Procedemento para a tramitación das Titulacións de Máster e
dos Programas de Doutoramento da USC.
A Comisión de Titulacións e Programas de Estudo do Claustro
Universitario, de conformidade co determinado no Real Decreto 1393/2007 de “Ordenación de las Enseñanzas Universitarias Oficiales”, no documento “Liñas Xerais para a implantación dos estudos de grao e posgrao” aprobado polo pleno do Consello Galego de Universidades na súa reunión do 5 de novembro de 2007, así como na Programación Plurianual da USC, acordou, na súa reunión de data 14 de maio de 2008, aprobar a seguinte proposta de procedemento para que rexa o proceso de presentación das propostas de titulacións de máster e de programas de doutoramento e de elaboración das correspondentes memorias de planos de estudo, para a súa aprobación por esta universidade e remisión ao Consello de Universidades co fin de iniciar o proceso de Verificación e Rexistro no RUCT e implantación, no seu caso. O Consello de Goberno da USC, tras a toma de consideración de dita proposta na súa reunión de data 30 de maio de 2008, acordou aprobar dito procedemento. Este procedemento será o que segue: 1. Propostas de titulacións de máster oficial e de programas de doutoramento. 1.1. Calquera proposta de máster oficial ou de programa de doutoramento pode ser formulada a iniciativa do Equipo de Goberno. Tamén poden formularse a iniciativa de centros, departamentos ou institutos de investigación, que son quen poden figurar como responsables de másteres e de programas de doutoramento nesta universidade, tal e como se contempla nas “Liñas Xerais da USC para a elaboración das novas titulacións oficiais reguladas polo RD 1393/2007”. No caso de propostas ex novo tamén poderán formularse a iniciativa dun colectivo de docentes da USC. 1.2. As propostas de máster oficial e de programas de doutoramento serán dirixidas ao/a vicerreitor/a da USC con competencias en Oferta Docente. 1.3. No caso dun máster oficial ou dun programa de doutoramento ex novo a proposta deberá incluír os seguintes elementos: (i) Denominación; (ii) Necesidade, Interese e Obxectivos do máster oficial ou do programa de doutoramento; (iii) Docentes implicados na iniciativa; (iv) Áreas de coñecemento que poderían participar na oferta docente; (v) Comisión de Redacción; (vi) Centro, departamento ou instituto que podería aparecer como responsable. 1.4. Nos casos dunha proposta de novo programa de doutoramento e dunha proposta de máster oficial exclusivamente de investigación que se presenten, xa sexa como transformación de programas de doutoramento existentes no 2007-2008 xa como propostas ex novo, as mesmas se canalizarán a través do CPTF (ou centro encargado dos estudos de doutoramento). 1.5.No caso de calquera outra proposta de máster, a mesma se canalizará a través do SXOPRA. 1.6. O Consello de Goberno, a proposta do/a vicerreitor/a da USC con competencias en Oferta Docente, establecerá o calendario para presentación de propostas de memoria de másteres oficiais e de programas de doutoramento. O/A vicerreitor/a con competencias en Oferta Docente deberá poñer en coñecemento da Comisión de Titulacións dito calendario e as modificacións que sobre o mesmo autorice. 1.7.De calquera proposta de máster oficial ou de programa de doutoramento da que sexa aprobada a correspondente memoria polo Consello de Goberno, este órgano deberá fixar con esa decisión qué centro, departamento ou instituto de investigación aparecerá como responsable. 2. Comisión de Redacción. 2.1. O centro, departamento ou instituto de investigación que presente unha proposta de máster oficial ou de programa de doutoramento, e figure como responsable desa proposta, será quen propoña a Comisión de Redacción da proposta de memoria e quen será o presidente de dita Comisión. No caso dunha proposta a desenvolver por varios centros, departamentos ou institutos garantirase que na Comisión de Redacción haxa cando menos un representante por cada un dos centros, departamentos ou institutos implicados. No caso dunha proposta presentada polo Equipo de Goberno ou unha proposta ex novo presentada por un colectivo de docentes, segundo o caso, o primeiro ou os segundos proporán unha Comisión de Redacción. 2.2. Cando se trate dun máster de investigación que proporcione o período de formación a un único programa de doutoramento a Comisión de Redacción será a mesma para o máster e para o programa de doutoramento. 2.3.En todos os casos a Comisión de Redacción contará co apoio técnico do/a Responsable de Xestión de Centros e Departamentos. 2.4. En todos os casos a Comisión de Redacción deberá ser autorizada polo/a vicerreitor/a con competencias en Oferta Docente. Contra esta decisión poderase recorrer ante o Consello de Goberno. 2.5. En todos estes casos a Comisión de Redacción poderá contar coa colaboración dunha (ou varias) Comisión(s) Asesora(s) Externa(s) autorizada(s) polo/a vicerreitor/a con competencias en Oferta Docente. 