Kidapawan City Youth Peace Builders Sulat Pamahayag

Pagtimbaya sa Kalinaw ug Panagdait sa Usag-usa! Maayong adlaw kanatong tanan, kining maong sulat pamahayag nagagikan sa mga myembro sa Kidapawan City Youth Peace Builders ug kini mahitungod sa sentimyento sa mga kabatan-onan sa nahitabong bombing ug pag-atake sa mga armadong tao sa Kidapawan City Jail kaniadtong Pebrero 19, 2012 nga nahimong hinungdan sa pagkamatay sa tulo ka inosenteng sibilyan ug pagkasamdan sa uban. Sakit sa among kabubut-on nga nagpabiling pahasubo sa mga nawalaan ug mahal sa kinabuhi ug pagkondena sa mga responsable sa maong hitabo ang butang nga among mabuhat sa pagka-karon. Apan padayon ang KCYPB sa pag-edukar sa mga kabatan-onan nga ang hadugay na natong pagandoy nga kalinaw partikular dire sa Mindanao bug-at nga tulubagon ug responsibilidad dili lamang sa pipila, susama sa atong pulisya apan natong tanan, unta sa umaabot nga panahon pangusgan sa mga susama namong kabatan-onan ang among katungod nga magpuyo sa usa ka malinawong kumunidad, halayo sa kasamok, pagpanglupig ug inhustisya nga maoy ugat hinungdan sa mga panagbangi. Hinaut pa nga maanalisa nato nga ang susamang panghitabo mamahimong makapekto sa tibuok nga natad sa hisgutan sa kalinaw sa atong nasod. Subo nga pamalandungon nga nakita na man unta nato ang ngil-ad nga bunga sa pag-gamit ug armas isip sulbad sa mga isyo sa atong sosyodad apan nagpibilin nga kini maoy napiling pama-agi sa pipila aron sa hinanaling sulbad sa mga problema. Ang tawag namong mga kabatan-onan, sa City Local Government nga unta pakusgon nila ang security measures sa atong dakbayan aron maprotektahan ang kinabuhi sa katawhan labi na gyud sa kabatan-onan. Ibalhin ang Kidapawan City Jail sa mas safe nga lugar ug magtukod ug mas modernong City Jail. Ang hagit namo sa mga tigpatuman sa hustisya nga hinaut pa unta nga inyong mahatagan ug hustisya ang mga biktima ug ang ilang pamilya. Karon na ang panahon sa pagmata og pagpakabana.

Respectfully yours.

ANNA FE P. VILLAROSA KCYPB- President

JOHN MICHAEL MORILLO KCYPB- V-President

JANAICA B. PAGAL KCYPB- Secretary

MEYNARD JAKE LUZON KCYPB- P.I.O.