魔術 私日記 ～大 Ken 恰長者 ＠ 2007_0427

魔術呢味野，真係講機緣巧合！

話說本來今篇係猛料直擊港大魔術騷，講下金掌櫃套新 act 點樣令人

睇到眼都定埋，就連果位長期睇我Ｄ水皮魔術睇到想喊的朋友都拍
爛手掌。佢雖然因為要趕返屋企食飯，被逼睇完金掌櫃壓軸第一
part 之後就要急急腳走，但都覺得不枉此行…咁又係，因為佢係後
備入替，正選係因身體不適而缺席的家父，如果表演唔精釆的話就
黎得冤枉了。此外我亦想報導會場內有乜野勁人坐陣，例如坐我後
面隔離，號稱「身無彩鳳雙飛翼」的男版貞子，以及坐正台面前Ｖ
ＩＰ席第二行類似法王的物體等等，但因為我陪朋友閃得就閃之陣，
於山頂見倒呢位勁人，故此，今集主角就變成係佢：大 Ken！

又再話說，話說今年一月底，台灣帥哥魔術師劉謙來港主持講座，
家父與我則分別出席其香港及澳門講座，實行黎個一網打盡。關於
魔術界謠傳大 Ken 恰阿伯，就係由東方一撻撻開始…

話說劉謙今次搞的魔術講座門票可於港九兩大魔術店報名購買，仲
要用中文名字報名，以防有人魚目混珠，而小妹就響東方一撻撻阿
金掌櫃度幫襯左一張飛。心細如塵的金掌櫃眼見小妹簽紙作實時，
手字實在寫得太過龍飛鳳舞，於是就問句話：「你個名最後果個字
係點寫呀？」小妹自然如實作答。好可惜，無論金掌櫃係幾咁心細
如塵都好，佢都無辦法扭轉乾坤……

又話說，話說小妹請家父欣賞劉謙的講座，自己就留響屋企目訓其
大覺。正係目訓到迷迷糊糊之際，忽然手提電話聲響起，原來正係
父親大人打黎，而電話另一邊的 background music 卻是一名陌生男
子極長氣地解釋購票守則。事緣工作人員，即陌生男子，找不到小
妹芳名，於是家父就致電求救啦。家父將個手電交俾陌生男子後，
小妹就開始與之對話：

「請問您係邊位？」

「我係 Kenneth。」

「Kenneth？」(乜我識得一個叫 Kenneth 的人咩？)

總算陌生男子叫做俾面，無一野就答句：「工作人員」之餘，竟然
仲肯解釋自己到底係何方神聖：「我係大 Ken。」當大 Ken 耐心解
釋發生乜事，「你朋友…」乜乜物物之際，冷不防被小妹搶白道：
「佢係我爸爸黎架！」大 Ken 大失威風之餘，依然盡力保持有禮態
度，話會盡快搵返小妹個名云云，電話對答於是告一段落。點知，
原來好戲在後頭。

繼續話說，話說大 Ken 千辛萬苦找到小妹芳名之際，家父望住個名，

竟然顯得一臉惘然…

「乜連自己個女果個名都唔認得呀？」似乎大 Ken 心情麻麻。

「呀，係啦，係佢啦，我認得個電話號碼。」家父答。

發生乜事呢？之唔係小妹個名的最後一個字，即係阿金掌櫃有疑問
果個字打錯左囉！打錯個名喎，您叫人點認得呀，大佬？！呀，唔
係，係大 Ken 至真。由於金掌櫃唔係負責中文打字工作果位人兄，
結果無法扭轉乾坤，促成是次笑話。之不過，都總算家父比佢個細
膽又百厭的女兒有品，未至於一句質落大 Ken 度：

「依家係您地寫錯我個女個名呀！好彩我醒目，認得佢個電話號碼
咋。乜你地做野咁求其架？家陣仲要串個老人家添？您知唔知醜
架？」

「大 Ken 欺負長者」一事，自此成為佢的魔術人生污點了…善哉善
哉。

～ 講笑而 已。 個 場咁 亂 ，係人都做到唔好老脾啦。大 Ken 已經

比小 妹更有 品的了 。

※※※※※※※※※※※※※※※※※※※※※※※※※※※※※

完場前，就等小妹為大家報導下魔術先生個澳門講座的官方宣傳單
張係點樣啦。唔…米同我整果張差唔多！聽日叫金掌櫃貼返舊果張
出黎都ＯＫ喎。一於咁話！晚安。