II PREMIO DE DIVULGACIÓN CIENTÍFICA ÁNGEL CARRACEDO
Convócase o 2º Premio de Divulgación Científica Ángel Carracedo coa
intención de dar a coñecer os descubrimentos científicos, así coma os autores destes avances, dunha forma amena e comprensible para o gran público. Ao mesmo tempo, preténdese pór en valor a lingua galega coma transmisor de coñecemento científico. O certame está aberto a todos os campos de coñecemento das ciencias experimentais. Os traballos poderán versar sobre diversos temas científicos así coma sobre a historia da construción do coñecemento científico. Invítase ao autor a facer unha reflexión en ton divulgativo sobre o tema elixido, dende un punto de vista crítico, baixo o rigor do método científico. O certame está dirixido a alumnos do IES Ponteceso de todos os niveis educativos. Requisitos Os traballos presentados deben ter unha extensión entre 500 e 800 palabras e estar redactados en galego. Admitiranse traballos presentados tanto de forma individual coma colectivos, cun máximo de catro autores por traballo. Valorarase a especificación da bibliografía e fontes empregadas. A bibliografía engadirase ao final do texto, cun máximo de cinco fontes bibliográficas, e non se considerará como parte do texto a efectos de extensión do mesmo. Os textos poderán ir acompañados de imaxes ou cadros de produción propia. Os traballos presentados non poderán estar publicados previamente e, coa aceptación das bases se asume a orixinalidade do traballo por parte do autor. Modo e prazos de presentación Os traballos deberán ser enviados en formato de procesador de texto (DOC, ODF) como documentos adxuntos dunha mensaxe dirixida ao correo bacharelato2010@gmail.com, indicando como asunto da mensaxe Premio Divulgación. No texto da mensaxe incluiranse o título do ensaio e os datos persoais do participante (estes datos nunca deben aparecer no ensaio redactado). O prazo de presentación de traballos permanecerá aberto do 4 de novembro do 2010 ao 29 de abril do 2011. Premios Un Primeiro premio: 100 euros e un libro de divulgación científica. Dous segundos premios: 50 euros e un libro de divulgación científica. Procurarase que todos os premiados realizarán unha visita a un centro investigación de Galicia. Xurado A concesión dos premios efectuarase a proposta dun xurado formado por profesores pertencentes aos Departamentos organizadores. Os criterios de valoración serán a capacidade divulgativa do texto, a calidade literaria, o interese social do ensaio e o rigor científico. Resolución De acordo coa proposta efectuada polo xurado, o comité organizador comunicará a concesión dos premios antes do dez de xuño. Colaboran Departamento de Ciencias Naturais, Departamento de Física e Química, Departamento de Matemáticas, Departamento Tecnoloxía, Biblioteca e Departamento de Normalización Lingüística.