3. Exposición pública do borrador de proxecto de memoria. O centro, departamento ou instituto de investigación que propoña un máster oficial ou un programa de doutoramento, e figure como responsable desa proposta enviará a vicerreitoría con competencias en oferta docente o borrador de proxecto de máster oficial ou de programa de doutoramento. En todos os casos a vicerreitoría con competencias en Oferta Docente encargarase (a través da unidade ou servizo que determine) da exposición pública do borrador de proxecto de máster oficial ou de programa de doutoramento a todos os membros da USC. O prazo de alegacións ante o responsable do correspondente centro, departamento, instituto de investigación ou ante a vicerreitoría correspondente será de 10 días naturais. 4. Elaboración dun proxecto de memoria de plano de estudos. A Comisión de Redacción elaborará un proxecto de memoria de plano de estudos, consonte ao previsto no RD 1393/2007, tras a análise das alegacións recibidas con motivo da exposición pública do borrador de proxecto de plano de estudos. 5. Pronunciamentos e informes acerca do proxecto de memoria de plano de estudos. 5.1. O órgano de goberno colexiado do centro, departamento ou instituto que presente a proposta, e figure como responsable, do máster ou do programa de doutoramento deberá pronunciarse respecto do proxecto de memoria. Cando se trate dunha proposta na que participen varios centros, departamentos ou institutos, cada un destes deberá pronunciarse respecto do proxecto de memoria. Dito(s) pronunciamento(s), xunto co proxecto de memoria, se remitirá(n) ao/á vicerreitor/a con competencias en Oferta Docente no prazo límite establecido polo Consello de Goberno. Dito(s) pronunciamento(s) deberá(n) incorporar os votos particulares realizados e explicitados no(s) órgano(s) colexiado(s), así como as alegacións presentadas ao borrador de proxecto de plano de estudos. 5.2. No caso de que sexa unha proposta presentada por un colectivo de docentes da USC a Comisión de Redacción remitirá o proxecto de memoria ao/á ao/á vicerreitor/a con competencias en Oferta Docente no prazo previsto polo Consello de Goberno. O proxecto deberá ir acompañado das alegacións presentadas ao borrador de proxecto de plano de estudos. 5.3.O/A vicerreitor/a con competencias en Oferta Docente asegurará os procesos para o examen da documentación polo SXOPRA, cando sexa preciso, e polas comisións que deben informar ao Consello de Goberno. 5.4. A Comisión de Doutoramento formulará un informe preliminar respecto de cada un dos proxectos de memorias de programas de doutoramento e dos de másteres oficiais exclusivamente de investigación. 5.5. A Comisión para Estudos de Máster Oficial formulará un informe preliminar respecto de cada un dos proxectos de memorias de másteres oficiais que non sexan exclusivamente de investigación. 5.6. Os informes aos que se fai referencia nos anteriores puntos 5.4 e 5.5 serán elevados á Comisión de Titulacións, para que esta a súa vez formule o seu pronunciamento respecto de cada proxecto e os correspondentes informes. Asimesmo, a Comisión de Organización Docente establecerá un informe acerca da capacidade docente dos departamentos implicados. Ditos informes serán remitidos ao/á Reitor/a antes de que transcorra un mes respecto da data na que foi recibido o proxecto de memoria, cos votos particulares e alegacións de existir, polo/a presidente/a de cada unha das respectivas Comisións, para a súa toma de consideración no Consello de Goberno e no Consello Social.. A Comisión de Titulacións para elaborar o seu informe poderá solicitar aclaracións da Comisión de Redacción, pedir un informe técnico do SXOPRA, convocar a quen estime necesario e solicitar o apoio de avaliadores externos a través da ACSUG. A Comisión de Titulacións poderá formular suxestións de mellora do proxecto de memoria para que a Comisión de Redacción as incorpore antes de que o Consello de Goberno se pronuncie sobre o proxecto de memoria. En todo caso ditas suxestións de mellora formarán parte do informe da Comisión de Titulacións. 6. Aprobación na USC da memoria de plano de estudos dunha titulación de máster ou dun programa de doutoramento. 6.1. O Consello de Goberno da USC se pronunciará respecto do proxecto de memoria e, no seu caso, aprobará a memoria de plano de estudos, coas modificacións que estime oportunas, para a súa tramitación ante a Consellería de Educación e, se procede, ante o Consello de Universidades. 6.2.O Consello Social da USC se pronunciará respecto da memoria aprobada polo Consello de Goberno para, se procede, a súa posterior tramitación. 7. Tramitación da memoria de plano de estudos dunha titulación de máster ou dun programa de doutoramento. 7.1. A memoria de plano de estudos dunha titulación de máster oficial ou dun programa de doutoramento será presentada ante a Consellería de Educación da Xunta de Galicia para a autorización da súa tramitación. 7.2. Aprobada a tramitación dunha titulación de máster oficial ou dun programa de doutoramento pola Consellería de Educación, a memoria remitirase ao Consello de Universidades para a súa verificación, publicación no BOE e rexistro no RUCT da titulación correspondente. 7.3. A implantación dunha titulación de máster oficial ou dun programa de doutoramento será solicitada á Consellería de Educación da Xunta de Galicia.