm] pawh an tihlan châmchi kha. India khawthlang lamah-ah te pawh an hmu chhuak.
Mahse...
 Fig. 1 Fig. 2
Nephili Mastodon

Heng thlalâk hi lo en kawp ve teh, i vâr uar mai ang. A hmasa zâwk (Fig. 1) hi Nephilim
milian thlalak an vawrh lâr ber chu a ni a, Saudi Arabia leh India-a an hmuhchhuah an tih,
March 2004-a chanchinbu tam taka an chhuah chu a ni. A pahnihna (Fig. 2) hi Cornell
University, USA-a scientist-ten Hyde Park, New York a\anga hmânlai sai lian (mastodon) an
hmuhchhuah, a hmunhma thlalâk, September 16, 2000 ami a ni [graphics.cornell.edu/
outreach/mastodon/ aerial-views.html]. Thlalâk 2-na ding lam chung lam zawng hi thlalak 1-
na ami hian bel hnan la, a fel vek. Cornell University-a mite thlalak chu computer hmanga
chei bâwlin, mastodon aiah mihring ruh an bel a, kan tân Nephilim a lo piang ta. Hosanna!
Cornell University hminga lo kal chu fakin awm rawh se.

Heng milian thlalâk leh a dangte hi a siamtuten inbum nâna an tih chiah chu a ni lo.
Worth1000.com buatsaih October, 2002-a Photoshop contest-ah heng thlalâk hi ‘Ironkite’
intiin ‘Archaeological anomalies’ tih thupui hmanga a thehluh a ni [a original thlalâk lem chu
worth1000.com/ view.asp?image=18978-ah a awm]. Heng hi mi chimawmten lo hmu fuhin
Nibiru leh Nephilim te nên an lo chawm pawlh ta mai a, a lungmâwl deuh ten an lo hâwp
hlawih hlawih mai a ni. Chik taka en phei chuan thlalâk 1-na hnuai lam laihâwl vel, milian
dâr hnuaia ruh lang, rin bial lai hi mastodon ruh kha a ni tih a la hriat theih, an paih hmaih a
ni.

Chutichuan Nibiru chu inbumna hleihluak mai, science huang ami rêng a ni lo va. Rinna
kawisawi leh maksak vuantute phuahchawp, dâwt lehlâng leh thu vuvûk mai a ni. Science
khawvêlah hi chuan thil hmuhchhuah rêng rêng hi, “Eureka!” ti chunga zahmawh then nawlh
nawlha khêkpui ngawt tawh lovin, awmze neia ziak (publication) hmangin an puangzâr \hin.
Nibiru emaw 2012 hun tâwp emaw milian danglam emaw hi scientific literature-ah chuan,
hmeithai awm khâwm zinga zang zawn ang chauh a ni – a vâng.

Dam hauh phawt ila: Englekhawle, kum 2012 hian chhiatna a rawn thleng dâwn lo tih ka
sawi thei lo, zâwl ka tlachham. Arsi them pawh a rawn tla thut thei tho, kawthalo pawn kan
pûl thei, sazu flu pawh a lêng thei. Hei erawh ka hria: Planet X, Nibiru, sai tih vêl hian ka taw
a tisai eih lo. 2012-ah eng tin nge kan awm dâwn tih lungkhama lo phâwklêk ai chuan, May
27, 2003 khan eng tin nge i awm tih chhui lêt la, a hnêm phian maithei che. A nih loh chuan
buai duh suh, he khawvêlah hian ngaihtuah tûr \ha dang a tam lutuk.

A thu bul-bâl ban pha ve lo te, hriatna, thiamna, finna ram dai ve lo te, leh tisa leh thlarauva
mi derdêpte tihchiai nana kawhmawhbâwl chingte thu lêlo hmanga invau \haihna thil mai
mai hi, mi â buhhâwp hlauha lo hlauh ngawt tûr a ni lo ve. Hetianga science thu leh hla rim
nam bawl phawn inbumna uchuakah hian tawlhthlu ve lo tûrin i fimkhur zêl zâwk ang.
Science thu hi zawng borâl mêkte tân âtna, hrethiam lote tân boralna a va ni êm.

Hetiang thu themlem lutuk hi chu kan chanchinbu âwmkhauh deuhte hi chuan ziak lo se kan
\hatpui loh vêk pawhin ngai kan awhpui tûr a, a nuihzatthlâkna lai hrethiam pha lo hi a tâm
zâwk kan ni si. Eng pawh ni se, hrisêlnaten min thlahthlam lo sela, thlamuang takin kum
2012 Krismas hmuah nuam le.