Professional Documents
Culture Documents
HUAISENNA
HUAISENNA
Mi hlawhtling kan tih te hian kawng awlsam zawh tur ang zawng hmu bik a, an chungah
thil mak thlengin an lo hlawhtling ta mai a ngaih chi a ni hauh lo. Harsatna hmachhawn
tur leh paltlang zo turin chakna leh huaisenna an zawng a, an lo inzir lawk hmasa thin a
lo ni. An hloh hlepah an chhiar bik awzawng lo. An hloh bang la awmte kha an
khawlkhawm a. Chu chu lungphum (foundation)-a hmangin chutah chuan dinhmun an
rem tha leh thin.
Duhthusamte hi a takin a thleng mai mai ngai lo. Inpumpekna tak nena chawm nun rinna
leh beiseinate erawh chuan par a chhuang thung si. Tawngtaina (neih duh a kan dil)-te
pawh hi huaisen taka bawhzui ngam loh chuan chhanin a awm ngai lova. Huaisenna
hmang a chhem alh nungchang leh ze tha inchawhpawlh chauh lo chuan hlawhtlinna a
hlawh chhuak mai ngai hek lo.
Kan rilru leh thinlung hi huaisenna a thuam a nih chuan hlauhnain min kiansan a,
harsatna kan paltlang thei thin. Huaisenna chu hlauhna tel lo nun a ni lova, hluahnate
hnehtu nun a ni zawk.
Duh si ti ngam si lo, ti ve uk si a puitlin ngam leh si lo bakah tih pawh tichhin ngam eih
lo khawp a dawihzep tan engahmah hlawhtlinna beisei chi a ni ngai lo.
At huai chu mi a zia a ni a, huaisenna erawh mifing zia a ni thung. A tum a, a duh a,
kawng chanve tawpsan hnihne a tum lo. A zir a, a inpuahchah lawk a, a mamawh hriatna
leh thiamnate nen a inthuam tlat a, a theih chin apianga a lo hriat chian lawk tawh
avangin huaisen taka bawhzui zel tih mai lo chu hmabak dang pakhat chauh a nei tawh
thin. Chu chu hlawhtlinna!
Hlawhtlinna hi chhangthawp siam nen hian inanna lai an ngah khawp mai. Chhangthawp
siam tur chuan bawlhlo inchawhpawlh tha tawk a ngai hmasa a. Bawlhlo tha ber berte
chu uluk taka chawhpawlh a nih chauhvin zawrh tlaka ur theih a ni thin. Bawlhlo tha
hmang lova, inchawhpawlh tha tawk lova siam chu i ur rei poh leh a ut ruam ringawt ang
a, i ur hneh loh lahin a hel si ang. Bawlhlo tha lo leh inchawhpawlh takw lo chu
engtikawng zawng mahin chhangthawp tui tha taka ur chhuah theih a ni lo tihna a nih ber
chu. Chutiang bawkin hlawhtlinna kan tih reng reng te hi thil tha ber ber leh mahni
inthununna nen chuhva hlawhchhuah chi an ni tih kan hriat a ngai. Tihsual hlauh ringawt
ai chuan tihsual hmang a tihsualna pangngai a tihsual nawn leh tawh loh hian
hlawhchhamna tur chhan a titlem zel a. Zir ngun leh zir uluk bakah hriatna leh thiamna
hmang a tih lawk/chhin fo hian kan hlawhtlinna tur chhan a tipung thin.